Iileshomwa moka mwa za omayamukulo gomapulo ngoka ge li
mokafo Onkalamwenyo yopaKriste niilonga yetu yokuuvitha
OMASIKU 4-10 DESEMBA
OMALIKO OKUZA MOOHAPU DHAKALUNGA | SEFANJA 1–HAGGAI 2
“Konga Jehova manga esiku lyondjahi ye inaali ya”
(Sefanja 2:2, 3) Manga inaamu ganya e tamu si mwa fa oongala, manga ondjahi yOmuwa inaayi mu lambela, manga esiku ndyoka ta holola ondjahi ye, inaali thikana. 3 Galukileni kOmuwa, aayifupipiki amuhe yomoshilongo, mboka hamu vulika kiipango ye. Longeni shoka shu uka, ne mu ifupipike koshipala shOmuwa. Pamwe otamu ka henuka egeelo mesiku ndyoka, sho Omuwa ta ka holola ondjahi ye.
w01 3/1 ep. 9-10, okat. 5-7
Galukileni kuJehova manga esiku lyondjahi ye inaali thika
5 Otashi vulika wu tye: ‘Ngame omupiya gwaKalunga i igandja nonda ninginithwa, ndi li Onzapo yaJehova. Mbela inandi gwanitha po nale iitegelelwa mbyono?’ Sho sheneshene, omwa kwatelwa oshindji shi vulithe owala pokwiiyapulila Jehova. Israeli osha li oshigwana shi iyapulila Jehova, ihe pethimbo lyaSefanja aantu yomuJuda kaya li ye li metsokumwe neiyapulo ndyoka. Oshizemo, hugunina oshigwana shoka osha li she ekelwahi. ‘Okukonga Omuwa’ kunena okwa kwatela mo okukokeka nokudhiginina ekwatathano lyopahole naye mokweendathana nehangano lye lyokombanda yevi. Otashi ti okutseya nkene Kalunga ha tala ko iinima nokugandja eitulomo komaiyuvo ge. Ohatu kongo Jehova ngele tatu konakona Oohapu dhe nuukeka, tatu tedhatedha kudho nokulongitha omayele gadho monkalamwenyo. Sho tatu kongo ewiliko lyaJehova okupitila mokugalikana nuulaadhi nomokulandula ewiliko lyombepo ye ondjapuki, ekwatathano lyetu naye ohali kolo nohashi tu inyengitha tu mu longele ‘nomutima gwetu aguhe, nomwenyo gwetu aguhe nonoonkondo dhetu adhihe.’ — Deuteronomium 6:5; Aagalati 5:22-25; Aafilippi 4:6, 7; Ehololo 4:11.
6 Oshitegelelwa oshitiyali sha tumbulwa muSefanja 2:3 osho ‘okulonga shoka shu uka.’ Oyendji yomutse otwa ninga omalunduluko ga simana, opo tu vule okukala twa gwana okuninginithwa, ihe otu na okutsikila okudhiginina omithikampango dhuuyuuki dhaKalunga onkalamwenyo yetu ayihe. Yamwe mboka ya li ye li nawa moshinima shika, oye etha ya nyatekwe kuuyuni. Kashi shi oshipu okukonga uuyuuki, molwaashoka otwa kundukidhwa kaantu mboka ya tala ko oluhondelo, okupopya iifundja nomayono galwe yi li iinima kaayi na uupyakadhi. Ihe ngele otu na ehalo enene lyokunyanyudha Jehova, otatu vulu okusinda egamo kehe lyokukala twa hala okupandika kuuyuni mokwiimbwanga mumwe nawo. Juda ka li we a hokiwa kuKalunga, molwaashoka okwa holele iigwana yaapagani iishiinda naye. Pehala lyokuholela uuyuni, natu ‘holele Kalunga,’ nokukokeka “omuntu omupe ngoka a shitwa a fa Kalunga nohi iholola ye mwene mokukalamwenyo ku uka nokwa yapuka.” — Aaefeso 4:24; 5:1.
7 Oshitsa oshititatu shi li muSefanja 2:3 osho shika kutya ngele otwa hala okuhupithwa mesiku lyondjahi yaJehova, otu na ‘okwiifupipika.’ Esiku kehe ohatu tsakaneke aalumentu naakiintu nosho wo aagundjuka mboka kaaye shi nando aaifupipiki. Kuyo okwiifupipika epuko. Okuvulika okwa talika ko ku li uunkundi wa kwata miiti. Aantu ya tya ngaaka ohaya panga, oyi ihole, oye hole okulandula omadhiladhilo gawo noyi itaala kutya “uuthemba” wawo naashoka ya hala oshi na okugwanithwa po, kutya nduno otashi pula shike. Kashi yemateka tuu ngele iikala mbyoka oye tu nwetha mo! Ndika olyo ethimbo ‘lyokwiifupipika.’ Ngiini mbela? Omokuvulika kuKalunga, omokutaamba ko omapukululo ge neifupipiko nomokulonga ehalo lye.
Konga omaliko gopambepo
(Sefanja 1:8) Omuwa ota ti: “Esiku lyetselo otandi geele aambala, aana yokombanda aamati naayehe mboka taa holele aakwiilongo.
Omanenedhiladhilo okuza membo lyaHaggai naSakaria
1:8, OB-1954. Pethimbo lyaSefanja aantu yamwe oya li ya hala okutaambiwa ko kiigwana mbyoka ye ya kundukidha ‘mokuzala oonguwo oonkwiilongo.’ Kashi li tuu sha nika uusama kaalongeli yaJehova kunena ya kale taya holele uuyuni mbuka momikalo dha faathana!
