Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
6-12 MEI
OMALIKO OKUZA MOOHAPU DHAKALUNGA | 2 AAKORINTO 4–6
“Inatu sa uunye”
(2 Aakorinto 4:16) Onkee ano itatu si uunye. Omuntu gwetu gwokombanda uuna ta yonuka po, omuntu gwetu gwomeni ota ningwa omupe esiku kehe.
Otwa vulwa, ihe itatu si uunye
16 Oshoshili kutya, okukala tu na ekwatathano lyopothingo naJEHOVA Kalunga, okwa simana noonkondo. Ngele otu li na, otatu vulu okukala twa vulwa palutu, ihe itatu ka vulwa nando oku mu longela. Oha “tsu omukumo oonakuvulwa naamboka yaa na oonkondo, oonkondo dhawo OTE DHI indjipaleke odhindji.” (Jesaja 40:28, 29) Omuyapostoli Paulus ngoka a li a mono uushili woohapu ndhoka, okwa nyola a ti: “Itatu si uunye. Omuntu gwetu gwokombanda uuna ta yonuka po, omuntu gwetu gwomeni ota ningwa omupe esiku kehe.” — 2 Aakorinto 4:16.
17 Ndhindhilika uutumbulilo “esiku kehe.” Otawu ulike kutya otu na okutaamba ko omasiloshimpwiyu ngoka Jehova he tu pe esiku kehe. Omumwameme gumwe omutumwa ngoka a longela Jehova nuudhiginini uule womimvo 43, okwa li ha kala a vulwa omathimbo gamwe nokwa teka omukumo. Ihe ina sa uunye nando. Okwa ti: “Ondi na ondjigilile yokupenduka ongula onene manga inaandi tameka okulonga sha, opo ndi galikane Jehova nondi konakone Oohapu dhe. Elandulathano ndika ndi itulila po esiku kehe, olyo lya kwathela ndje ndi tsikile okwiidhidhimika sigo onena.” Otatu vulu okukala tu na uushili kutya Jehova ote ke tu pa oonkondo ndhoka twa pumbwa, ngele otwa kala hatu mu galikana nohatu tedhatedha komaukwatya ge ga dhenga mbanda “esiku kehe.”
(2 Aakorinto 4:17) Oshoka uudhigu mbuka tu na ngashingeyi, owokathimbo [wo “uupu,” OB-1954] notau ke tu etela eadhimo enenenene lyaa shi kuyelekwa nolyaaluhe.
it-1-E ep. 724-725
Eidhidhimiko
Osha simana wo tu kaleke aluhe momadhiladhilo etegameno lyetu lyopaKriste, ano lyomwenyo gwaaluhe, pethimbo tatu ka kala kaatu na nando uulunde washa. Nokuli nonando aahepeki yetu oye tu dhipage, shoka itashi ke tu ningitha kaatu ka mone omwenyo gwaaluhe. (Rom 5:4, 5; 1Tes 1:3; Eh 2:10) Omaudhigu ngoka tatu iyadha mugo ngashingeyi itaga vulu okuyelekwa netegameno lya dhenga mbanda ndyoka tu na. (Rom 8:18-25) Manga twa tegelela oku ka mona omwenyo gwaaluhe, omaudhigu ngoka tu na ngashingeyi ‘ogopakadhimbo,’ nonando oga kale ga kwata miiti. (2Kor 4:16-18) Ngele otwa dhimbulukwa kutya omaudhigu ngoka tu li mugo ogopakathimbo owala e tatu dhiginine etegameno lyopaKriste ndyoka tu na, otashi ke tu kwathela kaatu se uunye notu kale aadhiginini kuJehova Kalunga.
(2 Aakorinto 4:18) Tse ihatu tala iinima mbyoka yi wetike, ihe oombyoka kaayi wetike. Oshoka shoka shi wetike, otashi kala owala okathimbo, ihe shoka itaashi vulu okumonika, otashi kala aluhe.
Konga omaliko mOmbiimbeli
(2 Aakorinto 4:7) Ihe tse mbaka tu na uuyamba mbuka wopambepo, otwa fa owala iiyuma yeloya. Shika otashi ulike kutya oonkondo kadhi li mutse yene, ihe odhi li muKalunga.
w12-E 2/1 ep. 28-29
“Nyanyudha Jehova”
Omumwatate David Splane, oshilyo shOlutuwiliki, okwa li a yelitha kombinga yenenedhiladhilo lyenyolo ndyoka. (2 Aakorinto 4:7) Uuyamba mboka wopambepo oshike? Mbela ontseyo nenge owino? Omumwatate David okwa ti: “Aawe. Uuyamba mboka wa popiwa kuPaulus owo ‘eyakulo ndika lyokupopya oshili.’” (2 Aakorinto 4:1, 2, 5) Okwa li a dhimbulukitha aanasikola kutya oomwedhi ntano ndhoka ya kala nokulongwa, odhe ya longekidhila oshinakugwanithwa shi ikalekelwa shiilonga yokuuvitha. Oshinakugwanithwa shoka oye na okukala ye shi lenga.
Omumwatate David okwa popi kutya “iiyuma yeloya” oyu ukitha komalutu getu. Okwa li a yelekanitha oshiyuma sheloya naashoka shoshingoli. Iiyuma yoshingoli ihayi longithwa olundji, ihe iiyuma yeloya, oya nuninwa okulongithwa. Ngele otwa tula uuyamba nenge eliko moshiyuma shoshingoli, otashi vulika tu kale owala tatu gandja eitulomo koshiyuma, pehala lyaashoka shi li mo. Onkee ano, omumwatate David okwa lombwele aanasikola a ti: “Inamu ukitha unene eitulomo kune yene. Mu li aatumwa, kwatheleni aantu ya gandje eitulomo kuJehova. Kaleni aaifupipiki mu li iiyuma yeloya.”
