Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
3-9 JUNI
OMALIKO OKUZA MOOHAPU DHAKALUNGA | AAGALATI 4–6
“‘Eyele’ ndyoka tali ti sha kutse”
(Aagalati 4:24, 25) Ehokololo ndika olyo eyele. Aakiintu mbaka yaali oyo omahangano gaali. Ehangano limwe oondyoka lyokondundu yaSinai hali vala aapika, olyo Hagar. 25 Oshoka Hagar oye ondundu yaSinai yi li muArabia. Oye efano lyoshilando shaJerusalem shopethimbo ndika, shoka shi li muupika pamwe naantu yamo ayehe.
it-1-E ep. 1018, okat. 2
Hagar
Meyele ndyoka lya popiwa komuyapostoli Paulus omwa popiwa Hagar ngoka ta thaneke oshigwana shaIsraeli shopanyama. Oshigwana shoka osha li mekwatathano naJehova okupitila mehangano lyompango ndyoka a li a hangana nasho pondundu Sinai, ehangano ndyoka lya vala “aapika.” Molwaashoka oshigwana shoka osha li hashi yono, kasha li sha vulu okudhiginina ehangano ndyoka lyompango. Osha li kohi yompango ndjoka, onkene inashi vula okumangululwa mo muulunde mboka tawu fala meso, kungawo osha li muupika. (Joh 8:34; Rom 8:1-3) Jerusalem shopethimbo lyaPaulus osha faathana naHagar, molwaashoka oshilando Jerusalem shoka tashi thaneke ehangano lyAaisraeli yoyene, osha li shi iyadha muupika noyana. Aakriste aagwayekwa oye li oyana ‘yaJerusalem shomegulu,’ omukiintu gwaKalunga gwopathaneko. Ngaashi Sara, omukiintu omuhokanwa, Jerusalem shoka shomegulu, inashi kala nando muupika. Ihe ngaashi owala Isak a li a hepekwa kuIsmaeli, noyana wo ‘yaJerusalem shomegulu,’ mboka ya mangululwa kOmwana, oya li ya hepekwa koyana yaJerusalem, mboka ye li oyana yomupika Hagar yopathaneko. Nonando ongawo, Hagar nomwanamati oya li ya lalekwa mo megumbo, shoka tashi thaneke nkene Jehova a laleke nenge e ekelehi oshigwana shaIsraeli shoshene. — Gal 4:21-31; tala wo Joh 8:31-40.
(Aagalati 4:26, 27) Ihe Jerusalem shomegulu osho omukiintu omuhokanwa, meme yetu. 27 Oshoka enyolo otali ti: “Nyanyukwa, ngoye nguka ihoo vala! Ligola nokwiigidha pombanda, ngoye nguka inoo thetwa nando olumwe! Oshoka omukiintu ngoka e ethiwa ota ka kala e na aanona oyendji ye vule yaangoka e na omulumentu.”
Kala wu na eitaalo lya kola mUukwaniilwa waKalunga
11 Omauvaneko ngoka gu uvanekwa mehangano naAbraham oga gwanithilwe po sho oluvalo lwaAbraham lwopanyama lwa thigulula Evi lyEuvaneko. Ihe Ombiimbeli otayi shi ulike kutya omauvaneko ngoka otaga ka gwanithwa wo meityo lyopambepo. (Gal. 4:22-25) Omuyapostoli Paulus okwa yelitha kutya oshitopolwa shotango sholuvalo lwaAbraham, oKristus, noshitopolwa oshitiyali Aakriste aagwayekwa mboka ye li 144 000. (Gal. 3:16, 29; Eh. 5:9, 10; 14:1, 4) “Jerusalem shomegulu” nenge oshitopolwa shehangano lyaJehova shomegulu shoka sha thikama po maayengeli aavuliki, osho omukiintu moka tamu zi oluvalo. (Gal. 4:26, 31) Ngaashi shu uvanekwa mehangano naAbraham, oluvalo lwomukiintu otalu ka etela aantu omayambeko.
(Aagalati 4:28-31) Aamwameme, nane wo aana yaKalunga omolweuvaneko lye, ngashika naanaa Isak a li 29 Pomasiku ngeyaka omunona ngoka a valwa pamukalo gwopanshitwe, okwa tidhagana mukwawo ngoka a valwa koonkondo dhOmbepo yaKalunga. Osho shi li po nonena. 30 Ihe enyolo otali ti ngiini? Otali ti: “Laleka omudhike nomwana, oshoka omuna gwomudhike ita vulu okutopola uuthiga nomuna gwomuhokanwa.” 31 Onkee ano, aamwameme, tse katu shi aana yomudhike, ihe otse aana yomuhokanwa.
Konga omaliko mOmbiimbeli
(Aagalati 4:6, yelekanitha OB-1954) Kalunga opo u ulike kutya otse oyana, okwe tu pe Ombepo yOmwana moomwenyo dhetu, Ombepo ndjoka tayi igidha: “Abba, Tate!”
w09-E 4/1 ep. 13
Owe shi tseya ngaa?
Omolwashike Jesus i ithana Jehova megalikano a ti: “Abba, Tate”?
Oshitya shOshiaramea ‘abba’ otashi vulu okutolokwa “tate gwandje” nenge “O Tate.” Poompito adhihe ndatu mpoka oshitya shoka sha longithwa momanyolo, osha longithwa megalikano nosha longithwa shu ukithwa kuTate gwomegulu, Jehova. Oshitya shika otashi ti ngiini?
Embo The International Standard Bible Encyclopedia ota li ti: “Pethimbo lyaJesus oshitya ‘abba’ osha li hashi popiwa tashi ulike kekwatathano lyopothingo ndyoka aanona ye na noohe nosha li hashi ulike kutya oye ya simaneka.” Ogwa li omukalo gwokwiithana gwopahole, noshitya shoka osho shimwe shomiitya mbyoka okanona ka li haka tseya tango. Jesus okwa li ha longitha uutumbulilo mboka uuna ti indile sha kuHe. Moshikunino shaGetsemane, manga inaa sa, Jesus okwa li i ithana Jehova megalikano a ti: “Abba, Tate.” — Markus 14:36, OB-1954.
