Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
5-11 AUGUSTE
OMALIKO OKUZA MOOHAPU DHAKALUNGA | 2 TIMOTEUS 1–4
‘Kalunga ine tu pa ombepo yoku tu ninga aambanda’
(2 Timoteus 1:7) Oshoka Kalunga ine tu pa Ombepo yoku tu ninga aambanda, ihe okwe tu pe Ombepo ye yoku tu pa oonkondo, ohole neikwatonawa.
Aagundjuka, ningeni ehumokomeho li wetike
9 Konima yaashono Paulus okwa li a kwathele Timoteus, sho a li e mu dhimbulukitha a ti: ‘Kalunga ine tu pa ombepo yoku tu ninga aambanda, ihe okwe tu pe ombepo ye yoku tu pa oonkondo, ohole neikwatonawa.’ (2 Tim. 1:7) Okukala “neikwatonawa” osha kwatela mo okuvula okudhiladhila nosho wo okutompathana pandunge. Osha kwatela mo wo okukala ho tala ko iinima yi li ngaashi yi li, ihe hangaashi wa hala yi kale. Aagundjuka yamwe mboka inaaya koka pambepo ohaya kwatwa kuumbanda nohaya kambadhala ya henuke okudhiladhila kombinga yoonkalo oondhigu. Ohaya kotha nenge ya tale o-TV sha pitilila, ohaya longitha iingangamithi nenge ya nwe iikunwa yoalkoholi sha pitilila, ohaya kala yi itula muututhi nenge ya ye moluhondelo. Ihe tu li Aakriste, otwa kumagidhwa “tu ethe okudhina Kalunga nuuhalu wuuyuni, tse tu kale muuyuni mbuka meikwatonawa, muuyuuki nomokusimaneka Kalunga.” — Tit. 2:12.
(2 Timoteus 1:8) Ino sa ohoni okuhokolola Omuwa gwetu nangame wo, ngoka nda kwatwa omolwe. Onkee ano nangoye wo ou na ompito yokukala momahepeko omolwevaangeli, oshoka Kalunga ote ku pe oonkondo dhoku ga idhidhimikila.
w03 3/1 ep. 22-23, okat. 7
‘Ikolelela, nowu kale nomukumo!’
7 Paulus okwa nyolele Timoteus a ti: ‘Kalunga ine tu pa ombepo yoku tu ninga aambanda, ihe okwe tu pe ombepo ye yoku tu pa oonkondo. Ino sa ohoni okuhokolola Omuwa gwetu.’ (2 Timoteus 1:7, 8; Markus 8:38) Molwaashoka otwa lesha oohapu ndhono, otatu vulu okwiipula kutya: ‘Mbela onda sa ohoni eitaalo lyandje, nenge ondi na omukumo? Kehala hono handi longo (nenge kosikola hono handi yi), mbela ohandi lombwele mboka ya kundukidha ndje kutya ngame Onzapo yaJehova, nenge ohandi kambadhala oku shi holeka? Mbela onda sa ohoni okukala nda yooloka ko kuyamwe, nenge ondi uvite uuntsa sho nda yooloka ko kuyo omolwekwatathano lyandje naJehova?’ Ngele opu na ngoka e na uumbanda shi na ko nasha nokuuvitha onkundana ombwanawa nenge okukala pamuthika ngoka inaagu pandika koyendji, na dhimbulukwe omayele gaJehova ngoka a pa Josua a ti: ‘Ikolelela, nowu kale nomukumo.’ Inatu dhimbwa nando kutya etaloko lyaalongi ooyakwetu nenge lyaanasikola ooyakwetu halyo lya simana, ihe etaloko lyaJehova naJesus Kristus. — Aagalati 1:10.
Konga omaliko mOmbiimbeli
(2 Timoteus 2:3, 4) Idhidhimikila omahepeko ongomukwiita ofule gwaJesus Kristus. 4 Omukwiita ngoka e li molugodhi, ihi ipyakidhile noompumbwe dhilwe, oshoka okwa hala okwoopalela aluhe omuwiliki gwe.
Konga eliko lyashili
13 Timoteus naye okwa li e na eitaalo lya kola. Paulus okwi ithana Timoteus ‘omukwiita ofule gwaJesus Kristus.’ Konima okwe mu lombwele a ti: “Omukwiita ngoka e li molugodhi, ihi ipyakidhile noompumbwe dhilwe, oshoka okwa hala okwoopalela aluhe omuwiliki gwe.” (2 Tim. 2:3, 4) Mokati kaalanduli yaJesus kunena, omu na aalongi yethimbo lyu udha ya konda pomiliyona yimwe. Aauvithi mboka oya tula miilonga omayele ngoka Paulus e tu pa. Ihaya kala yi itula momatseyitho gopaipindi nomiinima mbyoka tayi ningwa muuyuni. Pehala lyaashono, ohaya kaleke momadhiladhilo ekotampango ndyoka tali ti: ‘Omunangunga ota ningi omupika gwomulilwangunga.’ (Omayel. 22:7) Satana okwa hala tu mane po ethimbo lyetu noonkondo dhetu mokukala twa pwila moongeshefa dhomuuyuni mbuka. Omatokolo gamwe ngoka hatu ningi otashi vulika ge tu ninge aapika yoongunga, uule womimvo. Aakriste yamwe ohaya li omikuli dhiimaliwa oyindji, opo ya lande omagumbo guuzeko, iihauto yondilo noya fute elongo lyopombanda nenge ya ninge oohango dha tata dhaindula. Ohatu ulike uunongo, uuna itaatu indumbile iinima yopamaliko noongunga monkalamwenyo. Ngele tatu shi ningi, otatu ka longela Kalunga twa manguluka, pehala lyokukala aapika yoongeshefa ndhoka tadhi dhana onkandangala muuyuni mbuka. — 1 Tim. 6:10.
