Ihe kondjo nda fa omuntu ta dhenge ombepo
1. Aakorinto yotango 9:26 otaya longo ngiini kutse uuna tu li muukalele kunena?
1 Omuyapostoli Paulus okwa nyola a ti: “Ongame ano itandi matuka osima, ngaashi ihe kondjo nda fa tandi [dhenge] ombepo.” (1 Kor. 9:26, OB-1954) Paulus ka li ta popi okudhenga kokwenekwene, ihe okwa li ta popi shi na ko nasha nelalakano lye lyokulongela Jehova nuudhiginini. Oohapu ndhika otatu vulu wo oku dhi tula miilonga uuna tu li muukalele wetu. Otwa hala okukala hatu “dhenge” nawa, opo tu pondole. Otatu ke shi ninga ngiini?
2. Ongiini tatu vulu okuholela Paulus nosho wo aauvithi yevaangeli mboka ya li ko pethimbo lye uuna tatu uvitha?
2 Inda mpoka tapu adhika aantu: Paulus nosho wo aauvithi yevaangeli mboka ya li ko pethimbo lye oya li haya uvithile aantu kehe mpoka taye ya adha. (Iil. 5:42; 16:13; 17:17) Miitopolwa yilwe otashi vulika shi li nawa okuya egumbo negumbo koongulohi, molwaashoka aantu oyendji ohaya adhika momagumbo. Mbela mpoka hapu thikama oombesa nomashina moshitopolwa sheni, ohapu kala omainyengo gaantu taya yi notaya galuka kiilonga pethimbo lyongulonene nokomatango? Aantu moshitopolwa sheni ohaye ya okulanda unene pethimbo lini? Mbela ito vulu okugandja uunzapo wepandaanda pomathimbo ngoka?
3. Omikalo dhini tadhi tu kwathele, opo kaatu dhenge mombepo uuna tatu longo iitopolwa yetu?
3 Iitopolwa nayi longwe nawa: Otu na wo okulonga iitopolwa yetu nawa, ihe katu na okukala twa fa aantu taya dhenge mombepo. Pashiholelwa, pehala lyokuya nongundu onene moshitopolwa shimwe, oshi li nawa okutopola aantu muungundu. Shoka otashi ka kwathela aantu ya longe momukalo gu unganekwa nawa. Ngele tatu longo momikunda, otatu ka mana ko oshitopolwa nziya notatu ka popya naantu oyendji, uuna twi itopola nawa muungundu. Otatu vulu okupula tu pewe oshitopolwa shetu shopaumwene shoka shi li popepi natse, opo kaatu hepithe ethimbo olindji mokweenda?
4. Oshike tashi ke tu kwathela tu kale “aayuli yaantu” haya pondola?
4 Jesus okwa ti kutya aauvithi yevaangeli oya fa “aayuli yaantu.” (Mark. 1:17) Elalakano lyomuyuli gwoohi kali shi owala shampa a tula oshiyulitho momeya, ihe olyo okukwata oohi. Onkee ano, aayuli yoohi aanekeka ohaya yi mpoka pu na oohi nopethimbo ndyoka tadhi monika nohaya tameke oku dhi yula nopwaahe na okukakadhala. Ohaya ningi shili oonkambadhala dha mana mo. Uuna tu li muukalele natu kale hatu ningi ngaaka. — Heb. 6:11.