Embo olya tsikile ko tali ti kutya “oshitya ‘abba’ shoka hashi longithwa megalikano tashi ithanwa Kalunga, kasha li mo lela miileshomwa yAajuda pethimbo lyaGreka naRoma. Otashi vulika aantu ya li ye shi tala ko inaashi pumbiwa okwiithana Kalunga noshitya shoka sha li hashi ithanwa aantu.” Ihe nonando ongawo, “Jesus okwa li a longitha oshitya shika megalikano, a koleke kutya oku na ekwatathano lyopothingo naKalunga.” Oshitya “Abba” osha holoka lwaali mOmanyolo ngoka ga nyolwa komuyapostoli Paulus, shoka tashi ulike kutya Aakriste yomethelemumvo lyotango oya li ye shi longitha sho taya galikana. — Aaroma 8:15; Aagalati 4:6.
(Aagalati 6:17) Inaku kala we nando oongoka te etele ndje uudhigu washa. Oshoka iiyadhi mbyoka ndi yi na kolutu lwandje, otayi ulike kutya ngame omupika gwaJesus.
w10-E 11/1 ep. 15
Owe shi tseya ngaa?
Omuyapostoli Paulus okwa li a hala okutya shike sho a popi kutya ‘iiyadhi mbyoka e na kolutu lwe, otayi ulike kutya ye omupika gwaJesus’? — Aagalati 6:17.
▪ Oohapu ndhoka Paulus a popi otashi vulika aapulakeni ye yomethelemumvo lyotango ya li ye dhi uvite ko momikalo dha yoolokathana. Pashiholelwa, pethimbo lyonale oonkwata dhomiita, aayugi yootempeli nosho wo aapika mboka ya fadhuka po ooyene yawo, oya li haya tulwa oshihako nosheela oshipyu. Uuna aantu ya tulwa oshihako shoka, iiyadhi mbyoka oya li hayi sitha ohoni.
Ihe nonando ongawo, iiyadhi mbyoka kaya li aluhe hayi talwa ko momukalo gwa puka. Aantu oyendji yopethimbo lyonale oya li haya tulwa iihako yu ulike kutya oyomuhoko guni nenge oyomelongelokalunga lini. Pashiholelwa, embo Theological Dictionary of the New Testament olya ti: “Aasiria oya li yi iyapulila iikalunga Hadad naAtargatis noya li haya tulwa iihako kiikesho nenge moothingo . . . Mboka ya li haya longele oshikalunga Dionysus, oya li haya tulwa oshihako shendhindhiliko lyefo lyoshimeno shontumba.”
Aakonakoni yiinima yopethimbo lyetu ohaya dhiladhila kutya Paulus okwa li ta popi iiyadhi yiilalo mbyoka a li a ningi sho ta hepekwa palutu pethimbo a li miilonga yuutumwa yopaKriste. (2 Aakorinto 11:23-27) Onkee ano, otashi vulika Paulus a li ta popi kutya eihumbato lye olyo lya li tali ulike kutya ye Omukriste, ihe kayi shi iiyadhi yoyene.
Elesho lyOmbiimbeli
(Aagalati 4:1-20) Ihe ngame otandi ti: Omuvalwa manga omunona, ina yooloka nomupika, nonando na kale oye mwene guuthiga auhe wahe. 2 Manga e li omushona, ohapu kala aantu mboka taye mu sile oshimpwiyu notaa tonatele iinima ye sigo ethimbo ndyoka lyu uthwa kuhe. 3 Pamukalo nguka natse wo manga twa li aanona, otwa li twa pikwa koombepo dhomewangandjo sigo esiku ndyoka twa adha uukuluntu. 4 Ihe ethimbo lyo opala sho lya thikana, Kalunga okwa tumu Omwana. Oye okwa valwa komukiintu nokwa kala kohi yompango yAajuda, 5 a vule okumangulula mboka ya kala kohi yompango, opo tse tu ninge aana yaKalunga. 6 Kalunga opo u ulike kutya otse oyana, okwe tu pe Ombepo yOmwana moomwenyo dhetu, Ombepo ndjoka tayi igidha: “Tate, Tate!” 7 Onkee ano kamu shi we aapika, ihe aavalwa. Onkee molwaashoka one oyana, nena Kalunga ote ke mu pa ashihe shoka e shi nine aathigululi ye. 8 Nale omwa li inaamu tseya Kalunga, onkee omwa li mwa pikwa kiikalunga kaayi shi ookalunga muukwatya wayo. 9 Ihe ngashingeyi sho mwa tseya Kalunga, nenge ndi tye, ngashingeyi sho mwa tseyika kuKalunga, otamu vulu ngiini okwiigameka ishewe koombepo ndhoka tadhi pangele mewangandjo nodhaa na oshilonga? Omolwashike mwa hala ishewe okuninga aapika yadho? 10 One ohamu yoolola omasiku gontumba, oomwedhi, omathimbo gomumvo nomimvo. 11 Onda tila omolweni. Iilonga yandje ayihe mokati keni oya ningi osima yowala? 12 Aamwameme, otandi mu indile, ituleni pehala lyandje, ngashika nangame wo tandi itula pehala lyeni. Ne inamu ningila ndje uuwinayi nando owasha. 13 Ne otamu dhimbulukwa kutya omoluunkundi wandje wokolutu onde mu uvithile tango evaangeli. 14 Ihe ne inamu dhina ndje noinamu huga ndje, nonando onkalo yolutu lwandje oya li eyeleko enene kune. Ihe omwa taamba ndje, ngashika tamu taamba omuyengeli gwaKalunga nenge Jesus Kristus mwene nokuli. 15 One omwa li mwa nyanyukwa unene. Oshike ano sha ningwa po? Ngame mwene otandi vulu oku shi mu lombwela kutya ando sha li tashi vulika, ando omwa kolola mo omeho geni e tamu ga pe ndje. 16 Ano ngashingeyi onda ningi omutondi gweni, sho nde mu hokololele oshili? 17 Aantu yamwe mboka oya hwama unene omolweni, ihe elalakano lyawo kali shi ewanawa. Oyo oya hala oku mu tokola ko kungame, opo mu ya ningile ngaashi yo ye mu ningile. 18 Aluhe osho opala okuhwamena oshinima oshiwanawa, hauna ndoka ashike ndi li pune. 19 “Aamwameme aaholike, ngashika naanaa omukiintu e li muuwehame wokuvala, osho wo nangame ndi uvite uuwehame omolweni, sigo ondjelo yaKristus ya tungwa mune. 20 Onda halele ando ondi li pune ngashingeyi, opo ndi popye nane newi li ili. Ondi li po ndu uvite uudhigu omolweni.
