Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
OMASIKU 3-9 APILILI
OMALIKO OKUZA MOOHAPU DHAKALUNGA | JEREMIA 17–21
“Jehova na zule omadhiladhilo neihumbato lyoye”
(Jeremia 18:1-4) Omuwa okwa lombwele ndje a ti: 2 “Kulukila monzimbogo yomuhongi gwiiyuma, omo tandi ku lombwelele oohapu.” 3 Onda yi mo nonda adha omuhongi gwiiyuma ta longele poshidhingolokitaafula she. 4 Oshihongwa ngele osha yonuka, ngaashi hashi ningwa olwindji, okwe shi mbumbinga nokwa hongo oshiyuma shilwe shi ili.
w99 4/1 ep. 32, okat. 4
Olye ha nwetha mo okudhiladhila kwoye?
Okukala wa pumbwa okukatuka nehalo ewanawa nolyevuliko ngele owa hala okumona mo uuwanawa menwethomo ewanawa lyaJehova, osha thanekwa nawa sho Jehova a lombwele omupolofeti Jeremia a ye konzimbogo yomuhongi gwiiyuma. Jeremia okwa li a mono nkene omuhongi gwiiyuma a lundulula omadhiladhilo ge shi na ko nasha naasho e na okuninga noshiyuma shimwe sho shimwe shoka a li a hala okuninga “sha yonuka.” Opo nduno Jehova okwa ti: “Kandi na uuthemba okuninga aantu yandje Aaisraeli, ngaashi omuhongi gwiiyuma ta ningi neloya? Omu li miikaha yandje ngashika eloya li li miikaha yomuhongi gwiiyuma.” (Jeremia 18:1-6) Mbela shino okwa li tashi ti kutya aantu muIsrael oya li owala ngaashi eloya kaali na omwenyo miikaha yaJehova ndyoka a li ta vulu okuma li ninge oshiyuma sholudhi limwe nenge lwontumba ngaashi a hala?
(Jeremia 18:5-10) Omuwa okwa lombwele ndje a ti: 6 “Kandi na uuthemba okuninga aantu yandje Aaisraeli, ngaashi omuhongi gwiiyuma ta ningi neloya? Omu li miikaha yandje ngashika eloya li li miikaha yomuhongi gwiiyuma. 7 Ngele nda ti, otii ka tudha mo oshigwana nenge oshilongo, ndi shi teyagule noku shi hanagula po, 8 ihe oshigwana shoka ngele oshi itedhulula she etha uuwinayi washo, itandi ka ninga we, ngaashi nda tile. 9 Kombinga onkwawo ngele tandi ti, otandi ka tsika nenge ndi tunge po oshigwana nenge oshilongo, 10 ihe oshigwana shoka itashi vulika kungame e tashi kolokosha, itii ka ninga shoka nda tile.
it-2-E ep. 776, okat. 4
Okwiitedhulula
Omuhongi gwiiyuma ota vulu okuninga oshiyuma sholudhi lumwe e ta ningulula shilwe ngele shoka a ningi tango osha ‘yonuka.’ (Jer 18:3, 4) Jehova okwa longitha oshiholelwa shika u ulike kutya ye ina fa omuntu ngoka ha hongo iiyuma he yi ‘yono,’ ihe oku na uuthemba wopakalunga wokupangela aantu, uuthemba wokulundulula omadhiladhilo ge sho tu ungaunga nayo shi ikolela kunkene taya katuka nenge itaaya ningi iinima metsokumwe nuuyuuki nonohenda ye. (Yelekanitha Jes 45:9; Rom 9:19-21) Onkee ano oha vulu ‘kaa ningile we ngaashi a tile’ oshigwana shontumba, nenge ‘kee shi ningile we ngaashi a tile’ omolwuwanawa washo, shi ikolelela kunkene shi inyengele sho ungaungile nasho nale. (Jer 18:5-10) Kungawo, itashi ti kutya Omuhongi Omunene, Jehova, oha ningi omapuko, ihe aantu mboka ya fa “eloya” ohaya lunduluka thiluthilu komitima dhawo, mokwiiyela ombedhi, nenge Jehova oye a lundulule omaiyuvo ge.
(Jeremia 18:11) Onkee ano lombwela Aajuda nAajerusalem kutya otandi ya dhiladhilile omageelo. Ya lombwela, ya tule po uulunde wawo — ya ethe oondjila dhawo oombwinayi nokwoopaleka iikala niilonga yawo.
w99 4/1 ep. 32, okat. 4-5
Olye ha nwetha mo okudhiladhila kwoye
Jehova iha longitha nando oonkondo dhe adhihe a ningithe aantu iinima mbyoka inaaya hala; natango iha hongo iiyuuma ya yonuka, ngaashi omuhongi gwiiyuma gwopantu. (Deuteronomium 32:4) Eyonuko ohali holoka owala ngele mboka Jehova ta kambadhala oku ya zula momukalo omwaanawa taya kondjitha ewiliko lye. Ndyoka olyo eyooloko ndyoka li li pokati koye neloya ndyoka kaali na omwenyo. Ngoye owu na ehalo lyoye mwene. Moku li longitha, oto vulu okuhogolola okutaamba ko enwethemo lyaJehova nenge wu li ekelehi owina.
Kashi shi tuu oshiilongomwa sha kwata miiti! Kashi li tuu nawa okupwilikina kewi lyaJehova pehala lyokupopya nuutsa to ti: “Inandi pumbwa nando ogumwe a lombwele ndje shoka ndi na okuninga”! Atuheni otwa pumbwa enwethomo lyaJehova oku tu wilika. (Johannes 17:3) Kala wu li ngaashi omupisalomi David ngoka a galikana ta ti: “Omuwa, longa ndje oondjila dhoye; dhi yelithila ndje.” (Episalomi 25:4) Dhimbulukwa shoka omukwaniilwa Salomo a ti: “Omunandunge ni ilikolithile owino we mokuuva, nomunamayele ni ilikolele ondjila yu uka.” (Omayeletumbulo 1:5, OB-1954) Mbela oto ka pulakena ngaa? Ngele osho, ‘owino otayi ke ku tonatela, noondunge otadhi ke ku gamena.’ — Omayeletumbulo 2:11.
