Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
2-8 DESEMBA
OMALIKO OKUZA MOOHAPU DHAKALUNGA | EHOLOLO 7–9
“Engathithi lyaantu ya nyengana okuyalula, olya yambekwa kuJehova”
(Ehololo 7:9) Konima yaambika onda mono ko engathithi lyaantu ya nyengana okuyalula. Oyo oya zi maantu yomomihoko adhihe, momaludhi agehe, miigwana ayihe nomomalaka agehe. Oyo oya thikama ya taalela oshipangelapundi nOnzigona ya zala oonguwo oonde oontokele noya li ye na iiyale miikaha yawo.
it-1-E ep. 997, okat. 1
Engathithi
Shoka oshe eta po epulo ndika: Ngele “engathithi” ndyono olyaantu mboka taya ka hupithwa notaya ka kala kombanda yevi, omolwashike taku tiwa “oya thikama ya taalela oshipangelapundi [shaKalunga] nOnzigona”? (Eh 7:9) ‘Okuthikama’ omathimbo gamwe mOmbiimbeli okwa longithwa taku ulike kutya omuntu nenge ongundu yaantu ndjoka ya thikama, oya hokiwa kwaangoka ya thikama ya taalela nenge ya thikama koshipala she. (Eps 1:5; 5:5; Omayel 22:29, AT; Luk 1:19) Montopolwa ya tetekele yEhololo nokuli omwa popiwa kutya “aakwaniilwa yokombanda yevi, aapangeli naawiliki yaakwiita, aayamba naanankondo nosho wo aapika naavalwa” oya ka holama opo ‘yaa monike kungoka a kuutumba koshipangelapundi nokaaya adhike kondjahi yOnzigona! Oshoka esiku enene lyondjahi yawo olye ya, nolye ta vulu oku li keelela?’ (Eh 6:15-17; yelekanitha Luk 21:36.) Onkee ano, “engathithi” enene olyaantu mboka ya hupithwa pethimbo ndyoka lyondjahi noya li taya vulu ‘okuthikama’ oshoka oya hokiwa kuKalunga nokOnzigona.
(Ehololo 7:14) Ngame onda yamukula nonda ti: “Ngame inandi ya tseya, ihe ngoye, Omuwa gwandje, ou ya shi.” Opo ihe okwa lombwele ndje a ti: “Aantu mbaka oomboka ya piti momahepeko ngoka omanene. Oyo oya yogo oonguwo dhawo noye dhi yelitha nombinzi yOnzigona.
it-2-E ep. 1127, okat. 4
Omahepeko
Konima yomimvo omilongo ndatu lwaampono sho Jerusalem sha hanagulwa po, omuyapostoli Johannes okwa li a lombwelwa kombinga yengathithi lyaantu ya za miigwana, momihoko nomomaludhi agehe kutya: “Aantu mbaka oomboka ya piti momahepeko ngoka omanene.” (Eh 7:13, 14) Sho engathithi lyaantu ‘lya piti momahepeko ngoka omanene,’ shoka otashi ulike kutya oya hupu momahepeko ngoka. Shika osha kolekwa kuutumbulilo wa faathana wu li mIilonga 7:9, 10 tawu ti: “Kalunga okwa li pamwe [naJosef], nokwe mu hupitha mo momaudhigu ge agehe.” Sho Josef a hupithwa momaudhigu ge agehe, kali owala a kwathelwa kuJehova e ga idhidhimikile, ihe okwa li wo a piti mo mugo.
(Ehololo 7:15-17) Onkee oya thikama komeho goshipangelapundi shaKalunga notaye mu yakula uusiku nomutenya motempeli ye. Ngoka a kuutumba koshipangelapundi, ote ya gamene nokukalapo kwe. 16 Nena oyo itaa ka sa we nando ondjala nenge enota; osho wo etango nenge epupyu kehe itali ke ya fika. 17 Oshoka Onzigona, ngoka a kuutumba pokati koshipangelapundi, ota kala omusita gwawo note ke ya wilika noku ya fala koothithiya dhomeya omanamwenyo. Kalunga nota ka theta po omahodhi agehe momeho gawo.”
it-1-E ep. 996-997
Engathithi
Aantu mboka oyeni? Uuyelele mboka tawu holola kutya “engathithi” lyaantu oolye, owu li mEhololo ontopolwa 7 nomontopolwa yilwe yembo ndyoka. MEhololo 7:15-17 otamu popiwa Kalunga ‘te ya gamene nokukalapo kwe,’ te ya fala “koothithiya dhomeya omanamwenyo” nota theta “omahodhi agehe momeho gawo.” MEhololo 21:2-4 omu na wo omautumbulilo ga faathana naangoka, ngaashi: ‘Egumbo lyaKalunga li li paantu,’ ‘okutheta omahodhi agehe momeho gawo’ ‘neso itaali ka kala ko we.’ Emoniko ndyoka itali popi kombinga yaantu ye li megulu moka tamu ‘kuluka Jerusalem oshipe,’ ihe aantu ye li kombanda yevi.
Konga omaliko mOmbiimbeli
(Ehololo 7:1) Konima yaambika onda mono aayengeli yane ya thikama koombinga ne dhevi noya keelele oombepo dhokoombinga ndhoka ne, dhaa pepe we kevi, mefuta nenge komiti.
re-E ep. 115, okat. 4
Okutulwa iihako kwaIsraeli shaKalunga
4 Osha yela kutya aayengeli mboka yane otaya thaneke oongundu ne dhaayengeli, mboka Jehova ha longitha ya keelele oombepo dhehanagulo sigo ethimbo lye lyoku shi ninga lya thiki. Ngele aayengeli mboka oya etha oombepo ndhoka dhondjahi yaKalunga dhi pepe poshikando, okuza kuumbangalantu, kuumbugantu, kuuzilo nokuuninginino, ehanagulo otali ka kala enene noonkondo. Otali ka kala lya fa ndyoka Jehova a li a ningile Aaelam a longitha oombepo ndhoka ne, ihe monakuyiwa otali ka kala enene noonkondo li vule po lela pwaandyoka. (Jeremia 49:36-38) Otayi ka kala ombepo yoshikungulu oshinene tayi ka hanagula noonkondo yi vule oshikungulu sha “lundalala” shoka Jehova a li a longitha sho a hanagula po Aayammoni. (Amos 1:13-15) Kapu nando ehangano lyaSatana kombanda yevi tali ka hupa mesiku lyondjahi yaJehova, sho ta ka yukipalitha uunamapangelo we sigo aluhe. — Episalomi 83:15, 18; Jesaja 29:5, 6.
(Ehololo 9:11) Omukwaniilwa gwadho oye omuyengeli ngoka ta pangele olumbogo lwomuule. Edhina lye mOshihebeli oAbbadon, mOshigreka oApollion (tali ti omuhanaguli).
it-1-E ep. 12
Abbadon
Abbadon, omuyengeli ngoka ta pangele olumbogo lwomuule olye?