(2 Timoteus 2:23) Yanda okuludhika kwa nika uugoya nokwaa na owino, oshoka iinima ya tya ngeyi ohayi hulile moontamanana.
Kehe gumwe gwomoshigwana shaJehova ne “ethe uugoyoki”
10 Momagongalo ogendji gOonzapo dhaJehova kunena kamu na aashunimonima. Ihe ngele otu uvu yamwe taya popi omadhiladhilo ngoka ge li kokule nOmbiimbeli, natu ge ekelehi thiluthilu kutya nduno otaga popiwa nee kulye. Kashi li pandunge okukala tatu ningi inda mo ndi ye mo naashunimonima. Kutya nduno otatu shi ningi oshipala noshipala nenge okuyamukula iihapu yawo yaa fele mbyoka haya tula kointaneta. Katu na okukwatathana nayo momukalo kehe. Nonando ohashi vulika tu kale twa hala oku ya kwathela, oshinima shoka otashi kondjithathana nehalo lyaKalunga. Tu li aapiya yaJehova, otu na okuyanda thiluthilu aashunimonima.
Elesho lyOmbiimbeli
(2 Timoteus 1:1-18) Paulus, omuyapostoli gwaJesus Kristus pahalo lyaKalunga nomutumwa okuhokolola omwenyo ngoka twe gu uvanekelwa muukumwe naKristus Jesus, 2 ota nyolele omwana omuholike Timoteus. Esilohenda, ontalanteni nombili yaKalunga Tate noyOmuwa gwetu Jesus Kristus nayi kale nangoye. 3 Otandi hambelele Kalunga ngoka handi mu longele neiyuvo lya yela ongaashi ootate wo. Otandi hambelele, sho handi ku dhimbulukwa aluhe uusiku nomutenya momagalikano gandje. 4 Otandi dhimbulukwa oluhodhi lwoye nonda hala oku ku talela po, opo ndi nyanyukwe. 5 Itandi dhimbwa, nkene eitaalo lyoye lya kola, ongaandyoka lyanyokokulu Loide nolyanyoko Eunike. 6 Onkee ano otandi ku dhimbulutha, u longithe omagano ngoka we ga pewa kuKalunga, sho nde ku tenteke iikaha. 7 Oshoka Kalunga ine tu pa Ombepo yoku tu ninga aambanda, ihe okwe tu pe Ombepo ye yoku tu pa oonkondo, ohole neikwatonawa. 8 Ino sa ohoni okuhokolola Omuwa gwetu nangame wo, ngoka nda kwatwa omolwe. Onkee ano nangoye wo ou na ompito yokukala momahepeko omolwevaangeli, oshoka Kalunga ote ku pe oonkondo dhoku ga idhidhimikila. 9 Kalunga okwe tu hupitha nokwe tu ithana, tu ninge aantu ye, hamolwiilonga yetu, ihe opahalo nopasilohenda lye. Esilohenda ndyoka e li tu pe nale petameko lyomathimbo omolwaJesus Kristus, 10 okwe li tu hololele ngashingeyi nokuya kwOmuhupithi gwetu Jesus Kristus. Kristus okwa shundula oonkondo dheso nokwa holola mevaangeli omwenyo gwaaluhe. 11 Kalunga okwa hogolola ndje, ndi kale omuyapostoli nomulongi gwokuuvitha elaka etoye. 12 Onkee omolwevaangeli onda adhika komahepeko ngoka. Ihe inandi li sa ohoni, oshoka ondi mu shi ngoka nde mu inekela. Ondi inekela lela kutya oye ota vulu okugamena oshilonga she shoka e shi inekelela ndje, sigo esiku ndyoka te ke ya. 13 Dhiginina oohapu dhoshili ndhoka nde dhi ku longo, dhi kale oshiholelwa shoye. Kala meitaalo nomohole ndjoka tatu yi adha muukumwe naKristus Jesus. 14 Dhiginina omagano omawanawa ngoka we ga pewa koonkondo dhOmbepo Ondjapuki, ngoka e li mutse. 15 Owa tseya kutya ayehe yomoshitopolwa shaAsia, ngaashi Figelus naHermogenes, oya thigi ndje po. 16 Omuwa na sile ohenda egumbo lyaOnesiforus, oshoka oye okwa hekeleke ndje olwindji. Oye ina sa ndje ohoni, sho ndi li mondholongo, 17 ihe sho a thiki muRoma, okwa tameke okukonga ndje mbala, sigo a mono ndje. 18 Omuwa ne mu kwathe, a ka mone esilohenda koshipala shOmuwa esiku ndyoka te ke ya. Ngoye owa tseya nawalela ashihe shoka e shi ningile ndje muEfeso.
12-18 AUGUSTE
OMALIKO OKUZA MOOHAPU DHAKALUNGA | TITUS 1–FILEMON
‘Okuhogolola aakuluntu yegongalo’
(Titus 1:5-9) Onde ku thigi muKreta, opo u pongolole iinima mbyoka ya pumbwa okutulwa melandulathano nou hogolole aakuluntu yegongalo momukunda kehe. Dhimbulukwa omalombwelo gandje: 6 Omukuluntu gwegongalo oku na okukala kee na oshipo, e na owala omukiintu gumwe, oyana oye na okukala ooitaali, inaa uvikila uupwidhi nenge okwaavulika. 7 Omuwiliki gwegongalo oye omusilishimpwiyu megumbo lyaKalunga, ngoka e na okukala kee na oshipo, hamutuwalali, hamugeentu, hankolwi, hamupwidhi nohamukongi gweliko nomakoto. 8 Oye oku na okukala ha yakula aayenda, ha longo uuwanawa, hi ikwata nawa, omuyuuki, omuyapuki nomwiidhiliki. 9 Oye oku na okudhiginina ohapu ndjoka yi shi kwiinekelwa noya tsa kumwe nelongo lyetu. Pamukalo nguka ota ka vula ihe okutsa yalwe omukumo, ya kale melongo lyashili nokuholola omapuko gaamboka taye li kondjitha.