Konga omaliko gopambepo
(Jeremia 17:9) “Omwenyo ogwo omunamakoto kombanda yiinima ayihe, nokagu shi kwaaludhwa. Olye ta vulu oku gu uva ko?
w01 11/1, ep. 20, okat. 13
Gamena omutima gwoye
13 Jeremia okwa li a londodha a ti: “Omwenyo ogwo omunamakoto kombanda yiinima ayihe, nokagu shi kwaaludhwa.” (Jeremia 17:9) Omakoto gomutima otashi vulika ga holoke uuna tatu iyukipalitha omolweputuko lyetu, tatu shonopeke uunkundi wetu, tu iningithe tu kale twa fa kaatu na uukwatya womapuko ga kwata miiti nenge tatu nenepeke okupondola kwetu. Omutima kaagu shi okwaaludhwa otagu vulu wo okukala niikala yopaali, okupopya oohapu dhomuthenu ihe iilonga yomuntu ngoka itayi shi ulike. (Episalomi 12:2; Omayeletumbulo 23:7) Inashi simana tuu tu kale aayuuki mokukonenena shoka tashi piti momitima dhetu!
(Jeremia 20:7) Omuwa, ongoye wa kotokele ndje, nonda kotokelwa. Ongoye omunankondo u vule ndje, owa gwililile ndje po. Shaa ngoka ota ningi ndje oshipwedhela, otaa nyonkele ndje omutenya aguhe.
w07 4/1 ep 9, okat. 6
Omanenedhiladhilo okuza membo lyaJeremia
20:7 — Omeityo lini Jehova a li ‘e vule Jeremia oonkondo’ noku mu kotokela? Molwaashoka aantu yopethimbo lyaJeremia kaya li ye na ko nasha netumwalaka lyepangulo ndyoka a li tu uvitha noya li nokuli ye mu hepeke, otashi vulika a li ta hala okusholola. Ihe Jehova okwa li e mu nkondopaleke a sinde egamo lyokusholola. Kungawo otaku vulu okutiwa kutya Jehova okwe mu kotokele sho e mu longitha a gwanithe po oshilonga shuuprofeti, omanga Jeremia ye mwene a li ta dhiladhila kutya ita vulu oku shi ninga.
Elesho lyOmbiimbeli
(Jeremia 21:3-14) Omuwa okwa lombwele ndje, nonda lombwele aatumwa 4 ya ka lombwele Sedekia kutya Omuwa, Kalunga kaIsrael, okwa ti: “Sedekia, otandi ka dhenga etangakwiita lyoye ndyoka tali kondjitha omukwaniilwa gwaBabilonia naakwiita ye. Omatati gaakwiita yoye otandi ke ga ndumbila ondumba pokati koshilando. 5 Otandi ke ku kondjitha noshikaha shoonkondo nokwooko kwa taganana, nondjahi yandje, nongeyo yandje nonuupyundjahi wandje. 6 Otandi ka dhipaga ayehe moshilando shika; aantu niinamwenyo otayi si kelega etilithi. 7 Ihe ngoye, omalenga goye naantu mboka ya hupu ko kiita, kondjala nokelega, otandi ke mu kwatitha po amuhe komukwaniilwa Nebukadnezzar nokaatondi yeni, mboka ya hala oku mu dhipaga. Nebukadnezzar ote ke mu dhipaga. Ita ka hupitha ko nando ogumwe gwomune nenge e mu sile ohenda nenge e mu etele olukeno. Ongame, Omuwa, nda popi.” 8 Omuwa okwa lombwele ndje, ndi lombwele aantu ndi tye: “Pulakeneni! Ongame, Omuwa, otandi mu pe ehogololo, mu hogolole ondjila ndjoka tayi fala komwenyo nenge ndjoka tayi fala meso. 9 Shaa ngoka ta kala moshilando shika, ota ka dhipagelwa miita nenge ta ka sa kondjala nenge kelega. Ihe ngoka ta piti mo noti igandja kAababilonia, aakondeki yoshilando, ota ka hupa e ta kala e na omwenyo. 10 Onda tokola ndaa hupithe oshilando shika, ihe ndi shi hanagule po. Otashi ka gandjwa miikaha yomukwaniilwa gwaBabilon, oye note shi fike po, shi lungune po. Ongame, Omuwa, nda popi.” Epangulo lyombala yaJuda 11-12 Omuwa okwa lombwele ndje, ndi gandje elaka ndika kombala yaJuda, oluvalo lwaDavid, tali ti: “Pulakeneni shoka ngame, Omuwa, tandi ti. Tokoleni pauyuuki esiku kehe. Hupitheni omuyugwa miikaha yomuyugi. Ngele itamu shi ningi, uuwinayi mboka tamu ningi, otau ka hwameka ondjahi yandje ya fa omulilo itaagu dhimwa. 13 Ngoye, Jerusalem, owa kuutumba puule pombanda yomasilu, wa fa ondundu ya yeluka kombanda yolushandja. Otandi ke ku kondjitha. Oto ti kaku na ngoka te ku ponokele nenge a teyagule omapopilo goye. 14 Otandi ku geelele shoka wa ningi. Ombala yoye otandi ke yi tomeka omulilo, nomulilo otagu ka lungunitha po ashihe shoka she yi kunduka. Ongame, Omuwa, nda popi.”
OMASIKU 10-16 APILILI
OMALIKO OKUZA MOOHAPU DHAKALUNGA | JEREMIA 22–24
“Mbela owu na ngaa ‘omwenyo gwokutseya’ Jehova?”