(2 Aakorinto 6:13) Ote popi nane, ngaashi te popi naamwandje: Tu ningileni ngaashi twe mu ningile; tu egululileni omitima dheni.
Tsikileni okukoka mohole yuumwayinathana
7 Ongiini kutse kunena? Ongiini tatu vulu ‘okumbwalangandja’ mokuulikila aamwatate ohole? Otashi vulika shi kale oshipu koohandimwe okuulikila aantu yepipi lyawo nenge yomuhoko gwawo ohole. Aantu mboka ye hole omainyanyudho goludhi lwontumba, olundji oye hole okukala pamwe. Ihe otwa pumbwa ‘okumbwalangandjeka’ ohole yetu ngele omainyanyudho gamwe ngoka hatu nyanyukilwa nAakriste yalwe, ohage tu topola ko kuyalwe. Oshi li nawa twi ipule tatu ti: ‘Olungapi handi longo muukalele nenge handi inyanyudha pamwe naamwatate naamwameme mboka kaaye shi ookuume kandje? Mbela ohandi ngambeke ekwatathano lyandje naamboka aape pOshinyanga shUukwaniilwa molwaashoka ondi wete kutya inaya gwana natango okuninga ookuume kandje? Mbela ohandi popitha ngaa aagundjuka nosho wo aakokele pokugongala?’
Elesho lyOmbiimbeli
(2 Aakorinto 4:1-15) Kalunga okwe tu pe eyakulo ndika molwesilohenda lye, onkee itatu si uunye. 2 Otwa laleke iilonga ayihe yomeholamo noyohoni. Tse ihatu longo nuufudhime noihatu pilike oohapu dhaKalunga, ihe ohatu popi oshili nokwiiholola pomuntu kehe e na eiyuvo ewanawa koshipala shaKalunga. 3 Oshoka evaangeli ndyoka tatu uvitha, shila olya holekwa owala mboka ye li mondjila ndjoka yu uka mekano. 4 Oomboka inaa itaala, oshoka omadhiladhilo gawo oga pukithwa komuhindadhi, kalunga komuuyuni mbuka, ngoka te ya imbi okumona uuyelele mboka tau ya minikile. Uuyelele mboka otau zi melaka etoye ndyoka tali hokolola eadhimo lyaKristus, ngoka olupe lwaKalunga. 5 Oshoka ihatu iyuvitha tse yene, aawe, ohatu uvitha kutya Jesus Kristus oye Omuwa. Natse otu li po aayakuli yeni omolwaJesus. 6 Kalunga ngoka a popi nale a ti: “Momilema namu ze uuyelele, u minikile,” oye tuu ngoka a minikile wo nuuyelele we moomwenyo dhetu, opo tu tseye eadhimo lye, eadhimo ndyoka tali welima moshipala shaKristus. 7 Ihe tse mbaka tu na uuyamba mbuka wopambepo, otwa fa owala iiyuma yeloya. Shika otashi ulike kutya oonkondo kadhi li mutse yene, ihe odhi li muKalunga. 8 Tse otwa kala tu na uudhigu owindji, ihe inatu hatwa po. Omathimbo gamwe otwa kala momalimbililo, ihe inatu teka omukumo. 9 Otwa kala tu na aatondi oyendji, ihe Kalunga ine tu ekelahi. Pomathimbo gamwe otwa hepekwa unene, ihe inatu yonagulwa po. 10 Aluhe otwe ende nokuhumbata eso lyaJesus momalutu getu omasi, opo omwenyo gwe gu holoke wo momalutu getu. 11 Mokukalamwenyo kwetu akuhe otwa kala aluhe popepi noshiponga sheso molwaJesus, opo omwenyo gwe gu holoke momalutu ngaka getu omasi. 12 Shika otashi ti kutya eso otali longo mutse, ihe omwenyo ogu li mune. 13 Enyolo otali ti: “Ngame ondi itaala, onkee otandi popi.” Onkee ano sho tu na ombepo yimwe yeitaalo, natse wo otatu popi, oshoka otwi itaala. 14 Oshoka otu shi shi kutya Kalunga, ngoka a yumudha Omuwa Jesus kuusi, ote ke tu yumudha wo pamwe naJesus note ke tu eta koshipala she pamwe nane. 15 Iinima ayihe otayi ningwa molweni. Esilohenda lyaKalunga sho tali adha aantu oyendjiyendji, nena oku na wo oyendji mboka taa ka hambelela nokusimaneka Kalunga.
13-19 MEI
OMALIKO OKUZA MOOHAPU DHAKALUNGA | 2 AAKORINTO 7–10
“Okukwathela mboka ya dhengwa kiiponga yopaunshitwe”
(2 Aakorinto 8:1-3) Aamwameme, tse otwa hala, mu tseye shoka sha longwa kesilohenda lyaKalunga momagongalo gomuMakedonia. 2 Ooyitaali oya li ya piti momayeleko omadhigu, ihe nando ongawo, enyanyu lyawo olya li enene. Onkee ano oya gandja nomwenyo omwaanawa, nonando oya li ye na oluhepo olunene. 3 Ngame onzapo yawo, nkene ya gandja, ngaashi taye shi vulu. Nokuli kehalo lyawo yene oya gandja shi vulithe po.
w98-E 11/1 ep. 25, okat. 1
“Kalunga oku hole omuntu ngoka ta gandja nenyanyu”
Tango, Paulus okwa li a lombwele Aakorinto kombinga yAamakedonia mboka ya tula po oshiholelwa oshiwanawa shokukwathela yalwe. Okwa nyola a ti: “Ooyitaali oya li ya piti momayeleko omadhigu, ihe nando ongawo, enyanyu lyawo olya li enene. Onkee ano oya gandja nomwenyo omwaanawa, nonando oya li ye na oluhepo olunene.” Aamakedonia kaya li ya pumbwa okuthiminikwa. Pehala lyaashono, Paulus okwe ya popi a ti kutya “oye tu indile noya pula, ya pewe ompito yokukwatha.” Okugandja kwawo nenyanyu okundhindhilikwedhi, unene tuu molwaashoka nayo oya li ‘moluhepo olunene.’ — 2 Aakorinto 8:2-4.