Omapulo ga za kaaleshi
Nonando Ombiimbeli inayi yelitha naanaa kondandalunde nkene aalumentu ayehe ya li ya langekwa po, otayi tu kwathele tu uve ko kashona nkene shika sha li hashi ningwa pethimbo lyonale. Ombiimbeli otayi ti kutya sho Paulus naBarnabas taya zi molweendo lwawo lwotango yu uka kegumbo, ‘oya hogololele ihe omagongalo agehe aakuluntu, naasho ye ya galikanene nokwiidhilika iikulya, oye ya gandja miikaha yOmuwa ngoka ye mu inekela.’ (Iil. 14:23) Konima yoomvula dhontumba, Paulus okwa li a nyolele omweendi pamwe naye, Titus a ti: ‘Onde ku thigi muKreta, opo u pongolole iinima mbyoka ya pumbwa okutulwa melandulathano nowu hogolole aakuluntu yegongalo momukunda kehe. Dhimbulukwa omalombwelo gandje.’ (Tit. 1:5) Sha faathana, Timoteus ngoka a li ha talele po omagongalo olundji pamwe nomuyapostoli Paulus, naye okwa lombwelelwe wo a langeke po aakuluntugongalo. (1 Tim. 5:22) Osha yela kutya, aatonateli aayendi oyo ya li haya langeke po aakuluntugongalo nenge aayakuligongalo, ihe haayapostoli naakuluntu muJerusalem.
Omolwoshinima shika Olutuwiliki lwOonzapo dhaJehova olwa lundulula omukalo moka aakuluntugongalo naayakuligongalo haya langekwa po. Okuza me 1 Septemba 2014 otashi kala hashi ningwa ngeyi: Omutonatelishikandjo kehe oye ta kala ta konakona uuyelele waamboka taya popilwa ya langekwe po. Sho ta talele po egongalo, ota ka kambadhala okutseya aamwatate mboka taya popilwa nokulonga pamwe nayo momapya mpoka tashi wapa. Konima ngele omutonatelishikandjo a kundathana nolutu lwaakuluntugongalo kombinga yaamboka taya popilwa, ota ka kala e na oshinakugwanithwa shokulangeka po aakuluntugongalo naayakuligongalo momagongalo moshikandjo she. Shika oshi li popepi naashoka sha li hashi ningwa pethimbo lyaayapostoli.
Oolye taya ka kutha ombinga moshinima shika? Ngaashi sha kala nale, “omupiya omudhiginini nomunandunge” oku na oshinakugwanithwa shokupa aamati ooyakwawo iikulya. (Mat. 24:45-47, NW) Shika osha kwatela mo okukonakona Omanyolo nekwatho lyombepo ondjapuki, opo a gandje omayele gankene omakotampango gOmbiimbeli taga vulu okutulwa miilonga ngoka ge na ko nasha nankene omagongalo muuyuni awuhe ge na okuunganekwa. Omupiya omudhiginini oha langeke po wo aatonatelishikandjo niilyo yOkomitiye yOshitayimbelewa. Oshitayimbelewa kehe ohashi gandja ekwatho nkene omalombwelo gomupiya ge na okutulwa miilonga. Olutu kehe lwaakuluntugongalo olu na oshinakugwanithwa sha kwata miiti shokukonakona nawa ngele aalumentu mboka lwa hala okulangeka po megongalo lyaKalunga oya gwanitha po iitegelelwa yopamanyolo. Omutonatelishikandjo kehe oku na oshinakugwanithwa oshinene shokukonakona nawa uuyelele waamboka taya popilwa kaakuluntugongalo pamwe negalikano, opo ihe ta langeke po mboka ya gwanitha po iitegelelwa.
Konga omaliko mOmbiimbeli
(Titus 1:12) Omuhunganeki gumwe gwawo Omukreta okwa tile: “Omulumentu Omukreta oye omufundja noshilikama oshiwinayi. Oye oku li owala melalangali nomuufukedhi.”
w89-E 5/15 ep. 31, okat. 5
Omapulo ga za kaaleshi
Omuyapostoli Paulus ka li ta tsu kumwe noohapu adhihe dhuukwamuhoko ndhoka dha popiwa dhi li ompinge nAakreta. Otatu vulu okukala nuushili mboka, molwaashoka Paulus okwa li e shi shi kutya muKreta omu na Aakriste ye na eihumbato ewanawa mboka Kalunga a li a hokwa nokwa li e ya gwayeke nombepo ye ondjapuki. (Iilonga 2:5, 11, 33) Omwa li mu na Aakriste aadhiginini taya vulu okutota po omagongalo “miilando ayihe.” Nonando Aakriste mboka kaya li ya gwanenena, otatu vulu okukala nuushili kutya kaya li aafundja, aananyalo naafukedhi oshoka ngele osho ya li ngawo, ando inaya tsikila okukala ya hokiwa kuJehova. (Aafilippi 3:18, 19; Ehololo 21:8) Ngaashi owala kunena, muKreta namo omwa li aantu mboka aanashili noya li haya yematekwa keihumbato ewinayi lyaamboka ya li ye ya kundukidha, ihe yo oya li ya katuka metsokumwe netumwalaka lyaJehova. — Hesekiel 9:4; yelekanitha Iilonga 13:48.
(Filemon 15, 16) Onesimus pamwe okwa kala kee li pungoye okathimbo okafupi kowala, opo u mu galulilwe, u kale u mu na aluhe. 16 Oshoka ngashingeyi ke li po owala omupika, ihe oku vule omupika; oye omukriste mukwetu omuholike muKristus. Oye omuholike kungame, ihe unene kungoye, ongele omupika nenge omwiitaali gwOmuwa.