Ihe mEhololo 9:11, oshitya “Abbadon” osha longithwa shi li edhina ‘lyomuyengeli ngoka ta pangele olumbogo lwomuule.’ Edhina ndyoka olya faathana naandyoka lyomOshigreka Apollion ndyoka tali ti “Omuhanaguli.” Okuza momumvo 1501-1900 lwaampono, aantu oya li ya kambadhala okukonakona uuyelele mboka noya mono kutya ehunganeko ndika otali popi kombinga yomupangeli nenge omukeesari Vespasian, Muhammad, naNapoleon. Omuyengeli ngoka aantu oya li ye mu tala ko kutya anuwa oha longo iilonga yaSatana. Ihe mEhololo 20:1-3 omuyengeli ngoka ota popiwa e na “oshipatululo sholumbogo lwomuule” e li omukalelipo gwaKalunga a za megulu, noiha longo iilonga yaSatana, ihe ote ke mu manga e te mu umbile molumbogo ndoka. Embo The Interpreter’s Bible otali popi kombinga yEhololo 9:11 tali ti: “Abbadon ke shi omuyengeli gwaSatana, ihe ogwaKalunga ta longo oshilonga shehanagulo e shi pewa kuKalunga.”
Moveelise ndhoka dha kundathanwa dhi li mAahebeli, osha yela kutya oshitya ʼavaddohnʹ osha faathana noshitya oshaasi nosho wo eso. MEhololo 1:18, Jesus Kristus ota popi ta ti: “Otandi kala ndi na omwenyo sigo aluhe. Ondi na oonkondo okupangela eso noshaasi.” MuLukas 8:31, otamu popiwa shi na ko nasha noonkondo Dhe dhokuumbila molumbogo. Uuyelele wulwe mboka tawu ulike kutya Jesus oku na oonkondo dhokuhanagula, mwa kwatelwa naSatana owu li mAahebeli 2:14. Ovelise ndjoka otayi popi kutya Jesus okwa faathana nayo muukwatya wawo ano okwa ningi omuntu gwonyama nombinzi, “opo a hanagule po neso lye mwene Omuhindadhi, ngoka he eta eso.” MEhololo 19:11-16 omu na uuyelele mboka tawu ulike lela kutya okwa langekwa po kuKalunga e li Omuhanaguli nenge Omudhipagi. — Tala oshitya APOLLYON.
Elesho lyOmbiimbeli
(Ehololo 7:1-12) Konima yaambika onda mono aayengeli yane ya thikama koombinga ne dhevi noya keelele oombepo dhokoombinga ndhoka ne, dhaa pepe we kevi, mefuta nenge komiti. 2 Nonda mono omuyengeli omukwawo a ziilile kuuzilo e na oshihako shaKalunga omunamwenyo. Oye okwi igidha newi enene kaayengeli mbeyaka yane, oomboka Kalunga e ya pe oonkondo dhokuyona po evi nefuta 3 a ti: “Inamu yona po evi nenge omiti, manga inaatu tula iihako miipala yaapiya yaKalunga.” 4 Opo ihe onda lombwelwa omwaalu gwaamboka ya ndhindhilikwa oshihako shaKalunga miipala yawo; ogwo 144 000, ya za momazimo agehe gAaisraeli. 5 Mezimo lyaJuda omwa li mwa ndhindhilikwa noshihako aantu 12 000, mezimo lyaRuben 12 000, mezimo lyaGad 12 000, 6 mezimo lyaAser 12 000, mezimo lyaNaftali 12 000, mezimo lyaManasse 12 000, 7 mezimo lyaSimeon 12 000, mezimo lyaLevi 12 000, mezimo lyaIssaskar 12 000, 8 mezimo lyaSebulon 12 000, mezimo lyaJosef 12 000, nomezimo lyaBenjamin 12 000. 9 Konima yaambika onda mono ko engathithi lyaantu ya nyengana okuyalula. Oyo oya zi maantu yomomihoko adhihe, momaludhi agehe, miigwana ayihe nomomalaka agehe. Oyo oya thikama ya taalela oshipangelapundi nOnzigona ya zala oonguwo oonde oontokele noya li ye na iiyale miikaha yawo. 10 Oyo oyi igidha newi enene ya ti: “Ehupitho otali tu zile kuKalunga ketu ngoka a kuutumba koshipangelapundi, notali tu zile wo kOnzigona!” 11 Aayengeli ayehe oya thikama ya kundukidha oshipangelapundi pamwe naakuluntu niinamwenyo mbyoka ine. Ayehe oya tsu oongolo yi inyongamena koshipangelapundi noya galikana Kalunga 12 ya ti: “Amen! Ehambelelo, eadhimo, uunongo, epandulo, esimano, epangelo noonkondo oyaKalunga ketu aluhe sigo aluhe! Amen!”
9-15 DESEMBA
OMALIKO OKUZA MOOHAPU DHAKALUNGA | EHOLOLO 10–12
“Aahokololi yaali’ ya dhipagwa e taya yumuka”
(Ehololo 11:3) Ngame otandi ka tuma aahokololi yandje yaali ya zala omahahi. Oyo otaa ka popya elaka lyaKalunga momasiku ngoka geyovi limwe nomathele gaali nomilongo hamano.”
Omapulo ga za kaaleshi
Mbela aahokololi yaali mboka taya popiwa mEhololo ontopolwa 11 oyo oolye?
Ehololo 11:3 otayi popi kombinga yaahokololi yaali mboka taya ka popya elaka lyaKalunga omasiku 1 260. Ehokololo olya tsikile ko kutya oshilikama “otashi ke ya sinda e tashi ya dhipaga.” Ihe konima “yomasiku gatatu netata,” aahokololi mbaka yaali otaya ka yumuka, naashika otashi ka tilitha mboka taye shi mono. — Eh. 11:7, 11.
Aahokololi mbaka yaali oyo oolye? Ehokololo otali tu kwathele tu mone kutya oyo oolye. Tango, otatu lombwelwa kutya oyo “oomono mbali noolamba mbali.” (Eh. 11:4) Shika otashi tu dhimbulukitha omiti mbali dhooholivi noshihukikwanyeka, mbyoka ya popiwa mehunganeko lyaSakaria. Ooholivi ndhoka odhi lile po “aalumentu yaali [omupangeli Serubbabel nomuyambimukuluntu Josua] mboka Kalunga a hogolola nokwe ya gwayeka, ye mu longele.” (Sak. 4:1-3, 14) Oshitiyali, aahokololi mbaka yaali otaya popiwa kutya otaya longo iilongankondo ya fa mbyoka ya longelwe kuMoses nokuElia. — Yelekanitha Ehololo 11:5, 6 naNumeri 16:1-7, 28-35 nosho wo Aakwaniilwa yotango 17:1; 18:41-45.
Oovelise ndhika otadhi popi kombinga yoshinima shini sha faathana? Adhihe otadhi popi kombinga yaalongelikalunga mboka ya li taya kwatele komeho pethimbo edhigu. Onkee ano, megwanithopo lyehunganeko ndyoka lya popiwa mEhololo ontopolwa 11, aamwatate aagwayekwa mboka ya li taya kwatele komeho sho Uukwaniilwa waKalunga wa dhikwa megulu mo 1914, oya li yu uvitha “ya zala omahahi” uule woomvula ndatu netata.
Aamwatate mbaka oya li ya dhipagwa pathaneko konima yokuuvitha kwawo ya zala omahahi, sho ya tulwa mondholongo ethimbo efupi, uule womasiku gatatu netata. Pakutala kwaatondi yoshigwana shaKalunga, oshilonga shaamwatate osha li sha hulithwa po, naashika osha li sha nyanyudha aatondi yawo. — Eh. 11:8-10.