Okulongela Jehova okwa kwatela mo okukwathela mboka ya adhika kiiponga
MOMUMVO 46 E.N. lwaampono, muJudea omwa li ondjala onene. Aalongwa yaKristus mboka ya li muJudea kaya li taya vulu okulanda iikulya, oshoka oya li yi na ondilo nayi noya pumba. Oya li ye niwe kondjala noya li monkugo yi na onkambe. Ashike Jehova okwa li te ke ya kwatha momukalo moka inee shi ningila nando onale yamwe yomaalongwa yaKristus. Ngiini mbela?
(2 Aakorinto 8:4) Oye tu indile noya pula, ya pewe ompito yokukwatha aantu yaKalunga yomuJudea.
Okulongela Jehova okwa kwatela mo okukwathela mboka ya adhika kiiponga
4 Oohapu dhontumwafo ye ontiyali ndjoka Paulus a nyolele Aakorinto aagwayekwa, kunena odha kwatela mo wo ‘oonzi dhilwe’ dhaKristus. (Joh. 10:16) Montumwafo ndjoka Paulus okwa popi kutya Aakriste oye na oshilonga shopaali. Shotango ‘oshilonga shokuhanganitha aantu,’ ano okuuvithila aantu noku ya longa. (2 Kor. 5:18-20; 1 Tim. 2:3-6) Oshilonga oshitiyali shoka Paulus a popi oshokugandja ‘ekwatho’ kooitaali ooyakwetu. (2 Kor. 8:4) Iitya ayihe mbika iyali “oshilonga” nosho wo ‘okukwatha’ oya tolokwa okuza koshitya shOshigreka diakonia. Omolwashike shoka oshindhindhilikwedhi?
5 Sho Paulus a longitha oshitya shOshigreka shimwe a popye kombinga yiilonga mbyoka iyali, oku ulike kutya okukwathela mboka ya adhika koshiponga nosho wo iilonga mbyoka hayi longwa megongalo lyopaKriste oya pambathana. Paulus okwa adhikile a popi kutya: ‘Oku na oompito dhomayakulo dhi ili nodhi ili, ihe Omuwa ngoka ta yakulwa, gumwe awike. Oku na omaunkulungu gi ili nogi ili gokuyakula, . . . ihe ombepo oye tuu ngoka gumwe, ngoka ta longo ayihe.’ (1 Kor. 12:4-6, 11) Nokuli Paulus okwa ti kutya iilonga mbyoka hayi longwa megongalo lyetu lyopaKriste ‘elongelokalunga’ nenge oshilonga oshiyapuki. (Rom. 12:1, 6-8) Nomolwashono a li e wete sho opala okulongitha ethimbo lye a “fale omagano ngoka ga pewa aantu yaKalunga.” — Rom. 15:25, 26.
6 Opo Paulus a kwathele Aakorinto yu uve ko kutya omolwashike okukwatha mboka ya adhika koshiponga nako ku li oshilonga shawo nokwa pambathana nelongelokalunga lyawo, okwa ti: Aakriste ohaya kwathele yalwe molwashoka otaya “vulika kevaangeli lyaKristus.” (2 Kor. 9:13) Onkee ano, Aakriste ohaya kwathele ooitaali ooyakwawo, shaashi ya hala okuvulika komalongo gaKristus. Paulus okwa ti kutya iilonga mbyoka ya longele aamwahe, oyi li lela ‘esilohenda enene lyaKalunga.’ (2 Kor. 9:14; 1 Pet. 4:10) Ano shi na ko nasha nokuyakula aamwatate, mwa kwatelwa okukwatha uuna pwa holoka oshiponga, Oshungolangelo ye 1 Desemba 1975, oya ti: “Katu na nando okulimbililwa kutya Jehova Kalunga nOmwana Jesus Kristus oya hokwa iilonga mbika.” Okukwathela mboka ya adhika koshiponga nako elongelokalunga nenge oshilonga oshiyapuki. — Rom. 12:1, 7; 2 Kor. 8:7; Heb. 13:16.
(2 Aakorinto 9:7) Kehe gumwe na gandje, ngaashi eiyuvo lye tali mu lombwele, hanokungungutula nenge kethiminiko. Oshoka Kalunga oku hole ngoka ta gandja nenyanyu.
Nkene iilonga yUukwaniilwa hayi ambidhidhwa pashimaliwa
10 Lyotango, ohatu gandja omaambidhidho nehalo ewanawa, molwaashoka otu hole Jehova notwa hala ‘okulonga shoka she mu opalela.’ (1 Joh. 3:22) Jehova oku hole shili aapiya ye mboka haya gandja nomutima aguhe. Natu konakoneni oohapu ndhoka dha popiwa komuyapostoli Paulus kutya Omukriste oku na okugandja ngiini. (Lesha 2 Aakorinto 9:7.) Omukriste gwashili ke shi omuluya noiha thiminikilwa okugandja. Pehala lyaashono, okwa tokola a gandje “ngaashi eiyuvo lye tali mu lombwele.” Ano oha gandja uuna a mona kutya opu na ompumbwe, nuuna a mona nkene ta vulu oku yi kandula po. Jehova okwa lenga omuntu ngoka ha gandja ngaaka, ‘oshoka oku hole ngoka ta gandja nenyanyu.’ Etoloko lilwe olya ti: “Kalunga oku hole aantu mboka ye hole okugandja.”