(Haggai 2:9) “‘Otempeli ompe otayi ka taima unene yi vule yonale. Peha ndika otandi ka pa aantu yandje elago nombili.’ Omuwa Omunankondoawike okwe dhi popi.”
Omanenedhiladhilo okuza membo lyaHaggai naSakaria
2:9 (Yelekanitha NW.) — Omomikalo dhini ‘otempeli ompe ya li tayi ka kala yo opala unene yi vule ndjiyaka yonale’? Shika osha li sha ningwa nokuli momikalo dhi li ndatu: Gwotango, nonando otempeli yaSalomo ya simana oya li ya kala po uule woomvula 420, okuza mo 1027 K.E.N. sigo omo 607 K.E.N., “otempeli ompe” oya li ya longithwa uule woomvula dhi vulithe po 580, okuza pokupwa kwayo mo 515 K.E.N. sigo opokuhanagulwa po kwayo mo 70 E.N. Omutiyali, Mesiasa, Jesus Kristus, okwa li a longele aantu ‘motempeli ndjoka ompe.’ Omutitatu, aantu oyendji oya li ye ya muyo shi vulithe ‘mwaandjoka yonale’ opo ya longele Kalunga. — Iilonga 2:1-11.
Elesho lyOmbiimbeli
(Haggai 2:1-14) Mesiku etimilongo mbali nolyotango lyomwedhi omutiheyali omumvo tuu ngoka, Omuwa okwa popi ishewe momuhunganeki Haggai. 2 Okwa lombwele Haggai, a lombwele Serubbabel, omuleli gwaJuda, nomuyambimukuluntu Josua naantu yalwe ngeyi: 3 “Ope na tuu gumwe mokati keni ta vulu okudhimbulukwa eopalo lyonale lyotempeli ndjika? Oyi li ano ngiini momeho geni ngashingeyi? Oya fa kaayi na omutalelo gwasha. 4 Ihe inamu kala mwa tyololoka. Longeni, oshoka ondi li pamwe nane. 5 Sho mwa tembuka muEgipiti, onde mu uvanekele, ndi kale aluhe nane. Ondi li nane nokuli, ano inamu tila. 6 “Konima yokathimbo otandi ki inyengitha egulu nevi, uukukutu nefuta. 7 Otandi ka tukulutha iigwana ayihe, nomaliko gayo otage ke etwa nkuka, notempeli otayi ku udhithwa omauyamba. 8 Iisiliveli ayihe niingoli yomuuyuni auhe oyandje. 9 Otempeli ompe otayi ka taima unene yi vule yonale. Peha ndika otandi ka pa aantu yandje elago nombili.” Omuwa Omunankondoawike okwe dhi popi. 10 Mesiku etimilongo mbali netine lyomwedhi omutimugoyi gwomumvo omutiyali, Darius sho a li omukwaniilwa, Omuwa Omunankondoawike okwa lombwele ishewe omuhunganeki Haggai. 11 Okwa ti: “Pula aayambi owino kepulo ndi: 12 ‘Tu tye, omuntu ota kutha ontumba yonyama ondjapuki kondjambelo e yi humbatela ponguwo ye. Ngele te etha, onguwo yi gume oshikwiila, iikulya ya pya, omaviinu, omagadhi nenge sha shilwe hashi liwa, otayi yi ningi wo iiyapuki?’” Epulo sho lya pulwa, aayambi oya yamukula: “Aawe.” 13 Nena Haggai okwa pula: “Tu tye, omuntu ina yogoka, oshoka okwa gumu omudhimba. Ngele ota gumu shimwe shomiikulya mbika, ote shi nyateke?” 14 Nena Haggai okwa ti: “Omuwa ota ti: ‘Osho naanaa tashi ningwa kaantu yoshigwana shika nokukehe shoka taye eta po. Shaa shoka taa yamba koshiyambelo, osha nyata.’”
OMASIKU 11-17 DESEMBA
OMALIKO OKUZA MOOHAPU DHAKALUNGA | SAKARIA 1–8
“Kala wa kwata wa dhiginina konguwo yOmujuda”
(Sakaria 8:20-22) Omuwa Omunankondoawike ota ti: “Esiku otali ya, uuna aantu taa ka za kiilando iinene taye ya kuJerusalem. 21 Mboka taa zi koshilando shika, otaa ka tya kumboka ya zi koshilando shiyaka: ‘Otatu ka simaneka Omuwa Omunankondoawike noku mu galikana, e tu yambeke. Ileni, tu yeni!’ 22 Aantu oyendji niigwana iinankondo otayi ke ya kuJerusalem, yi simaneke Omuwa Omunankondoawike noku mu galikana, e ya yambeke.
‘Ngashingeyi omwa ningi aantu yaKalunga’
14 Aapolofeti yopethimbo lyonale, oya li ya hunganeke kutya aantu oyendji otaya ka longela Jehova pamwe noshigwana she pethimbo ndika lyehulilo. Jesaja okwa hunganeke a ti: ‘Aantu yayo otaa ka tya: “Natu londeni kondundu yOmuwa, tu ye kotempeli yaKalunga kaIsrael. Ote ke tu nongeka shoka a hala tu longe; otatu ke enda momapola e ga hogolola. Oshoka elongo lyOmuwa otali zi muJerusalem; okuza muSion ota popitha aantu ye.”’ (Jes. 2:2, 3) Omupolofeti Sakaria okwa li a hunganeke oshinima sha faathana sho a ti: “Aantu oyendji niigwana iinankondo otayi ke ya kuJerusalem, yi simaneke Omuwa Omunankondoawike noku mu galikana, e ya yambeke.” Aantu mboka okwe ya popi pathaneko ye li ‘aakwiilongo omulongo ya za momalaka agehe nomiigwana ayihe.’ Otaya ka longela wo Kalunga pamwe naIsraeli shopambepo nokupopya taya ti: “Otwa hala okukala pamwe nane, oshoka tse otu uvu kutya Omuwa oku li nane.” — Sak. 8:20-23.
