Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
1-7 APILILI
OMALIKO OKUZA MOOHAPU DHAKALUNGA | 1 AAKORINTO 7–9
“Oshi li omagano okukala inoo ya mondjokana”
(1 Aakorinto 7:32) Ngame onda hala, mu kale mwaa na iimpwiyu. Omulumentu ngoka inaa hokana, oti ipyakidhile owala niilonga yOmuwa, oshoka ota kambadhala okwoopalela Omuwa.
Longitha ompito kehe wu na manga inoo ya mondjokana
3 Olundji omuntu inaa ya mondjokana oha kala e na ethimbo lya gwana nosho wo emanguluko ndyoka kaali niwe kwaangoka a ya mondjokana. (1 Kor. 7:32-35) Ngaka oge li omauwanawa gi ikalekelwa ngoka taga vulu oku mu pa ompito a tamunune mo uukalele we, aambwalangandjeke ohole ye nokuhedha popepi naJehova. Onkee ano, Aakriste oyendji oya tseya kutya oshi na uuwanawa okukala inaaya ya mondjokana noya tokola “okwiikalela” uule wethimbo. Yalwe otashi vulika kaashi shi ehalo lyawo sho inaaya ya mondjokana, ihe sho oonkalo dhawo dha lunduluka, oya li ya konakona oonkalo dhawo pamwe negalikano e taya mono kutya nayo otaya vulu okutaamba ko nenyanyu onkalo ndjoka kekwatho lyaJehova. Kungawo, oya li ya taamba ko oonkalo dhawo e taya kala ya taamba ko okukala inaaya ya mondjokana. — 1 Kor. 7:37, 38.
(1 Aakorinto 7:33, 34) Ihe omulumentu ngoka a hokana, oti ipyakidhile niinima yomuuyuni, oshoka okwa hala okwoopalela omukadhi, 34 onkee ano okwa mangwa koombinga adhihe mbali. Omukiintu inaa hokanwa nenge ngoka omukadhona okwi ipyakidhila niilonga yOmuwa, oshoka okwa hala oku mu pa olutu nombepo ye. Ihe omukiintu a hokanwa oti ipyakidhile niinima yomuuyuni mbuka, oshoka okwa hala okwoopalela omulumentu gwe.
Omanenedhiladhilo okuza moontumwafo dha nyolelwa Aakorinto
7:33, 34 — Mbela uutumbulilo ‘iinima yuuyuni’ mbyoka omulumentu a hokana nomukiintu a hokanwa ha kala i ipyakidhila nayo otawu ti shike? Mpaka Paulus okwa li ta popi iinima yi na ko nasha nonkalo yesiku kehe, mbyoka Aakriste ya hokana ye na okwiipula nayo. Shika osha kwatela mo iikulya, oonguwo negumbo, ihe inashi kwatela mo iinima iiwinayi yuuyuni mbuka mbyoka Aakriste ye na okuhenuka. — 1 Joh. 2:15-17.
(1 Aakorinto 7:37, 38) Omumati ngoka u uvite kutya ota vulu okwiikalela inaa hokana, nopwaa na ethiminiko lyomuntu, ne shi ninge. Ngele ota vulu okwiipangela noku na etokolo, nena oto opaleke, ngele ita hokana. 38 Onkee ano omumati ngoka ta hokana omuyalekwa gwe, ota opaleke, naangoka itee shi ningi, sho a hala okwiikalela, ota ningi nawa unene.
w96 11/1 ep. 8, okat. 14
Okukala inoo ya mondjokana ompito yokulonga kuu na omapiyaganeko
14 Omukriste ngoka inaa ya mondjokana, ngoka ta longitha okukala kwe inaa ya mo, mokugwanitha po omalalakano ge gokwiihola mwene ita ningi “nawa” e vule Aakriste mboka ye li mondjokana. Ye ina ya mondjokana, ‘molwOshilongo shegulu,’ nenge molwUukwaniiwa, ihe omolwomatompelo gopaumwene. (Mateus 19:12) Omulumentu nenge omukiintu inaa ya mondjokana oku na okukala i “ipyakidhila niilonga yOmuwa,” molwaashoka okwa hala “okwoopalela Omuwa,” noku wape “okwiigandja moshilonga shOmuwa.” Shika otashi ti kutya okugandja eitulomo alihe mokulongela Jehova naKristus Jesus. Mokuninga ngaaka, opo owala Aakriste inaaya ya mondjokana taya ningi “nawa” ye vule mboka ye li mo.
Konga omaliko mOmbiimbeli
(1 Aakorinto 7:11) Ngele ote shi ningi, oku na okukala itaa yi we moondjokana nenge a hangane ishewe nomulumentu gwe. Omulumentu ina henga po nando omukadhi.
Oshigwedhelwako
Opwa li pu na oonkalo dhontumba moka Aakriste yamwe ya li ye wete taya thiminikwa noonkondo e taya tokola okutopoka nenge okuteya ondjokana, nonando kuume ina ya moluhondelo. Moshinima shoka, Ombiimbeli otayi ti kutya ngoka a thiga po mukwawo “oku na okukala itaa yi we moondjokana nenge a hangane ishewe” nakuume ke kopandjokana. (1 Kor. 7:11) Omukriste ngoka ina manguluka okuhokanununa nenge okuhokanununwa. (Mat. 5:32) Tala oonkalo oondhigu dhontumba ndhoka dha ningitha yamwe ya thige po oondjokana nenge ya topoke paveta (nando kashi li pamanyolo).
• Uuna omulumentu inaa hala okusila oshimpwiyu uukwanegumbo we. Uukwanegumbo otawu vulu okukala wa hepa noonkondo nokawu na iipumbiwa yakehe esiku, molwaashoka omulumentu ihe wu sile oshimpwiyu, nonando ota vulu oku shi ninga. Ombiimbeli otayi ti: ‘Ngele opu na omuntu ngoka itaa sile oshimpwiyu aanegumbo lye, oye okwi idhimbike eitaalo nomwiinayi e vulike komupagani.’ (1 Tim. 5:8) Ngele omulumentu ngono ina hala okulundulula omikalo dhe, omukulukadhi oku na okutokola ngele okwa pumbwa okugamena onkalonawa ye nosho wo yaanona ye mokuteya ondjokana paveta (nonando kashi li pamanyolo) nenge okukatuka onkatu yimwe yopaveta. Aakuluntugongalo oye na lela okukonakona nawa epopyo kutya omulumentu Omukriste ina hala okusila oshimpwiyu uukwanegumbo we. Omuntu ota vulu okukondwa ngele ina hala okusila oshimpwiyu uukwanegumbo we.
• Ehepeko lyopalutu lya kwata miiti. Kuume kopandjokana otashi vulika a kale e na onyanya noonkondo shoka tashi tula uukolele wakuume ke nomwenyo gwe moshiponga nokuli. Aakuluntugongalo oye na okukonakona oshinima shoka ngele kuume kopandjokana ngoka ta hepeke mukwawo oku li Omukriste. Omuntu ota vulu okukondwa ngele oha geye sha pitilila noha longitha oonkondo. — Gal. 5:19-21.