Konga omaliko mOmbiimbeli
(2 Aakorinto 9:15) Kalunga na hambelelwe omolwomagano ge gaa shi kutumbulwa!
‘Omagano gaKalunga gaa shi kutumbulwa’ nage tu inyengithe
2 Paulus okwa li e shi shi kutya eyambo lyaJesus otali shilipaleke kutya ashihe shoka Kalunga a uvaneka otashi ka gwanithwa. (Lesha 2 Aakorinto 1:20.) Shika otashi ti kutya omagano gaKalunga ngoka “gaa shi kutumbulwa” inaga kwatela mo owala eyambo lyaJesus. Oga kwatela mo wo uuwanawa awuhe nohole yaaluhe ndjoka Jehova he tu ulukile. Omagano ngoka itaga vulu okutumbulwa momukalo moka tatu vulu okuuva ko thiluthilu. Omagano ngaka gi ikalekelwa, oge na oku tu uvitha ngiini? Nongiini ge na oku tu inyengitha, sho tatu ilongekidhile Edhimbuluko lyeso lyaKristus, ndyoka tali ka kala ko mEtitatu, 23 Maalitsa 2016?
(2 Aakorinto 10:17) Ano ngaashi enyolo tali ti: “Kehe ngoka a hala okwiitanga, ni itangele shoka Omuwa e shi longo.”
g99-E 7/8 ep. 20-21
Mbela uuntsa owa puka?
MOmanyolo gopaKriste gOshigreka, oshityalonga kaukhaomai, osha tolokwa kutya okukala nuuntsa, “okwiisimanekitha, okwiitanga,” nohashi longithwa shu ukithwa kuuntsa mboka uuwanawa naamboka uuwinayi. Pashiholelwa, Paulus okwa ti otatu vulu ‘okwiisimanekela etegameno lyeadhimo lyaKalunga.’ (OB-1954) Okwa ti wo kutya “kehe ngoka a hala okwiitanga, ni itangele shoka Omuwa e shi longo.” (Aaroma 5:2; 2 Aakorinto 10:17) Shika osha hala okutya okukala tu uvite uuntsa molwaashoka Jehova e li Kalunga ketu, oshinima shoka tashi vulika shi tu kwathele tu simaneke edhina lye nuukwatya we uuwanawa.
Elesho lyOmbiimbeli
(2 Aakorinto 7:1-12) Ookuume kandje aaholike, ano sho tu na omauvaneko ngaka agehe, natu iyogeni shaa shoka tashi nyateke olutu nenge omwenyo. Tu lalakaneni wo okukala aayapuki, tse tu tile Omuwa. 2 Tu taambeni nomwenyo aguhe. Inatu ningila nando omuntu gumwe uuwinayi, inatu pukitha nando omuntu gumwe, tse inatu ningilila mo nando ogumwe. 3 Oshinima shika itandi shi popi, ndi mu pangule, oshoka onde mu lombwela nale kutya otu mu hole. Onkee otu na okukala tu na uukumwe aluhe, ongele tu na omwenyo nenge tatu si. 4 Ngame onde mu inekela lela notandi mu itangele. Momaudhigu getweni agehe ngame ondi na omukumo nondu udha enyanyu. 5 Ano sho twa thiki muMakedonia, inatu mona nando efudho lyasha, oshoka otwa li tu na omaudhigu koombinga adhihe: oontamanana naantu yalwe nuumbanda moomwenyo dhetu. 6 Ihe Kalunga ngoka ha tsu omukumo mboka ya tyololoka, okwe shi tu ningile nokuyapo kwaTitus. 7 Nokuli hakuyapo kwe akuke, ihe okuhokolola kwe wo, nkene mwe mu tsu omukumo. Ye okwe tu hokololele, nkene mwa yuulukwa ndje, nkene mwa yemata nonkene mwi ilongekidha okupopila ndje. Ano ngashingeyi onda nyanyukwa pombanda. 8 Oshoka nando ontumwafo yandje ye mu nikitha oluhodhi, kandi uvite ando nayi, sho nde yi nyola. Tango onda li ndi na okukala ndu uvite omwenyo omwiinayi, sho nda dhimbulula kutya ontumwafo ya tya ngaaka oye mu nikitha oluhodhi, nonando olwokathimbo ashike. 9 Ihe ngashingeyi onda nyanyukwa, hamolwaasho nde mu nikitha oluhodhi, ihe omolwaasho oluhodhi lweni lwe mu fala meitedhululo. Oluhodhi lwa tya ngaaka olwa hokiwa kuKalunga, onkee tse inatu mu etela nando oshiponga shasha. 10 Oshoka oluhodhi ndoka lwa hokiwa kuKalunga, otalu fala omuntu meitedhululo, eitedhululo e tali mu fala mehupitho, onkee inalu puka. Ihe oluhodhi lwopayuni otalu eta eso. 11 Taleni ano shoka Kalunga a ningi, sho e mu pitikile oluhodhi ndoka. Oluhodhi tuu ndoka lwe mu pe uulaadhi, mu vule okuholola kutya kamu na uusama. Oshinima sha tya ngaaka oshe mu geyitha noshe mu londodha, oshe mu yuulukitha noshe mu pe uupenda nehalo okugeela uuwinayi. Omu ulike kutya ne kamu na epuko lyasha moshinima shika. 12 Onkee ano nando nda nyola ontumwafo ndjoka, inandi shi ninga molwaangoka a ningi nayi nenge molwaangoka a ningwa nayi. Onda nyola, opo ndi mu hololele uupenda weni molwetu koshipala shaKalunga.