(Sakaria 8:23, OB-1954) Omuwa Sebaot osho ta ti: Omasiku ngeyaka aalumentu omulongo yomomalaka agehe gaapagani otaa kwata kekunka lyonguwo yomulumentu Omujuda notaa ti: Otse otwa hala okweendela pamwe nane; oshoka otse tu uvu, Kalunga e li pamwe nane.
“Otwa hala okukala pamwe nane”
4 Ngele nani itatu vulu okutseya omadhina gaagwayekwa ayehe mboka ye li ko, oonzi dhilwe otadhi vulu ngiini okutya “otwa hala okukala pamwe nane”? Ombiimbeli otayi ti kutya “aakwiilongo omulongo otaye ya kOmujuda gumwe notaa ti: ‘Otwa hala okukala pamwe nane, oshoka tse otu uvu kutya Omuwa oku li nane.’” Nonando Ombiimbeli oya ti Omujuda gumwe, sho ya tsikile oya popi aantu oyendji, oshoka oya ti “nane.” Shika otashi ti Omujuda ngoka ta popiwa ke shi owala omuntu gumwe, ihe oku lile po ongundu ayihe yaagwayekwa. Oonzi dhilwe oshinima shika odhi shi shi, onkee ohadhi longele Jehova pamwe nongundu ndjoka. Inadhi pumbwa okutseya omadhina gaagwayekwa ayehe, opo ando dhi landule kehe gumwe gwomuyo. Jesus oye omuwiliki gwetu, nOmbiimbeli otayi ti kutya oye awike tu na okulandula. — Mateus 23:10.
“Ohaa landula Onzigona shaa mpoka ta yi”
14 Jesus okwa tala ko ekwatho ndyoka aamwahe haya pewa a fa oye te li pewa. (Lesha Mateus 25:40.) Omomikalo dhini mboka ye na etegameno lyoku ka kala kombanda yevi sigo aluhe taya vulu okwaambidhidha aamwahe yaKristus aagwayekwa? Omukalo gwa simanenena moka tatu vulu okwaambidhidha aagwayekwa omokukutha ombinga miilonga yokuuvitha etumwalaka lyUukwaniilwa. (Mat. 24:14; Joh. 14:12) Momukokomoko gwomimvo omilongo dha ka pita, omwaalu gwaagwayekwa mboka ye li kombanda yevi ogwe ende tatu shonopala, omanga omwaalu gwoonzi dhilwe gwi indjipala. Mboka ye na etegameno lyoku ka kala kombanda yevi ohaya kutha ombinga miilonga yokugandja uunzapo, yamwe oye li nokuli aauvithi yethimbo lyu udha. Kungawo, otaya ambidhidha aagwayekwa sho taya gwanitha po oshinakugwanithwa shawo shokuninga aantu aalongwa. (Mat. 28:19, 20) Otatu vulu wo natango okwaambidhidha iilonga mbyoka mokugandja omayambidhidho gopashimaliwa, tatu shi ningi momikalo dhi ili nodhi ili.
Konga omaliko gopambepo
(Sakaria 5:6-11) Onda pula nda ti: “Oshike?” Okwa yamukula: “Osho eshungu tali yeleke oondjo dhoshilongo ashihe.” 7 Eshungu olya li li na oshisiikilo sha ningwa moholo. Sho nda tongolola, eshungu olya suukululwa, omo nomwa li omukiintu a kuutumba. 8 Omuyengeli okwa ti: “Omukiintu oku lile po aantu aagoyoki.” Nena okwe mu tula meshungu nokwe li siikile. 9 Onda ligamene nonda mono aakiintu yaali taa tuka yu uka kungame ye na omawawa omanene ga fa gakandoko. Oya kutha po eshungu e taa tuka nalyo. 10 Onda pula omuyengeli: “Otaye li fala peni?” 11 Okwa yamukula: “OkuBabilon, nkoka taa ke li tungila otempeli. Otempeli ngele ya pu okutungwa, eshungu otali ka tulwa mo, opo li simanekwe.”
Nkene omamoniko gaSakaria ge ku guma
18 Emoniko olya li wo lya dhimbulukitha Aajuda oshinakugwanithwa shawo shokukaleka elongelokalunga lya yogoka. Aantu aagoyoki itaya vulu noitaya ka pitikwa okukala mokati koshigwana shaKalunga. Konima sho twe ya mehangano lyaKalunga ndyoka lya yogoka, moka tu uvite ohole negameno lye, nena otu na oshinakugwanithwa shoku li kaleka lya yela. Mbela ohatu kaleke ngaa “otempeli” yetu ya yela? Aantu aagoyoki kaye na mo nando ehala moparadisa yetu yopambepo.
(Sakaria 6:1) Onda mono emoniko ekwawo. Pethimbo ndika onda mono mo omatembakwiita gane tage ya taga zi pokati koondundu mbali dhoshikushu.
Omatembakwiita noshishani otayi mu gamene
7 MOmbiimbeli, oondundu otadhi vulu okuthaneka komaukwaniilwa nenge komapangelo. Oondundu ndhoka dha popiwa mehokololo lyaSakaria odha faathana noondundu mbali ndhoka dha yelithwa mehunganeko lyaDaniel. Ondundu yimwe, otayi thaneke eshito lyaJehova alihe nepangelo lyaaluhe. Ondundu onkwawo, otayi thaneke Uukwaniilwa wopaMesiasa kohi yewiliko lyaJesus. (Dan. 2:35, 45) Okuza sho Jesus a tameke okupangela megulu momumvo 1914, pethimbo lyoshikufuthinge, oondundu ndhoka mbali oko dha kala nodha kala tadhi dhana onkandangala mokugwanithwa kwehalo lyaKalunga kombanda yevi.