(Jeremia 24:1-3) Omuwa okwa ulukile ndje iimbamba iyali yoonkwiyu ya tentekwa posheelo shotempeli. (Shika osha ningwa konima yomukwaniilwa gwaBabilonia Nebukadnezzar sho a kwata po omukwaniilwa gwaJuda Jehoiakin yaJehoiakim a ninge omupongekwa okukuthwa muJerusalem nokufalwa kuBabilon, pamwe naakuluntu yaJuda, omangomba naahambudhi yiiyedhilitho.) 2 Oshimbamba shotango osha li shi na oonkwiyu oontoye, oondhiye; oshikwawo osha li shi na omayamba gaa na omulyo. 3 Omuwa okwa pula ndje a ti: “Jeremia, ou wete shike?” Onda yamukula nda ti: “Oonkwiyu, oondhiye oontoyelela nomayamba omawinayi gaa shi kuliwa.”
Mbela Owu Na Ngaa ‘Omwenyo Gwokutseya’ Jehova?
2 Oshikando shimwe Jehova okwa li a yelekanitha oonkwiyu nomitima. Kalunga ka li ta yelithile aantu shi na ko nasha niitungithi mbyoka hayi zi moonkwiyu. Ihe okwa li ta popi owala kombinga yomitima dhawo dhopathaneko. Shoka a popi okupitila momupolofeti Jeremia otashi vulu okukwathela omutima gwoye nosho wo dhaamboka wu hole. Sho tatu konakona shoka a li a popi, natu dhiladhile kutya oohapu dhe ndhoka otadhi ti shike kutse tu li Aakriste.
(Jeremia 24:4-7) Omuwa okwa lombwele ndje a ti: 5 “Ongame, Omuwa, Kalunga kaIsrael, tandi tala aantu mboka ya falelwe kuBabilonia kutya oya fa oonkwiyu oombwanawa, notandi ke ya ninga nawa. 6 Otandi ke ya tonatela notandi ya galulile kevi ndika. Otandi ke ya tunga noitandi ya kumuna po; otandi ke ya tsika noitandi ya tudha mo. 7 Otandi ke ya pa ondjuulukwe yokutseya kutya ongame Omuwa. Otaa ka ninga aantu yandje notandi ka ninga Kalunga kawo; oshoka otaa ka galukila kungame nomitima dhawo adhihe.
Mbela Owu Na Ngaa ‘Omwenyo Gwokutseya’ Jehova?
4 Jehova okwa popi kombinga yaamboka taya thanekwa koonkwiyu oontoye a ti: “Ongame otandi ya pe oomwenyo dhokutseya ndje, ongame Omuwa, oyo notaa ningi aantu yandje.” (Jer. 24:7, OB-1954) Oohapu ndhika odho dhi li enyolo lyoshipalonyolo shoshitopolwa shika. Enyolo ndika itali tu tsu tuu omukumo! Kalunga oku na ehalo oku pa kehe gumwe ‘omwenyo gwoku mu tseya.’ Oshitya ‘omwenyo’ nenge omutima otashi ulike kegamo lyomuntu. Osha yela kutya, owa hala okukala u na omutima gwoku mu tseya nokukala wu li gumwe gwomoshigwana she. Opo wu kale ngaaka owa pumbwa okukatuka oonkatu dhontumba. Oonkatu ndhoka odha kwatela mo okukala ho konakona nokutula miilonga shoka shi li mOohapu dhe, okwiitedhulula nokwiigaluluka, oku mu iyapulila nokuninginithwa medhina lyaHe, nolyOmwana nolyombepo ondjapuki. (Mat. 28:19, 20, NW; Iil. 3:19) Otashi vulika wa katuka nale oonkatu ndhoka nenge tashi vulika ho endathana nOonzapo dhaJehova pandjigilile nowu li pokukatuka oonkatu ndhoka.
(Jeremia 24:8-10) “Kombinga yomukwaniilwa gwaJuda Sedekia nomalenga ge nAajerusalem mboka ya kalele moshilongo shika nenge mboka ya kala muEgipiti, otandi ya ningi ya fa omayamba ngoka omawinayi kaage shi okuliwa. 9 Otandi ya undulile omupya gwa tya ngaaka, niigwana ayihe yomuuyuni otayi ka haluka. Aantu otaa ke ya nyonkela, otaa ningathana iileva noku ya ninga oshipwedhela; otaa tumbula edhina lyawo, ngele taa tukathana shaa hoka taa halakanene. 10 Otandi ya undulile iita, ondjala yekomba nelega, sigo inaku hupa nando ogumwe moshilongo shoka nde ya pe noohekulu.”
Mbela Owu Na Ngaa ‘Omwenyo Gwokutseya’ Jehova?
3 Tango natu kundathaneni shi na ko nasha naashoka Kalunga a li a popi pethimbo lyaJeremia kombinga yoonkwiyu. Mo 617 K.E.N., (pwa pita ngashingeyi omimvo 2629) Aajuda oya li ya nkundipala pambepo. Kalunga okwa li a pe Jeremia emoniko lyaashoka sha li tashi ke ya ningilwa. Okwa li e ya lombwele kombinga yoonkwiiyu “oontoye, oondhiye” noonkwawo “omayamba gaa na omulyo.” (Lesha Jeremia 24:1-3.) Omayamba oga li taga thaneke omukwaniilwa Zedekia nosho wo yalwe mboka ya li yi iyadha moshipyu sho ya ponokelwa komukwaniilwa Nebukadnezzar netangakwiita lye. Ihe mbela oondhiye otadhi thaneke oolye? Otadhi thaneke Hesekiel, Daniel nosho wo ookuume ke yatatu mboka ya li nale muupongekwa muBabiloni nosho wo Aajuda yamwe mboka ya li ye li pokufalwa ko. Oshihupe shAajuda osha li tashi ka shuna shi ka tungulule Jerusalem nosho wo otempeli yasho, nomokweendela ko kwethimbo, shoka osha li sha gwanithwa. — Jer. 24:8-10; 25:11, 12; 29:10.
Konga omaliko gopambepo
(Jeremia 22:30) Omuwa ota popi ta ti: “Ndhindhilikeni omulumentu nguka a fa kee na oluvalo, omuntu kee na elago mokukala kwe akuhe. Kaku na nando ogumwe gwomoyana ta kala e na elago lyokukuutumba koshipangelapundi shaDavid ye a pangele we muJuda.”