20-26 MEI
OMALIKO OKUZA MOOHAPU DHAKALUNGA | 2 AAKORINTO 11–13
“Paulus okwa li e na ‘okwega monyama’”
(2 Aakorinto 12:7, OB-1954) Nopo ndaa inenepekithile omamoniko ngoka omanenenene, onda pewa okwega monyama yandje, omuyengeli gwaSatana, a dhenge ndje oongonyo, ndaa inenepeke.
w08-E 6/15 ep. 3-4
Okwa li e na oonkondo, nonando okwa li omunkundi
Omuyapostoli Paulus, omupiya gwaKalunga gulwe omudhiginini, okwa li a pula Jehova e mu kuthe “okwega monyama” ye, ano uupyakadhi mboka wa li we mu gwilila po. Okwa li a galikana Kalunga lutatu a kuthe po uupyakadhi mboka. Kutya nduno owa li washike, owa li wa fa okwega taku tsana, notashi vulika wa li wa ningitha Paulus a kale inaa nyanyukwa miilonga yaJehova. Paulus okwe wu faathanitha nokudhengwa aluhe. Jehova okwa li e mu yamukula a ti: “Esilohenda lyandje olye ku gwanena, oshoka oonkondo dhandje odho oonenenene kwaamboka aankundi.” Jehova ka li a kutha po okwega hoka monyama ye. Paulus okwa li e na okukondja nakwo, ihe okwa hulitha a ti: “Uuna ndoka ndi na uunkundi, opo mpoka ndi na oonkondo.” (2 Kor. 12:7-10) Mbela okwa li a hala okutya shike?
(2 Aakorinto 12:8, 9) Opo ihe onda galikana Omuwa lutatu omolwoshinima shika nonde mu indile, e shi kuthe ndje. 9 Ihe okwa yamukula ndje a ti: “Esilohenda lyandje olye ku gwanena, oshoka oonkondo dhandje odho oonenenene kwaamboka aankundi.” Onkee ngame onda nyanyukwa notandi itangele uunkundi wandje, opo ndi kale megameno lyoonkondo dhaKristus.
Jehova oha gandja “Ombepo Ondjapuki kumboka taye mu indile”
17 Kalunga okwa li a yamukula egalikano lyaPaulus a ti: “Esilohenda lyandje olyo alike we li pumbwa, oshoka oonkondo dhandje odho oonenenene kwaamboka aankundi.” Opo nduno Paulus okwa popi a ti: “Ngame onda nyanyukwa notandi itangele uunkundi wandje, opo ndi kale megameno lyoonkondo dhaKristus [“dha siikila ndje ngaashi otenda,” NW].” (2 Aakorinto 12:9; Episalomi 147:5) Kungawo, Paulus okwa li e wete kutya egameno ndyoka Kalunga a li e mu pa okupitila muKristus, olya li lya fa otenda. Jehova oha yamukula omagalikano getu momukalo gwa faathana kunena. Oha gamene aapiya ye a fa e ya siikila notenda.
18 Odhoshili kutya otenda ihayi imbi omvula yi loke nenge ombepo yi pepe, ihe ohayi vulu okugamena omuntu koonkalo dha tya ngaaka. Sha faathana, egameno ndyoka hali gandjwa ‘koonkondo dhaKristus’ ihali keelele omamakelo nenge omaupyakadhi ngoka hage tu adha. Ihe oonkondo ndhoka ohadhi gamene aapiya yaJehova koonkalo dha nika oshiponga dhuuyuni mbuka nosho wo komaponokelo gomupangeli gwawo, Satana. (Ehololo 7:9, 15, 16) Onkee ano, ngele oto kondjo nemakelo lyontumba ndyoka itaali ku ‘etha,’ kala wu na einekelo kutya Jehova oku wete onkalo yoye nonokutya okwa uva “onkugo” yoye (Jesaja 30:19; 2 Aakorinto 1:3, 4) Paulus okwa nyola a ti: “Kalunga oku shi kwiinekelwa. Onkee ite mu ethele memakelo li vule oonkondo dheni. ihe ngele ta pitika, mu makelwe, ote mu pe ompito okuza mo mulyo noonkondo dhoku li humbata.” — 1 Aakorinto 10:13; Aafilippi 4:6, 7.
(2 Aakorinto 12:10) Ngame onda nyanyukilwa okukala muunkundi, mokudhinwa, miiponga, momatidhagano nomoothina omolwaKristus. Oshoka uuna ndoka ndi na uunkundi, opo mpoka ndi na oonkondo.
“Oye ta tsu omukumo oonakuvulwa naamboka yaa na oonkondo”
8 Lesha Jesaja 40:30. Kutya nee otu kale tu na uunongo wu thike peni, oonkondo dhetu dhokuninga iinima odha ngambekwa. Atuheni natu kaleni tu shi oshinima shoka. Omuyapostoli Paulus okwa li omulumentu ha vulu iilonga, ihe opwa li iinima yimwe mbyoka tayi mu imbi a gwanithe po iilonga ye ayihe. Sho a lombwele Kalunga nkene u uvite, okwa lombwelwa taku ti: “Oonkondo dhandje odho oonenenene kwaamboka aankundi.” Paulus okwa li u uvite ko kutya oohapu ndhoka odha hala okutya ngiini. Okwa thiki pehulithodhiladhilo a ti: “Uuna ndoka ndi na uunkundi, opo mpoka ndi na oonkondo.” (2 Kor. 12:7-10) Okwa li a hala okutya shike?
9 Paulus okwa li e shi mono kutya ita vulu okuninga oshindji, nopwaahe na ekwatho ndyoka tali mu ziilile pombanda. Ombepo ondjapuki yaKalunga, oya li tayi vulu okupa Paulus oonkondo ndhoka kee na. Kakele kaashono, ombepo yaKalunga oya li ya nkondopaleke Paulus a longe iilonga mbyoka itaa vulu okulonga koonkondo dhe mwene. Ombepo ondjapuki otayi vulu oku tu nkondopaleka wo. Odhoshili kutya otatu ka kala twa kola, ngele Jehova okwe tu nkondopaleke.