10-16 JUNI
OMALIKO OKUZA MOOHAPU DHAKALUNGA | AAEFESO 1–3
“Elelo lyegumbo lyaJehova niilonga yalyo”
(Aaefeso 1:8, 9) Esilohenda ndika Kalunga okwe li tu pa olindji, li ninge oondunge nuunongo wetu miinima ayihe. 9 Kalunga okwa ningi shoka a kala nale a hala oku shi longa nokwe tu hololele oshiholekwa shoka a li a hala oku shi tu hololela muKristus.
it-2-E ep. 837, okat. 4
Oshiholekwa oshiyapuki
Uukwaniilwa wopaMesiasa. Paulus okwa gandja uuyelele awuhe woshiholekwa oshiyapuki shaKristus. MAaefeso 1:9-11 okwa popi Kalunga ta tseyithile aantu “oshiholekwa [“oshiyapuki”, NW]” shoka a kala a hala oku shi longa sho a ti: “Kalunga oku uvaneke okutsakanitha edhiladhilo lye pethimbo lyo opala. Oye ota ka hanganitha eshito alihe, nokutya ayihe yomegulu noyokombanda yevi otayi ka tulwa kumwe nomutse, Kristus. Oshoka ayihe oya ningwa pamadhiladhilo nopatokolo lyaKalunga. Kalunga okwe tu hogolola molwaKristus, tu ninge aantu ye, ongaashi e shi tokola nale okuza petameko. “Oshiholekwa [“oshiyapuki,” NW]” osha kwatela mo epangelo lyopaMesiasa lyUukwaniilwa waKalunga. Iinima “ayihe yomegulu” mbyoka Paulus a popi, aagwayekwa mboka ye na etegameno lyoku ka pangela pamwe naKristus mUukwaniilwa womegulu. Iinima ‘ayihe yokombanda yevi,’ aalelwa yokombanda yevi. Jesus okwa li a lombwele aalongwa ye kutya oshiholekwa oshiyapuki osho Uukwaniilwa sho a ti: ‘Ne omwa pewa okuuva ko oshiholekwa [“oshiyapuki,” NW] shOshilongo shaKalunga.’ — Mark 4:11.
(Aaefeso 1:10) Kalunga oku uvaneke okutsakanitha edhiladhilo lye pethimbo lyo opala. Oye ota ka hanganitha eshito alihe, nokutya ayihe yomegulu noyokombanda yevi otayi ka tulwa kumwe nomutse, Kristus.
‘Omuwa oye awike’ ta gongele iilyo yegumbo lye
3 Moses okwa li a lombwele Aaisraeli a ti: “OMUWA Kalunga ketu oye awike Kalunga.” (Deut. 6:4) Kehe shimwe shoka Jehova ta ningi oshi li aluhe metsokumwe nelalakano lye. Onkee ano, “pethimbo lyo opala” ota ka hanganitha iishitwa ye ayihe iinandunge okupitila melongekidho ndyoka tali ithanwa “elelo lyegumbo lye.” (OB-1954) (Lesha Aaefeso 1:8-10.) Elelo lyegumbo ndika olya kwatela mo oongundu mbali. Ongundu yotango, oyaagwayekwa taya hanganithwa ya ka kale nomwenyo megulu pamwe nomutse gwawo, Jesus Kristus. Okuhanganithwa kwawo okwa tameke mo 33 E.N., sho Jehova a tameke okugongela mboka taya ka pangela pamwe naKristus megulu. (Iil. 2:1-4) Molwaashoka aagwayekwa oya ningwa aayuuki kekuliloyambo lyaKristus, oye shi kutya yo oye li “aana yaKalunga.” — Rom. 3:23, 24; 5:1; 8:15-17.
4 Ongundu ontiyali, oyaamboka taya ka kala mOparadisa kombanda yevi, kohi yUukwaniilwa waKristus wopaMesiasa. Otaya popiwa ye li “ongundu onene.” (OB-1954) (Eh. 7:9, 13-17; 21:1-5) Otaya ka hangana naantu omabiliyona mboka taye ke enda taya yumudhwa muule wOomvula Eyuvi dhepangelo lyaKristus. (Eh. 20:12, 13) Eyumuko ndyoka otali ke tu hanganitha lelalela. Iinima ‘ayihe yokombanda yevi’ otayi ka makelwa oshikando shahugunina pehulilo lyoomvula eyuvi. Mboka taya ka pita memakelo ndyoka, otaya ka ninga ‘aana yaKalunga’ yokombanda yevi. — Rom. 8:21; Eh. 20:7, 8.
Konga omaliko mOmbiimbeli
(Aaefeso 3:13) Onkee otandi mu kumagidha, mwaa se uunye, oshoka ngame otandi hepekwa molweni; ashihe otashi ningwa omoluuwanawa weni.