• Ngele uupambepo we wu li moshiponga. Kuume kopandjokana otashi vulika e shi ninge oshidhigu kumukwawo okulongela Jehova nenge otashi vulika e mu thiminike a yone iipango yaJehova momukalo gwontumba. Moshinima sha tya ngaaka, kuume kopandjokana ngoka e li moshiponga ota vulu okutokola a konge ombapila yopaveta yokutopoka, shoka tashi vulu oku mu kwathela a kale ta ‘vulika kuKalunga, ihe hakaantu.’ — Iil. 5:29.
(1 Aakorinto 7:36) Kombinga yayaali ya adhika ya yalekathana e taa tokola, yi idhilike oondjokana, otandi ti: Omumati ngele ita vulu okwiidhidhimika, nena naa hokane. Ngele taa hokana, itaa yono.
w00-E 7/15 ep. 31, okat. 2
Otatu vulu okukala twa yogoka muuyuni mbuka inaawu yogoka
Aagundjuka kaye na okutondokela mondjokana ngele ya adhika komahalo gopamilalo pethimbo lyokamukondapweyu. Aaihokani oya pumbwa okukala aadhiginini keuvaneko lyawo ndyoka ya ninga, ihe opo ya kale metsokumwe nalyo oye na okukala ya koka. (Genesis 2:24) Oshi li nawa ya tegelele sigo ya “koko” (OB-1954), oshoka pethimbo lyuugundjuka omahalo gopamilalo ohaga kala ge na oonkondo nohashi vulika ga ningithe omuntu a ninge etokolo lya puka. (1 Aakorinto 7:36) Otashi ka kala sha nika uusama ngele omuntu ngoka a koka nokwa hala okuya mondjokana, okwa yi momilalo, molwaashoka owala kee wete kuume kopandjokana to opalele. Ngele te shi ningi, ota yono.
Elesho lyOmbiimbeli
(1 Aakorinto 8:1-13) Ngashingeyi ote popi kombinga yonyama ya yambelwa iikalunga. Osho oshipu okudhiladhila kutya tseni atuheni otwa tseya, ohula oshike. Ihe okutseya otaku fala omuntu meinenepeko, nohole otayi tungu. 2 Omuntu ngoka ta dhiladhila kutya oshinima shontumba oku shi shi, ke na naanaa ontseyo ya gwana. 3 Ihe ngoka e hole Kalunga, okwa tseyika wo kuKalunga. 4 Kombinga yokulya onyama ndjoka ya yambelwa iikalunga, tse otwa tseyeni kutya iikalunga oyo iinima ihaayi kwatha sha. Tse otu shi shi kutya oku na owala Kalunga gumwe. 5 Oku na ngaa mbyoka haku tiwa “ookalunga,” ongele megulu nenge kombanda yevi. Ihe nando oku na “ookalunga” oyendji “naawa” oyendji, 6 tseni otu na owala Kalunga gumwe. Oye Tate yetweni, omushiti gwiinima ayihe, mungoka tu na ethikilo. Otu na wo Omuwa gumwe awike, Jesus Kristus, ngoka Kalunga e mu shititha iinima ayihe, notu li po omolwe. 7 Ihe haayehe ya tseya oshili ndjika. Aantu yamwe oyi igilila iikalunga. Onkee ano sigo onena ndjika ngele taa li onyama ya tya ngeyi, otaye yi dhiladhila kutya oya yambelwa iikalunga. Eiyuvo lyawo enkundi noyu uvite taa nyatekwa kiikulya ya tya ngaaka. 8 Iikulya itayi vulu nando oku tu hedhitha popepi naKalunga. Itatu kanitha sha, ngele itatu li iikulya mbyoka; itatu likola wo sha, ngele tatu yi li. 9 Kotokeni ano, emanguluko lyeni okutokola oshinima shika lyaa fale aantu mboka aankundi muulunde. 10 Oshoka omuntu ngoka e na eiyuvo enkundi moshinima shika, ngele ta mono ngoka e na owino, ta li iikulya motempeli yoshikalunga, omunkundi a tya ngaaka ita tsuwa omukumo okulya iikulya mbyoka ya yambelwa iikalunga? 11 Ano mukweni a tya ngaaka omunkundi, ngoka Kristus a si wo omolwe, ota kana molwowino woye. 12 Ngele tamu yono ngaaka kuyakweni mboka notamu nkundipaleke eiyuvo lyawo, otamu yono kuKristus. 13 Ngele iikulya yontumba otayi fala mukwetu muulunde, nena ngame kombinga yandje itandi li we onyama, opo ndaa fale mukwetu muulunde.
8-14 APILILI
OMALIKO OKUZA MOOHAPU DHAKALUNGA | 1 AAKORINTO 10–13
“Jehova omudhiginini”
(1 Aakorinto 10:13) Emakelo ndyoka lye mu adha, olyo tuu ndyoka hali adha aantu ayehe, Kalunga oku shi kwiinekelwa. Onkee ite mu ethele memakelo li vule oonkondo dheni. Ihe ngele ta pitika, mu makelwe, ote mu pe ompito okuza mo mulyo noonkondo dhoku li humbata.
Omapulo ga za kaaleshi
Omuyapostoli Paulus okwa nyola a ti kutya Jehova “ite mu ethele memakelo li vule oonkondo dheni.” (1 Kor. 10:13) Mbela shino otashi ti kutya Jehova oha tala komeho yethimbo kutya oshike tatu vulu okwiidhidhimikila e ta tokola kutya emakelo lini tali ke tu adha?
▪ Tala koshiholelwa shomuntu ngoka e na etaloko lya tya ngaaka. Omumwatate gumwe ngoka e na okamwanamati ki idhipaga okwa ti: ‘Mbela Jehova okwa kala e wete nale komeho yethimbo kutya ngame nomukulukadhi gwandje otatu ki idhidhimikila eidhipago lyomwanamati gwetu? Mbela osha ningwa, molwaashono Jehova a kala nale e shi kutya otatu vulu oku shi idhidhimikila?’ Mbela opu na ngaa etompelo lyokolela ndyono tatu vulu okwiitaala kutya Jehova oye ha pitika iinima ya tya ngawo yi tu ningilwe monkalamwenyo?
Okutala koohapu dhaPaulus ndhoka dhi li mAakorinto yotango 10:13 otashi tu eta pehulithodhiladhilo kutya Jehova iha kala e shi komeho yethimbo kutya otatu vulu okwiidhidhimikila uupyakadhi wontumba. Iha tokola kutya uudhigu wuni tawu tu adha. Natu taleni komatompelo gane ngoka taga vulu oku tu kwathela tu uve ko oshinima shoka.
Shotango, Jehova okwa shiti aantu ye na emanguluko lyokuninga omatokolo. Okwa hala tu hogolole shoka twa hala okuninga monkalamwenyo yetu. (Deut. 30:19, 20; Jos. 24:15) Ngele otwa hogolola tu ninge shoka shu uka, nena otu na einekelo kutya Jehova ota ka wilika oonkatu dhetu. (Omayel. 16:9) Ihe ngele otwa hogolola okuninga shoka sha puka, otatu ka adhika kiilanduliko. (Gal. 6:7) Ngele Jehova oye ha tokola kutya omamakelo geni tage tu adha, mbela ando otu na ngaa shili emanguluko lyokuninga omatokolo?