Konga omaliko mOmbiimbeli
(2 Aakorinto 12:2-4) Opwa piti ngashingeyi oomvula omulongo nane, ihe ote dhimbulukwa omulumentu gumwe gwontumba omukriste, ngoka a akelwa megulu lyopombandaelela. Inandi tseya kutya osha ningwa lela nenge pamwe osha li owala emoniko, Kalunga oye awike e shi shi. 3 Otandi shi tumbula natango: omulumentu ngwiyaka okwa falwa mOparadisa, ihe kandi shi wo kutya shika osha ningwa lela nenge osha li owala emoniko, Kalunga oye awike e shi shi. 4 Mwiyaka oku uvu iinima mbyoka itaayi vulu okutumbulwa, iinima mbyoka omuntu inaa pitikwa oku yi popya.
Omapulo ga za kaaleshi
‘Egulu lyopombandaelela’ ndyoka lya popiwa mAakorinto aatiyali 12:2, otashi vulika tali ulike kUukwaniilwa wopaMesiasa mboka wu li miikaha yaJesus Kristus naapangeli ye 144 000, ano “egulu epe.” — 2 Pet. 3:13.
Egulu ndyoka, ‘egulu lyopombandaelela,’ oshoka otali thaneke Uukwaniilwa waKalunga mboka wa shiga ko nowu li epangelo ndyoka lya dhenga mbanda.
‘Oparadisa’ ndjoka ya popiwa memoniko, moka mwa li mwa “akelwa” Paulus otashi vulika tayi thaneke iinima tayi landula. Shotango, otayi vulu okukala oparadisa yo yeneyene, ndjoka tayi ka kala kombanda yevi. Oshitiyali, otayi vulu okukala oparadisa yopambepo ndjoka tayi ke ya notayi ka kala yi vule kokule ndjoka yi li ko kunena. Oshititatu, otashi vulika wo yi kale ‘oshikunino shaKalunga’ nenge tu tye oparadisa yaKalunga megulu, ndjoka tayi ka kala ko wo muuyuni uupe.
(2 Aakorinto 13:12) Kundilathanii po nohole yaamwayinathana [“nethipo lyokomilungu eyapuki” OB-1954].
it-2-E ep. 177
Ethipo lyokomilungu
“Ethipo lyokomilungu eyapuki.” Mokati kAakriste yopetameko omwa li “ethipo lyokomilungu eyapuki” nenge ohole yuumwayinathana (Rom 16:16, yelekanitha OB-1954; 1Kor 16:20; 2Kor 13:12; 1Tes 5:26) nenge “okuthipathana kwohole komilungu,” tashi vulika sha li hashi ningwa kaantu yuukashike kookantu wa faathana (1Pet 5:14, yelekanitha OB-1954). Omukalo nguka gwAakriste yopetameko gwokupopithathana taya thipathana komilungu, otashi vulika ogo gwa li hagu longithwa kAahebeli yonale. Nonando Omanyolo inaga gandja uuyelele washa, “ethipo lyokomilungu eyapuki” nenge “okuthipathana kwohole komilungu,” osha yela kutya otaku ulike kohole nokuukumwe mboka wu li megongalo lyopaKriste. — Joh 13:34, 35.
Elesho lyOmbiimbeli
(2 Aakorinto 11:1-15) Onda hala, mu idhidhimikile ndje nuuna ndoka wo nda fa nda nika uugoya. Alikana, idhidhimikilii ndje! 2 Ngame onde mu sila efupa, ndele naKalunga osho e li. Oshoka ne omwa fa omukadhona omuyelele, ngoka nda kongela omulumentu gumwe awike, oKristus. 3 Ngame onda tila kutya pamwe oondunge dheni otadhi yonuka e tamu ke etha po okukala aantu yaKristus, ongaashi Eva a pukithwa koondunge dhomakoto geyoka. 4 Oshoka ohamu idhidhimikile nenyanyu shaa ngoka te ya kune tu uvitha Jesus gulwe i ili kee shi ngoka twa uvitha. Omwa taamba ombepo nevaangeli lilwe, ndyoka inaali fa ombepo nevaangeli ndyoka mwe li taamba kutse. 5 Ngame itandi dhiladhila ando kutya ondi vulike kaayapostoli yeni mboka aanene. 6 Otashi vulika ndaa shi enyakwa mokupopya, ihe ondi na ngaa oondunge. Shika otwe shi mu tseyithile aluhe pamikalo odhindji. 7 Ngame sho nde mu uvithile elaka etoye lya za kuKalunga, inandi pula nando osha. Ngame ondi ifupipike, opo ndi mu nenepeke. Nenge onda puka? 8 Manga nda li tandi longo mokati keni, onda li tandi futwa komagongalo galwe. Nandi tye, onde ga yugu, opo ndi mu kwathe. 9 Ethimbo ndyoka nda kala pune inandi mu pula iimaliwa, nonando onda li nde yi pumbwa, oshoka aamwameme mboka ya zi kuMakedonia, oye etele ndje ashihe shoka nda li nda pumbwa. Ngashika sha kala methimbo lya piti, osho wo tashi ka kala nokomeho kutya ngame inandi hala oku mu etela uudhigu nando owa sha. 10 Omolwoshili yaKristus, ndjoka yi li mungame, otandi uvaneke kutya eitango ndika lyandje kali na nando mpoka tali ka mwenekwa mevi alihe lyAagreka. 11 Omolwashike tandi popi ngeyi? Omolwaasho ando ndaa mu hole? Kalunga oku shi shi kutya ondi mu hole. 12 Ngashingeyi otandi tsikile owala naashoka tandi shi longo, opo aayapostoli mboka yalwe yaa vule okumona etompelo lyokwiitanga kutya otaa longo pamukalo ngaangoka tatu longo. 13 Aalumentu ya tya ngaaka kaye shi aayapostoli yashili, ihe oyo aafundja. Oyo otaa longitha iifundja miilonga yawo notayi iningi ya kale ya fa aayapostoli yaKristus. 14 Eeno, shika itashi kumitha! Oshoka naSatana ota vulu okwiishitukitha, a kale a fa omuyengeli guuyelele. 15 Onkee ano itashi kumitha, ngele aayakuli yaSatana otayi ishitukitha, ya kale ongaayakuli aawanawa. Ihe hugunina otaa ka pewa shoka ye shi ilongela.