8 Omolwashike oondundu ndhoka dha li dha longwa moshikushu? Ngaashi oshingoli, oshikushu oshiyela shoka shi na ongushu lela. Jehova okwa li a ti kutya oshiyela shika tashi tayima, oshi na okulongithwa mokutunga etsalihangano nokonima omokutunga otempeli muJerusalem. (Eks. 27:1-3; 1 Aak. 7:13-16) Odhoshili kutya oondundu mbali ndhoka dha longwa moshikushu, otadhi tu dhimbulukitha omaukwatya guuthemba waJehova wokupangela eshito alihe nosho wo gUukwaniilwa wopaMesiasa, mboka tawu ke etela aantu ombili nomayambeko ogendji.
Elesho lyOmbiimbeli
(Sakaria 8:14-23) Omuwa Omunankondoawike ota ti: “Oohokulu sho ya geyithile ndje, onde ya dhiladhilile iiponga noinandi lundulula nando omadhiladhilo gandje, ihe onda tsakanitha oompangela dhandje. 15 Ihe nena onda hala okuyambeka aantu yomuJerusalem naJuda. Onkee inamu tila. 16 Tsakanitheni iinima mbika: Hokololelathaneni oshili. Tokoleni pauyuuki nopambili. 17 Inamu dhiladhililathana uuwinayi. Inamu gandja uumbangi wiifundja nokugana. Ondi tonde iifundja, uugoyoki nuukolokoshi.” 18 Omuwa Omunankondoawike okwa lombwele Sakaria elaka ndika: 19 “Okwiidhilika iikulya momwedhi omutine, omutitano, omutiheyali nomutimulongo otaku ka kala oshituthi shenyanyu noshehambelelo moshigwana shaJuda. Holeni oshili nombili.” 20 Omuwa Omunankondoawike ota ti: “Esiku otali ya, uuna aantu taa ka za kiilando iinene taye ya kuJerusalem. 21 Mboka taa zi koshilando shika, otaa ka tya kumboka ya zi koshilando shiyaka: ‘Otatu ka simaneka Omuwa Omunankondoawike noku mu galikana, e tu yambeke. Ileni, tu yeni!’ 22 Aantu oyendji niigwana iinankondo otayi ke ya kuJerusalem, yi simaneke Omuwa Omunankondoawike noku mu galikana, e ya yambeke. 23 Momasiku ngeyaka aakwiilongo omulongo otaye ya kOmujuda gumwe notaa ti: ‘Otwa hala okukala pamwe nane, oshoka tse otu uvu kutya Omuwa oku li nane.’”
OMASIKU 18-24 DESEMBA
OMALIKO OKUZA MOOHAPU DHAKALUNGA | SAKARIA 9–14
“Kala ‘molusilu lwOndundu’”
(Sakaria 14:3, 4) Nena Omuwa ota ka za mo e ta kondjitha iigwana mbyoka, ngaashi a kondjele muuyuni wonale. 4 Pethimbo ndyoka ota ka thikama kOndundu yomiolivi kuuzilo waJerusalem. Nena Ondundu yomiolivi otayi ka pambuka miitopolwa iyali okuza kuuzilo sigo okuuninginino polusilu olunene. Etata lyondundu otali uka lwokuumbangalantu, netata ekwawo, olwokuumbugantu.
Kala molusilu lwegameno lyaJehova
10 Sho ondundu yopathaneko ya pambuka pokati, oshipambu shimwe okuumbangalantu noshikwawo okuumbugantu, oompadhi dhaJehova odha kala dhi li koondundu adhihe. Kohi yoompadhi dhaJehova okwa holoka “olusilu olunene.” Olusilu nduka lwopathaneko otalu thaneke egameno lyopakalunga, ndyoka aapiya ye haya mono kuye e li omunamapangelo gweshito alihe naandyoka haya mono mUukwaniilwa wopaMesiasa wOmwana. Jehova ota ka shilipaleka kutya elongelokalunga lyashili ka li na siku nando li hulithwe po. Ondundu yomiolivi oya li ya pambuka pokati uunake? Osha li sha ningwa sho Uukwaniilwa wopaMesiasa wa dhikwa po pehulilo lyomathimbo gaapagani momumvo 1914. Uunake aalongelikalunga yashili ya li ya tameke okufadhukila kolusilu lwopathaneko?
(Sakaria 14:5) Ne otamu ka fadhuka po tamu piti molusilu nduka talu topola ondundu miitopolwa iyali. Otamu ka fadhuka po, ngaashi oohokulu ya ningile, sho evi lya kakamene muuyuni womukwaniilwa gwaJuda Usia. Omuwa Kalunga kandje ote ke ya te etelele aayengeli ayehe.
Kala molusilu lwegameno lyaJehova
13 Ngele otwa kala kombinga yaJehova nokukala aadhiginini moshili, Jehova nosho wo Omwana, Jesus Kristus, otaya ka shilipaleka kutya itaye etha nando osha shi tu ‘yuge mo moshikaha She.’ (Joh. 10:28, 29) Jehova okwi ilongekidha oku tu kwathela, opo tu vule okuvulika kuye e li Omunamapangelo agehe nokukala aapangelwa aadhiginini yUukwaniilwa wopaMesiasa. Otu na okukala molusilu lwegameno, molwaashoka olusilu ndoka otalu ka kala lwa simanenena kaalongelikalunga yashili pethimbo lyuudhigu uunene mboka wu li popepipepi.