Ino etha sha shi ku imbe wu pewe esimano
15 Ngele otatu tsikile nokulonga ehalo lyaJehova, otashi ka kwathela yalwe ya pewe esimano kuye. Paulus okwa li a nyolele egongalo lyokuEfeso a ti: “Otandi mú kumagidha, mwaa se uunye, oshoka ngame otandi hepekwa molweni; ashihe otashi ningwa omoluuwanawa weni,” nenge tu tye omolwesimano lyeni. (Ef. 3:13) Omeityo lini Paulus a li a hepekwa ‘omolwenyanyu lyAaefeso’ nenge tu tye omolwesimano lyawo? Omokukala i ilongekidha oku ya kwathela. Nonando okwa li ta hepekwa okwa li u ulukile Aaefeso kutya uuthembahenda mboka ye na wokukala Aakriste owa kwata miiti nowa dhenga mbanda kaaku na we. Ando Paulus okwa sile uunye sho ta hepekwa, mbela andola inashi holola kutya ekwatathano lyawo naJehova, uukalele wawo nosho wo etegameno lyawo ka li na ongushu yasha? Eidhidhimiko lyaPaulus olya ningitha Uukriste wu hume komeho nolyu ulike kutya okuninga aantu aalongwa oku li eyambo li na ondilo.
(Aaefeso 3:19) Eeno, tseyeni ohole ye, nonando itayi vulu okutseyika thiluthilu, e tamu kala ihe mu udhithwa egwano alihe lyaKalunga.
‘Tseyeni ohole yaKristus’
21 Oshitya shOshigreka shoka sha tolokwa ‘okutseya’ otashi ti okutseya sha “okupitila miimoniwa.” Ngele tatu ulike ohole ngaashi Jesus, mokukala tatu ningi omaiyambo opo tu kwathele yalwe, mokugwanitha po oompumbwe dhawo pahole, moku ya dhimina po tashi zi komutima, otashi ke tu kwathela tu uve ko nawa kutya okwa li ha kala e uvitile aantu ngiini. Kungawo, okupitila miimoniwa, otatu ka ‘tseya ohole ye nonando itayi vulu okutseyika thiluthilu.’ Inatu dhimbwa nandonando kutya mpoka ngaa pu thike okuholela kwetu Kristus, opo ngaa tapu ka kala pu thike okuhedha kwetu popepi lela naKalunga ketu omunahole, Jehova, ngoka Jesus ha holele thiluthilu.
Elesho lyOmbiimbeli
(Aaefeso 1:1-14) Ontumwafo ndjika oya zi kuPaulus, omuyapostoli gwaJesus pahalo lyaKalunga. Oya nyolelwa aantu yaKalunga ye li muEfeso, mboka aainekelwa mekwatathano lyawo naJesus Kristus. 2 Silweni ohenda, ne mu kale mu na ombili yaKalunga Tate noyOmuwa Jesus Kristus. 3 Kalunga, He yOmuwa gwetu Jesus Kristus, na hambelelwe! Oye tuu ngoka e tu laleke nuuyamba muukumwe naKristus, sho e tu pe omagano agehe gopambepo taga zi megulu. 4 Kalunga sho e tu hole, okwe tu hogolola nale molwaKristus, manga uuyuni inaau shitwa, tu kale aayapuki twaa na oshipo koshipala she, 5 Oye okwa kala e shi nuna nale kutya ote ke tu taamba, tu ninge oyana omolwaJesus Kristus. Shika osho enyanyu nelalakano lye. 6 Onkee Kalunga na hambelelwe omoluuwindji wesilohenda lye nomolwomagano agehe ngoka e ge tu pa mOmwana omuholike. 7 Oshoka tse otwa mangululwa notwa dhiminwa po oondjo dhetu omolweso lyaKristus. Esilohenda lyaKalunga ekumithi ngiini! 8 Esilohenda ndika Kalunga okwe li tu pa olindji, li ninge oondunge nuunongo wetu miinima ayihe. 9 Kalunga okwa ningi shoka a kala nale a hala oku shi longa nokwe tu hololele oshiholekwa shoka a li a hala oku shi tu hololela muKristus. 10 Kalunga oku uvaneke okutsakanitha edhiladhilo lye pethimbo lyo opala. Oye ota ka hanganitha eshito alihe, nokutya ayihe yomegulu noyokombanda yevi otayi ka tulwa kumwe nomutse, Kristus. 11 Oshoka ayihe oya ningwa pamadhiladhilo nopatokolo lyaKalunga. Kalunga okwe tu hogolola molwaKristus, tu ninge aantu ye, ongaashi e shi tokola nale okuza petameko. 12 Onkee ano tu tangeni esimano lyaKalunga, oshoka otse aatango mboka twa kala tu na etegameno muKristus. 13 Nane wo sho mu uvu ohapu yoshili, elaka etoye ndyoka lye mu etele ehupitho, omwi itaale Kristus. Kalunga nokwe mu tula oshihako shoku mu ndhindhilika kutya mwa ningi aantu ye, sho e mu pe Ombepo Ondjapuki ngoka e mu uvanekela. 14 Ombepo oye okapilo kutya tse otatu ka pewa shoka Kalunga e shi uvanekela aantu ye. Ombepo ote tu tsu omukumo, tu inekele kutya Kalunga ota ka mangulula aantu ye. Tu tangeni ano esimano lye!
17-23 JUNI
OMALIKO OKUZA MOOHAPU DHAKALUNGA | AAEFESO 4–6
“Ihomatekeni iikondjitho ayihe mbyoka Kalunga te yi mu pe”
(Aaefeso 6:11-13) Ihomatekeni iikondjitho ayihe mbyoka Kalunga te yi mu pe, opo mu vule okukandeka omakotokelo omawinayi gomuhindadhi. 12 Oshoka tse itatu kondjitha aantu, ihe otatu kondjitha oonkondo dhomombepo, aanankondo yuuyuni mbuka womilema nosho wo oonkondo dhuuwinayi mewangandjo. 13 Onkee ano ngashingeyi ihomatekeni iikondjitho ayihe mbyoka Kalunga te yi mu pe. Omasiku omawinayi ngele tage ya, nena otamu ka vula okwiipopila komahomono gomukondjithi gweni nokukala omuthika, ngele mwa kondjo sigo okehulilo.