Oshitiyali, Jehova ihe tu gamene ‘kiiningwanima inaayi tegelelwa.’ (Omuuv. 9:11, NW) Iiponga iinyanyalithi, pamwe niilanduliko yayo iinyanyalithi otayi vulu okuningwa, molwaashoka tu li pehala lya puka pethimbo lya puka. Jesus okwa li a popi kombinga yoshiponga moka mwa sile aantu 18 sho ya gwilwa koshungongulu. Okwa popi kutya eso lyawo olye etithwa koshiponga, ihe inali etithwa kuKalunga. (Luk. 13:1-5) Kashi li pandunge okudhiladhila kutya uuna pwa holoka oshiponga Kalunga oye ha tokola komeho yethimbo kutya oolye taya kala nomwenyo noolye taya si.
Oshititatu, kehe gumwe gwomutse okwa pumbwa okukala omudhiginini kuJehova. Dhimbulukwa kutya Satana okwa li a tula momalimbililo uudhiginini waayehe mboka taya longele Jehova, ta ti kutya itaya ka kala aadhiginini kuJehova ngele ya adhika komamakelo. (Job 1:9-11; 2:4; Eh. 12:10) Ando Jehova okwe tu gamenene komamakelo gontumba, molwaashoka e wete kutya itatu vulu oku gi idhidhimikila, mbela ando epopyo lyaSatana kutya ohatu longele Kalunga omolwokwiihola mwene ando inali kala nando li li mondjila?
Oshitine, Jehova ina tseya kehe shimwe shoka tashi ke tu ningilwa. Edhiladhilo kutya Kalunga okwa tokola nale kutya omamakelo geni tage ke tu adha, otali gandja edhiladhilo kutya oku shi kehe shimwe kombinga yonakuyiwa yetu. Ihe Omanyolo hasho taga ti ngaaka. Odhoshili kutya Kalunga ota vulu okukala e shi onakuyiwa yetu. (Jes. 46:10) Ihe Ombiimbeli otayi ulike kutya iha tokola kutya oshike tashi ke tu ningilwa komeho. (Gen. 18:20, 21; 22:12) Nonando Jehova oku na oonkondo dhokutseya onakuyiwa yetu, ohe dhi longitha pandjele, molwaashoka okwa simaneka emanguluko lyetu lyokuninga omatokolo. Mbela shoka hasho twa tegelela Kalunga ngoka a simaneka emanguluko lyetu noha longitha aluhe oonkondo dhe nondjele a kale? — Deut. 32:4; 2 Kor. 3:17.
Ongiini mbela tatu vulu okuuva ko oohapu dhaPaulus ndhoka tadhi ti: ‘Kalunga ite mu ethele memakelo li vule oonkondo dheni’? Paulus mpaka okwa li a yelitha shoka Jehova ha ningi pethimbo tu li muudhigu, ihe hapethimbo inaawu tu adha. Oohapu dhomuyapostoli otadhi tu shilipaleke kutya nonando otu iyadhe muudhigu wu thike peni monkalamwenyo yetu, Jehova ote ke tu kwatha ngele otwe mu inekela. (Eps. 55:22) Oohapu dhaPaulus tadhi hekeleke odha kankamena kiinima iyali.
Oshinima shotango, omamakelo ngoka hage tu adha ogo haga “adha aantu ayehe.” Onkee ano, oge li oshitopolwa shonkalamwenyo. Ngele otwa kala twi inekela Jehova, omamakelo ngoka itaga kala ge vule oonkondo dhetu. (1 Pet. 5:8, 9) Menyolo ndika lyAakorinto yotango 10:13, Paulus okwa li ta popi omamakelo ngoka ga li ga adha Aaisraeli mombuga. (1 Kor. 10:6-11) Sho Aaisraeli ya li mombuga kapu na nando olimwe lyomomamakelo ngoka ge ya adha ya li itaaya vulu okwiidhidhimikila. Paulus okwe shi popi lwiikando ine a ti: “Yamwe yomuyo” inaya vulika kuJehova. Shinikitha oluhodhi, Aaisraeli yamwe oya li yi iyethele momahalo ga puka, molwaashoka oye etha okwiinekela muKalunga.
Oshitiyali, “Kalunga oku shi kwiinekelwa.” Ondjokonona yankane Kalunga a li u ungaunga noshigwana she otayi ulike kutya ohu ulike ohole ye yuudhiginini “kumboka ye mu hole e taa vulika kiipango ye.” (Deut. 7:9) Ondjokonona ndjoka otayi ulike wo kutya Kalunga oha gwanitha po aluhe omauvaneko ge. (Jos. 23:14) Mokutala kondjokonona ye yonale yi na ko nasha nuudhiginini, mboka ya li ye mu hole nohaya vulika kuye, oya li yi inekela kutya ota ka gwanitha omauvaneko ngoka gaali ge na ko nasha nomamakelo ngoka ya li tashi vulika ya taalele: (1) Jehova ite ke ye ethela memakelo li vule oonkondo dhawo nosho wo kutya (2) ‘ote ke ya pa ompito okuza mo mulyo.’
Jehova oha gandja ngiini kwaamboka ye mu inekela ompito yokuza mo memakelo? Osha yela kutya ngele okwe shi hala, oha vulu okukutha po emakelo ndyoka. Ihe dhimbulukwa oohapu dhaPaulus ndhoka tadhi ti: ‘Jehova ote mu pe ompito okuza mo mulyo noonkondo dhoku li humbata.’ Onkee ano, poompito odhindji Jehova oha gandja “ompito okuza mo mulyo” moku tu pa shoka twa pumbwa, opo tu vule okwiidhidhimikila omamakelo nomupondo. Natu taleni omikalo dhimwe moka Jehova hashi vulika e tu pe ompito yokuza momamakelo:
▪ Jehova ‘ohe tu kwatha muudhigu wetu auhe.’ (2 Kor. 1:3, 4) Oha vulu okungungumaneka omadhiladhilo getu, omitima dhetu nosho wo omaiyuvo getu okupitila mOohapu dhe, mombepo ye ondjapuki nomiikulya yopambepo mbyoka hatu pewa komupiya omudhiginini. — Mat. 24:45; Joh. 14:16, Rom. 15:4.
▪ Ota vulu okulongitha ombepo ondjapuki yi tu wilike. (Joh. 14:26) Uuna uudhigu wa holoka po, ombepo ondjapuki otayi vulu oku tu kwathela tu dhimbulukwe omahokololo gOmbiimbeli nomakotampango, opo tu vule okuninga omatokolo gopandunge.
▪ Ota vulu okulongitha aayengeli, opo ye tu kwathele. — Heb. 1:14.