Omanenedhiladhilo okuza moontumwafo dha nyolelwa Titus, Filemon nAahebeli
15, 16 — Omolwashike Paulus a li inaa pula Filemon a mangulule Onesimus? Paulus okwa li a halelela okukala i itula mo moshilonga she ‘shokuuvitha Uukwaniilwa waKalunga nokulonga aantu nokuhokolola Omuwa Jesus Kristus.’ Onkee ano, ka li a kutha ombinga miinima yopankalathano ngaashi mbyoka yi na ko nasha nuupika. — Iil. 28:31, KB.
Elesho lyOmbiimbeli
(Titus 3:1-15) Dhimbulutha aakwanegongalo yoye, ya kale haa vulika kaaleli nokaapangeli noya kale taa vulu okulonga uuwanawa kehe. 2 Ya lombwela, yaa popile ooyakwawo muuwinayi yo yaa tamanane, ihe ya kale ye na uukuume nolukeno naantu ayehe. 3 Oshoka natse wo otwa li nale twaa na oondunge, oonakwaavulika notwa li twa puka. Otwa li aapika yuuhalu womaludhi ogendji noyomolundundu. Otwa kala miilonga iiwinayi nomefupa. Otwa li twa tondika kuyalwe, tse twe ya tondo wo. 4 Ihe uuna uuwanawa nohole yaKalunga, Omuhupithi gwetu, ya holoka, 5 okwe tu hupitha. Hamolwiilonga ando yasha iiwanawa twe yi longo, aawe, ihe okwe shi ningi molwesilohenda lye alike. Oye okwe tu yogo meshasho nokwe tu valululitha kOmbepo Ondjapuki, tu ninge aantu aape. 6 Kalunga okwe tu tilile Ombepo Ondjapuki oyindji molwaJesus Kristus, Omuhupithi gwetu, 7 opo molwesilohenda lye tu ninge aayuuki koshipala she nokumona omwenyo gwaaluhe ngoka twe gu tegamena. 8 Ohapu ndjika oyoshili. Onda hala, u teneneke iinima mbika, opo mboka yi itaala Kalunga, ya vule okulongitha ethimbo lyawo mokulonga uuwanawa. Iinima mbika iiwanawa notayi kwatha aantu. 9 Ihe ngoye, yanda omaludhi guugoya, omalandulathano omale gondjokonona yomadhina goohokulu, oontamanana nomaludhi gokombinga yompango. Iinima ya tya ngeyi kayi na oshilonga noitayi kwatha sha. 10 Omuntu ngoka te eta omatopoko, mu kumagidha ando lwaali, nongele itashi kwatha sha, mu etha. 11 Ou shi shi kutya omuntu a tya ngaaka okwa puka, ta longo uulunde nokwi ipangula ye mwene. 12 Uuna tandi ku tumine Artemas nenge Tikikus, endelela, u ye kungame kuNikopolis, oshoka omo nda hala ndi kale pethimbo lyokufu. 13 Longekidha nawa omunongompango Zenas nosho wo Apollos, ya ye moondjenda ye na iipumbiwa ayihe. 14 Aakwanegongalo yetu naa igilile wo okulonga uuwanawa mokukwatha mpoka pu na oluhepo. Naa ethe okukalamwenyo kwaa na iilonga yasha. 15 Ayehe mboka ye li pungame, otaye mu kundile po. Kundila po ookuume ketu meitaalo. Esilohenda lyaKalunga nali kale nane amuhe.
19-25 AUGUSTE
OMALIKO OKUZA MOOHAPU DHAKALUNGA | AAHEBELI 1–3
‘Hola shoka shu uka e to tondo shoka sha puka’
(Aahebeli 1:8) Ihe kOmwana Kalunga okwa ti: “Ongoye Kalunga, oshipangelapundi shoye otashi kala aluheluhe. Oshilongo shoye oto shi lele nuuyuuki.
Hambeleleni Kristus, Omukwaniilwa gweadhimo!
8 Jehova okwa li a langeke po Omwana e li Omukwaniilwa gwopaMesiasa megulu, mo-1914. ‘Ondhimbo yuukwaniilwa we oyo ondhimbo yuuyuuki,’ onkee ano osha yela kutya melelo lye otamu ka kala uuyuuki. Oku na uuthemba wokupangela, molwaashoka ‘epangelo ndyoka okwe li pewa kuKalunga.’ Shoka otashi ulike kutya Jehova oye ekankameno lyuukwaniilwa we. Shimwe ishewe, oshipangelapundi shaJesus otashi ka kala po “sigo aluhe.” Mbela ku uvite etumba sho to longele Jehova mewiliko lyOmukwaniilwa omunankondo ngoka a langekwa po kuYe?
(Aahebeli 1:9) Ongoye ou hole shoka shu uka nou tonde shoka sha puka; onkee Omuwa Kalunga koye okwe ku lenge nokwe ku pe esimano e te ku nyanyudha nenyanyu enene li vule lyayalwe.”
Hambeleleni Kristus, Omukwaniilwa gweadhimo!
7 Lesha Episalomi 45:6, 7. Omolwokukala kwaJesus e hole uuyuuki nokukala e tonde kehe shimwe shoka tashi vulu okudhinitha He, Jehova okwa li e mu gwayeke a ninge Omukwaniilwa gwUukwaniilwa wopaMesiasa. Jesus okwa li a gwayekwa ‘nomugwayo gwenyanyu’ (OB-1954) nenge tu tye a tililwa eyambeko olindji e vule “omukwaniilwa kehe,” ano omukwaniilwa kehe gwaJuda gwomezimo lyaDavid. Ngiini mbela? Etompelo limwe oondyono kutya, Jesus okwa li a gwayekwa kuJehova mwene. Ekwawo, Jehova okwa li e mu gwayeke e li Omukwaniilwa nosho wo Omuyambimukuluntu. (Eps 2:2; Heb 5:5, 6) Limwe ishewe, Jesus ka li a gwayekwa nomagadhi ihe onombepo ondjapuki, nuukwaniilwa we kawu shi wokombanda yevi ihe owomegulu.