Aagundjuka — kondjitheni Omuhindadhi
OMUYAPOSTOLI PAULUS okwa faathanitha onkalamwenyo yetu tu li Aakriste nonkalamwenyo yaakwiita mboka ye li molugodhi. Odhoshili kutya olugodhi ndoka tatu kondjo olwopambepo, ihe kalu shi olugodhi lwo lwene. Nonando ongawo, aatondi yetu mboka tatu kondjitha oyolela. Satana noompwidhuli dhe, aakwiita ya pyokoka mboka ya kala nokukondja ethimbo nuule. Otashi vulika tu kale tu wete itaatu vulu oku ya kondjitha. Aagundjuka Aakriste otashi vulika ya kale ye wete itaaya vulu okusindana molugodhi ndoka. Oshike tashi ya kaleke netegameno kutya otaya vulu okusindana mokukondjitha Satana noompwidhuli dhe, mboka ye na oonkondo dhi vule dhaantu? Odhoshili kutya aagundjuka otaya vulu okusindana, notaya sindana! Omolwashike? Omolwaashoka oyi ‘ikolelela mOmuwa.’ Ihe ohaya ningi oshindji shi vulithe pokwiikolelela moonkondo dhaKalunga. Oya zala ya kondje olugodhi. Ngaashi aakwiita ya dheulwa nawa, naagundjuka oyi ‘ihomateka iikondjitho ayihe mbyoka Kalunga e tu pa.’ — Lesha Aaefeso 6:10-12.
(Aaefeso 6:14, 15) Kaleni ano omuthika mwi ilongekidha; zaleni oshili, yi ninge epaya moombunda dheni. Izalekeni uuyuuki, u ninge ehuuyanza poontulo dheni. 15 Kaleni mwi ilongekidha okuuvitha elaka etoye lyombili, li kale oongaku dhokoompadhi dheni.
w18.05 ep. 28-29, okat. 4, 7, 10
Aagundjuka — kondjitheni Omuhindadhi
4 Sha faathana, oshili ndjoka twi ilonga mOohapu dhaKalunga, ohayi tu gamene kiiponga yopambepo mbyoka hayi etithwa komalongo giifundja. (Joh. 8:31, 32; 1 Joh. 4:1) Ngele otwa kala tu hole lela oshili, otashi ka kala oshipu kutse okuhumbata “ehuuyanza” lyetu, shoka sha hala okutya, okukala metsokumwe nomithikampango dhaKalunga. (Eps. 111:7, 8; 1 Joh. 5:3) Shimwe ishewe, uuna tu uvite ko nawa oshili yOohapu dhaKalunga, otatu ka vula okukala nomukumo tu kondjithe aapataneki yetu nokugamena oshili. — 1 Pet. 3:15.
7 Ehuuyanza ndyoka otali opalele, oshoka otali ulike nkene omithikampango dhaJehova dhuuyuuki tadhi vulu okugamena omutima gwetu gwopathaneko. (Omayel. 4:23) Ngaashi owala omukwiita itaa hala okugandja po ehuuyanza ndyoka lya longwa moshiyela, opo a pewe ndyoka inaali kola, natse itatu ka pingena po omithikampango dhaJehova dhuuyuuki naashoka she tu opalela paumwene. Tse itatu vulu okwiigamena tse yene. (Omayel. 3:5, 6) Pehala lyaashono, ohatu shilipaleke aluhe kutya “ehuuyanza” ndyoka Jehova e tu pa, olya gamena omutima gwetu.
10 Ngaashi oongaku ndhoka dha li hadhi zalwa kaakwiita yaRoma dha li hadhi ya kwathele ya ye kolugodhi, oongaku dhopathaneko ndhoka hadhi zalwa kAakriste, ohadhi ya kwathele yu uvithe etumwalaka lyombili. (Jes. 52:7; Rom. 10:15) Ihe ohashi pula uulaadhi okuuvithila yalwe. Omumwatate Bo gwomimvo 20, ota ti: “Onda li handi kala nda tila okuuvithila aalongwa yomongundu yetu. Ondi wete kutya onda li ndi na ohoni. Uuna tandi shi dhiladhila, kandi shi kutya omolwashike nda li ngawo. Ngashingeyi ohandi nyanyukilwa okuuvithila oomakula yandje.”
(Aaefeso 6:16, 17) Ethimbo alihe zaleni eitaalo ongehuuyanza, opo mu wape okudhima nalyo iikuti ayihe ya hwama omulilo mbyoka tayi umbwa kuMwiinayi. 17 Taambeni ehupitho, li ninge ongegala lyosheela, noohapu dhaKalunga ongegongamwele, ndyoka Ombepo te li mu pe.
w18.05 ep. 29-31, okat. 13, 16, 20
Aagundjuka — kondjitheni Omuhindadhi
13 ‘Iikuti yimwe ya hwama omulilo’ mbyoka Satana ha longitha e ku ehameke, iifundja kombinga yaJehova kutya ke na ko nasha nangoye nonokutya kapu na ngoka e ku hole. Omumwameme Ida gwomimvo 19, oha kondjitha omadhiladhilo gokukala u uvite kee na oshilonga. Ota ti: “Olundji onda li handi kala ndu uvite kutya Jehova ke li popepi nangame nonokutya ina hala okukala Kuume kandje.” Mbela ohu ungaunga ngiini nonkalo ndjoka? Ota ti: “Omakugongala ogo unene haga koleke eitaalo lyandje. Onda li handi kala owala nda kuutumba noihandi gandja nando etyokosha, tandi dhiladhila kutya kapu ngoka a hala okupulakena kwaashoka nda hala okutya. Ihe ngashingeyi ohandi ilongekidhile omakugongala nohandi kambadhala okuyamukula lwaali nenge lutatu. Oshidhigu shili, ihe ohandi kala ndu uvite nawa, uuna nde shi ningi. Aamwatate naamwameme ohaya tsu ndje omukumo lela. Kokugongala aluhe ohandi zi ko ndi shi kutya Jehova oku hole ndje.”