Omanenedhiladhilo okuza membo lyaJeremia
22:30 — Mbela elombwelo ndyoka li li movelise ndjoka olyali lya guma uuthemba waJesus Kristus wokuthigulula oshipangelapundi shaDavid? (Mateus 1:1, 11) Aawe, elombwelo ndyoka olya li li na ko nasha nokuya moshipala oluvalo lwaJehoiakin kaalu ‘kale lu na elago lyokukuutumba koshipangelapundi shaDavid muJuda.’ Jesus okwa li ta ka pangela e li megulu, ihe hamuJuda.
(Jeremia 23:33) Omuwa okwa lombwele ndje a ti: “Jeremia, uuna gumwe gwomaantu yandje nenge omuhunganeki nenge omuyambi te ku pula ta ti: ‘Etumwalaka lyOmuwa oshike?’ ou na oku mu lombwela to ti: ‘One omutenge gwOmuwa, note ke mu ekelahi.’
Omanenedhiladhilo okuza membo lyaJeremia
23:33 — “Omutenge gwOmuwa” oshike? Omatumwalaka ga kwata miiti ngoka gali taga ka uvithwa komuprofeti Jeremia, ge na ko nasha nokuhanagulwa po kwaJerusalem, oga li omutenge koshigwana shawo. Kakele kaashono aantu mboka ya li kaaye na ko nasha netumwalaka lyaJehova oya li omutengi kuJehova nomolwaashono a li te ke ya hanagula po. Sha faathana, etumwalaka lyopamanyolo li na ko nasha nokuhanagulwa po kUukwakriste oli li omutengi kUukwakriste, naantu mboka inaya hala okuvulika ketumwalaka ndyoka oye li omutenge kuKalunga.
Elesho lyOmbiimbeli
(Jeremia 23:25-36) Onda tseya aahunganeki mboka, nkene taa popi iifundja medhina lyandje. Aniwa onde ya lombwela oohapu dhandje moondjodhi dhawo. 26 Sigo uunake aahunganeki mboka taa pukitha aantu yandje niilombo yawo ye yi toto? 27 Otaa dhiladhila kutya oondjodhi ndhoka taa hokololelathana, otadhi dhimbitha ndje kaantu yandje, naanaa ngaashi oohekulu ya dhimbwa ndje e taa gama kuBaal. 28 Omuhunganeki ngoka a yaguma, oku na okutya, ndjika ondjodhi yowala, ihe omuhunganeki ngoka u uvu oohapu dhandje, oku na oku dhi uvitha nuudhiginini. Etutu otali yelekwa tuu niilya? 29 Oohapu dhandje odha fa omulilo, nodha fa osilwa tayi nyanyagula omamanya. 30 Otandi kondjitha aahunganeki mboka taa taambathana oohapu yo taye dhi uvitha dha fa dhandje. 31 Otandi tsu ondumbo naahunganeki mboka taa uvitha oohapu dhawo notaa ti, odha za kungame. 32 Pulakeneni shoka ngame, Omuwa, tandi mu lombwele. Onda tsa ondumbo naahunganeki mboka taa hokolola oondjodhi dhawo dhu udha iifundja. Otaa uvitha oondjodhi dhawo e taa pukitha aantu yandje niilombo yawo nomainomo gawo. Inandi ya tuma nando nenge ndi ya lombwele ya ye, nokaye na omupondo gwasha kaantu yandje. Ongame, Omuwa, nda popi.” Omutenge gwOmuwa 33 Omuwa okwa lombwele ndje a ti: “Jeremia, uuna gumwe gwomaantu yandje nenge omuhunganeki nenge omuyambi te ku pula ta ti: ‘Etumwalaka lyOmuwa oshike?’ ou na oku mu lombwela to ti: ‘One omutenge gwOmuwa, note ke mu ekelahi.’ 34 Ngele gumwe gwomaantu yandje nenge omuhunganeki nenge omuyambi ta longitha iitya mbika ‘omutenge gwOmuwa,’ otandi ke mu geela negumbo lye. 35 Peha lyasho shaa ngoka oku na okupula ookuume ke naakwawo ta ti: ‘Omuwa okwa gandja eyamukulo lini? Omuwa okwa ti ngiini?’ 36 Ano inaa popya we ya tye ‘omutenge gwOmuwa’, oshoka ngele oku na ngoka te shi ningi, etumwalaka lyandje otali ka ninga shili omutenge kuye. Aantu oya goyokitha oohapu dhaKalunga kawo, Kalunga omunamwenyo, Omuwa Omunankondoawike.
OMASIKU 17-23 APILILI
OMALIKO OKUZA MOOHAPU DHAKALUNGA | JEREMIA 25–28
“Kala omulaadhi ngaashi Jeremia”
(Jeremia 26:2-6) Omuwa okwa lombwele ndje a ti: “Thikama mehale lyotempeli, u uvithe oohapu adhihe nde ku lombwele u dhi lombwele aantu mboka taa zi komikunda dhaJuda ye ya kelongelokalunga. Ino thiga po sha. 3 Pamwe aantu taa pulakene, ye ethe oondjila dhawo oombwinayi. Ngele taye shi ningi, otandi ki itedhulula kombinga yehanagulo ndyoka nde ya dhiladhilile molwiilonga yawo yuukolokoshi.” 4 Omuwa okwa lombwele ndje, ndi lombwele aantu ndi tye: “Ongame, Omuwa, nda ti, vulikeni kungame ne mu dhiginine ompango yandje nde yi mu pe. 5 Pulakeneni oohapu dhaapiya yandje aahunganeki, mboka nda dhiginine oku mu tumina, nando inamu vulika kushoka ya popi. 6 Ngele otamu tsikile okwaavulika, nena otempeli ndjika otandi ke yi ninga, ngaashi nda ningi Shilo, niigwana ayihe yomuuyuni otayi ka tumbula edhina lyoshilando shika, ngele tayi thingana.”