Ihe oya li ya yumudhwa konima yomasiku gatatu netata ngaashi sha hunganekwa. Aagwayekwa oya li ya mangululwa mo mondholongo, na Kalunga okwa pe mboka ya kala aadhiginini oshilonga shi ikalekelwa okupitila mOmuwa gwawo, Jesus Kristus. Mo 1919 aagwayekwa mboka, oya langekwa po ye li “omupiya omudhiginini nomunandunge,” opo ya paluthe oshigwana shaKalunga pambepo momasiku gahugunina. — Mat. 24:45-47, NW; Eh. 11:11, 12.
Ehololo 11:1, 2 otayi popi kutya iiningwanima mbika otayi ningwa sho otempeli yopambepo tayi konakonwa. Ontopolwa ontitatu yaMaleaki oya popi wo kombinga yokukonakonwa kwotempeli yopambepo nosho wo yeyogolo lyayo. (Mal. 3:1-4) Otempeli oya konakonwa nokuyogolwa uule wethimbo li thike peni? Osha ningwa okuza mo 1914 sigo opetameko lyo 1919. Ethimbo ndyoka olya kwatela mo omasiku 1 260 (oomwedhi 42) nosho wo omasiku gatatu netata gopathaneko ngoka ga popiwa mEhololo ontopolwa 11.
Otwa nyanyukwa noonkondo sho Jehova a longekidha opo e tu yelithe, tu ninge aantu ye mwene ya hala okulonga uuwanawa. (Tit. 2:14) Oshikwawo, otwa pandula wo oshiholelwa oshiwanawa shoka aagwayekwa aadhiginini mboka ya li taya kwatele komeho pethimbo ndyoka edhigu ye tu tulila po. Kungeyi oya gwanitha po ehunganeko kombinga yaahokololi yaali.
(Ehololo 11:7) Ngele ya mana okupopya elaka ndyoka, nena oshilikama shoka tashi zi molumbogo lwomuule, otashi ke ya kondjitha. Osho otashi ke ya sinda e tashi ya dhipaga.
(Ehololo 11:11) Ihe konima yomasiku gatatu netata ombepo yomwenyo oya zi kuKalunga e tayi ya muyo, oyo noya yumuka e taa thikama. Aantu ayehe mboka ye ya mono, oya tila noonkondo.
Konga omaliko mOmbiimbeli
(Ehololo 10:9, 10) Ngame onda yi komuyengeli nonde mu indile, a pe ndje okambo hoka okashona. Oye okwa ti kungame: “Kutha okambo hoka, u ka lye. Oko otaka ningi okalulu mela lyoye, ihe mokana otaka ningi okatoye ka fa omagadhi goonyushi.” 10 Ngame onda kutha okambo hoka moshikaha she nonde ka li, e taka ningi okatoye ka fa omagadhi goonyushi mokana kandje. Ihe sho nde ka nina, oka ningi okalulu mela lyandje.
it-2-E ep. 880-881
Okambo, ondhinga yembo
Nkene ya longithwa pathaneko. MOmbiimbeli omu na iiholelwa yimwe tayi popi kombinga yankene oshitya “okambo” nenge “ondhinga yembo” sha longithwa pathaneko. Hesekiel naSakaria ayehe oya li ya mono ondhinga yembo ya nyolwa koombinga adhihe. Molwaashoka oya li unene hayi nyolwa owala kombinga yimwe, osha yela kutya sho ya nyolwa koombinga adhihe, otashi ulike kutya etumwalaka lyepangulo ndyoka lya li mo, olya kwata miiti shi thike peni. (Hes 2:9–3:3; Sak 5:1-4) Memoniko ndyoka li li mEhololo, omwa popiwa kutya moshikaha shokolulyo shaangoka a kuutumba koshipangelapundi omwa li mu na embo enene ano ondhinga yembo ya patwa niipatitho iheyali. Iipatitho mbyoka oya li ya keelela kaayi matulwe nando okugulwe e yi leshe, sigo Onzigona te yi matula. (Eh 5:1, 12; 6:1, 12-14) Memoniko olyo tuu ndyoka, Johannes okwa li a pewa okambo e ta lombwelwa e ka lye po. Sho e ka li, mokana oka li okatoye, ihe mela lye oka ningi okalulu. Molwaashono ka kali ka patwa, osha yela kutya uuyelele mboka wa li mo owa li tawu vulu okuuviwa ko. Etumwalaka ndyoka lya li mo olya li ‘etoye’ kuJohannes, ihe omwa li mu na iinima iilulu mbyoka e na okuhunganeka ngaashi a li a lombwelwa. (Eh 10:1-11) Hesekiel naye okwa li a pewa ondhinga yembo yi na “oontakumandjimbo, omahekumuno nomayemato.” — Hes 2:10.
(Ehololo 12:1-5) Endhindhiliko enene olya holoka kegulu: omukiintu a zala etango, nomwedhi gu li kohi yoompadhi dhe, noku na oshishani shoonyothi omulongo nambali komutse gwe. 2 Oye okwa li metegelelo li li pokuvalwa, nokwa kugu omoluuwehame nomolwoshitheta shopokuvala. 3 Endhindhiliko ekwawo olya holoka kegulu. Okwa li ku na oshikoko oshinene oshitiligane shi na omitse heyali nooniga omulongo, nokomutse kehe gwasho oku na oshishani. 4 Osho osha kombo po nomushila gwasho oshititatu shoonyothi dhokegulu noshe dhi umbile kombanda yevi. Oshikoko shika osha thikama sha taalela omukiintu ngoka ta hala okuvala, shi lye po okanona, ngele ka valwa. 5 Nena omukiintu okwa vala okanona okamati, hoka ke na okupangela iigwana ayihe nondhimbo yosheela. Ihe okanona hoka oka fegulwa po noka falwa puKalunga noposhipangelapundi she.
it-2-E ep. 187, okat. 7-9
Oshitheta shopokuvala
Memoniko ndyoka li li mEhololo, omuyapostoli Johannes okwa li a mono omukiintu gwomegulu ta kugu “omoluuwehame nomolwoshitheta shopokuvala.” Okwa vala “okanona okamati, hoka ke na okupangela iigwana ayihe nondhimbo yosheela.” Nonando oshikoko osha li sha kambadhala shi ka lye po, ‘okanona hoka oka fegulwa po noka falwa puKalunga.’ (Eh 12:1, 2, 4-6) Sho okanona hoka ka fegulwa po noka falwa puKalunga, otashi ulike kutya okwa li e ka taamba ko onga ke mwene, ngaashi owala pethimbo lyonale sha li omukalondjigilile okufala okahanona kuhe e ke ka taambe ko. (Tala oshitya BIRTH) “Omukiintu” ngoka “omuhokanwa” gwaKalunga, oye “Jerusalem shomegulu,” “meme” gwaKristus naamwahe aagwayekwa. — Gal 4:26; Heb 2:11, 12, 17.