16 Ngaashi owala egala lyosheela hali gamene uuluyi womukwiita, “netegameno lyehupitho” lyetu ohali gamene uuluyi wetu, ano omadhiladhilo getu. (1 Tes. 5:8; Omayel. 3:21) Etegameno ohali tu kwathele tu tsikile okugandja eitulomo komauvaneko gaKalunga nohali tu kwathele wo twaa shune omutse miipeta, omolwomaupyakadhi getu. (Eps. 27:1, 14; Iil. 24:15) Ihe ngele otwa hala ‘egala lyetu lyosheela’ li tu gamene, otu na oku li zala komitse dhetu, ihe haku li humbata miikaha.
20 Paulus okwa faathanitha Oohapu dhaKalunga negongamwele. Jehova okwe tu pa egongamwele ndyoka. Ihe otu na okwiilonga nkene tu na oku li longitha nawa, uuna tatu popile eitaalo lyetu nenge tatu lundulula omadhiladhilo getu. (2 Kor. 10:4, 5; 2 Tim. 2:15) Ongiini tatu vulu okuhwepopaleka uunkulungu wetu? Omumwatate Sebastian gwomimvo 21, ota ti: “Melesho lyandje lyOmbiimbeli, montopolwa kehe ohandi kutha mo ovelise yimwe noku yi nyola pokuma. Ohandi gongele oovelise ndhoka ndi hole. Okuninga ngawo, okwa kwathela ndje ndi uve ko nkene Jehova ha dhiladhila.” Omumwatate Daniel ngoka a popiwa metetekelo ota ti: “Uuna tandi ningi elesho lyandje lyOmbiimbeli, ohandi hogolola oovelise ndhoka ndi wete kutya otadhi vulu okukwathela aantu mboka tandi tsakaneke muukalele. Onda mona kutya aantu ohayi inyenge nawa, uuna ya mono kutya owu hole shili Ombiimbeli nuuna to ningi ngaashi to vulu wu ya kwathele.”
Konga omaliko mOmbiimbeli
(Aaefeso 4:30) Ombepo Ondjapuki yaKalunga inamu yi nikitha uuthigwa, oshoka oyo oshihako shaKalunga shoku mu ndhindhilika kutya mwa ningi aantu ye, okapilo koku mu tsa omukumo kutya esiku otali ke ya, uuna ndoka Kalunga te ke mu mangulula.
it-1-E ep. 1128, okat. 3
Uuyapuki
Ombepo ondjapuki. Oonkondo nenge ombepo ndjoka Jehova ha longitha a gwanithe po aluhe elalakano lye. Oya yogoka, kayi na okantongo kasha, oya yapuka nohayi longithwa owala kuKalunga miinima iiwanawa. Onkee ano, ohayi ithanwa ‘ombepo ondjapuki’ nosho wo ‘ombepo yuuyuuki.’ (Eps 51:11; Luk 11:13; Rom 1:4; Ef 1:13) Ombepo ondjapuki ohayi longo momuntu yi li oonkondo dhuuyapuki nenge dhuuyogoki. Okwaana uuyogoki kehe nenge okuninga iinima ya puka, ohaku ningitha ombepo ondjapuki kaayi longe momuntu nenge yi ‘nike uuthigwa.’ (Ef 4:30) Nonando ombepo ondjapuki kayi shi omuntu, oyi li oshitopolwa shuukwatya waKalunga uuyapuki, onkee ohayi vulu ‘okunikithwa uuthigwa.’ Uuna omuntu ta ningi oshinima kehe sha puka oha ‘keelele ombepo ondjapuki.’ (1Tes 5:19) Ngele okwa tsikile noku shi ninga, ombepo ondjapuki yaKalunga ohayi “uvu nayi” shoka hashi ningitha Kalunga a ninge omutondi gwomuntu ngoka. (Jes 63:10, NW) Omuntu ngoka ta nikitha ombepo yaKalunga uuthigwa ohashi vulika e yi sheke, neyono ndyoka Jesus okwa ti kutya i te li dhiminwa po ngashingeyi nomonakuyiwa. — Mat 12:31, 32; Mark 3:28-30; tala wo OMBEPO.
(Aaefeso 5:5) Ndhindhilikeni ihe nawa oshinima shika: kapena ando omuhondeli nenge omuntu kehe e li muulunde nenge omunalwiho, oshoka olwiho olwo okusimaneka iimenka, ta ka kala e na oshitopolwa mOshilongo shaKristus noshaKalunga.