Jeremia ka li e etha po okulongela Jehova
Jehova okwa li a lombwele Jeremia a londodhe aantu kutya Jerusalem otashi ka hanagulwa po ngele inaya lundulula omikalo dhawo omiwinayi. Sho Jeremia a li e ya londodha, aantu oya li ya geye e taya ti: “Omulumentu nguka okwi ilongele egeelo lyokusa.” Ihe Jeremia okwa li e yi indile ya “vulike kOMUWA.” Opo nduno okwe ya lombwele a ti: ‘Shi tseyeni ashike, ngele otamu dhipaga ndje, otamu kala mu na ondjo yedhipago lyomukeenandjo, oshoka OMUWA oye a tumu ndje, ndi mú pe elondodho ndika.’ Mbela owu shi kutya oshike sha li sha ningwa po konima yaashoka? —
(Jeremia 26:8, 9) Sho nda hulitha ayihe mbyoka Omuwa a lombwele ndje, ndi yi popye, oya kwata ndje noyi igidha ya ti: “Ou na okudhipagwa! 9 Omolwashike to popi medhina lyOmuwa kutya otempeli ndjika otayi ka fa Shilo, noshilando shika otashi ka hanagulwa po nokaku na ngoka ta ka kala mo?” Aantu noya gongalele ndje.
(Jeremia 26:12, 13) Ngame onda ti: “Omuwa okwa tumu ndje, ndi uvithe ashihe shoka mu uvu tashi popi otempeli ndjika noshilando shika. 13 Opalekeni ano ngashingeyi omikalo niilonga yeni, ne mu vulike kOmuwa, Kalunga keni. Ngele otamu shi ningi, Omuwa oti itedhulula noite mu etele ehanagulo ndyoka a li e li dhiladhila.
jr-E ep. 21, okat. 13
Okulongela Jehova “pehulilo lyomasiku, NW”
13 Aawiliki yomalongelokalunga oya li tayi ki inyenga ngiini ketumwalaka ndyoka Jehova li a gandja okupitila muJeremia, sho omalongelokalunga nopolotika oyo yali tayi ti pii muJuda? Omupolofeti ngoka okwa li a popi ye mwene mehokololo lye kutya “Aayambi, aahunganeki naantu ayehe. . . . oya kwata ndje noyi igidha ya ti: ‘Ou na okudhipagwa!’ “ Oya li ya geya tayi igidha taya ti: “Omulumentu nguka okwi ilongele egeelo lyokusa.” (Lesha Jeremia 26:8-11.) Ihe aapataneki yaJeremia mboka kaya li ye shi pondola. Jehova okwa li a gamene omupolofeti gwe nguka. Ye Jeremia ka li a tilithwa keholokepo lyawo etilithi nenge komwaalu gwawo. Nangweye inaye ku tilitha.
(Jeremia 26:16) Nena aawiliki naantu ayehe oya lombwele aayambi naahunganeki taa ti: “Omulumentu nguka okwe tu uvithile medhina lyOmuwa Kalunga ketu; ke na okudhipagwa andola.”
(Jeremia 26:24) Ihe molwashoka nda li megameno lyaAhikam yaShafan, inandi gandjwa miikaha yaantu, ndi dhipagwe.
Jeremia ka li e etha po okulongela Jehova
Ombiimbeli oya ti: “Aawiliki naantu ayehe oya lombwele aayambi naahunganeki taa ti: ‘Omulumentu nguka okwe tu uvithile medhina lyOMUWA Kalunga ketu; ke na okudhipagwa andola.’” Onkee ano, Jehova okwa li a gamene Jeremia molwaashoka uumbanda kawa li we mu ningitha e ethe po oku mu longela. Ngashingeyi natu tale kutya oshike sha li sha ningilwa Urija, omupolofeti gwaJehova ngoka a li i inyenge lela shi ili.
Konga omaliko gopambepo
(Jeremia 27:2, 3 OB-1954) Omuwa okwa lombwele ndje a ti: Iyogohela oongodhi, ngu u ihongele oondjoko, ngu u dhi itsikile mothingo, 3 ngu u dhi tumine omukwaniilwa gwaEdom, omukwaniilwa gwaMoab, omukwaniilwa gwaTiro nomukwaniilwa gwaSidon, dhi tumikikidha aantumwa yawo, ye ye kuSedekia, omukwaniilwa gwaJuda, okuJerusalem.
jr-E ep. 27, okat. 21
Okulongela Jehova “pehulilo lyomasiku, NW”
21 Petameko lyepangelo lyaSedekia, aatumwa yamwe oya li ye ya muJerusalem ya tumwa kaakwaniilwa yokuEdom, Moab, Ammon, Tiro, nokuSidon. Otashi vulika elalakano lyawo lya li lyokulombwela Sedekia i imange kumwe nayo ya ka kondjithe Nebukadnezzar. Jeremia okwa li a lombwele Sedekia i igandje kAababilon. Omolwentompelo ndyoka, Jeremia okwa li a gandja etumwalaka ta longitha ethaneko lyondjoko u ulike kutya iigwana yawo nayo oyi na okulongela Aababilon. (Jer. 27:1-3, 14) Aantu kaya li ya hokwa oshinima shoka. Jeremia ngoka a li ta gandja etumwalaka kaali holike, okwa li wo e shi ningilwa oshidhigu kuHanania a gwanithe po oshilonga she. Hanania omupolofeti gwiifundja ngoka a li a popi montaneho ta ti Kalunga oye a ti kutya ondjoko yAababilon otayi ka teywa. Jehova okwa li a lombwele Jeremia kutya Hanania ota ka sa momumvo ngoka. Shoka osho sha ningwa. — Jer. 28:1-3, 16, 17.