Omukiintu gwaKalunga gwomegulu, okwa gwanenena noita vulu okukala e na uuwehame woshitheta shopokuvala paulelalela. Onkee ano, uuwehame mboka pathaneko otawu ulike kutya “omukiintu” ote ke shi dhimbulula mo kutya oku li pokuvala. — Eh 12:2.
Mbela “okanona okamati” oka li ta ka kala lye? Oka li “ke na okupangela iigwana ayihe nondhimbo yosheela.” Shoka osha li sha hunganekwa kombinga yOmukwaniilwa gwopaMesiasa mEpisalomi 2:6-9. Ihe Johannes okwa li a mono emoniko ndyoka konima yethimbo lela sho Kristus a valelwa kombanda yevi, e ta si nokuyumuka. Onkee ano, emoniko ndyoka otali popi kombinga yokuvalwa kwUukwaniilwa wopaMesiasa wu li miikaha yOmwana gwaKalunga, ngoka sho a yumudhwa kuusi, a ‘kuutumba kolulyo lwaKalunga nokwa tegelela Kalunga a tule aatondi ye kohi yoompadhi dhe.’ — Heb 10:12, 13; Eps 110:1; Eh 12:10.
Elesho lyOmbiimbeli
(Ehololo 10:1-11) Ngame onda mono omuyengeli gulwe omunankondo a zi megulu. Oye okwa li a zalekwa oshikogo nuutamvula komutse gwe. Oshipala she osha li sha fa etango, nomagulu ge oga li ga fa oongudhi dha tema omulilo. 2 Oye okwa li e na okambo okashona ka pandjwa moshikaha she. Okwa lyata ompadhi ye yokolulyo kombanda yefuta noyokolumoho okevi, 3 nokwi igidha newi enene lya fa lyonime tayi ndunduma. Ano sho i igidha ngeyi, okwa yamukulwa komityalakato heyali. 4 Mbalambala omityalakato ndhoka sho dha popi, onda li nda hala okunyola oohapu. Ihe ondu uvu ewi tali popi megulu tali ti: “Mwenena oohapu ndhoka dha popiwa komityalakato ndhoka heyali, ino dhi nyola!” 5 Nena omuyengeli ngwiyaka nda monene a thikama kefuta nokevi, okwa ganeke oshikaha she shokolulyo kegulu. 6 Oye okwa gana kuKalunga, ngoka ta kala e na omwenyo sigo aluhe, ngoka a shiti egulu nevi, efuta niinima ayihe yi li mo. Omuyengeli nokwa ti: “Kaku na we ethimbo! 7 Ano uuna omuyengeli omutiheyali ta hiki enkuma lye, Kalunga ota ka tsakanitha elalakano lye ndyoka lya kala lya holama, ngaashi e li tseyithile aapiya ye, nokutya aahunganeki.” 8 Nena ewi ndyoka ndu uvile tali popitha ndje megulu, olya lombwele ndje ishewe lya ti: “Inda e to kutha okambo ka pandjwa ke li moshikaha shomuyengeli ngoka a thikama kefuta nokevi.” 9 Ngame onda yi komuyengeli nonde mu indile, a pe ndje okambo hoka okashona. Oye okwa ti kungame: “Kutha okambo hoka, u ka lye. Oko otaka ningi okalulu mela lyoye, ihe mokana otaka ningi okatoye ka fa omagadhi goonyushi.” 10 Ngame onda kutha okambo hoka moshikaha she nonde ka li, e taka ningi okatoye ka fa omagadhi goonyushi mokana kandje. Ihe sho nde ka nina, oka ningi okalulu mela lyandje. 11 Nena onda lombwelwa taku tiwa: “Ou na okulombwela natango iigwana oyindji, omihoko, omalaka naakwaniilwa elaka lyaKalunga.”
16-22 DESEMBA
OMALIKO OKUZA MOOHAPU DHAKALUNGA | EHOLOLO 13–16
“Ino tila oshilikama oshitilithi”
(Ehololo 13:1, 2) Nena onda mono ko oshilikama tashi zi mefuta. Osho osha li shi na ooniga omulongo nomitse heyali. Koluniga kehe okwa li oshishani, komitse dhasho okwa li kwa nyolwa omadhina gomatukano. 2 Oshilikama shoka nda mono, osha li sha fa etotono shi na omakaha ga fa gemwanka nokana ka fa konime. Oshikoko osha gandja koshilikama oonkondo dhasho, oshipangelapundi shasho nombinga onene yepangelo lyasho.
Jehova oye ‘omuhololi gwiiholekwa’
6 Oomvula 2 000 lwaampono dha pita, Jesus okwa li a hololele omuyapostoli Johannes omamoniko omakumithi ga landulathana. (Eh. 1:1) Mulimwe, Johannes okwa mono Ondiaboli, nenge oshikoko sha thikama kooha dhefuta enene. (Lesha Ehololo 12:18–13:2.) Okwa mono wo oshilikama sha anduka mefuta moka nosha pewa oonkondo oonene kOndiaboli. Konima omuyengeli gumwe okwa lombwele Johannes kutya omitse heyali dhoshilikama shoka sha fa etotono ndhoka dha popiwa mEhololo 13:1, otadhi thaneke “aakwaniilwa yaheyali,” nenge omapangelo omanankondo. (Eh. 13:14, 15; 17:3, 9, 10) Sho Johannes ta nyola embo lyEhololo, yatano yomuyo oya sa nale, gumwe ota pangele natango pethimbo ndyoka nomukwawo “ine ya.” Aakwaniilwa mboka otaya thaneke omapangelo geni? Natu konakoneni omutse kehe gwoshilikama shoka sha popiwa mEhololo. Otatu ka mona wo nkene embo lyaDaniel lya gandja uuyelele oundji kombinga yaakwaniilwa mboka omimvo omathele omanga inaaya valwa nokuli.
(Ehololo 13:11) Nena onda mono ko oshilikama oshikwawo tashi zi mevi. Osho osha li shi na ooniga mbali dha fa ooniga dhonzi, nosha popi newi lya fa lyoshikoko.
(Ehololo 13:15) Oshilikama oshitiyali osha pitikwa okufudhila ombepo yomwenyo moshiyelekela shoshilikama shotango, opo oshiyelekela shika shi vule okupopya nokudhipaga mboka inaa hala oku shi galikana.
re-E ep. 194, okat. 26
Okukondja niilikama iihahu iyali
26 Oshilikama shoka otashi thaneke shike? Oshilikama shoka oAnglo-Amerika, epangelo enankondo muuyuni, shoka sha faathana noshilikama shomitse heyali, ihe otashi dhana onkandangala yi ikalekelwa. Ngele otwe shi ikalekele, otashi tu kwathela tu mone lela kutya otashi pangele muuyuni shi ithikamena. Oshilikama shika shooniga mbali, osha thikama po momapangelo gaali omanankondo gopapolotika ge li ko pethimbo limwe, gi ithikamena, ihe otaga longele kumwe. Ooniga dhasho mbali ‘dha fa dhonzi’ otadhi ulike kutya ohashi iningitha sha fa shi na olukeno noshi na ombili nosha fa tashi pangele aantu nawa, nuuyuni auhe oko wu na okutala kusho. Ihe ohashi popi newi “lya fa lyoshikoko,” sha hala okutya, ohashi thiminike aantu nokulongitha oonkondo ngele omukalo gwasho gwokupangela inagu taambiwa ko. Ihashi ladhipike aantu ya vulike kUukwaniilwa waKalunga mboka wu li mewiliko lyOnzigona yaKalunga, ihe ohashi ladhipike aantu ya vulike kuSatana, oshikoko oshinene. Osha kala nokuhwahwameka etopoko miigwana nuutondwe, naashoka osha ningitha aantu ya galikane oshilikama shotango.