Konga omaliko mOmbiimbeli
(Aahebeli 1:3) Oye oku na eadhimo lyaKalunga nondjelo yaKalunga mwene. Oye ota humbata eshito alihe noonkondo dhohapu yomokana ke. Sho a yelitha aantu koondjo dhawo, okwa kuutumba kolulyo lwaKalunga, Omunankondoadhihe megulu.
it-1-E ep. 1185, okat. 1
Oshifetha
Mbela Jesus oha holele aluhe omaukwatya gaHe thiluthilu?
Omwana gwaKalunga gwosheeli, ngoka konima a ka ninga Jesus, oku li oshifetha shaHe. (2Kor 4:4) Molwaashoka Omwana ngoka oye a li ta lombwelwa kuKalunga sho a ti: “Natu shiteni aantu ye tu fe, oshifetha shetu,” osha yela kutya Omwana okwa fa He, Omushiti, sha hala okutya Jesus sho a shitwa kuJehova, okwe mu shiti e mu fa. (Gen 1:26; Joh 1:1-3; Kol 1:15, 16) Sho Jesus a li kombanda yevi e li omuntu a gwanenena, oku ulike omaukwatya ga fa gaHe thiluthilu ngaashi ta vulu, nomolwaasho a popi a ti: “Kehe ngoka a mono ndje, okwa mona wo Tate.” (Joh 14:9; 5:17, 19, 30, 36; 8:28, 38, 42) Omaukwatya ngoka Jesus okwe ke ga ulika shi vulithe mpoka sho a yumudhwa nokwa ningi oshishitwa shopambepo nokwa pewa “epangelo alihe megulu nokombanda yevi” kuHe, Jehova Kalunga. (1Pet 3:18; Mat 28:18) Molwaashoka ngashingeyi Kalunga okwa tula Jesus pondondo ‘yopombandambanda’ megulu, Omwana ngoka gwaKalunga ota holola eadhimo lyaHe shi vulithe sho a li mo nale manga inee ya kombanda yevi. (Fil 2:9; Heb 2:9) Ngashingeyi oku na ‘ondjelo yaKalunga mwene.’ — Heb 1:2-4.
(Aahebeli 1:10-12) Kombinga yOmwana okwa ti wo: “Omuwa, petameko ongoye wa shiti evi, ongoye wa shiti egulu niikaha yoye mwene. 11 Agehe otaga hulu po, ihe ngoye oto kala po. Agehe otaga kulupa ngoonguwo. 12 Ongoye to ke ga gonya ngonguwo, oto ke ga lundulula ngomizalo. Ihe ngoye oto kala ngaashi u li noito kulupa.”
it-1-E ep. 1063, okat. 7
Egulu
Oohapu ndhoka dhi li mEpisalomi 102:25, 26 otadhi popi Jehova Kalunga, ihe omuyapostoli Paulus okwe dhi popi e dhi ukitha kuJesus Kristus. Shika osho molwaashoka Omwana ngoka awike gwaKalunga okwa li omulongi pamwe naKalunga mokushita eshito alihe. Paulus okwa popi kutya Omwana gwaKalunga ota kala sigo aluhe, ihe eshito ndyoka Kalunga a shita, ota vulu oku li “gonya ngonguwo,” e te li lundulula. — Heb 1:1, 2, 8, 10-12; yelekanitha 1Pet 2:3.
Elesho lyOmbiimbeli
(Aahebeli 1:1-14) Kalunga okwa lombwele nale ootate pamikalo odhindji momakana gaahunganeki. 2 Ihe pomasiku ngaka gahugunina ote tu popitha mOmwana, ngoka Kalunga e mu shititha uuyuni, niinima ayihe pehulilo otayi ka ninga ye. 3 Oye oku na eadhimo lyaKalunga nondjelo yaKalunga mwene. Oye ota humbata eshito alihe noonkondo dhoohapu yomokana ke. Sho a yelitha aantu koondjo dhawo, okwa kuutumba kolulyo lwaKalunga, Omunankondoadhihe megulu. 4 Kalunga okwa lenge Omwana, a ninge omunene e vule aayengeli nokwe mu luku edhina li vule gawo. 5 Oshoka Kalunga ina tya nando olumwe kugumwe gwomaayengeli: “Ngoye omumwandje; nena ndjika nda ningi ho.” Kalunga ina lombwela wo nando ogumwe gwomaayengeli: “Otandi ka ninga ho, nenge oto ka ninga omumwandje.” 6 Oshoka Kalunga mokutuma Omwana, omutango gwe, muuyuni okwa ti wo: “Aayengeli yaKalunga ayehe oye na oku mu simaneka.” 7 Kombinga yaayengeli okwa ti: “Kalunga ota ningi aayengeli ye oombepo, naayakuli ye ote ya ningi omalaka gomulilo.” 8 Ihe kOmwana Kalunga okwa ti: “Ongoye Kalunga, oshipangelapundi shoye otashi kala aluheluhe. Oshilongo shoye oto shi lele nuuyuuki. 9 Ongoye ou hole shoka shu uka nou tonde shoka sha puka; onkee Omuwa Kalunga koye okwe ku lenge nokwe ku pe esimano e te ku nyanyudha nenyanyu enene li vule lyayalwe.” 10 Kombinga yOmwana okwa ti wo: “Omuwa, petameko ongoye wa shiti evi, ongoye wa shiti egulu niikaha yoye mwene. 11 Agehe otaga hulu po, ihe ngoye oto kala po. Agehe otaga kulupa ngoonguwo. 12 Ongoye to ke ga gonya ngonguwo, oto ke ga lundulula ngomizalo. Ihe ngoye oto kala ngaashi u li noito kulupa.” 13 Oshoka Kalunga ina lombwela nando olumwe gumwe gwoomaayengeli ye: “Kuutumba mpaka kolulyo lwandje, sigo tandi tula aatondi yoye kohi yoompadhi dhoye, ya ninge oshilyatelo shoye.” 14 Aayengeli oolye ano? Oyo ayehe oombepo ndhoka tadhi yakula Kalunga. Ohaa tumwa kuye okukwatha aantu mboka taa ka hupithwa.