(Sakaria 14:6, 7) Uuna ethimbo ndyoka tali ya, itaku ka kala uutalala nenge ombambi 7 nenge omilema. Otaku ka kala omutenya, nando omokati kuusiku. Omuwa oye awike a tseya, uuna mbika tayi ka ningwa.
(Sakaria 14:12) Iigwana mbyoka tayi hingile Jerusalem iita, Omuwa ote ke yi tumina uuvu welega etilithi. Otaa ka ola, manga ye na omwenyo; omeho gawo nomalaka gawo otaga ka ola.
(Sakaria 14:15) Uuvu welega uutilithi otau ka kwata wo uukambe, omamulutiya, oongamelo nuusino — iinamwenyo ayihe moontanda dhaatondi.
Kala molusilu lwegameno lyaJehova
15 Mesiku lyaKalunga lyokukondjitha aatondi ye, oshike tashi ka ningilwa mboka kaaye li ‘molusilu lwe olunene’ lwegameno? Kuyo ‘eluwa itali ka tenda,’ sha hala okutya, uuyelele waJehova itawu ke ya minikila. Mesiku ndyoka lyaJehova lyokukondjitha aatondi, “uukambe, omamulutiya, oongamelo nuusino — iinamwenyo ayihe,” mbyoka yi li endhindhiliko lyiikondjitho mbyoka iigwana hayi longitha itayi ka kala yi na ekwatho lyasha. Iikondjitho mbyoka otayi ka kwatwa ‘kuutalala wombambi,’ itayi ka longithwa sha, otayi ka kala ya fa ya kwatwa kuutalala wo wenewene. Jehova ota ka longitha wo omikithi nosho wo “uuvu welega etilithi.” Kutya nduno ote ke shi ninga lelalela nenge hasho, uuvu welega etilithi otawu ka mweneka mboka taye tu tilitha. Mesiku ndyoka “omeho gawo nomalaka gawo otaga ka ola” meityo ndyoka kutya aaponokeli yetu otaya ka dhenga mombepo notaya ka mwenekwa. (Sak. 14:6, 7, 12, 15) Kapu na okakololo kombanda yevi hoka ehanagulo lyaJehova itaali ka adha. Omatangakwiita agehe kombanda yevi otage ki imanga uukuni kumwe naSatana e taga ningi etangakwiita enenenene. (Eh. 19:19-21) Ihe “mesiku ndyoka omidhimba dhaantu mboka ya dhipagwa kOMUWA, otadhi ka langathana okuza kooha dhuuyuni sigo okooha oonkwawo.” — Jer. 25:32, 33.
Konga omaliko gopambepo
(Sakaria 12:3) Ihe ethimbo ngele lya thikana, otandi ka ninga Jerusalem ongemanya lya kola. Oshigwana kehe tashi li toola po, otashi gwilwa kulyo. Iigwana ayihe yomuuyuni otayi hangana molugodhi, yi shi matukile.
Oshikondjitho kehe tashi hambulwa shi ku kondjithe, itashi tompola sha
9 Ehunganeko lyaSakaria otali tu ulukile kutya omolwashike iigwana hayi pataneke Aakriste yashili. Sakaria 12:3 otayi ti: “Ethimbo ngele lya thikana, otandi ka ninga Jerusalem ongemanya lya kola.” Mbela ehunganeko ndika otali popi Jerusalem guni? Jerusalem ngoka a popiwa kuSakaria ota thaneke ‘Jerusalem shomegulu,’ Uukwaniilwa womegulu mboka tawu ka thigululwa kAakriste aagwayekwa. (Aahebeli 12:22) Kombanda yevi oku na natango oshihupe oshishona shaagwayekwa mboka taya ka thigulula Uukwaniilwa wopaMesiasa. Aakriste aagwayekwa pamwe ‘noonzi dhilwe’ ohaya ladhipike aantu ya ambidhidhe Uukwaniilwa waKalunga manga ku na ethimbo. (Johannes 10:16, OB-1986; Ehololo 11:15) Mbela aantu yomiigwana ohayi inyenge ngiini kehiyo ndyoka? Jehova oha ambidhidha ngiini aapiya ye kunena? Natu mone eyamukulo mokukonakona muule Sakaria ontopolwa 12. Ngele otwe shi ningi, otatu ka mona uushili woohapu ndhoka tadhi ti kutya kapu na ‘oshikondjitho tashi ka tompola’ okukondjitha aagwayekwa yaKalunga nosho wo oonzi dhilwe.
10 Sakaria 12:3 okwa popi kutya iigwana otayi ka “gwilwa kulyo.” Shono osha ningilwe ngiini? Kalunga okwa li a popi kutya onkundana ombwanawa yUukwaniilwa oyi na okuuvithwa. Oonzapo dhaJehova ohadhi yi uvitha nuulaadhi. Ihe sho Oonzapo tadhi uvitha kutya Uukwaniilwa owo owala tawu ka kandula po omaupyakadhi osha ninga ‘emanya lya kola’ kiigwana. Iigwana mbyoka ohayi kambadhala okukutha mo emanya ndyoka mondjila yayo, mokuya moshipala aauvithi yUukwaniilwa. Kungawo, iigwana mbyoka oya “gwilwa kulyo,” sha hala okutya, yi iyehameka. Oyi ipetha nokuli edhina ewinayi sho inaayi pondola. Itayi vulu okumweneka aalongelikalunga yashili mboka ya lenga uuthembahenda wokuuvitha ‘elaka etoye lyaaluhe’ lyUukwaniilwa waKalunga wopaMesiasa omanga onkalelo ndjika yiinima inaayi hula po. (Ehololo 14:6) Omukeeleli gumwe gwondholongo moshilongo shimwe shomuAfrika sho a mono omiyonena ndhoka dha li tadhi ningilwa Oonzapo dhaJehova, okwa ti: ‘Otamu imonitha iihuna ngele otamu hepeke aantu mboka. Itaya ka etha po eitaalo lyawo, ihe otaya ka indjipala owala.’