re-E ep. 195, okat. 30-31
Okukondja niilikama iihahu iyali
30 Ondjokonona otayi ulike kutya oshiyelekela shoshilikama shoka, ehangano lya totwa po nolya li hali humithwa komeho nokwaambidhidhwa kuBritania naAmerika, nolya li tango hali ithanwa Oshipandi shIigwana (League of Nations). Montopolwa 17 yEhololo otashi popiwa kutya otashi ka holoka shi li molupe lwa fa lwoshilikama oshitiligane shi ithikamena po. Ehangano ndika lyopauyuni ohali ‘popi’ meityo ndyoka kutya ohali inomo kutya olyo owala tali vulu okweetela aantu ombili negameno. Ihe paushili wowene, pomitumba dhasho dhopaigwana, aantu ohaya kala owala taya gandja iipopiwa iiwinayi iile yokugandja uusama, yomalundilo notaya tukathana. Osha thiminika nokutidha mo iigwana nenge aantu mongongahangano yasho ngele inaya hala ya vulike koonkondopangelo dhasho. Oshipandi shIigwana osha tidha mo lela iigwana mbyoka ya ndopa okuvulika komalombwelo gasho. Petameko lyuudhigu unene, omatangakwiita giigwana yi imanga kumwe ano “ooniga” dhoshiyelekela shoshilikama, otaga ka kutha ombinga mehanagulo enene. — Ehololo 7:14; 17:8, 16.
31 Okuza piita iitiyali yuuyuni, oshiyelekela shoshilikama shoka ngashingeyi shi li ehangano lyIigwanahangano (United Nations) olya dhipaga lela aantu. Pashiholelwa, mo 1950 etangakwiita lyehangano ndyoka olya li lya kutha ombinga miita mbyoka ya li pokati kaNorth Korea naSouth Korea. Etangakwiita ndyoka pamwe nolyaSouth Korea, otaku tengenekwa kutya olya dhipaga aantu yomoNorth Korea nAachina 1 420 000. Sha faathana omatangakwiita gIigwanahangano oga li ga dhana onkandangala moCongo (Kinshasa), okuza mo 1960 sigo 1964. Shimwe ishewe, aapangeli yomuuyuni mwa kwatelwa aapapa Paul VI naJohn Paul II oya kala noku shi koleka kutya oshiyelekela shoka osho owala tashi vulu okweetela aantu ombili. Ohaya ti ngele aantu oya ndopa oku shi longela, otaye ki ihanagula po yoyene. Kungawo, ohaya ningitha aantu ayehe ya dhipagwe pathaneko mboka taya tindi okulongela kumwe nokugalikana oshiyelekela shoka. — Deuteronomium 5:8, 9.
(Ehololo 13:16, 17) Oshilikama osha thiminike aantu ayehe, aadhinwa naanenentu, aayamba noohepele, aapika naavalwa, ya kale ya ndhindhilikwa miikaha yawo yokolulyo nenge miipala yawo. 17 Aantu oyi indikwa okulanda nenge okulanditha, ngele kaye na endhindhiliko ndika, nokutya edhina lyoshilikama nenge onomola yedhina lyasho.
Omanenedhiladhilo okuza membo lyEhololo 13:1–22:21
13:16, 17. Nonando opu na omaupyakadhi ngoka hatu tsakaneke momaipyakidhilo getu gesiku kehe, ngaashi ‘mokulanda nenge mokulanditha,’ katu na okweetha tu thininikilwe mokweetha oshilikama shi pangele onkalamwenyo yetu. Okweetha tu kale tu na ‘endhindhiliko lyoshilikama miikaha yetu nomiipala yetu’ otashi ti kutya otwe etha shi pangele iilonga yetu nenge shi nwethe mo omadhiladhilo getu.
Konga omaliko mOmbiimbeli
(Ehololo 16:13, 14) Opo ihe onda mono oombepo ndatu dha nyata dha fa omafuma tadhi zi mokana koshikoko, koshilikama nokomuhunganeki omufundja. 14 Ndhika odho oombepo dhoompwidhuli ndhoka hadhi longo iikumithalonga. Oombepo ndhika ndatu otadhi yi kaakwaniilwa yokombanda yevi alihe oku ya hanganitha, ya ka hinge iita mesiku enene lyaKalunga Omunankondoadhihe.
Omanenedhiladhilo okuza membo lyEhololo 13:1–22:21
16:13-16. ‘Oombepo dha nyata’ otadhi thaneke oopolopahanda dhoompwidhuli dha nuninwa okushilipaleka kutya aakwaniilwa yokombanda yevi inaya nwethwa mo kokutilwahi kwoshiyaha oshitiheyali shondjahi yaKalunga, ihe pehala lyaashono otadhi yu ulumike ya pataneke Jehova. — Mat. 24:42, 44.
(Ehololo 16:21) Omamanya omanene goompawe, kehe limwe li na uudhigu u thike pookilograma omilongo ne, oga koloka kegulu noga gwile kombanda yaantu. Nena aantu oya tuku Kalunga omolwoshiponga shika shoompawe, oshoka osha li oshinene noonkondo.
“Ehupitho lyeni lya thiki popepi”
9 Ethimbo lyuudhigu uunene itali ka kala ethimbo lyokuuvitha ‘onkundana ombwanawa yUukwaniilwa.’ Ihe otali ka kala ethimbo ‘lyehulilo.’ (Mateus 24:14) Ethimbo lyokuuvitha etumwalaka ndyoka otali ka kala lya pwa po. Oshigwana shaKalunga otashi ka uvitha nuulaadhi etumwalaka lyepangulo ndyoka tali ka guma aantu ayehe. Otashi vulika etumwalaka ndyoka tali ka popya kutya uuyuni waSatana mboka wa kolokosha, owu li pokuhanagulwa po thiluthilu. Ombiimbeli otayi yelekanitha etumwalaka ndika noompawe, sho tayi ti: “Omamanya omanene goompawe, kehe limwe li na uudhigu u thike pookilograma omilongo ne, oga koloka kegulu noga gwile kombanda yaantu. Nena aantu oya tuku Kalunga omolwoshiponga shika shoompawe, oshoka osha li oshinene noonkondo.” — Ehololo 16:21.