26 AUGUSTE–1 SEPTEMBA
OMALIKO OKUZA MOOHAPU DHAKALUNGA | AAHEBELI 4–6
“Longa ngaashi to vulu wu ka ye mevululuko lyaKalunga”
(Aahebeli 4:1) Ano ngashingeyi Kalunga okwe tu pe euvaneko, tu vule okuya mo, tu ka vululukwe puye. Tu kotokeni ano, opo kwaa kale nando ogumwe gwomutse ta puka ondjila yokuthika mo.
(Aahebeli 4:4) Oshoka palwe mOmanyolo otamu popiwa esiku etiheyali taku tiwa: “Kalunga okwa vululukwa esiku etiheyali kiilonga ye ayihe.”
Evululuko lyaKalunga oshike?
3 Opu na omatompelo gaali kutya omolwashike tatu vulu okutya osha li natango esiku etiheyali sho Jesus a li kombanda yevi nosho wo pethimbo lyAakriste yotango. Etompelo lyotango otu li iwetele mwaashoka Jesus a li a lombwele aatondi ye yamwe. Oya li ye mu geela molwaashoka a aludha aantu mEsabati. Oya li taya dhiladhila kutya osha puka okwaaludha omuntu mEsabati molwaashoka Ompango yaMoses oya ti kutya olya li esiku lyokuvululukwa kiilonga yawo. Jesus okwe ya lombwele a ti: ‘Tate ota longo sigo ongashingeyi, nangame wo otandi longo.’ (Joh. 5:16, 17, KB) Okwa li ta ti naanaa shike? Okwa li ta ti kutya: “Tse naTate otatu longo iilonga yimwe. Tate okwa kala ta longo mEsabati uule woomvula omayuvi nongashingeyi oku li ta longo natango, onkee ano otandi vulu okulonga mEsabati.” Oohapu dhaJesus otadhi ulike kutya olya li natango esiku etiheyali li na ko nasha nevi pethimbo lye, sha hala okutya, esiku lyaKalunga lyevululuko.
4 Opu na etompelo etiyali tali tu ningitha tu tye kutya osha li natango esiku etiheyali sho Jesus a li kombanda yevi nosho wo pethimbo lyAakriste yotango. Omuyapostoli Paulus okwa li a nyola kombinga yevululuko lyaKalunga montumwafo ye ndjoka a li a nyolele Aahebeli. Manga Paulus inaa endulula oohapu ndhoka dhi li muGenesis 2:2, okwa li a nyola montopolwa 4 yontumwafo ye a ti: ‘Tse mbaka twi itaala, otatu yi mo, tu ka vululukwe puKalunga.’ (Heb. 4:3, 4, 6, 9) Shika otashi ulike kutya pethimbo lyaPaulus osha li natango esiku etiheyali. Esiku etiheyali otali hulu uunake?
5 Opo tu mone eyamukulo kutya esiku etiheyali otali hulu uunake, otu na okudhimbulukwa kutya Jehova okwa li a hogolola esiku ndyoka li kale lyi ikalekelwa. Genesis 2:3 ota ti: ‘Kalunga okwa yambeke esiku etiheyali e te li yapula.’ Okwa li a yapula esiku ndyoka molwaashoka okwe li hogolola li kale esiku moka a mana elalakano lye li na ko nasha nevi. Elalakano lye olyo kutya aalumentu naakiintu aavuliki ya kale nomwenyo kombanda yevi noye li sile oshimpwiyu nosho wo iinima ayihe mbyoka yi li ko. (Gen. 1:28) Jehova Kalunga naJesus Kristus ngoka e li “omuwa gwEsabati,” ‘otaya longo sigo ongashingeyi,’ opo ya gwanithe po elalakano lyaKalunga li na ko nasha nevi. (Mat. 12:8) Onkee ano, esiku lyaKalunga lyokuvululukwa otali tsikile sigo a mana elalakano lye. Shika otashi ka ningwa pehulilo lyEpangelo lyaKristus lyOmimvo eyuvi.
(Aahebeli 4:6) Mbeyaka yu uvu tango elaka etoye, oyo inaa ya mo, ya ka vululukwe puKalunga, oshoka oya li inaa itaala. Ihe oku na yamwe ya pitikilwa okuya mo, ya vululukwe puKalunga.
Evululuko lyaKalunga oshike?