(Sakaria 12:7) “Ongame, Omuwa, tango ote gandja esindano kuJuda, opo oluvalo lwaDavid naantu yaJerusalem yaa kale ye vule oshihupe shaJuda mesimano.
Oshikondjitho kehe tashi hambulwa shi ku kondjithe, itashi tompola sha
13 Lesha Sakaria 12:7, 8. MuIsraeli shonale, omatsali oga li apuhe. Omathimbo gamwe oga li haga longithwa kaasita yiimuna nokaanamapya. Aantu mboka ya li haya kala momatsali oya li haya ningi iihakanwa nuupu noya li haya kala ya pumbwa egameno ngele aatondi taya ponokele oshilando shaJerusalem. Uutumbulilo “omatsali gaJuda,” (OB-1954) otawu ulike kutya oshihupe shaagwayekwa kunena oshi li momahala inaaga gamenwa, oku shi popya pathaneko. Otashi gamene nokaashi na uumbanda iinima yUukwaniilwa wopaMesiasa. Jehova gwomatanga gaakwiita ota ka hupitha “omatsali gaJuda” molwaashoka Satana okwa halelela oku ga ponokela.
Elesho lyOmbiimbeli
(Sakaria 12:1-14) Ndika olyo elaka tali popi Israel u lya zi kOmuwa, Omuwa ngoka a tula ko omawangandjo, a shita evi nokwa mwenyeke Omuntu. Ye ota ti: 2 “Otandi ka ninga Jerusalem a fe oshitenga shomaviinu; iigwana ye shi kunduka, Otayi ke ga nwa e tayi tantagala ya fa oonkolwi. Nuuna taa kondeke Jerusalem, oshilando shevululuko lyaJuda, nasho wo otashi ka kondekwa. 3 Ihe ethimbo ngele lya thikana, otandi ka ninga Jerusalem ongemanya lya kola. Oshigwana kehe tashi li toola po, otashi gwilwa kulyo. Iigwana ayihe yomuuyuni otayi hangana molugodhi, yi shi matukile. 4 Pethimbo ndyoka otandi ka pwidhukitha uukambe wawo auhe naalondi yawo otandi ke ya goyapeka. Otandi ka tonatela oshigwana shaJuda, ihe uukambe waatondi yawo otandi ke u posipaleka. 5 Nena omaludhi gaantu yaJuda otaga ka lombwelathana taga ti: ‘Omuwa Kalunga Omunankondoawike ota gandja oonkondo kaantu ye mboka ye li muJerusalem.’ 6 “Pethimbo ndyoka omaludhi gaJuda otandi ke ga ninga ga fa epeya mokuti nenge omulilo mepya lyiilya ya kukuta — otaa ka hanagula po iigwana ayihe ye ya kunduka. Aantu yaJerusalem otaa ka hupa e taa kala nawa moshilando. 7 “Ongame, Omuwa, tango ote gandja esindano kuJuda, opo oluvalo lwaDavid naantu yaJerusalem yaa kale ye vule oshihupe sha Juda mesimano. 8 Pethimbo ndyoka Omuwa ota ka gamena mboka ye li muJerusalem. Oshimbembe mokati kawo otashi ka kala sha fa David moonkondo. Oluvalo lwaDavid otalu ke ya wilika ngaashi omuyengeli gwOmuwa, ongaashi Kalunga mwene. 9 Pethimbo ndyoka otandi ka hanagula po oshigwana kehe tashi kambadhala okuponokela Jerusalem. 10 Oluvalo lwaDavid naantu yalwe yaJerusalem otandi ke ya udhitha nombepo yesilohenda noyegalikano. Otaa ka tongolola ngoka ye mu dhipaga notaye ke mu lila ongaantu taa lili omunona epona. Otaa ka lila omahodhi omapyu ongomuntu a kanitha osheeli she shomumati. 11 Pethimbo ndyoka oosa muJerusalem otadhi ka ninga oonene dha fa oosa dhaHadad Rimmon mesilu lyaMegiddo. 12 “Ezimo kehe moshilongo otali ka lila oosa pulyo lyene: ezimo lya za muDavid, ezimo lya za muNatan, ezimo lya za muLevi, ezimo lya za muShimei nomazimo agehe galwe. Ezimo kehe otali ka lila oosa pulyo lyene, naalumentu yomezimo kehe otaa ka lila ya yooloka maakiintu.” 13 “Ezimo kehe moshilongo otali ka lila oosa pulyo lyene: ezimo lya za muDavid, ezimo lya za muNatan, ezimo lya za muLevi, ezimo lya za muShimei nomazimo agehe galwe. Ezimo kehe otali ka lila oosa pulyo lyene, naalumentu yomezimo kehe otaa ka lila ya yooloka maakiintu.” 14 “Ezimo kehe moshilongo otali ka lila oosa pulyo lyene: ezimo lya za muDavid, ezimo lya za muNatan, ezimo lya za muLevi, ezimo lya za muShimei nomazimo agehe galwe. Ezimo kehe otali ka lila oosa pulyo lyene, naalumentu yomezimo kehe otaa ka lila ya yooloka maakiintu.”
OMASIKU 25-31 DESEMBA
OMALIKO OKUZA MOOHAPU DHAKALUNGA | MALEAKI 1–4
“Ondjokana yeni oya hokiwa ngaa kuJehova?”