Elesho lyOmbiimbeli
(Ehololo 16:1-16) Ngame ondu uvu ewi enene lya zi motempeli, lya lombwele aayengeli mbeyaka yaheyali lya ti: “Indeni, mu ka tilehi iiyaha mbyoka iheyali yondjahi yaKalunga kombanda yevi!” 2 Omuyengeli gwotango okwa yi nokwa tilehi oshiyaha she kombanda yevi. Nena aantu ayehe mboka ya li ye na endhindhiliko lyoshilikama naayehe mboka ya li haa galikana oshiyelekela shasho, oya kwatwa kiitumbuka iiwinayi tayi ehama noonkondo. 3 Omuyengeli omutiyali okwa tilehi oshiyaha she mefuta, omeya noga shituka ga fa ombinzi yomusi, niinamwenyo ayihe yomefuta oya si. 4 Omuyengeli omutitatu okwa tilehi oshiyaha she momilonga nomoothithiya dhomeya, omeya noga shituka ombinzi. 5 Ongame nondu uvu omuyengeli ngoka ha pangele omeya ta popi ta ti: “Omuyapuki, ngoka u li ko nowa li ko, omapangulo goye oge na uuyuuki. 6 Oyo oya tilehi ombinzi yaantu yoye noyaahunganeki, onkee owe ya nwetha ombinzi. Oya pewa shoka ye shi ilongela.” 7 Nena ondu uvu ewi lya zi moshiyambelo lya ti: “Omuwa Kalunga Omunankondoadhihe, omapangulo goye ogu uka lela nogoshili.” 8 Omuyengeli omutine okwa tilehi oshiyaha she ketango, olyo nolya pewa oonkondo okufika aantu nuupyu walyo uunene. 9 Aantu oya fikwa kuupyu mbuka uunene noya tameke okusheka edhina lyaKalunga, ngoka e na oonkondo okupangela omageelo ngaka. Oyo inaa itedhulula nando, ye ethe uulunde wawo yo ya simaneke uunene we. 10 Omuyengeli omutitano okwa tilehi oshiyaha she koshipangelapundi shoshilikama. Nena omilema odha siikile oshilongo shoshilikama, aantu noya lumata omalaka gawo omoluuwehame 11 noya tuku Kalunga komegulu omoluuwehame niitumbuka yawo, ihe inaa itedhulula. 12 Omuyengeli omutihamano okwa tilehi oshiyaha she momulonga omunene gwaEufrat. Nena omulonga ogwa pwine nogwa ningi ondjila yokweendiwa kaakwaniilwa mboka taa zi kuuzilo. 13 Opo ihe onda mono oombepo ndatu dha nyata dha fa omafuma tadhi zi mokana koshikoko, koshilikama nokomuhunganeki omufundja. 14 Ndhika odho oombepo dhoompwidhuli ndhoka hadhi longo iikumithalonga. Oombepo ndhika ndatu otadhi yi kaakwaniilwa yokombanda yevi alihe oku ya hanganitha, ya ka hinge iita mesiku enene lyaKalunga Omunankondoadhihe. 15 “Tala, otandi ya ombaadhilila! Omunelago oongoka ta kala a tonata nota tonatele oonguwo dhe, opo kaa ende e li olutu lwowala ye a se ohoni montaneho yaantu ayehe.” 16 Nena oombepo odha gongele aakwaniilwa pehala ndyoka hali ithanwa mOshihebeli Armagedon.
23-29 DESEMBA
OMALIKO OKUZA MOOHAPU DHAKALUNGA | EHOLOLO 17–19
“Iita yaKalunga mbyoka tayi ka hulitha po iita ayihe”
(Ehololo 19:11) Nena onda mono egulu lye eguluka nomo mwa li mu na okakambe okatokele. Omukayili gwako ohi ithanwa Omwiinekelwa nOmunashili. Oye ota pangula nuuyuuki nota kondjo olugodhi.
(Ehololo 19:14-16) Omatanga gaakwiita yomegulu oge mu landula, ya londa kuukambe uutokele noya zala oonguwo oontokele dholiina. 15 Mokana ke omwa zi egongamwele lya tsa, ndyoka ta ka sinda nalyo iigwana. Oye ote ke yi pangela nondhimbo yosheela nota ka kola nokutsipulila moshikolelo shomaviinu gondjahi onene yaKalunga Omunankondoadhihe. 16 Konguwo ye noketundji lye okwa li kwa nyolwa edhina ndika: “Omukwaniilwa gwaakwaniilwa nOmuwa gwaawa.”
Armagedon — Iita yaKalunga mbyoka tayi ka hulitha po iita ayihe
Aayuuki itaya ka nyanyukilwa ombili negameno, omanga aakaanakalunga oyo taya pangele. (Omayeletumbulo 29:2; Omuuvithi 8:9) Odhoshili kutya itatu vulu okutopola eyonuko nuukolokoshi naantu mboka haye wu longo. Ombili tayi kalelele nuuyuuki otayi ke ya po owala konima ngele aakolokoshi ya hulithwa po. Salomo okwa nyola a ti: “Omukolokoshi ta ningi iikulila yomuyuuki.” — Omayeletumbulo 21:18, OB-1954.
Molwaashoka Kalunga oye Omupanguli, otu na uushili kutya sho ta ka pangula aakolokoshi ota ka longitha uuyuuki. Abraham okwa li a pula a ti: “Omupanguli guuyuni auhe ita longo ando pauyuuki?” Eyamukulo ndyoka Abraham a li a mono olyo kutya Jehova omuyuuki aluhe. (Genesis 18:25) Ombiimbeli otayi tu shilipaleke natango kutya Jehova iha nyanyukilwa okuhanagula po aakolokoshi, ihe ohe shi ningi owala ngele itayi itedhulula. — Hesekiel 18:32; 2 Petrus 3:9.
t-1-E ep. 1146, okat. 1
Okakambe
Memoniko lyomuyapostoli Johannes lyopathaneko, Jesus Kristus okwa popiwa a londa kokakambe okatokele a landulwa ketanga lyaakwiita, ayehe nayo oya ya londa kuukambe uutokele. Emoniko ndika Johannes a li a hololelwa olya tali ulike kiita yi li pauyuuki mbyoka Kristus ta ka kondja naatondi ayehe pehala lyaHe, Jehova Kalunga. (Eh 19:11, 14) Petameko, sho Kristus a tameke okupangela e li omukwaniilwa, oonkalo dha yaga kegonga ndhoka dha ka landula ko otadhi thanekwa kaakayili yuukambe ya yoolokathana nuukambe hoka ya londa. — Eh 6:2-8.
(Ehololo 19:19, 20) Nena onda mono oshilikama naakwaniilwa yokombanda yevi nomatanga gaakwiita ya gongala, ya kondjithe ngoka a londa okakambe naakwiita ye. 20 Oshilikama osha kwatwa, osho wo omuhunganeki omufundja ngoka a longo iikumithalonga montaneho yasho nokupukitha aantu mboka ye na endhindhiliko lyasho, naamboka ya li haa galikana oshiyelekela shasho. Oshilikama nomuhunganeki omufundja oyu umbilwa mefuta lyomulilo ye na omwenyo ngoka tagu hohelithwa osulufuli.
re-E ep. 286, okat. 24
Omukwaniilwa ngoka e li omukwiita ota ka sindana puArmagedon
24 Oshilikama shomitse heyali, shi na ooniga omulongo shoka sha anduka mefuta, tashi thaneke ehangano lyaSatana lyopapolotika, otashi ka hulithwa po pamwe nomuhunganeki omufundja, ano epangelo etiheyali enankondo lyuuyuni. (Ehololo 13:1, 11-13; 16:13) Manga oshilikama shoka nomuhunganeki omufundja ye na “omwenyo,” nenge taya pangele ye li ompinge noshigwana shaKalunga kombanda yevi, oyu umbilwa “mefuta lyomulilo.” Mbela efuta ndika lyomulilo olyolela? Aawe, oshoka oshilikama nomuhunganeki omufundja nayo kaye shi iinamwenyo yolelalela. Pehala lyaashono, efuta ndyoka otali ulike koshinima tashi hanagulwa po thiluthilu, noitashi vulu okuza mo we. Mehala moka omo tamu ka umbilwa eso noshaasi, nosho wo Omuhindadhi. (Ehololo 20:10, 14) Kali shi ehala moka tamu ka fikilwa aakolokoshi sigo aluhe, oshoka Jehova oku tonde iihuna mbyoka. — Jeremia 19:5; 32:35; 1 Johannes 4:8, 16.