27 MEI–2 JUNI
OMALIKO OKUZA MOOHAPU DHAKALUNGA | AAGALATI 1–3
“Onde mu ganda montaneho yaayehe”
(Aagalati 2:11-13) Ihe Petrus sho e ya kuAntiokia, onde mu ganda montaneho yaayehe, oshoka okwa li a puka lela. 12 Oshoka manga aalumentu yamwe mboka ya li ya tumwa kuJakob, ya adhika inaaye ya, Petrus okwa li ha li naamwameme aalumentu yomaapagani. Ihe aalumentu mboka sho ye ya, Petrus okwi iyoolola mo maamwameme mboka yomaapagani, ye ina hala we okulya pamwe nayo. Oshoka okwa li a tila aalumentu mboka ya kala haa ti kutya aakriste mboka taa zi maapagani, naa fukalekwe. 13 Aajuda ooyakwawo aakriste nayo wo oye mu holele, sigo naBarnabas a pukithwa kuufudhime wawo.
Mbela oho tala ko ngaa uuyuuki ngaashi Jehova he wu tala ko?
16 Lesha Aagalati 2:11-14. Petrus okwa li a kwatwa kuumbanda wokutila aantu. (Omayel. 29:25) Nonando okwa li a tseya kutya Jehova oku uvitile ngiini oshinima shoka, Petrus okwa li a tila kutya aantu otaye ke mu tila ngiini sho te endathana naantu inaaya pita etanda yomegongalo lyomuJerusalem. Omuyapostoli Paulus ngoka naye a li pokugongala hoka kwa ningilwa muJerusalem mo 49 E.N. muAntiokia, oku ula Petrus omufudhime. (Iil. 15:12; Gal. 2:13) Mbela mboka kaaye shi Aajuda oya li yu uvitile ngiini epuko ndyoka lya ningwa kuPetrus kaali li pauyuuki? Mbela oya li ya geya? Mbela Petrus okwa li a kanitha iinakugwanithwa ya simana molwaashoka a ningi epuko?
(Aagalati 2:14) Ano ngame sho nda mono kutya omikalo dhawo itadhi tsu we kumwe noshili yevaangeli, onda lombwele Petrus montaneho yawo ayehe nda ti: “Ngoye Omujuda, ihe ku li ngaashi Omujuda, ou na omikalo dha fa dhaapagani. Oto vulu tuu okuthiminika aapagani, ya kale ngaashi Aajuda?”
Mboka Ye Hole Jehova “Ihaa Pundukithwa Kusha”
12 Petrus okwa li e na uumbanda wokutila aantu, niikando yimwe okwa li a punduka unene. Ihe nonando ongaaka, okwa li a kala omudhiginini kuJesus naJehova. Pashiholelwa, okwa li i idhimbike Omuwa gwe, nokuli lwiikando itatu. (Luk. 22:54-62) Ethimbo limwe, Petrus ka li i ihumbata momukalo gwopaKriste, sho u ungaunga nooitaali mboka ya za miigwana yilwe, ya fa ye vulike kAakriste Aajuda mboka ya pita etanda. Ihe omuyapostoli Paulus okwa li e shi shi nawa kutya megongalo lyopaKriste kamu na ngoka a simana e vule Aakriste ooyakwawo. Eihumbato lyaPetrus olya li lya puka. Manga eihumbato lye inaali yona po ombili yuumwayinathana, Paulus okwa li a katuka onkatu e mu pukulule shu ukilila pethimbo opo tuu mpoka. (Gal. 2:11-14) Mbela Petrus okwa li a geye sho a pewa omayele e te etha po okumatuka methigathano lyomwenyo? Aawe. Okwa li a taamba ko omayele gaPaulus e te ga tula miilonga nokwa li a tsikile nokumatuka methigathano.
Konga omaliko mOmbiimbeli
(Aagalati 2:20) opo ndaa kale we ndi na omwenyo mungame mwene, ihe Kristus oye a kale e na omwenyo mungame. Ano manga ndi na omwenyo muuyuni mbuka, otandi kala ndi itaala Omuna gwaKalunga, ngoka e hole ndje nokwa gandja omwenyo gwe molwandje.
Longela Kalunga wa mana mo, nonando owu na ‘uudhigu owindji’
20 Ihe ongiini tatu vulu okukondjitha omamakelo ngoka ihaaga monika nuupu? Pashiholelwa, ongiini tatu vulu okukondjitha etekomukumo? Omukalo gumwe moka tatu vulu oku shi ninga omokutedhatedha kekulilo. Omuyapostoli Paulus osho a li a ningi. Omathimbo gamwe okwa li ha kala a ninga omwenyo omwiinayi. Ihe okwa li wo e shi kutya Kristus ina sila aayuuki, ihe aalunde ngaashi ye. Okwa nyola nokuli a ti: ‘Otandi kala ndi itaala Omuna gwaKalunga, ngoka e hole ndje nokwa gandja omwenyo gwe molwandje.’ (Gal. 2:20) Eeno, Paulus okwa li a taamba ko ekulilo nokwa li i itaala kutya otali vulu oku mu mangulula muulunde.