▪ Ota vulu oku tu kwathela okupitila maalongelikalunga ooyakwetu ‘ya kale ekwatho enene’ kutse. — Kol. 4:11.
Ano nani oohapu dhaPaulus ndhoka dha nyolwa mAakorinto yotango 10:13 otadhi ti shike? Jehova iha hogolola noiha tokola kutya uudhigu wuni tu na okutaalela. Ihe ngele otwi iyadha tu li muudhigu, otatu vulu okukala nuushili mbuka: Ngele otwa kala twi inekela thiluthilu muJehova, ite ke etha nando tu ye muudhigu mboka itaatu vulu oku wu humbata, ote ke tu pa aluhe ompito yokuza mo muwo. Edhiladhilo ndika itali hekeleke tuu!
(1 Aakorinto 10:13) Emakelo ndyoka lye mu adha, olyo tuu ndyoka hali adha aantu ayehe, Kalunga oku shi kwiinekelwa. Onkee ite mu ethele memakelo li vule oonkondo dheni. Ihe ngele ta pitika, mu makelwe, ote mu pe ompito okuza mo mulyo noonkondo dhoku li humbata.
(1 Aakorinto 10:13) Emakelo ndyoka lye mu adha, olyo tuu ndyoka hali adha aantu ayehe, Kalunga oku shi kwiinekelwa. Onkee ite mu ethele memakelo li vule oonkondo dheni. Ihe ngele ta pitika, mu makelwe, ote mu pe ompito okuza mo mulyo noonkondo dhoku li humbata.
Konga omaliko mOmbiimbeli
(1 Aakorinto 10:8) Inatu hondeleni, ngaashi yamwe yomuyo ya ningi; onkee oya yonwa po omayuvi omilongo mbali nagatatu mesiku limwe.
w04-E 4/1 ep. 29
Omapulo ga za kaaleshi
Omolwashike ovelise ndjika tayi popi kutya Aaisraeli 23 000 oya si mesiku limwe sho ya hondele, omanga Numeri 25:9 tayi ti kutya aantu 24 000 ya si?
Opu na omatompelo ogendji ngoka taga ulike kutya omolwashike omiyalu ndhoka dha yoolokathana. Etompelo limwe olyo kutya omuyalu gwokondandalunde otashi vulika gu li pokati ko 23 000 no 24 000.
Natu tale ishewe ketompelo limwe. Omuyapostoli Paulus okwa li a popi kombinga yAaisraeli mboka ya li haya kala muShittim, opo a londodhe Aakriste yomuKorinto, oshilando shoka sha li sha tseyikila omikalo dha nyata. Okwa nyola a ti: “Inatu hondeleni, ngaashi yamwe yomuyo ya ningi; onkee oya yonwa po omayuvi omilongo mbali nagatatu mesiku limwe.” Sho Paulus a popi mboka ya li ya dhipagwa kuJehova molwaashoka ya hondele, okwe ya popi ye li omayuvi omilongo mbali nagatatu. — 1 Aakorinto 10:8.
Ihe Numeri ontopolwa 25 ote tu lombwele kutya “Aaisraeli sho ya simaneke ngeyi Baal, oshikalunga shaPeor, Omuwa okwe ya geele.” Opo ihe Jehova okwa lombwele Moses a dhipage “aawiliki yAaisraeli ayehe.” Moses okwa li a lombwele aatokolihapu ye shi ninge. Hugunina, Pinehas okwa katuka neendelelo e ta dhipaga Omuisraeli ngoka e eta omufuko Omumidiana montanda. Kungawo, elega ndyoka lya yono po Aaisraeli, “olya kodha.” Ehokolo olya hulu tali ti kutya elega “olya faalele nokuli aantu 24 000.” — Numeri 25:1-9.
Osha yela kutya omwaalu ngoka gwa tumbulwa muNumeri ogwa kwatela mo “aawiliki yAaisraeli” mboka ya li ya dhipagwa kaatokolihapu nosho wo aantu mboka ya li ya dhipagwa kuJehova mwene. Otashi vulika mboka ya dhipagwa kaatokolihapu ya li eyuvi, naashoka osha ningitha omwaalu gu ninge 24 000. Kutya nduno aawiliki yAaisraeli oya li ya hondele, ya kutha ombinga miituthi yomasaagelo nenge ya pitike mboka ya yi moluhondelo ye shi ninge, oya li ye na ondjo sho ya ningi ‘aalongeli yaBaal Peor.’
Embo limwe lya popya kombinga yOmbiimbeli olya yelitha oshitya “omulongeli” kutya otashi ti “okwiimanga kumwe nomuntu gwontumba.” Aaisraeli oya li oshigwana sha yapulilwa Jehova, ihe sho ya ‘ningi aalongeli yaBaal Peor,’ oya teya po ekwatathano lyawo naKalunga. Konima yoomvula 700, Jehova okwa popi kombinga yAaisraeli okupitila momupolofeti Hosea a ti: “Ihe sho ye ya kondundu Peor, oya tameke okulongela Baal, mbalambala oya ningi iikungitha ngaashi iikalunga mbyoka ye yi hole.” (Hosea 9:10) Ayehe mboka ye shi ningi oya li yi ilongele epangulo lyaKalunga. Onkee ano, Moses okwa li a dhimbulukitha Aaisraeli a ti: “Omwa mono ne yene shoka Omuwa a ningi pondundu Peor. Okwa yono po ayehe mboka ya longele Baal, oshikalunga shaPeor.” — Deuteronomium 4:3.
(1 Aakorinto 11:5, 6) Nomukiintu kehe ngoka ta galikana nenge tu uvitha melongelokalunga lyaayehe inaa zala sha komutse, ota shekitha omulume. Kapu na eyooloko pokati ke naangoka a kululwa omutse aguhe. 6 Omukiintu ngele ita siikile omutse gwe, nena na kululwe omutse aguhe. Osho ohoni yowala, ngele omukiintu ta kululwa omutse aguhe, nenge omafufu taga tetwa, ga ninge omafupi, ihwepo a siikile omutse gwe.
(1 Aakorinto 11:10) Omolwaayengeli omukiintu oku na okusiikila omutse gwe, opo a holole kutya oku li mepangelo lyomulumentu gwe.
w15-E 2/15 ep. 30
Omapulo ga za kaaleshi
Mbela omukiintu Omukriste okwa pumbwa okuzala sha komutse sho ta kwatele komeho ekonakonombiimbeli uuna ta longo pamwe nomumwatate?
▪ MOshungolangelo 15 Juli 2002 omwa li mu na oshitopolwa “Omapulo ga za kaaleshi,” tashi popi kutya omumwameme oku na okuzala sha komutse uuna ta kwatele komeho pekonakonombiimbeli e li nomumwatate, kutya nduno okwa ninginithwa nenge hasho. Sho uuyelele mboka wa talululwa, otwa mona kutya uuyelele mboka owa pumbwa okulundululwa.
