Ontumwafo ya za kOlutuwiliki

Aamwatate naamwameme aaholike:

Tate yetu gwomegulu, Jehova, okwe tu tulila po oshiholelwa oshiwanawa mokuulika ohole. Nomolwaashono Ombiimbeli tayi ti: “Kalunga oye ohole.” (1 Joh. 4:8) Ihe nonando Jehova Omunankondoadhihe, Oohapu dhe inadhi mu popya nando kutya “Kalunga oye oonkondo.” Okupangela kwe okwe ku kankamekela unene kohole. Naashika osho tashi tu hilile kuye.

Shoka oshiwanawa osho kutya, Jehova ihe tu thiminike tu mu longele. Ke shi kayamukulwa. Okwa hala tu mu longele nohole tayi zi komutima. Uuna tatu shi ningi, otatu ulike kutya otwa hala okupangelwa kuye, molwaashoka otwi itaala kutya omukalo moka ha pangele ogu li mondjila nogwopahole. Shika oshi iwetikile okuza petameko lyondjokonona yaantu.

Pehala lyokuthiminika Adam naEva ya vulike kuye, Jehova okwe ya pe ompito ya vulike nehalo ewanawa. Ando oya li ye hole shili Jehova noya pandula shoka e ya ningila, ando oya kondjitha oonkambadhala dhaSatana dhoku ya ningitha aanashipotha.

Konima, Moses okwa li a lombwele oshigwana shaIsraeli moshipopiwa she shahugunina a ti: “Nena otandi ku pe, u hogolole pokati kuuwanawa nuuwinayi, pokati komwenyo neso.” (Deut. 30:15) Oshigwana osha li shi na emanguluko lyokutokola nkene sha hala okukala. Sha faathana, Josua okwa li a lombwele Aaisraeli a ti: ‘Ngele inamu hala [okulongela] OMUWA, tokoleni nena ndjika ngoka tamu longele.’ Oshigwana osha yamukula Josua sha ti: “Katu na mpoka tatu etha OMUWA.” (Jos. 24:15, 16) Natse osho tu uvite ngawo kunena. Molwaashoka otu hole Jehova, “katu na mpoka” tu mu ethe po.

Tu li Aakriste yashili otu uvite ko kutya emanguluko lyokuninga omatokolo otali ti shike. Nonando aakuluntugongalo oya pitikwa okugandja omayele nokugandja nokuli egeeloputudho, ihaya kala ya hala okuthindila yalwe kongudhi nenge oku ya pangela nenge okupangela eitaalo lyawo. Omuyapostoli Paulus okwa nyola a ti: “Tse inatu hala oku mú thiminikila mushoka mu na okwiitaala, oshoka omwa kola meitaalo. Ihe otatu longo pamwe nane, oshoka otashi ke mú nyanyudha.” — 2 Kor. 1:24.

Ohashi tu mbilipaleke okuninga sha, molwaashoka twa hala oku shi ninga, pehala lyokuthiminikwa tu shi ninge. Jehova ote tu hiya tu longe shoka oshiwanawa, molwaashoka tu mu hole. Esimano lyasho oli iwetikile moohapu dhaPaulus dha nwethwa mo, sho a ti: “Nando ondi gandje po iinima ayihe, nenge ndi gandje olutu lwandje, lu fikwe po, ihe kandi na ohole, itashi kwatha ndje sha.” — 1 Kor. 13:3.

Ohashi simanekitha Jehova nohashi mu etele enyanyu uuna aamwatate naamwameme omamiliyona taye mu longele, molwaashoka oye mu hole nomutima aguhe.

Jehova naye oku hole noonkondo aapiya ye ayehe, mwa kwatelwa nane uunona naagundjuka mboka hamu ulike kutya omu hole Jehova pehala lyokukala mu hole uuyuni nomainyanyudho gawo. Kaleni wo mu shi shi kutya otu mu hole noonkondo. — Luk. 12:42, 43.

Omolwohole yeni yokuhola Jehova, omvula ya zi ko aamwatate, aamwameme nosho wo aagundjuka omwa longo oowili 1 748 697 447 tamu uvitha onkundana ombwanawa. Omolwohole tuu ndjoka, aauvithi 7 782 346 oya li ya kutha ombinga miilonga yomomapya muuyuni awuhe. Otwa nyanyukwa sho aauvithi aape ye li 268 777, mwa kwatelwa aagundjuka, ya li ya ninginithwa yu ulike kutya oyi igandja kuJehova. Shika osha fa omuntu to ti kutya ohaku ninginithwa aauvithi 5 168 ehuliloshiwike kehe. Shika oshe tu nyanyudha noonkondo.

Momasiku ngaka gahugunina, oshigwana shaKalunga ohashi adhika komaupyakadhi ogendji, omashongo, omapataneko, omauwehame nayamwe otaya kondjo nuukulupe. Ihe otwa tokola twaa ‘shune monima’ nando nenge tu ‘se uunye.’ Otu mu hole amuhe noonkondo. — Heb. 10:39; 2 Kor. 4:16.

Aamwaho

Olutuwiliki lwOonzapo dhaJehova