(Jeremia 28:11) [Hanania] e ta popi montaneho yaantu ayehe ta ti: “Omuwa okwa ti, osho ngeyi ta ka teya po ondjoko yomukwaniilwa Nebukadnezzar ya kutilwa koothingo dhiigwana ayihe; note shi ningi momimvo mbali.” Ngame nonda zi po.
jr-E ep. 187-188, okat. 11-12
“Ite vulu okumwena”
11 Oshi li nawa tu shi kaleke momadhiladhilo kutya Jeremia ka li e na omutse omukukutu. Okwa li ha dhiladhila pandunge uuna ta patanekwa. Okwa li e shi kutya na ninge shike. Pashiholelwa, natu tale nkene a li u ungaunga naHanania. Sho omupolofeti ngoka gwiifundja a li a popi e li ompinge nehunganeko lyaJehova montaneho, Jeremia okwa li e mu pukulula nokwa yelitha kutya omupolofeti gwashili oha dhimbululwa ngiini. Jeremia okwa kala a humbata ondjoko yoshiti shoka shi li euliko lyaamboka taya ka longela Aababilon. Hanania okwa geye e ta teya ondjoko ndjoka. Olye a li e shi kutya Hanania ota ka ninga po ishewe shike? Jeremia okwa ningi po shike nduno? Otatu lesha mOmbiimbeli kutya: “Ngame nonda zi po.” Eeno, Jeremia okwa zi po poshiningwanima. Sho pwa piti ethimbo lyontumba, okwa galuka a tumwa kuJehova e ta lombwele Hanania shoka Jehova ta ka ninga, ano kutya Aajuda otaya ka ninga aapika yomukwaniilwa gwaBabilon na Hanania ota ka sa. — Jer. 28:1-17.
12 Mehokololo ndika lya nwethwa mo omu na uuyelele wa yela kutya otu na okukala aalaadhi nokukala hatu longitha oondunge dhokuuyolola. Ngele omunegumbo gwontumba ota pataneke shoka tatu mu yelithile okuza mOmbiimbeli e ta geye, nokuli tashi vulika a kambadhale noku tu etela oshiponga, otatu vulu okuza po puye nombili e tatu yi pegumbo lilwe. Inashi pumbiwa tu nyenyete nomuntu shi na ko nasha nonkundana ombwanawa yUukwaniilwa. ‘Okwiidhidhimikila uuwinayi, OB-1954,’ otaku ke tu inyengitha tu ze po pomunegumbo tse tu ke mu galukile ishewe pethimbo tali opalele. — Lesha 2 Timoteus 2:23-25; Omayel. 17:14.
Elesho lyOmbiimbeli
(Jeremia 27:12-22) Shika onde shi lombwele wo omukwaniilwa gwaJuda Sedekia nda ti: “Igandjeni komukwaniilwa gwaBabilon. Mu longeleni naantu ye notamu kala mu na omwenyo. 13 Omolwashike ne naantu yeni mu na okusila miita, mondjala nomelega? Omuwa ota ti, shika otashi ningilwa oshigwana kehe itaashi igandja komukwaniilwa gwaBabilon. 14 Inamu pulakena kaahunganeki mboka taye mu lombwele, mwaa igandje kuye. Otaye mu tula muugoya. 15 Omuwa ota ti, ine ya tuma nando, oyo notaye mu fundju taa popi medhina lye. Otaye eta ashike, mu tidhwe mo ne mu ka dhipagwe pamwe naahunganeki mboka taye mu lombwele iifundja mbika.” 16 Onda lombwele aayambi noshigwana ashihe kutya Omuwa ota ti: “Inamu pulakena aahunganeki mboka taa ti, iikwaniipangitho yomotempeli otayi galulwa ko mbala kuBabilon. Otaye mu fundju. 17 Inamu ya pulakena! Igandjeni komukwaniilwa gwaBabilonia notamu kala mu na omwenyo! Omolwashike oshilando shika shi na okuninga ondumba yomakulukuma? 18 Ngele yo aahunganeki shili nongele oye na elaka lyOmuwa, naa galikane Omuwa Omunankondoawike, kaa pitike iiyuma mbyoka ya hupile motempeli nomuuwa, yi falwe kuBabilonia.” 19-20 (Omukwaniilwa Nebukadnezzar sho a fala omukwaniilwa gwaJuda Jehoiakin yaJehoiakim pamwe naawiliki yaJuda naJerusalem kuBabilonia, okwa thigi po oongudhi, ondama yoshikushu, uutemba niikwaniipangitho yilwe yomotempeli.) 21 “Pulakeneni shoka ngame, Omuwa Omunankondoawike, Kalunga kaIsrael, tandi popi iikwaniipangitho mbyoka ya thigala motempeli nomuuwa muJerusalem: 22 Otayi ka falwa kuBabilonia notayi ka kala hoka sigo esiku ndyoka tandi yi dhimbulukwa. Opo ihe tandi ke yi galulila meha ndika noku yi pungulila mo. Ongame, Omuwa, nda popi.”
OMASIKU 24-30 APILILI
OMALIKO OKUZA MOOHAPU DHAKALUNGA | JEREMIA 29–31
“Jehova okwa li a hunganeke kombinga yehangano epe”
(Jeremia 31:31) Omuwa ota ti: “Esiku otali ya, uuna tandi ka dhika ehangano epe nAaisraeli nAajuda.
it-1-E ep. 524, okat. 3-4
Ehangano
Ehangano epe. Jehova okwa li a hunganeke kombinga yehangano epe okupitila momupolofeti Jeremia momumvo 2717 K.E.N., kutya itali ka kala lya fa egangano lyOmpango ndyoka Aaisraeli ya li ya teya. (Jer 31:31-34) Ongulohi ndjoka manga Jesus inaa sa, mo 14 Nisan, 33 E.N., sho a dhiki po edhimbuluko lyUulalelo wOmuwa, Jesus Kristus okwa li a popi kutya ehangano ndyoka epe olya li tali ka wapa owala okupitila mekuliloyambo lye. (Luk 22:20) Mesiku eti-50 konima sho a yumudhwa nokonima yomasiku 10 sho a yi kuHe megulu, okwa li a tilile ombepo ondjapuki, ndjoka a li e pewa kuJehova, kaalongwa ye mboka ya li ya gongala mela lyopombanda muJerusalem. — Iil 2:1-4, 17, 33; 2Kor 3:6, 8, 9; Heb 2:3, 4.