Ngele omumwatate ngoka ta longo pamwe nomumwameme okwa ninginithwa, omumwameme oku na okuzala sha komutse. Kungawo, otu ulike kutya okwa simaneka elongekidho lyaJehova lyuukwamutse megongalo lyopaKriste, molwaashoka ota longo oshilonga shoka ando shi na okulongwa kaamwatate. (1 Kor. 11:5, 6, 10) Ihe nonando ongawo, ota vulu okupula omumwatate a kwatele komeho ekonakono ngele ota vulu oku shi ninga.
Mepingathano naashoka, ngele omumwameme ota longo pamwe nomumwatate inaa ninginithwa, ngoka kee shi omusamane gwe, pamanyolo, inashi pumbiwa a zale sha komutse. Ihe shi ikolelela keiyuvo lyawo, aamwameme yamwe otashi vulika ya kale yu uvite kutya oya pumbwa okuzala sha komutse monkalo ndjoka.
Elesho lyOmbiimbeli
(1 Aakorinto 10:1-17) Onkee ano aamwameme, onda hala oku mu dhimbulutha shoka sha li sha ningilwa ootate, sho ya li ya landula Moses. Ayehe oya li megameno lyoshikogo noinaa mona oshiponga mokutokola Efuta etiligane. 2 Ayehe oya shashelwa moshikogo nomefuta mokulandula Moses. 3 Oyo oya lile ayehe oshikwiila shimwe shopambepo 4 noya nwine okunwa kumwe kwopambepo; oshoka oya nu momeya ga zi memanya lyopambepo ndyoka lye ende pamwe nayo; nemanya ndyoka oKristus. 5 Onkene tuu oyendji yomuyo Kalunga ine ya hokwa, ihe omidhimba dhawo odha halakanene nombuga ayihe. 6 Ano iinima ayihe ya tya ngeyi oyo iiholelwa yoku tu londodha, twaa longe iilonga iiwinayi, ngaashi yo ya ningile. 7 Inatu simaneka iikalunga, ngaashi yamwe yomuyo ye shi ningi, nongaashi enyolo tali ti: “Aantu oya kuutumba e taa li yo taa nu noya tutula uudhano.” 8 Inatu hondeleni, ngaashi yamwe yomuyo ya ningi; onkee oya yonwa po omayuvi omilongo mbali nagatatu mesiku limwe. 9 Inatu hindeni Omuwa, ngaashi yamwe yomuyo ye shi ningi e taa dhipagwa komayoka. 10 Inamu ngungutula, ngaashi yamwe yomuyo ye shi ningi e taa yonwa po komuyengeli gweso. 11 Iinima ayihe mbika oye ya adha, yi gune aantu yalwe noya nyolwa, yi tu londodhe. Oshoka otu li methimbo, uuna ehulilo li li popepi. 12 Ngoka ta dhiladhila kutya okwa thikama, na kotoke, kaa gwile po. 13 Emakelo ndyoka lye mu adha, olyo tuu ndyoka hali adha aantu ayehe, Kalunga oku shi kwiinekelwa. Onkee ite mu ethele memakelo li vule oonkondo dheni. Ihe ngele ta pitika, mu makelwe, ote mu pe ompito okuza mo mulyo noonkondo dhoku li humbata. 14 Onkee ano, ookuume aaholike, inamu simaneka iikalunga. 15 Otandi popi, ngaashi tandi lombwele aantu aanandunge; tokoleni ne yene okupopya kwandje. 16 Oshitenga shomayambeko shono hatu hambelelele Kalunga nohatu shi nu nokupaathana, ihatu nu nani ombinzi yaKristus? Noshikwiila shono hatu topola, ihatu topolelathana nani olutu lwaKristus, uuna tatu shi li? 17 Sho hatu li oshikwiila shimwe ashike, nonando otu li oyendji, otashi ulike kutya otse olutu lumwe, oshoka ohatu li oshikwiila shimwe.
22-28 APILILI
OMALIKO OKUZA MOOHAPU DHAKALUNGA | 1 AAKORINTO 14–16
“Kalunga ota ka ninga ‘omupangeli gwaayihe’”
(1 Aakorinto 15:24, 25) Nena otaku ya ihe ehulilo; Kristus ota ka sinda ihe aapangeli yomombepo, omapangelo noonkondo nota ka gandja oshilongo kuTate Kalunga. 25 Oshoka Kristus oku na okupangela, sigo Kalunga a sindi aatondi ayehe e te ya tula kohi yoompadhi dhaKristus.
w98 7/1 ep. 29, okat. 10
‘Eso Otali Ka Hanagulwa Po’
10 “Ehulilo” olyo ehulilo lyElelo lyOomvula Eyuvi lyaKristus, uuna Jesus ta ka gandja neifupipiko nonesimaneko Uukwaniilwa kuKalunga ke naHe. (Ehololo 20:4) Elalakano lyaKalunga ‘lyokuhanganitha ayihe kumwe muKristus’ otali ka kala lya gwanithwa. (Aaefeso 1:9, 10) Ihe tango, Kristus ota ka adhika a hanagula po “elelo alihe nepangelo noonkondo adhihe” ndhoka dha pataneke ehalo lyaKalunga e li Omunamapangelo agehe. Shika osha kwatela mo oshindji shaahe shi owala ehanagulo puHarmagedon. (Ehololo 16:16; 19:11-21) Paulus ota ti: “[Kristus] oye e na okupangela sigo a tula aatondi ayehe kohi yoompadhi dhe. [Omutondi gwahugunina ngoka ta hanagulwa po oye eso, KB].” (1 Aakorinto 15:25, 26) Eeno, uulunde neso mbyoka ye etithwa kuAdam otayi ka kuthwa po. Ano kapu na omalimbililo, Kalunga ‘oombiladhimbuluko’ ota ka adhika e dhi yeleka mokuyumudha aasi. — Johannes 5:28, NW.
(1 Aakorinto 15:26) Omutondi gwahugunina e na okusindwa, oye eso.
Uukwaniilwa tawu gwanitha po ehalo lyaKalunga kombanda yevi
21 Ihe oshike tashi ka ningilwa eso ndyoka hali etithwa komikithi ndhoka dhe etithwa kuulunde? Eso olyo “omutondi gwahugunina” ngoka te tu tyakaleke atuhe, oshoka inatu gwanenena. (1 Kor. 15:26) Ihe mbela eso otali sindi ngaa Jehova? Tala kwaashoka Jesaja a hunganekele: “OMUWA Omupangeliawike ota ka hanagula po eso sigo aluhe. Ota ka theta po omahodhi momeho gaayehe.” (Jes. 25:8) Dhiladhila owala nkene tashi ka kala. Itaku ka ningwa we omafumviko, itaku ka kala we omayendo noitaku ka kala we oluhodhi. Pehala lyaashono, otaku ka kala enyanyu enene sho Jehova ta ka yumudha aasi. (Lesha Jesaja 26:19.) Pehulilo, uuwehame awuhe mboka hawu etithwa keso otawu ka hula po.