6 Kalunga okwa li a lombwele Adam naEva kutya elalakano lye li na ko nasha nevi olini, ihe inaya vulika kulyo. Aantu yalwe omamiliyona mboka ya ka landula ko nayo inaya vulika wo. Nokuli nAaisraeli mboka ya li oshigwana shaKalunga oya kala nokwaahavulika kuye iikando niikando. Paulus okwa li a londodha Aakriste pethimbo lye kutya yamwe yomuyo otashi vulika ya kale ihaaya vulika ya fa Aaisraeli. Okwa nyola a ti: “Onkee ano tu lalakaneneni okuya mo, tu ka vululukwe puKalunga. Inapu kala nando ogumwe gwomutse itaa vulika ngashika mbeyaka, ndele inaa thika mo we.” (Heb. 4:11) Oohapu dhaPaulus otadhi ulike kutya aantu mboka ihaaya vulika itaya ka ya mevululuko lyaKalunga. Shoka otashi ti shike kutse? Mbela otashi ti kutya ngele otwa ningi shoka tashi tsu ondumbo nelalakano lyaKalunga momukalo gwontumba, itatu ka ya mevululuko lye? Osha simana noonkondo tu kale tu shi eyamukulo kepulo ndyoka, notatu ka popya oshindji kombinga yaashoka moshitopolwa shika. Ihe tango otatu ka kundathana kombinga yoshiholelwa oshiwinayi shAaisraeli nonokutya omolwashike inaaya ya mevululuko lyaKalunga.
(Aahebeli 4:9-11) Onkee ano oku na natango evululuko lyaantu yaKalunga, ongaandyoka lyaKalunga, sho a vululukwa esiku etiheyali. 10 Oshoka shaa ngoka a yi mo a vululukwe puKalunga, ota vululukwa, ngashika Kalunga a li a vululukwa kiilonga ye. 11 Onkee ano tu lalakaneneni okuya mo, tu ka vululukwe puKalunga. Inapu kala nando ogumwe gwomutse itaa vulika ngashika mbeyaka, ndele inaa thika mo we.
Evululuko lyaKalunga oshike?
16 Aakriste kunena inayi itaala nando kutya oye na okuvulika kOmpango yaMoses opo ya ka hupithwe. Paulus okwa li a lombwele Aaefeso a ti: “Oshoka omwa hupithwa kesilohenda lyaKalunga keitaalo. Ehupitho ndika inali za mune yene, aawe, olyo omagano gaKalunga. Mpaka kape na sha shokwiitangela.” (Ef. 2:8, 9) Ongiini Aakriste kunena taya vulu okuya mevululuko lyaKalunga, sha hala okutya, okukala ye na oshitopolwa mevululuko lye? Dhimbulukwa kutya Jehova okwa li a hogolola esiku lye lyokuvululukwa li kale esiku ndyoka ta ka gwanitha po elalakano lye li na ko nasha nevi nosho wo naantu aavuliki. Ohe tu lombwele elalakano lye nosho wo shoka a hala tu ninge okupitila mehangano lye. Otatu vulu okuya mevululuko lyaJehova ngele ohatu vulika kuye nohatu longo pamwe nehangano lye.
17 Ihe ngele itatu vulika komupiya omudhiginini nomunandunge otu li ompinge nelalakano lyaJehova nosho wo ngele ohatu vulika owala kwaashoka tu wete sha simana. Ngele ohatu ningi shoka shi li ompinge nelalakano lyaJehova, itatu ka kala ookuume ke. Moshitopolwa tashi landula otatu ka kundathana kombinga yiinima mbyoka tayi ulike kutya otu na evuliko. Omatokolo getu miinima mbyoka otage ku ulika ngele otwa ya mevululuko lyaKalunga.
Konga omaliko mOmbiimbeli
(Aahebeli 4:12) Oshoka oohapu dhaKalunga odhi na omwenyo nodhi na oonkondo dhokulonga sha. Odho odhi na omayego dhi vule egongamwele lyoongenge mbali. Otadhi tete e tadhi adha sigo opuutsakaneno womwenyo nombepo, woongolo nomongo. Otadhi holola puuyelele omahalo nomadhiladhilo gomomitima dhaantu.
Omapulo ga za kaaleshi
“Oohapu dhaKalunga” ndhoka dha popiwa mAahebeli 4:12 kutya “odhi na omwenyo nodhi na oonkondo dhokulonga sha” odhini?
▪ Oshikalimo shoohapu ndhoka otashi ulike kutya omuyapostoli Paulus okwa li ta popi kombinga yetumwalaka nenge yelalakano lyaKalunga ndyoka li li mOmbiimbeli.
Enyolo lyAahebeli 4:12 ohali longithwa olundji miileshomwa yetu lyu ulike kutya Ombiimbeli oyi na oonkondo dhokulundulula oonkalamwenyo dhaantu, noshi li lela mondjila sho hatu li longitha momukalo ngoka. Nonando ongawo, otashi ka kala ekwatho enene ngele otwa tala nawa muule enyolo ndika. Paulus okwa li ta ladhipike Aakriste Aahebeli ya longe metsokumwe nomalalakano gaKalunga. Ogendji gomugo oga li ga nyolwa mOmanyolo omayapuki. Paulus okwa longitha oshiholelwa shAaisraeli mboka ya li ya mangululwa mo muEgipiti. Oya li ye na etagameno lyokuya mevi lyeuvaneko, “evi lya tondoka omahini nomagadhi goonyushi,” moka ya li taya vulu okunyanyukilwa ombili. — Eks. 3:8; Deut. 12:9, 10.
Ndyoka olyo lya li elalakano lyaKalunga, ihe konima Aaisraeli oya li ya kukutike omitima dhawo nokaya li we ye na eitaalo. Onkee ano, oyendji yomuyo inaya vula okuya mevi moka. (Num. 14:30; Jos. 14:6-10) Paulus okwa popi kutya opwa li natango ‘euvaneko lyokuya mevululuko lyaKalunga.’ (Heb. 3:16-19; 4:1) Osha yela kutya “euvaneko” ndyoka oli li oshitopolwa shelalakano lyaKalunga. Ngaashi Aakriste Aahebeli ye shi ningile, natse otatu vulu okulesha kombinga yelalakano ndyoka nokulonga metsokumwe nalyo. Paulus opo u ulike shili kutya euvaneko ndika oli ikolelela kOmanyolo, okwa totha okuza muGenesis 2:2 nomEpisalomi 95:11.