Ehangano epe kombinga yimwe oli na Jehova nokombinga onkwawo ‘oIsraeli yaKalunga,’ ano aagwayekwa muukumwe naKristus, mboka ya ninga egongalo nenge olutu. (Heb 8:10; 12:22-24; Gal 6:15, 16, OB-1954; 3:26-28; Rom 2:28, 29) Ehangano epe otali longo okupitila mombinzi yaJesus Kristus ndjoka ya tika (okuyamba po omwenyo gwopantu), ongushu yayo ndjoka ya li ya pewa Jehova konima shoka Jesus a londo a yi megulu. (Mat 26:28) Uuna gumwe a hogololwa kuKalunga a ka ninge omupangeli megulu (Heb 3:1), Kalunga ohe mu tula mehangano Lye okupitila mekuliloyambo lyaKristus. (Eps 50:5; Heb 9:14, 15, 26) Jesus Kristus oye Omupokati gwehangano epe (Heb 8:6; 9:15, NW) ye oye oluvalo lwaAbraham. (Gal 3:16) Okupitila muJesus ngoka e li omupokati gwehangano epe, Jesus oha kwathele mboka ye li mehangano ndyoka ya ninge oshitopolwa sholuvalo lwashili lwaAbraham (Heb 2:16; Gal 3:29) nomoku ya dhimina po omayono gawo. Jehova ohe ya tala ko ye li aayuuki. — Rom 5:1, 2; 8:33; Heb 10:16, 17.
(Jeremia 31:32, 33) Inali fa nando ehangano ekulu ndyoka nda hanganene noohekulu, sho nde ya kwata koshikaha nonde ya tembudha muEgipiti. Nando onda li nda fa ombushiki kuyo, inaa dhiginina ehangano ndyoka. 33 Ehangano epe ndyoka tandi hangana nAaisraeli, olyo ndika: Ompango yandje otandi yi tula momadhiladhilo gawo notandi yi nyolele moomwenyo dhawo. Otandi ningi Kalunga kawo, noyo taa ningi aantu yandje.
jr-E ep. 173-174, okat. 11-12
Oto vulu okumona uuwanawa mehangano epe
11 Mbela ino hala okutseya uukwatya wulwe uundhindhilikwedhi wehangano epe? Eyooloko limwe enene ndyoka li li pokati kalyo nolyompango yaMoses olyo kutya ogali ga nyolwa kushike. (Lesha Jeremia 31:33.) Iipango omulongo yehangano lyOmpango oya li ya nyolwa kiipelende yomamanya, mbyoka kaayi po we ngashingeyi. Okuyelekanitha naashoka sha hunganekwa kuJeremia, ompango yehangano epe oya li tayi ka nyolelwa moomwenyo dhaantu, notayi kala sigo aluhe. Mboka ye li oshitopolwa shehangano ndika epe, aakriste aagwayekwa, oya simaneka lela ompango ndjika. Ongiini nduno kombinga yaamboka kaaye shi oshitopolwa shehangano ndika, ano “oonzi dhilwe,” mboka ye na etegameno lyokukala nomwenyo sigo aluhe kombanda yevi? (Johannes 10:16) Aantu mbaka ohaya nyanyukilwa ompango yaKalunga. Oya fa owala aakwiilongo mboka ya li muIsraeli, mboka ya li ya taamba ko e taya mono uuwanawa mompango yaMoses. — Lev. 24:22; Num. 15:15.
12 Oto ka yamukula ngiini uuna gumwe e ku pula kutya, ‘Ompango ndjoka ya nyolelwa momitima dhaakriste aagwayekwa oyini?’ Ompango ndjoka ohayi ithanwa wo “ompango yaKristus.” Tango oyali ya pewa Aaisraeli yopampepo, mboka ye li mehangano epe. (Gal. 6:2; Rom. 2:28, 29) Ano “ompango yaKristus” oya thika ma po moshitya shimwe, ohole. (Mat. 22:36-39) Ompango ndjika ompe ohayi nyolelwa ngiini momitima dhaagwayekwa? Omikalo dhimwe dha simana hashi ningwa, omokukonakona Oohapu dhaJehova, Ombiimbeli, nokupopya naye okupitila megalikano. Iinima mbyoka yomelongelokalunga lyashili oyo yi na okuningwa aluhe kAakriste ayehe, nokuli nokwaamboka kaaye li mehangano epe, ihe oya hala okumona uuwanawa mulyo.
(Jeremia 31:34) Itaku kala we omuntu ta longo mukwawo nenge omuntu ta lombwele mumwayina ta ti: ‘Tseya Omuwa.’ Oshoka ayehe otaa ka tseya ndje, aagundjuka naakuluntu. Otandi dhimi po omayono gawo, nuulunde wawo itandi u dhimbulukwa we. Ongame, Omuwa, nda popi.”
jr-E ep. 177, okat. 18
Oto vulu okumona uuwanawa mehangano epe
18 Ehangano epe olya tsa omuthindo uukwatya wa dhenga mbanda wankene Jehova hu u ungaunga naantu ayehe aalunde, aagwayekwa mboka yeli mehangano ndika, naamboka ye na etegameno lyoku ka kala nomwenyo sigo aluhe kombanda yevi. Oto vulu okukala neinekelo kutya uuna Jehova a dhimi po omayono goye, ite ke ga lafulula ishewe. Shoka Kalunga u uvaneka kombinga yehangano epe, oshi li oshiilongomwa kukehe gumwe gwomutse. Ipula kutya, ‘Mbela ohandi kambadhala ngaa okuholela Jehova mokwaa ha lafulula iinima iiwinayi mbyoka nda ningilwa kuyalwe, omapuko ngoka nda ti kutya onde ga dhima po?’ (Mat. 6:14, 15) Omapuko ngoka oga kwatela mo ngoka omashona naangoka ga kwata miiti, ngaashi kuume kopandjokana Omukriste a yi moluhondelo. Ngele kuume ngoka kee na ondjo okwa tokola a dhimine po mukwawo ngoka i iyela ombedhi, kashi li mondjila ‘a dhimbulukwe uulunde mboka ishewe.’ Kashi shi oshipu okudhimbwa omayono, ihe oku shi ninga oku li omukalo gumwe tatu vulu okuholela Jehova.