(1 Aakorinto 15:27, 28) Oshoka enyolo otali ti: “Kalunga okwa tula iinima ayihe kohi yoompadhi dhaKristus.” Shika osha yela kutya iitya mbika “iinima ayihe” inayi kwatela mo Kalunga ye mwene, ngoka ta tula iinima ayihe kohi yoompadhi dhaKristus. 28 Ihe uuna iinima ayihe ya tulwa mepangelo lyaKristus, nena Omwana oti itula wo ye mwene kohi yepangelo lyaKalunga, ngoka a tula iinima ayihe kohi yepangelo lye; naKalunga ota ka ninga oye awike omupangeli gwaayihe.
Kevi otaku ka kala ombili uule woomvula eyuvi nosigo aluhe
17 Oohapu ndhoka tadhi ti kutya “Kalunga ota ka ninga oye awike omupangeli gwaayihe,” odha ngonga nawa kutya onkalamwenyo otayi ka kala ngiini pehulilo lyoomvula eyuvi. Shoka osha hala okutya shike? Dhiladhila nkene onkalamwenyo ya li muEden, sho Adam naEva ya li ya gwanenena noye li iilyo yegumbo lyaJehova li na ombili nelongelokumwe. Jehova, Omunamapangelo agehe, oye a li ta pangele eshito lye alihe mwa kwatelwa aayengeli naantu. Oya li haya vulu okupopya naye mwene noku mu longela nokwa li e ya laleka nuuyamba. Okwa li “oye awike omupangeli gwaayihe.”
Konga omaliko mOmbiimbeli
(1 Aakorinto 14:34, 35) Aakiintu naa kale ya mwena miigongi yegongalo. Inaa pitikwa okupopya; ongaashi ompango yAajuda tayi ti kutya kaye na okuwilika. 35 Ihe ngele oya hala okutseya sha, naa pule aalumentu yawo megumbo. Omukiintu ngoka ta popi moshigongi shegongalo, oti isitha ohoni.
w12-E 9/1 ep. 9, oshimpungu
Mbela omuyapostoli Paulus okwa li i indike aakiintu kaaya popye?
Omuyapostoli Paulus okwa li a nyola a ti: “Aakiintu naa kale ya mwena miigongi yegongalo.” (1 Aakorinto 14:34) Okwa li a hala okutya shike? Mbela okwa li e ya dhina? Hasho nando. Olundji okwa li ha popi kombinga yelongo ewanawa ndyoka hali gandjwa kaakiintu. (2 Timoteus 1:5; Titus 2:3-5) Paulus montumwafo ye ndjoka a nyolela Aakorinto ina kumagidha owala aakiintu, ihe okwa kumagidha wo mboka haya popi omalaka nokuhunganeka ya “kale ya mwena” uuna omwiitaali omukwawo ta popi. (1 Aakorinto 14:26-30, 33) Otashi vulika aakiintu yamwe Aakriste ya li ya nyanyukilwa noonkondo eitaalo lyawo ndyoka opo ya mono, e taya kala taya yi omupopi moshipala moku mu pula omapulo, shoka sha li omukalondjigilile moshitopolwa shoka. Opo Paulus a yande evundakano ndyoka, okwa li e ya ladhipike ya “pule aalumentu yawo megumbo.” — 1 Aakorinto 14:35.
(1 Aakorinto 15:53) Oshoka shoka tashi ka yonuka po, oshi na okwiizaleka shoka itaashi ka yonuka po; naashoka tashi ka sa, oshi na okwiizaleka shoka itaashi si.
w98 7/1 ep. 20, okat. 7
‘Eso Otali Ka Hanagulwa Po’
7 Opo nduno Paulus ota ti: “Neyumuko lyaasi osho li li; omeyonuko tamu kunwa, mokwaayonuka tamu yumudhwa.” (1 Aakorinto 15:42) Olutu lwopantu, nokuli nando olwa gwanenena, ohalu yonuka. Ohalu vulu okudhipagwa. Pashiholelwa, Paulus okwa ti kutya Jesus omuyumudhwa ‘oye ke na okushuna we meso.’ (Iilonga 13:34) Ye ita ka shuna nando momwenyo hagu yonuka, nokuli nando oku na olutu lwopantu lwa gwanenena. Omalutu ngoka Kalunga ta pe aagwayekwa aayumudhwa ihaga yonuka — sha hala okutya, ihaaga si nenge go ole. Paulus ota tsikile: “Mokudhinwa tamu kunwa, omeadhimo tamu yumudhwa; muunkundi tamu kunwa, omoonkondo tamu yumudhwa; otamu kunwa olutu lwopanshitwe, taku yumudhwa olutu lwopambepo.” (1 Aakorinto 15:43, 44) Natango, Paulus ota ti: “Oshoka shika shopayonuko oshi na okuzala shiyaka shaa na eyonuko.” Okwaahasa otashi ti onkalamwenyo kaayi na ehulilo ndjoka ihaayi vulu okuhanagulwa po. (1 Aakorinto 15:53; Aaheberi 7:16) Momukalo nguka, aayumudhwa oya zala “efano lyaanguka gwomegulu,” Jesus, ngoka a ningi eyumuko lyawo tali wapa. — 1 Aakorinto 15:45-49.
Elesho lyOmbiimbeli
(1 Aakorinto 14:20-40) Aamwameme, inamu kala mwa fa uunona mokudhiladhila. Kombinga yuuwinayi kaleni mwa fa uunona, ihe ningeni aakuluntu mokudhiladhila. 21 MOmanyolo otamu tiwa: “Otandi ka lombwela aantu mbaka, Omuwa osho ta ti: Otandi ke ya lombwela momakana gaantu taa popi omalaka omakwiilongo. Otandi ka popitha omilungu dhaakwiilongo. Ihe nando ongaaka, aantu yandje itaa ka pulakena ndje.” 22 Onkee ano omagano gokupopya omalaka gaa shiwike ogo endhindhiliko lyaamboka inaa itaala, halyaamboka yi itaala. Ihe omagano gokupopya elaka lyaKalunga ogo endhindhiliko lyooyitaali, halyaamboka yaa shi ooyitaali. 23 Ngele ano egongalo alihe tali gongala, nangele gumwe ota tameke okupopya omalaka gaa shiwike, nena yakweni mboka ihaa popi omalaka nosho mboka kaaye shi ooyitaali, ngele taye ya mo, otaye mu dhiladhilile ngiini? Ndishi otaa ti: “Omwa piyagana?” 24 Ihe uuna ayehe taa popi elaka lyaKalunga, e tamu ya omuntu ini itaala nenge ngoka ihaa popi omalaka, nena ota hololelwa oondjo dhe keuvitho lyu uvitike. 25 Omadhiladhilo ge ngoka ga holama, otaga etwa puuyelele, nota tameke okutsa oongolo koshipala shaKalunga e ta ti: “Eeno, Kalunga oku li mpaka mokati keni.” 26 Aamwameme, onda hala okupopya shike ano? Sho hamu gongala melongelokalunga, ohamu kala ngeyi: Gumwe oti imbi eimbilo, gumwe ota longo yakwawo, gumwe oku na ehololo lyaKalunga, gumwe ota popi omalaka gaa shiwike namukwawo ota fatulula shoka taga ti. Kehe shimwe oshi na okukala ekwatho lyegongalo. 