(Maleaki 2:13, 14) Oshinima oshikwawo hamu shi ningi, osho shika. Ohamu hipike oshiyambelo shOmuwa nomahodhi, ohamu lili nokuhekumuna, sho itaa taamba we omayambo ngoka tamu mu etele. 14 Otamu pula, oshike itee ga taamba we. Ite ga taamba, oshoka oku shi shi kutya owa yono euvaneko kumukadhoye ngoka wa hokana muugundjuka woye. Okwa li kuume koye, ongoye nowa yono euvaneko lyoye kuye, nonando owa uvaneke koshipala shaKalunga kutya oto ke mu dhiginina.
jd-E ep. 125-126, okat. 4-5
Kwathela uukwanegumbo weni wu kale tawu nyanyudha Kalunga
4 Pethimbo lyaMaleaki methelemimvo etitano K.E.N., Aajuda oyendji oya li haya hengathana. Maleaki okwe ya lombwele a ti: ‘Jehova oku shi shi kutya owa yono euvaneko kumukadhoye ngoka wa hokana muugundjuka woye. Ongoye nowa yono euvaneko lyoye kuye.’ Molwaashoka aalumentu yamwe oya li ya kengelele aakulukadhi yawo, oshiyambelo shaJehova osha li sha hipikwa komahodhi gaakulukadhi mboka, ‘gokulila nokuhekumuna.’ Aayambi mboka kaaya li aanashili oya li yi ipwililikile oshinima shoka oshiwinayi noonkondo! — Maleaki 2:13, 14.
5 Jehova okwa li a tala ko ngiini etaloko ewinayi ndyoka li na ko nasha nondjokana pethimbo lyaMaleaki? Maleaki okwa nyola a ti: “Omuwa Kalunga kalsrael ota ti: ‘Otandi tondo eteyo lyoondjokana.’” Okwe shi koleke wo kutya Jehova ‘ina lunduluka.’ (Maleaki 2:16; 3:6) Mbela owu uvite kutya shono osha hala okutya shike? Kalunga okwa adhikile nale a popya kutya ke hole eteyondjokana. (Genesis 2:18, 24) Naashoka osho a li a ningi pethimbo lyaMaleaki. Nokunena osho ha ningi. Aantu yamwe otashi vulika ya thige po oondjokana dhawo molwaashoka owala inaaya panda we ookuume kawo kopandjokana. Nonando oye shi ninge miineya, Jehova oku ya wete owala. (Jeremia 17:9, 10) Okukengelela akuhe hoka taku ningwa, opo gumwe a thige po ondjokana oku ku shi, nonando gumwe oku tye okwe shi ningi omolwetompelo ewanawa. Ihe “kehe shimwe shomeshito oshi li puuyelele montaneho yaKalunga, ngoka tu na oku ke mu hokololela ayihe mbyoka twa ninga.” — Aahebeli 4:13.
(Maleaki 2:15, 16) Kalunga nani ine mu ninga olutu lumwe nombepo yimwe naye? Elalakano lye olini mpaka? Ndishi ou mone aanona mboka taa kala aantu lela yaKalunga. Shi tseyeni ano, pwaa kale nando ogumwe ta henge po omukiintu gwe. 16 Omuwa Kalunga kalsrael ota ti: “Otandi tondo eteyo lyoondjokana. Ondi tonde omuntu ta ningile omukadhi esithahoni li thike mpa. Kala u shi shi, waa yone euvaneko lyoye, ihe u dhiginine omukulukadhi gwoye.”
w02 5/1 ep. 27, okat. 19
Jehova oku tonde okwiitekathana
19 Mokutala kwaashoka shi li nawa, Malakia otu ulike kutya aasamane yamwe kaya li yi iteka po aakiintu yawo. Oya li ‘ye na oshihupe shombepo ondjapuki yaKalunga.’ (Ovelise 15) Lago enene, ehangano lyaKalunga nena olyu udha aalumentu ya tya ngaaka mboka ‘ya simaneka aakiintu yawo.’ (1 Petrus 3:7) Ihaya ningi nayi aakiintu yawo panyama nenge pakupopya, ihaye ya thiminike ya kuthe ombinga miilonga yopamilalo mbyoka ya gwana okudhinika, noihaya dhini aakiintu yawo mokukala ye na iihole naakiintu yalwe nenge mokutala omathano giipala. Ehangano lyaJehova olya lalekwa nuuyamba mokukala li na aakiintu oyendji Aakriste aadhiginini noye li aadhiginini muKalunga nomoompango dhe. Aalumentu naakiintu ya tya ngaaka oye shi shoka Kalunga e tonde nohaya dhiladhila nokulonga metsokumwe nasho. Tsikila ano okukala ngaashi yo, e to ‘vulika kuKalunga e li omupangeli’ nokuyambekwa nombepo ye ondjapuki. — Iilonga 5:29.
Konga omaliko gopambepo
(Maleaki 1:10) Omuwa Omunankondoawike ota ti: “Onda hala, gumwe gweni e edhile omiyelo dhotempeli, opo e mu keelele, mwaa teme omulilo gwosima koshiyambelo shandje. Kandi na ombili nane; itandi taamba omayambo ngoka tamu etele ndje.
Omanenedhiladhilo okuza membo lyaMaleaki
1:10. Jehova ka li nando a nyanyukilwa omayambo gaasaaseri aanalwiho mboka ya li taya futitha nokuli iilonga yanathangwa ngaashi okweedhila omiyelo nokutema omulilo koshiyambelo. Mbela inashi simana tuu, opo iilonga yetu yokulongela Kalunga, mwa kwatelwa uukalele wetu wopaKriste, tu yi longe tatu inyengithwa kohole yashili yokuhola Kalunga nosho wo aantu ooyakwetu, ihe hakokwiikongela nando iimaliwa! — Mateus 22:37-39; 2 Aakorinto 11:7.