Otu na lela okugumwa kuushili mboka kutya ‘euvaneko lyokuya mevululuko lyaKalunga, opo li li natango.’ Otu na einekelo kutya euvaneko ndika li ikolelela kOmbiimbeli lyokuya mevululuko lyaKalunga otali vulu shili okugwanithwa notwa katuka nale oonkatu tu ye mo. Inatu katuka oonkatu ndhoka mokukambadhala okuvulika kOmpango yaMoses nenge mokulonga iilonga yilwe tu hokiwe kuJehova. Pehala lyaashono, ohatu nyanyukilwa okulonga metsokumwe nelalakano lyaKalunga omolweitaalo notatu tsikile okulonga metsokumwe nalyo. Oshikwawo, ngaashi sha popiwa metetekelo, aantu omayovi muuyuni awuhe oya tameka okukonakona Ombiimbeli nokwiilonga kombinga yelalakano lyaKalunga. Oyendji yomuyo oyi inyengithwa ya lundulule oonkalamwenyo dhawo, ya kale ye na eitaalo noya ninge Aakriste ya ninginithwa. Omukalo moka ya gumwa otagu ulike kutya “oohapu dhaKalunga odhi na omwenyo nodhi na oonkondo dhokulonga sha.” Elalakano lyaKalunga ndyoka lya nyolwa mOmbiimbeli olya guma nale onkalamwenyo yetu, notali tsikile okukala li na oonkondo mokukalamwenyo kwetu.
(Aahebeli 6:17, 18) Kalunga okwa li a hala okuyelithila nawa mboka ya pewa euvaneko lye kutya ita ka lundulula nando edhiladhilo lye. Onkee okwe li koleke negano. 18 Oku na iinima mbika iyali mbyoka tayi holola kutya Kalunga iha lundulula ye iha fundju. Onkee ano tse mboka twa mono egameno muye, otwa tsuwa omukumo omunene, opo tu tegamene shoka shi li komeho.
it-1-E ep. 1139, okat. 2
Etegameno
Etegameno ndika lyomwenyo gwaaluhe ngoka itaagu hulu po kumboka ‘yi ithanwa kuKalunga,’ (Heb 3:1) olyaaluhe nolyi li oshinima shoka taya vulu okwiinekela musho thiluthilu. Olya kolekwa kiinima iyali mbyoka tayi ulike kutya Kalunga iha fundju, iinima mbyoka oyo euvaneko negano lye, netegameno ndyoka otali wapa owala omolwaKristus, ngoka ta kala nomwenyo sigo aluhe. Onkee ano, etegameno ndika olya popiwa kutya “olya kwata lya dhiginina oomwenyo dhetu. Otatu yi nalyo, sigo twa piti metopolitho lyotempeli yomegulu e tatu yi muuyapukielela [ngaashi omuyambi omukuluntu a li hayi muuyapukielela mesiku lyegeyulukitho], moka Jesus a tetekele okuya mo molwetu. Oye okwa ningi omuyambi omukuluntu sigo aluhe palandulathano lyaMelkisedek.” — Heb 6:17-20.
Elesho lyOmbiimbeli
(Aahebeli 5:1-14) Omuyambimukuluntu kehe oha hogololwa maantu nota yoololelwa okuyambela Kalunga peha lyawo. Oha gandja omagano nomayambo omolwoondjo. 2 Onkee ano ye mwene sho e li po omunkundi miinima ayihe, ota vulu okusila ohenda mboka yaa na owino nohaa puka. 3 Ano ye mwene sho e li po omunkundi, ke na okuyamba omayambo omolwoondjo dhaantu adhike, ihe nomolwoondjo dhe mwene wo. 4 Kape na nando ogumwe ti ikuthile esimano lyokuninga omuyambi omukuluntu. Okeithano lyaKalunga alike omuntu ta vulu okuninga omuyambi omukuluntu, ngaashi Aron a li i ithanwa. 5 Osho tuu naKristus ini ikuthila esimano lyokuninga omuyambi omukuluntu, ihe okwa lombwelwa kuKalunga: “Ongoye omumwandje, onena ndjika nda ningi ho.” 6 Okwa ti wo pehala lilwe: “Ngoye oto ka ninga omuyambi gwaaluhe palandulathano lyaMelkisedek.” 7 Jesus mokukalamwenyo kwe kombanda yevi okwa galikana nokwi indile Kalunga nokulila nokukugila pombanda Kalunga, ngoka ta vulu oku mu hupitha meso. Kalunga okwe mu uvu omolweifupipiko nevuliko lye. 8 Ihe oye nando okwa li omuna gwaKalunga, omahepeko oge mu longo okuvulika. 9 Oye sho a gwanitha ayihe, okwa ningi oluthithiya lwehupitho lyaaluhe, olyaayehe mboka taa vulika kuye. 10 Onkee Kalunga okwe mu lenge, a ninge omuyambi omukuluntu palandulathano lyaMelkisedek. 11 Otu na odhindji oku mu lombwela moshinima shika, ihe otu na uudhigu oku mu fatululila, oshoka ihamu uvu ko nuupu. 12 Omwa li mu na ethimbo lya gwana, mu longwe e tamu ningi aalongi, ihe nani natango omwa pumbwa okulongwa iilongwa yopetameko yomoohapu dhaKalunga. Nani omu na okunwa owala omahini, nando omwa li mu na okulya iikulya ya kola. 13 Kehe ngoka ta nu omahini, oye omunona natango. Ke na nando owino okuyoolola shoka shu uka nenge sha puka. 14 Iikulya ya kola oyaakuluntu, mboka yi ilonga noyi igilila okuyoolola shoka shu uka nenge sha puka.