27 Melongelokalunga ngele omu na gumwe ta popi omalaka gaa shiwike, nena yaali nenge yatatu otaa vulu okupopya wo melandulathano ewanawa, ihe omu na okukala gumwe ta fatulula shoka taa ti. 28 Ihe ngele kapu na omuntu ta vulu okufatulula, nena inaku kala nando ogumwe ta popi megongalo, shila na kale owala ta popi puye mwene nenge ta popi kuKalunga. 29 Yaali nenge yatatu mboka ya pewa elaka lyaKalunga, naa popye, manga yakwawo yalwe taa konakona shoka taa popi. 30 Ihe gumwe gwaamboka ya kuutumba ngele okwa pewa elaka kuKalunga, nena ngoka a adhika ta popi, na mwene manga. 31 Amuhe otamu vulu okupopya elaka lyaKalunga, ihe shi ningeni koogumwe nagumwe, opo ayehe yi ilonge noya tsuwe omukumo. 32 Omagano gokupopya elaka lyaKalunga oge na okukalwa nago nawa komupopi. 33 Oshoka Kalunga ine tu ithanena okukala kwaa na elandulathano, ihe okukala tu na ombili. Momagongalo agehe gaantu yaKalunga omu na okukala omukalo nguka: 34 Aakiintu naa kale ya mwena miigongi yegongalo. Inaa pitikwa okupopya; ongaashi ompango yAajuda tayi ti kutya kaye na okuwilika. 35 Ihe ngele oya hala okutseya sha, naa pule aalumentu yawo megumbo. Omukiintu ngoka ta popi moshigongi shegongalo, oti isitha ohoni. 36 Nenge one amuke aapopi yoohapu dhaKalunga? Nenge one amuke mu na okupopithwa kudho? 37 Ngele oku na ngoka ti itala kutya oye omutumwa gwaKalunga nenge e na omagano gopambepo, oku na okutseya kutya mpaka otandi mu nyolele shoka sha zi kOmuwa. 38 Ngele ke na ko nasha nasho, osho tuu wo nOmuwa ke na ko nasha naye. 39 Aamwameme, ihaleleni okupopya elaka lyaKalunga, ihe inamu indika ngoka ta popi omalaka gaa shiwike. 40 Kehe shimwe nashi ningwe palandulathano nopamukalo omwaanawa.
29 APILILI–5 MEI
OMALIKO OKUZA MOOHAPU DHAKALUNGA | 2 AAKORINTO 1–3
“Jehova, ‘oKalunga ngoka kuye haku zi ekwatho alihe’”
(2 Aakorinto 1:3) “Kalunga, He yOmuwa gwetu Jesus Kristus, na hambelelwe! Oye Tate omunahenda, Kalunga, ngoka kuye haku zi ekwatho alihe.”
“Lileni pamwe naamboka taa lili”
4 Tate yetu omunahenda, naye okwa li a silwa aantu mboka e hole. Aantu mboka ongaashi: Abraham, Isak, Jakob, Moses nOmukwaniilwa David. (Num. 12:6-8; Mat. 22:31, 32; Iil. 13:22) Oohapu dhaKalunga odhe tu shilipaleka kutya Jehova okwa halelela, sha hala okutya, okwa tegelela nondjuulukwe ethimbo ndyoka ta ka yumudha aantu. (Job 14:14, 15) Otaya ka kala ya nyanyukwa noye na uukolele wu li nawa. Dhiladhila wo kutya Omwana gwaKalunga omuholike, ‘ngoka a li e mu nyanyudha,’ okwa si eso tali uvitha omwenyo omutoye. (Omayel. 8:22, 30) Itatu vulu okuyelitha thiluthilu nkene Jehova a li u uvite, sho Omwana a si. — Joh. 5:20; 10:17.
(2 Aakorinto 1:4) Oye ngoka he tu kwatha muudhigu wetu auhe, opo tu vule wo okukwatha mboka ye li momaudhigu gi ili nogi ili. Ekwatho ndika olyo ndyoka, tse yene twa kwathwa nalyo kuKalunga.
w17. ep. 15, okat. 14
“Lileni pamwe naamboka taa lili”
14 Otashi vulu wo okukala oshidhigu okutseya shoka tu na okupopya nomuntu ngoka a gwililwa po koluhodhi. Ombiimbeli otayi ti: “Elaka lyaanawino olyo ealudho.” (Omayel. 12:18) Mokambo Uuna gumwe ngoka wu hole a sa, aantu oyendji oya mona mo oohapu tadhi hekeleke. Olundji, oshinima shimwe shoka to vulu okuninga nohashi kwathele unene osho ‘okulila pamwe naamboka taa lili.’ (Rom. 12:15) Omuselekadhi gwedhina Gaby, okwa ti: “Ohandi uvu nda pepelelwa, ngele nda lili. Onkee ano, ohashi hekeleke ndje, uuna ookuume kandje taya lili pamwe nangame. Kungawo, ihandi kala ndu uvite uuwike.”
Konga omaliko mOmbiimbeli
(2 Aakorinto 1:22) Okwe tu tula oshihako shoku tu ndhindhilika kutya tse aantu ye, nokwe tu pe Ombepo Ondjapuki, okapilo kaayihe mbyoka a hala oku tu pa.
w16.04-E ep. 32
Omapulo ga za kaaleshi
“Okapilo” nosho wo “oshihako” shoka Aakriste aagwayekwa haya pewa kuKalunga oshike? — 2 Kor. 1:21, 22.
▪ Okapilo: Embo limwe lyuuyelele olya ti kutya oshitya shOshigreka sha tolokwa “okapilo” mAakorinto aatiyali 1:22 osha li hashi longithwa “miinima yopaveta noyopamangeshefo,” ngaashi “ofuto ndjoka ho gandja petameko, okugandja ko sha, okufuta ko etata lyoshinima shoka to landa, okukwatela sha gumwe ngoka e ku hehela sha ngoye wu shi mu pe ngele wa mono kutya okwe ku pa shoka e ku uvanekela. Ofuto ndjoka ohayi gandjwa komeho yethimbo, kungawo kapu na ngoka ta ka lila mukwawo.” Shi na ko nasha naagwayekwa, ofuto yawo ya gwana po nenge ondjambi yawo, oya hokololwa mAakorinto aatiyali 5:1-5 kutya oya kwatela mo okuzala omalutu ihaaga yonuka gomegulu. Ondjambi ndjoka oya kwatela mo wo okupewa omagano gokwaa sa. — 1 Aakorinto 15:48-54.
MOshigreka shokunena, uutumbulilo wa fa mboka ohawu longithwa wu ukithwa kokalinga keyaleko. Efaathanitho ndika otali opalele kwaamboka taya ka ninga omukiintu gwaKristus gwopathaneko. — 2 Kor. 11:2; Eh. 21:2, 9.