(Maleaki 3:1) Omuwa Omunankondoawike ota yamukula: “Otandi ka tuma omutumwa gwandje okulongekidhila ndje ondjila. Nena Omuwa ngoka tamu mu kongo, ote ke ya ohaluka kotempeli ye. Omutumwa ngoka mwa yuulukwa, ote ke ya nota popi ehangano lyandje.”
‘Otandi Kala Pamwe Nane Omasiku Agehe’
5 Omathelemumvo manga Jesus inaa popya eyele lyiilya nomau, Jehova okwa li a nwetha mo omupolofeti Maleaki a hunganeke iiningwanima tayi tsu kumwe neyele lyaJesus. (Lesha Maleaki 3:1-4.) Johannes Omuninginithi oye a li ‘omutumwa ngoka a li o opaleke ondjila.’ (Mat. 11:10, 11) Sho Johannes e ya mo 29 E.N., ethimbo lyepangulo lyoshigwana shaIsraeli olya li lya hedha popepi. Jesus oye a li omutumwa omutiyali. Okwa opaleke lwaali otempeli muJerusalem, lwotango opetameko lyuukalele we nolutiyali olwopehulilo lyuukalele we. (Mat. 21:12, 13; Joh. 2:14-17) Onkee ano, iilonga yaJesus yokwoopaleka oya li tayi ka kutha ethimbo ele.
6 Egwanitho enene lyehunganeko lyaMaleaki olini? Momukokomoko gwoomvula omilongo ndhoka dha fala sigo omo 1914, C.T. Russell pamwe naayakuli ye oya li ya longo oshilonga sha fa shaJohannes Omuninginithi. Oshilonga shoka sha simana osha li sha kwatela mo okuyelitha ooshili dhOmbiimbeli. Aakonakonimbiimbeli oya li ya longo oshili kombinga yekuliloyambo lyaKristus, ya yaneke pomutenya elongo lyomulilo gwoheli, noyu uvitha ehulilo lyOmathimbo gAapagani ndyoka lya li tali ya. Ihe natango, opwa kala oongundu odhindjidhindji dhomalongelokalunga ndhoka dha li tadhi ti kutya dho aalanduli yaKristus. Onkee ano epulo lya kwata miiti olya li lya pumbwa okuyamukulwa: Oolye yomoongundu ndhoka ya li iilya? Opo epulo ndyoka li yamukulwe, Jesus okwa li a tameke okukonakona otempeli yopambepo mo 1914. Oshilonga shoka shokukonakona nokwoopaleka osha li sha kutha ethimbo, ano okuza mo 1914 sigo olwopetameko lyo 1919.
Elesho lyOmbiimbeli
(Maleaki 1:1-10) Ndika olyo elaka ndyoka Omuwa e li pe Maleaki, opo e li lombwele oshigwana shalsrael. 2 Omuwa ota ti kaantu ye: “Ondi mu hole aluhe.” Ihe oyo taa yamukula: “Ohole yoye owe yi tu ulukile mushike?” Omuwa ta yamukula: “Esau naJakob oya li aamwayinathana, ihe ngame onda li ndi hole Jakob noluvalo lwe 3 nonda tondo Esau noluvalo lwe. Onda mbugaleke oondundu dhaEsau nevi lye onde li thigile iithitukuti.” 4 Ngele oluvalo IwaEsau, Aaedomi, taa ti: “Iilando yetu oya hanagulwa po, ihe otatu yi tungulula,” nena Omuwa ota yamukula: “Yi tungululeni e tandi ke yi kumuna po ishewe. Aantu otaa ke yi ithana Oshilongo oshidhudhu’ na ‘Oshigwana shoka sha geelwa kOmuwa ndongo aluhe.’” 5 Oshigwana shalsrael otashi ka tala iinima mbika nomeho gawo yene e taa ti: “Omuwa oye omunankondo nokiilongo yilwe.” 6 Omuwa Omunankondoawike ota lombwele aayambi ta ti: “Omumati oha simaneke he, nomupiya oha simaneke mwene gwe. Ongame ho — omolwashike itaamu simaneke ndje? Ongame mwene gweni, ndele oshike itaamu tundu ndje? Ne otamu nyeme ndje, nonando tamu pula: ‘Otwe ku nyeme ngiini? 7 Oshoka ohamu yamba poshiyambelo shandje iikulyandjambo inaayi yogoka. Nena otamu pula: ‘Otwa nyengwa ngiini oku ku simaneka?’ Oshoka otamu dhiladhila kutya otamu vulu okudhina oshiyambelo shandje 8 Ngele tamu eta oshimuna oshiposi, mu shi yambele ndje, nani kape na epuko mpoka? Nongele tamu eta oshimuna oshilema nenge tashi alukwa, kali shi epuko ndyono? Yelekela utale, oshimuna sha tya ngaaka u shi faalele omuleli gwoshilongo shaandjeni! Ote ku taamba nuukuume nenge ote 9 ‘Ngashingeyi ne aayambi, kambadhaleni okupula Kalunga, e tu sile ohenda. Sho itaa yamukula nando Omagalikano geni, ombedhi oyeni. 10 Omuwa Omunankondoawike ota ti: “Onda hala, gumwe gweni e edhile omiyelo dhotempeli, opo e mu keelele, mwaa teme omulilo gwosima koshiyambelo shandje. Kandi na ombili nane; itandi taamba omayambo ngoka tamu etele ndje.