(Ehololo 19:21) Aakwiita yawo oya dhipagwa po negongamwele ndyoka lya zi mokana kaangoka a londa okakambe; noondhila adhihe odha kuta onyama yawo.
re-E ep. 286, okat. 25
Omukwaniilwa ngoka e li omukwiita ota ka sindana puArmagedon
25 Aantu ayehe mboka ya li kaaye shi oshitopolwa shepangelo ndyoka, ihe oya li haya kutha ombinga miinima yomuuyuni mbuka wa kolokosha nayo oya “dhipagwa po negongamwele ndyoka lya zi mokana kaangoka a londa okakambe.” Jesus ote ke ya tokolela eso. Molwaashoka yo inaya popiwa kutya otaya ka umbilwa mefuta lyomulilo, mbela aantu mboka otaya ka yumudhwa? Kapu na uumbangi washa mOmbiimbeli tawu ulike kutya aantu mboka taya hanagulwa po kOmupanguli Jesus, ngoka a langekwa po kuJehova, otaya ka yumudhwa. Jesus okwe shi popya kutya, ayehe mboka kaaye shi “oonzi” otaya ka umbilwa “momulilo gwaaluhe ngoka gwa longekidhilwa omutondi naayengeli ye” ano “mehanagulo lyaaluhe, NW.” (Mateus 25:33, 41, 46) Ndika otali ka kala “esiku, uuna aakeenakonashanakalunga taa ka pangulwa notaa ka yonagulwa po.” — 2 Petrus 3:7; Nahum 1:2, 7-9; Maleaki 4:1.
Konga omaliko mOmbiimbeli
(Ehololo 17:8) Oshilikama shoka wa mono, osha li shi na omwenyo nale, ihe ngashingeyi kashi ko we. Ihe oshi li pokwaanduka mo molumbogo lwomuule notashi ka hanagulwa po. Nena aantu ayehe yokombanda yevi okuza keshito lyuuyuni, oomboka omadhina gawo inaaga nyolelwa membo lyaanamwenyo, otaa ka kumwa, sho taa ka tala oshilikama shoka. Oshoka osha li shi na omwenyo, ihe ngashingeyi kashi ko we, ihe otashi ka holoka natango.
re-E ep. 247-248, okat. 5-6
Oshiholekwa tashi hololwa
5 “Oshilikama . . . osha li.” Eeno oko sha li hashi ithwana Oshipandi shIigwana (League of Nations) okuza mo 10 Januali 1920 okuuka komeho, nosha li sha thikama po miigwana nenge miilongo 63 hayi kutha ombinga musho omathimbo nomathimbo. Ihe iilongo ngaashi Japan, Ndowishi, Italia naashoka sha li nale Soviet Union, oya li yi ikutha mo mOshipandi shoka. MuSeptemba 1939, omupangeli gwaNdowishi omukayamukulwa okwa li a tameke Iita Iitiyali yUuyuni. Molwaashoka Oshipandi shIigwana osha li sha ndopa okukaleka po ombili muuyuni, okonyala shi gwile molumbogo moka itaashi vulu okulonga sha. Mo 1942 osha si po. Ihe pethimbo tuu ndyoka lyomakuyunguto, Jehova okwa li a hololele oshigwana she kutya ehunganeko ndyoka otali ti lela ngiini! Poshigongi shedhina Oshigongi shUuyuni Uupe wopaKalunga, N. H. Knorr okwa li a ningi etseyitho kombinga yehunganeko ndyoka kutya “oshilikama . . . kashi ko we.” Opo nduno okwa li a pula a ti: “Mbela Oshipandi shoka otashi ka kala molumbogo sigo aluhe?” Okwa yamukula a totha mEhololo 17:8 a ti: “Ehangano ndyoka lyiigwana yomuuyuni otali ka holoka natango.” Shoka oshu ulike kutya omahunganeko gaJehova ohaga gwanithwa shili!
Tashi anduka mo molumbogo lwomuule
6 Oshilikama oshitiligane osha li sha zi mo shili molumbogo lwomuule. Mo 26 Juni 1945, moSan Francisco, moAmerika, omwa li mu na ombuyagano yaantu. Iigwana 50 oya li ya taamba ko ehangano lyIigwanahangano li ye miilonga. Ehangano ndika olya li lya totwa po nelalakano li “kaleke po ombili negameno yopaigwana.” Embo The World Book Encyclopedia ota li ti: “Momikalo dhontumba, o-UN [Iigwanahangano] nayo oya faathana nOshipandi shIigwana shoka sha li sha totwa po konima yIita yoTango yUuyuni . . . Oyindji yomiigwana mbyoka ya toto po o-UN, oyo ngaa ya totele po Oshipandi shIigwana. Ngaashi Oshipandi shIigwana, o-UN nayo oya li ya totwa po nelalakano lyokweeta ombili pokati kiigwana. Ookomitiye ndhoka dhi li oshitopolwa sho-UN, odha faathana naandhoka dha li mOshipandi.” Onkee ano, o-UN oshilikama oshitiligane sha ningi ishewe omwenyo. Osha thikama po miigwana 190 yi vule kokule mbyoka ya li mOshipandi shIigwana 63. O-UN oyi ina iinakugwanithwa oyindji yi vule yOshipandi shIingwana.
(Ehololo 17:16, 17) Ooniga omulongo we dhi mono, nosho wo oshilikama, otayi ka tonda ohonda ndjoka. Oyo otaa ke yi thiga yi li olutu lwowala. Oyo otaa ka lya po onyama yayo otaa ke yi lungunitha po nomulilo. 17 Oshoka Kalunga okwa pendutha moomwenyo dhawo ehalo lye, ya tse ompango yimwe noya gandje oonkondo dhawo dhokupangela koshilikama, sigo oohapu dhakalunga dha gwanithwa.
Jehova okwa holola shoka “shi na okuningwa mbala”
17 Aantu momalongelokalunga giifundja itaya ka pwa mo thiluthilu. Ohonda otayi ka tsikila nokunwetha mo aakwaniilwa ya longe ehalo lyayo, sigo Kalunga ta ka pendutha moomwenyo dhaapangeli ya gwanithe po ehalo lye. (Lesha Ehololo 17:16, 17.) Masiku Jehova ota ka hwahwameka omahangano gopapolotika guuyuni waSatana ga ponokele ohonda. Otaga ka hulitha po enwethomo lyayo notage ke yi hula ashihe. Omimvo omilongo dha ka pita oshinima shoka osha kala sha fa oongano, ihe yamwe oye wete natango kutya kashi na siku shi ka ningwe. Ohonda onkee ngaa ya kayila koshilikama oshitiligane nokunena, noinayi thenunuka ko natango. Ihe otayi ka gwa ko ombadhilila nokuhanagulwa po. — Eh. 18:7, 8, 15-19.