▪ Oshihako: Monale oshihako osha li hashi longithwa shi li eshainokaha lyokuulika uumwene, uuinekelwa nenge euvathanotsokumwe. Ngele tashi ya kaagwayekwa, yo ohaya tulwa “oshihako” nenge ohaya ndhindhilikwa pathaneko nombepo ondjapuki ye li aantu yaKalunga. (Ef. 1:13, 14) Ihe otaya ka tulwa owala oshihako shawo sha hugunina, ngele oya si aadhiginini nenge manga uudhigu uunene inaawu tameka. — Ef. 4:30; Eh. 7:2-4.
(2 Aakorinto 2:14-16) Ihe Kalunga na hambelelwe, oshoka ohe tu enditha aluhe mosheendo shaKristus shesindano! Ongaashi ezimba ewanawa tali taandele koombinga adhihe, osho Kalunga te tu longitha okutseyithila aantu ayehe Kristus. 15 Mokati kaamboka taa hupithwa nokaamboka ye li mondjila ndjoka yu uka mekano, otwa fa ezimba lyeyambo lya nika nawa, ndyoka Kristus te li yambele Kalunga. 16 Kwaamboka ye li mondjila ndjoka yu uka mekano, ezimba ndika otali ningi omuku tagu dhipaga, ihe mboka taa ka hupithwa, oyu uvite mulyo ezimba tali eta omwenyo. Olye ano ngoka a opalela oshilonga shika?
w10-E 8/1 ep. 23
Owe shi tseya ngaa?
Omuyapostoli Paulus okwa li a hala okutya shike sho a popi kombinga ‘yosheendo shaKristus shesindano’?
▪ Paulus okwa nyola a ti: “Kalunga . . . ohe tu enditha aluhe mosheendo shaKristus shesindano! Ongaashi ezimba ewanawa tali taandele koombinga adhihe, osho Kalunga te tu longitha okutseyithila aantu ayehe Kristus. Mokati kaamboka taa hupithwa nokaamboka ye li mondjila ndjoka yu uka mekano, otwa fa ezimba lyeyambo lya nika nawa, ndyoka Kristus te li yambele Kalunga. Kwaamboka ye li mondjila ndjoka yu uka mekano, ezimba ndika otali ningi omuku tagu dhipaga, ihe mboka taa ka hupithwa, oyu uvite mulyo ezimba tali eta omwenyo.” — 2 Aakorinto 2:14-16.
Omuyapostoli Paulus okwa li ta popi kombinga yomukalondjigilile gwAaroma gwokudhana iituthi yokusimaneka oondjayi dhiita ndhoka dha sindi aatondi yepangelo lyawo. Piituthi mbyoka iinima mbyoka ya yugwa ko nosho wo oonkwatwa dhomiita odha li hadhi ulikwa, noondumetana odha li hadhi falwa dhi ka yambwe manga ondjayi ndjoka ya sindana nosho wo etangakwiita lyayo taya tangwa kaatali. Ngele oshituthi sha pu, oontsezi odha li hadhi yambwa po, noonkwatwa odhindji otashi vulika dha li hadhi dhipagwa.
Embo The International Standard Bible Encyclopedia olya ti kutya omupopyothano ngoka tagu popi “ezimba lyeyambo lya nika nawa, ndyoka Kristus te li yambele Kalunga” ndyoka tali thaneke kutya yamwe otaya ka kala nomwenyo yo yamwe otaya ka sa, ogwa li gwa “kuthwa komuthigululwakalo gwAaroma gwokufika iizimba sho oshituthi shi li metifa. Ezimba lya nika nawa ndyoka tali ulike kutya aasindani oye shi enditha nawa, olya li hali dhimbulukitha oonkwatwa kutya odhi li pokudhipagwa.”
Elesho lyOmbiimbeli
(2 Aakorinto 3:1-18) Otatu tameke ishewe okwiitanga? Pamwe otwa pumbwa, ngashika aantu yamwe, oontumwafo dhomaitumbaleko tadhi zi kutse nenge kune? 2 Ne omu li po ontumwafo yetu ya nyolelwa momitima dhetu, yi tseyike noyi leshwe kukehe gumwe. 3 Ontumwafo ndjika oya nyolwa kuKristus mwene nokwe yi tu pe, tu yi mu pe. Yo inayi nyolwa nohinga yo inaayi nyolelwa kiipelende yomamanya, ihe oya nyolelwa momitima dhaantu kOmbepo yaKalunga omunamwenyo. 4 Tse otatu popi oshinima shika, oshoka otwi inekela Kalunga molwaKristus. 5 Mutse kamu na nando osha shoka tashi vulu oku tu itangitha kutya otwa gwana okulonga oshilonga shika. Okuvula sha kwetu otaku zi kuKalunga. 6 Oshoka oye e tu ningi aayakuli yehangano epe ndyoka lyaa shi lyomompango ya nyolwa, ihe olyomOmbepo. Oshoka ompango ndjoka ya nyolwa otayi eta eso, ihe Ombepo otayi gandja omwenyo. 7 Uunyolo wompango owa li wa hokelwa miipelende yomamanya, neadhimo lyaKalunga olya li lya holoka pokugandjwa kwayo. Eadhimo ndika nando olya li tali ka dhimeya, uuyelele womoshipala shaMoses owa li owindji. Onkee Aaisraeli inaa vula okutongolola oshipala she. Ngele eyakulo lyompango, ndyoka lye eta eso, olya holoka li na eadhimo enene li thike mpoka, 8 nena uuwindji weadhimo ndyoka li li meyakulo tali wilikwa kOmbepo, otau kala u thike peni! 9 Oshoka ngele eyakulo ndyoka tali pangulile aantu meso, olya li li na eadhimo, ano eadhimo lyomeyakulo ndyoka tali mangulula aantu, otali kala li thike peni! 10 Eadhimo ndika li li po ngashingeyi, olyo enene shili li vule ndiyaka lyonale. 11 Oshoka ngele mushoka sha li sha kala owala okathimbo, omwa li mu na eadhimo, nena eadhimo ndyoka li li mushoka tashi kala aluhe, oli thike peni! 12 Ano sho tu na etegameno ndika, otatu popi nomukumo. 13 Tse inatu fa Moses, ngoka a li e na okusiikila oshipala she, opo Aaisraeli yaa wape okutala eadhimo nkene tali kana po. 14 Omadhiladhilo gawo oga li ga patwa. Osho ge li sigo onena ndjika, sho taa lesha omambo gomehangano ekulu. Oshisiikilo shika otashi kuthwa po owala, uuna omuntu ta hangana naKristus. 15 Sigo onena ndjika natango oshisiikilo osha siikila omadhiladhilo gawo, ngele taa lesha ompango yaMoses. 16 Ihe oshisiikilo otashi kuthwa po, ngaashi enyolo tali ti: “Oshisiikilo shaMoses ohashi kuthwa po aluhe, ngele ta yi koshipala shOmuwa.” 17 “Omuwa” menyolo ndika oye Ombepo. Mpoka pu na Ombepo yOmuwa, opu na emanguluko. 18 Tse atuhe otwa fa oshiitalelo tashi monikila eadhimo lyOmuwa ngoka e li Ombepo, notatu shitululwa, tu fe ondjelo ye mwene yeadhimo enenenene li vule agehe.