21 Nangoye oto vulu okumona uuwanawa ngele owe shi taamba ko kutya ekulilo omagano goye mwene we ga pewa kuJehova. Shika itashi ti kutya etekomukumo otali ka kana po nziyanziya. Otashi vulika yamwe yomutse tu kale tatu li kondjitha sigo uuyuni uupe we ya. Ihe dhimbulukwa kutya otatu ka mona owala ondjambi ngele inatu sholola. Esiku kehe epe otali tu hedhitha popepi nesiku ndyoka uuna Uukwaniilwa waKalunga tawu ke ya. Ngele shoka sha ningwa, kombanda yevi otaku ka kala ombili, naantu ayehe otaya ka kala ya gwanenena. Kala wa tokola toko okuya mUukwaniilwa mboka, nonando oto pitile muudhigu owindji.
(Aagalati 3:1) Aagalati ne, one aagoya! Olye e mu pilaaleke? One tuu mboka mu na efano lyokusa kwaJesus Kristus komushigakano lya anekwa komeho geni!
it-1-E ep. 880
Ontumwafo ya nyolelwa Aagalati
Sho Paulus i igidha a ti “Aagalati ne, one aagoya!” itashi ulike nando kutya okwa li ta dhiladhila komuhoko gwaantu mboka ya li owala haya zi moshitopolwa Gallic muumbangalantu waGalatia. (Gal 3:1) Pehala lyaashono, Paulus okwa li ta ganda yamwe momagongalo, mboka ya li yi iyetha ya nwethwe mo kAajuda yamwe ya li mokati kawo ya kakatela Ompango yaMoses, mboka ya li taya kambadhala okwiininga aayuuki okupitila melongekidho lyopango yaMoses pehala ya “ninge aayuuki omolweitaalo” ndyoka lye ya po omolwehangano epe. (2:15–3:14; 4:9, 10) ‘Momagongalo agehe gomuGalatia’ (1:2) ngoka ga li ga nyolelwa ontumwafo kuPaulus, omwa li mu na Aajuda naamboka kaaye shi Aajuda. Mwaamboka kaaye shi Aajuda omwa li mwa kwatelwa mboka ya pita etanda naamboka inaaya pita etanda, nosha yela kutya yamwe yomuyo oya li ya za kuuninginino waEuropa. (Iil 13:14, 43; 16:1; Gal 5:2) Ayehe oya li hayi ithanwa Aakriste Aagalati, oshoka moshitopolwa moka ya li haya zi, osha li hashi ithanwa Galatia. Ontumwafo ndjoka Paulus a li a nyola, okwa li e yi nyolele mboka e shi nawa ya li moshitopolwa shuumbugantu waRoma, ihe haamboka a li kee shi ya li muumbangalantu washo, oshitopolwa shoka tashi vulika a li inaa talela po nandonando.
Elesho lyOmbiimbeli
(Aagalati 2:11-21) Ihe Petrus sho e ya kuAntiokia, onde mu ganda montaneho yaayehe, oshoka okwa li a puka lela. 12 Oshoka manga aalumentu yamwe mboka ya li ya tumwa kuJakob, ya adhika inaaye ya, Petrus okwa li ha li naamwameme aalumentu yomaapagani. Ihe aalumentu mboka sho ye ya, Petrus okwi iyoolola mo maamwameme mboka yomaapagani, ye ina hala we okulya pamwe nayo. Oshoka okwa li a tila aalumentu mboka yakala haa ti kutya aakriste mboka taa zi maapagani, naa fukalekwe. 13 Aajuda ooyakwawo aakriste nayo wo oye mu holele, sigo naBarnabas a pukithwa kuufudhime wawo. 14 Ano ngame sho nda mono kutya omikalo dhawo itadhi tsu we kumwe noshili yevaangeli, onda lombwele Petrus montaneho yawo ayehe nda ti: “Ngoye Omujuda, ihe ku li ngaashi Omujuda, ou na omikalo dha fa dhaapagani. Oto vulu tuu okuthiminika aapagani, ya kale ngaashi Aajuda?” 15 Eeno oshoshili, otse Aajuda kevalo, katu shi aalunde aapagani. 16 Otu shi shi kutya omuntu ota ningi omuyuuki koshipala shaKalunga keitaalo okwiitaala Jesus Kristus, hamolwokugwanitha shoka tashi pulwa kompango. Onkee ano natse wo otwi itaala Jesus Kristus, opo tu ninge aayuuki omolweitaalo, hamolwokugwanitha shoka tashi pulwa kompango. Oshoka kape na nando omuntu ta ningi omuyuuki koshipala shaKalunga omolwokugwanitha shoka tashi pulwa kompango. 17 Ngele ano tse mboka tatu lalakanene uuyuuki molwaKristus, tatu monika kutya otse aalunde, ngaashi naanaa aapagani ye li, nena shono otashi ti ando kutya Kristus oye omuyakuli guulunde? Itashi vulika! 18 Oshoka ngele otandi tameke okutungulula shoka nda li nda kumuna po nale, nena otandi holola kutya ongame omuyoni gwompango. 19 Mokupopya ompango ngame onda sa, nda dhipagwa kompango, opo ndi kalele Kalunga ndi na omwenyo. Ngame onda si pamwe naKristus komushigakano, 20 opo ndaa kale we ndi na omwenyo mungame mwene, ihe Kristus oye a kale e na omwenyo mungame. Ano manga ndi na omwenyo muuyuni mbuka, otandi kala ndi itaala Omuna gwaKalunga, ngoka e hole ndje nokwa gandja omwenyo gwe molwandje. 21 Onkee ano itandi ekelehi esilohenda lyaKalunga. Oshoka ngele omuntu ota ningwa omuyuuki molwompango, nena okusa kwaKristus inaku kwatha sha.