Konga omaliko gopambepo
(Jeremia 29:4) “Omuwa Omunankondoawike, Kalunga kaIsrael, ota lombwele aantu ayehe mboka a ziminine Nebukadnezzar e ya kuthe muJerusalem oonkwatwa noku ya fale kuBabilon:
(Jeremia 29:7) Longeni uuwanawa wiilando mbyoka nde mu fala kuyo muupongekwa. Yi galikaneneni Omuwa, oshoka ngele oyi li melago, nane omu li melago.
w96 5/1 ep. 11, okat. 5
Kalunga nOmukesari
5 Konima yomathelemimvo omupolofeti omudhiginini Jeremia okwa li a nwethwa mo kuJehova a lombwele oonkwatwa dhAajuda dhi vulike kaapangeli sho dhi li muupongekwa kuBabilon nodhi galikanene nokuli ombili yoshilando shoka. Montumwafo ye ndjoka a li e dhi nyolele okwa nyola mo a ti: “Omuwa Omunankondoawike, Kalunga kaIsrael, ota lombwele aantu ayehe mboka a ziminine Nebukadnezzar e ya kuthe muJerusalem oonkwatwa noku ya fale kuBabilon: . . Longeni uuwanawa wiilando mbyoka nde mu fala kuyo muupongekwa. Yi galikaneneni Omuwa, oshoka ngele oyi li melago, nane omu li melago.” (Jeremia 29:4, 7) Oshigwana shaJehova oshi na etompelo ‘lyokukonga ombili’ yasho shene noyoshigwana moka shi li, opo shi kale sha manguluka okulongela Jehova. — 1 Petrus 3:11.
(Jeremia 29:10) “Omuwa ota ti: ‘Omimvo dhomuBabilonia omilongo heyali nge dha piti po, otandi mu dhimbulukwa nokudhiginina euvaneko lyandje notandi mu galulile kegumbo.
g-E 6/12 ep. 14, okat. 1-2
Ombiimbeli, embo ndyoka li na omahunganeko gashili, Oshitopolwa 2
Egwanitho: Konima yomimvo 70 sho Aaisraeli ya kala muupongekwa waBabilonia, okuza momumvo 607 sigo 537 K.E.N., omukwaniilwa gwaPersia Kores okwa li e ya pititha mo nokwe ya lombwele ya galukile kegumbo opo ya ka tungulule otempeli muJerusalem. — Esra 1:2-4.
Shoka ondjokonona tayi ulike:
● Aaisraeli oya kalele tuu shili muupongekwa muBabilonia uule momimvo 70 ngaashi Ombiimbeli ya hunganeka? Tala kwaashoka omukwatelikomeho gwokulafulula iiningwanima gwomuIsraeli, Ephraim Stern a ti. “Okuza momumvo 607 K.E.N., sigo 538 K.E.N., kapu na uuyelele tawu ulike aantu yali mehala lyontumba. Muule wethimbo alihe ndyoka, kapu na nando oshilando shimwe sha li sha hanagulwa po kAababilonia sha li sha kala naantu ishewe.” Ethimbo ndyoka aantu ya li inaaya kala nenge ya galukile moshitopolwa shoka sha li sha ponokelwa otali tsu kumwe lela naandyoka Aaisraeli ya kala muupongekwa muBabiloina okuza momumvo 607 K.E.N., sigo 537 K.E.N. — 2 Ondjalulo 36:20, 21.
Elesho lyOmbiimbeli
(Jeremia 31:31-40) Omuwa ota ti: “Esiku otali ya, uuna tandi ka dhika ehangano epe nAaisraeli nAajuda. 32 Inali fa nando ehangano ekulu ndyoka nda hanganene noohekulu, sho nde ya kwata koshikaha nonde ya tembudha muEgipiti. Nando onda li nda fa ombushiki kuyo, inaa dhiginina ehangano ndyoka. 33 Ehangano epe ndyoka tandi hangana nAaisraeli, olyo ndika: Ompango yandje otandi yi tula momadhiladhilo gawo notandi yi nyolele moomwenyo dhawo. Otandi ningi Kalunga kawo, noyo taa ningi aantu yandje. 34 Itaku kala we omuntu ta longo mukwawo nenge omuntu ta lombwele mumwayina ta ti: ‘Tseya Omuwa.’ Oshoka ayehe otaa ka tseya ndje, aagundjuka naakuluntu. Otandi dhimi po omayono gawo, nuulunde wawo itandi u dhimbulukwa we. Ongame, Omuwa, nda popi.” 35 “Omuwa okwa utha etango okuminikila omutenya, nomwedhi noonyothi okuminikila uusiku. Ota pilula efuta note li ndundumitha; edhina lye Omuwa Omunankondoawike. 36 Elandulathano ndika lyuunshitwe manga inaali tenguka po, oluvalo lwaIsrael nalwo wo italu hulu po, lu kale oshigwana koshipala shandje. 37 Egulu pombanda ngele tali vulu okuyelekwa, nomakankameno gevi pohi ngele taga vulu okukonakonwa, nena otandi ekelehi Israel omolwaashihe shoka e shi ningi.” 38 Omuwa ota ti: “Esiku otali ya, uuna Jerusalem ashihe tashi ka tungululwa shi ninge oshilando shandje okuza koshungo Hananel sigo okOsheelo shokokolonela. 39 Okuza mpoka ongamba otayi ka tsikila sigo okoshikulundundu Gareb e tayi goyokele ihe lwokuGoa. 40 Esilu alihe moka hamu fumvikwa aasi netoto lyiiyagaya nelundu alihe sigo okokalonga Kidron nosigo okOsheelo shuukambe kuuzilo, otali ka kala lya yapulilwa ndje. Oshilando itashi ka kumunwa po we nenge shi hanagulwe po.”