it-1-E ep. 1006, okat. 2
Olwiho
Ohalu ulikwa kwaashoka omuntu ta longo. Omuntu ngele oku na olwiho oha kala e na omahalo ga puka go oga pitilila. Omunyoli gumwe gwOmbiimbeli Jakob okwa ti kutya uuna omahalo ga puka ga simbapala, ohaga vala uulunde. (Jak 1:14, 15) Onkee ano, omuntu ngoka e na olwiho ohi imonikila mwaashoka ta ningi. Omuyapostoli Paulus okwa popi kutya omuntu ngoka e na olwiho omusimaneki gwiimenka. (Ef 5:5) Oha ningi omahalo ge oshikalunga, pehala lyokupititha komeho okulongela Omushiti. — Rom 1:24, 25
Elesho lyOmbiimbeli
(Aaefeso 4:17-32) Medhina lyOmuwa otandi mu lombwele ihe oshinima shika noku mu kumagidha kutya, inamu enda we ngashika aapagani, mboka taa ende muugoya womadhiladhilo gawo. 18 Omadhiladhilo gawo oga sa komilema. Kalunga ite ya pe omwenyo, oshoka kaye na oondunge noyi ikukutika. 19 Oyo ihaa si ohoni. Otaa iyethele yo yene moonyata dhuulunde kaaye na eidhiliko noyaa na nando onge. 20 Ihe ne inamu longwa okutseya Kristus pamukalo gwa tya ngaaka. 21 Ondi inekela, omwe mu uvu, naasho mu li aalanduli ye, omwa longwa oshili ndjoka yi li muJesus. 22 Ano ihuleni omuntu gweni omukulu ngoka mwe mu landula nale, ngoka hi iyono po ye mwene mokwiifundjaleka nuuhalu we. 23 Omitima dheni nomadhiladhilo geni naga shituluke lela, ga ninge omape. 24 Zaleni omuntu omupe ngoka a shitwa a fa Kalunga nohi iholola ye mwene mokukalamwenyo ku uka nokwa yapuka. 25 Onkee ano etheni iifundja. Ihe kehe gumwe na lombwele mukwawo oshili, oshoka tse atuhe iilyo yolutu lwaKristus. 26 Ngele tamu geye, inamu etha ondjahi yeni yi mu fale sigo omokuyona; inamu kala mwa geya esiku alihe. 27 Inamu pa omuhindadhi ompito, e mu sinde. 28 Omufuthi na ethe po okuyaka kwe, ye a tameke okwiilongela sha pamukalo omwaanawa, ye a vule ihe okukala e na sha okukwatha oohepele. 29 Inamu popya oohapu oombwinayi. Popyeni ashike oohapu ndhoka oombwanawa tadhi tungu nodha pumbiwa, opo aapulakeni yeni ye dhi hokwe. 30 Ombepo Ondjapuki yaKalunga inamu yi nikitha uuthigwa, oshoka oyo oshihako shaKalunga shoku mu ndhindhilika kutya mwa ningi aantu ye, okapilo koku mu tsa omukumo kutya esiku otali ke ya, uuna ndoka Kalunga te ke mu mangulula. 31 Etheni ano uululu auhe, ondjahi nonkone, omakudhilo nenge omatukano, uuwinayi kehe nau mu kale kokule. 32 Ihe kalathaneni mu na uukuume nolukeno. Silathaneni ohenda nokudhiminathana po oondjo, ngashika naanaa Kalunga e mu dhimine po oondjo dheni molwaKristus.
24-30 JUNI
OMALIKO OKUZA MOOHAPU DHAKALUNGA | AAFILIPPI 1–4
“Inamu kala mu na nando oshimpwiyu shasha”
(Aafilippi 4:6) Inamu kala mu na nando oshimpwiyu shasha, ihe oompumbwe dheni dhi tseyithileni Kalunga momagalikano geni agehe. Ihe indileni aluhe nomwenyo gu udha ehambelelo.
‘Ombili yaKalunga, oyi vule uunongo awuhe wopantu’
10 Oshike tashi vulu oku tu kwathela kaatu kale tu na iimpwiyu notu mone ‘ombili yaKalunga’? Oohapu ndhoka Paulus a li a nyolele Aafilippi, otadhi ulike kutya egalikano olyo ekandulopo lyuupyakadhi. Onkee ano, uuna tu na iimpwiyu, otwa pumbwa oku yi tseyithila Jehova megalikano. (Lesha 1 Petrus 5:6, 7.) Uuna to galikana kuJehova, kala wi itaala thiluthilu kutya oku na ko nasha nangoye. Mu galikana “nomwenyo gu udha ehambelelo,” omolwomayambeko ngoka wa mona. Einekelo lyetu muJehova otali ka kola, ngele otwa kala tu shi kutya ota vulu “okulonga oshindji shi vulithe pushoka tatu shi indile nenge tatu shi dhiladhila.” — Ef. 3:20.
(Aafilippi 4:7) Nombili yaKalunga, ndjoka yi vule uunongo auhe wopantu, otayi gamene oomwenyo dheni nomadhiladhilo geni muKristus Jesus.
‘Ombili yaKalunga, oyi vule uunongo awuhe wopantu’
7 Sho aamwatate yomuFilippi ya lesha ontumwafo ndjoka ya zi kuPaulus, oya dhimbulukwa shike? Oyendji otashi vulika ya dhimbulukwa shoka sha li sha ningilwa Paulus nankene Jehova a li e mu kwathele momukalo inaagu tegelelwa. Paulus okwa li te ya longo shike? Okwa li te ya longo kaaya kale tayi ipula unene noya kale taya galikana, opo ya mone ombili yaKalunga. Ndhindhilika kutya ‘ombili yaKalunga, oyi vule uunongo awuhe wopantu.’ Mbela shoka osha hala okutya ngiini? Aatoloki yamwe, uutumbulilo mboka oye wu toloka kutya ombili yaKalunga “oyi vule oondjodhi dhetu adhihe” nenge “oyi vule oompangela adhihe dhopantu.” Onkee ano, Paulus okwa li a hala kutya ‘ombili yaKalunga’ onkumithi shimwe to nyengwa. Nonando otashi vulika tu kale tu wete itaatu vulu okukandula po omaupyakadhi getu, Jehova ota vulu oku shi ninga, nokuli nomomukalo inaagu tegelelwa. — Lesha 2 Petrus 2:9.
‘Ombili yaKalunga, oyi vule uunongo awuhe wopantu’
16 Ngele otwa kala tu na ‘ombili yaKalunga, ndjoka yi vule uunongo awuhe wopantu,’ oshizemo otashi ka kala shini? Ombiimbeli otayi ti kutya ‘otayi ka gamena oomwenyo dhetu nomadhiladhilo getu muKristus Jesus.’ (Fil. 4:7) Oshitya shomelaka lyopetameko shoka sha tolokwa ‘gamena,’ osha li tashi ulike kuukwiita. Osha li tashi ulike kongundu yaakwiita mboka ya tulwa po, opo ya gamene oshilando oshinene pethimbo lyonale. Filippi osho oshilando sha li hashi kala sha gamenwa kaakwiita. Aakalimo yomoshilando moka oya li haya kotha taya mbonyoka, molwaashono oye shi kutya oshilando shawo osha gamenwa kaakwiita. Sha faathana, ngele otu na ‘ombili yaKalunga,’ omitima dhetu nomadhiladhilo getu ohaga kala ga gundjila. Otu shi kutya Jehova oku na ko nasha natse nokwa hala tu pondole. (1 Pet. 5:10) Shoka ohashi tu kwathele kaatu gwililwe po kiimpwiyu nokaatu teke omukumo.
Konga omaliko mOmbiimbeli
(Aafilippi 2:17) Nonando [“ondi tilwehi onga oshinuwandjambo,” NW] kombanda yomayambo ngoka eitaalo lyeni tali ga yambele Kalunga, ngame onda nyanyukwa notandi ka nyanyukwa pamwe nane amuhe.
it-2-E ep. 528, okat. 5
Omayambo
Iinuwandjambo. Iinuwandjambo oya li hayi gandjwa pamwe nomayambo galwe unene tuu sho Aaisraeli ya yi mEvi lyEuvaneko. (Num 15:2, 5, 8-10) Miinuwandjambo omwa li mwa kwatelwa omaviinu noya li hayi tilwahi koshiyambelo (Num 28:7, 14; yelekanitha Eks 30:9; Num 15:10.) Omuyapostoli Paulus okwa nyolele Aakriste yokuFillipi a ti: “Nonando [“ondi tilwehi onga oshinuwandjambo,” NW] kombanda yomayambo ngoka eitaalo lyeni tali ga yambele Kalunga, ngame onda nyanyukwa notandi ka nyanyukwa pamwe nane amuhe.” Movelise ndjoka okwa longitha oshikunwandjambo pathaneko u ulike kutya okwa li e na ehalo lela lyokulonga pehala lyAakriste ooyakwawo. (Fil 2:17) Konima yokathimbo manga inaa sa okwa li a nyolele Timoteus a ti: “Ngame otandi tilwahi nokuli ongomayambo giikunwa. Ethimbo olya thika, ethimbo lyokuthiga po okukalamwenyo huka oli li popepi.” — 2Tim 4:6, yelekanitha OB-1954.
(Aafilippi 3:11) opo nangame wo ndi yumudhwe mo meso [“meyumudho lyotango,” NW] ndi ye momwenyo.
‘Eyumuko lyotango’ olya tameka nale!
5 Kakele keyumuko lyaJesus, aagwayekwa mboka ye li ‘aantu yaKalunga’ oye na okuyumudhilwa megulu, moka taya ‘ka kala aluhe pOmuwa,’ Jesus Kristus. (Aagalati 6:16; 1 Aatessalonika 4:17) Ombiimbeli otayi ti kutya eyumuko ndyoka olyo ‘eyumuko lyotango.’ (Ehololo 20:6) Konima ngele eyumuko ndyoka lya pu, opo owala aantu omamiliyona mboka ye li moombiladhimbuluko taya ka yumuninwa omwenyo kombanda yevi, notaya ka kala ye na etegameno lyoku ka kala nomwenyo gwaaluhe mEviparadisa. Onkee ano, kutya nduno otu na etegameno lyokuya megulu nenge olyoku ka kala mEviparadisa, otu na okukala tu na ohokwe lela ‘meyumuko lyotango.’ Mboka haya yumudhwa meyumuko lyotango ohaya yumudhwa nomalutu ga tya ngiini? Eyumuko ndyoka olya tameka uunake notali ka hula uunake?
Elesho lyOmbiimbeli
(Aafilippi 4:10-23) Onda nyanyukwa shili mOmuwa, sho mwa mono ishewe ompito okusila ndje oshimpwiyu konima yethimbo ele. Osho shoka mwa li mwa hala oku shi ninga shito, ihe inamu mona ompito. 11 Shika itandi shi popi omolwoluhepo, oshoka ondi igilila okukala naashoka ndi shi na, 12 nashi kale oshishona nenge nashi kale oshindji. Onda pyokoka miinima ayihe: okukala nda kuta nenge okukala nda sa ondjala, okukala meloolo nenge okukala moluhepo. 13 Ngame otandi vulu shaa shoka, oshoka Kristus ota koleke ndje. 14 Ihe ne omwa ninga nawa shili, sho mwa kwatha ndje muudhigu wandje, 15 Ne Aafilippi, omu shi shi nawa kutya, sho nda zile muMakedonia pomasiku ngeyaka gopetameko, manga nda li tandi uvitha elaka etoye, egongalo lyeni olyo alike lya li lya kwatha ndje. Eeno, ne amuke omwa li mwa topola pamwe nangame etano neshonopalo lyiiniwe. 16 Ongame sho nda li ndi na oluhepo muTessalonika, one omwa li mwa tumine ndje ekwatho, halumwe aluke, ihe lwaali nokuli. 17 Shika itashi ti, onda hala ashike ando okutaamba omagano, ihe onda hala, mu ilikolele sha ne yene. 18 Ngashingeyi ondi na oshindji shi vule shoka nda pumbwa. Ondi na eloolo, Epafroditus sho e etele ndje omagano geni, taga ningi eyambo lyezimba lya nika nawa, lyo opala nolya hokiwa kuKalunga. 19 Kalunga kandje, ngoka e na uuyamba auhe muKristus Jesus, ote ke mu gwanithila ashihe shoka mwe shi pumbwa. 20 Kalunga, Tate yetu, oye na simanekwe aluhe sigo aluhe. Amen. 21 Kundilii po aantu yaKalunga ayehe noyaJesus Kristus. Aamwameme ayehe mboka ye li mpaka, otaye mu kundile po. 22 Aayapuki ayehe otaye mu kundile po, unene mboka yomuuwa womupangeli Omuroma. 23 Esilohenda lyOmuwa Jesus Kristus nali kale pamwe nane amuhe.