Elesho lyOmbiimbeli
(Ehololo 17:1-11) Nena gumwe gwomaayengeli yaheyali mboka ye na iiyaha iheyali, okwe ya kungame nokwa lombwele ndje a ti: “Ila huka, ndi ku ulukile, nkene ohonda kamana, oshilando shiyaka oshinene sha tungilwa popepi nomilonga odhindji, tashi geelwa. 2 Aakwaniilwa yokombanda yevi oya hondele nohonda ndjika, naantu yokombanda yevi oya kolwa, sho ya nu omaviinu goluhondelo lwayo.” 3 Ongame onda kwatwa kombepo nonda falwa komuyengeli mombuga. Mwiyaka onda mono mo omukiintu a kuutumba koshilikama oshitiligane sha nyolwa omadhina gomatukano kolutu lwasho aluhe. Oshilikama shika osha li shi na omitse heyali nooniga omulongo. 4 Omukiintu okwa li a zala onguwo ontiligane ya hondjelwa uulenga woshingoli nuumanya wondilo nomawe. Moshikaha she okwa li e na oshitenga shoshingoli shu udha iihuna noonyata dholuhondelo lwe. 5 Moshipala shomukiintu omwa li mwa nyolwa edhina eholekwa: “Babilon oshinene, yina yoohonda adhihe noyiihuna ayihe yomuuyuni.” 6 Nena onda dhimbulula kutya omukiintu okwa li a kolwa kombinzi yaantu yaKalunga noyaamboka ya dhipagwa molwaasho yi inekela Jesus. Ano sho nde mu mono, onda kumwa noonkondo. 7 Nena omuyengeli okwa pula ndje a ti: “Omolwashike wa kumwa? Otandi ke ku tseyithila oshiholekwa shomukiintu nguka noshoshilikama shoka she mu humbata, oshilikama shoka shi na omitse heyali nooniga omulongo. 8 Oshilikama shoka wa mono, osha li shi na nale omwenyo, ihe ngashingeyi kashi ko we. Ihe oshi li pokwaanduka mo molumbogo lwomuule notashi ka hanagulwa po. Nena aantu ayehe yokombanda yevi okuza keshito lyuuyuni, oomboka omadhina gawo inaaga nyolelwa membo lyaanamwenyo, otaa ka kumwa, sho taa ka tala oshilikama shoka. Oshoka osha li shi na omwenyo, ihe ngashingeyi; kashi ko we, ihe otashi ka holoka natango. 9 “Shika otashi pula oondunge nomayele. Omitse heyali odho oondundu heyali hoka kwa kuutumba omukiintu. Oondundu ndhika otadhi thaneke aakwaniilwa yaheyali: 10 yatano yomuyo oya sa nale, gumwe ota pangele natango nomutiheyali ine ya. Ihe ngele te ke ya, ota ka pangela owala okathimbo okafupi. 11 Nokuli oshilikama shoka sha li ko, ihe ngashingeyi kashi ko we, osho omukwaniilwa omutihetatu. Eeno, osho gumwe gwomaakwaniilwa mbeyaka yaheyali yotango notashi ka yonagulwa po.
30 DESEMBA–5 JANUALI
OMALIKO OKUZA MOOHAPU DHAKALUNGA | EHOLOLO 20–22
“Tala, ngashingeyi iinima ayihe otandi yi ningi iipe!”
(Ehololo 21:1) Ongame nonda mono egulu epe nevi epe. Oshoka egulu lyotango nevi lyotango oya hula po nefuta kali ko we.
re-E ep. 301, okat. 2
Egulu epe nevi epe
2 Omimvo omathele dha ka pita pethimbo manga Johannes kaali po, Jehova okwa li a lombwele Jesaja a ti: “Tala, otandi shiti egulu epe nevi epe. Iiningwanima yonale otayi ka dhimbiwa thiluthilu.” (Jesaja 65:17; 66:22) Ehunganeko ndika olya li lya gwanithwa tango sho Aajuda aadhiginini ya galukile kuJerusalem mo 537 K.E.N., konima sho ya kala muupongekwa muBabilon omimvo 70. Sho ya zi mo, oya ningi oshigwana sha yogolwa, ano “evi epe” ye li kohi yepangelo epe, ano “egulu epe.” Ihe omuyapostoli Petrus okwa li a popi shi na ko nasha nehunganeko ndyoka a ti: “Tse otwa tegelela shoka Kalunga e shi uvaneka: egulu epe nevi epe, moka tamu ka kala uuyuuki.” (2 Petrus 3:13) Johannes oku ulike kutya ehunganeko ndika olya gwanithwa pethimbo lyesiku lyOmuwa. “Egulu lyotango nevi lyotango,” ano uuyuni waSatana nepangelo lyawo ndyoka tali nwethwa mo kuSatana noondemoni dhe, otaga ka hanagulwa po. “Efuta” lya pindjala ano aakolokoshi, aantu mboka aanashipotha, itaya ka kala po we. Pehala lyaashono, otaku ka kala “egulu epe nevi epe.” Egulu epe, epangelo epe, ano Uukwaniilwa waKalunga. Evi epe, uulikumwe waantu ya hangana mboka taya ka kala kohi yepangelo epe. — Yelekanitha Ehololo 20:11.
(Ehololo 21:3, 4) Nena ondu uvu ewi enene lya popi mokule tali zi moshipangelapundi lya ti: “Ngashingeyi egumbo lyaKalunga oli li paantu! Oye ota ka kala pamwe nayo, notaa ka ninga aantu ye. Kalunga mwene ota ka kala pamwe nayo nota ka ninga Kalunga kawo. 4 Oye ota ka theta omahodhi agehe momeho gawo. Oko noitaku ka kala we eso, oluhodhi, elilo nenge uuwehame. Oshoka iikulu oya hula po.”
w13-E 12/1 ep. 11, okat. 2-4
“Tala, ngashingeyi iinima ayihe otandi yi ningi iipe!”
“[Kalunga] ota ka theta omahodhi agehe momeho gawo.” (Ehololo 21:4) Omahodhi geni taga ka thetwa po? Kage shi omahodhi genyanyu nenge ngoka haga gamene omeho getu. Euvaneko ndyoka lyaKalunga otali popi omahodhi ngoka hatu lili, uuna tatu mono iihuna notwa nika oluhodhi. Kalunga itaka theta po owala omahodhi ngoka, ihe ota ka kutha po thiluthilu iinima mbyoka hayi tu lilitha, ano okumona iihuna noluhodhi.
‘Itaku ka kala we eso.’ (Ehololo 21:4) Oshike hashi etele aantu oluhodhi shi vulithe omutondi gwetu eso? Jehova ota ka mangulula aantu aavuliki moomango dheso. Ngiini? Ota ka hulitha po shoka hashi tu etele eso, ano uulunde mboka twa thigulula kuAdam. (Aaroma 5:12) Jehova ota ka galulila aantu mboka aavuliki megwaneneno, okupitila mekuliloyambo lyaJesus. Omutondi gwahugunina, eso, ota ka ‘sindwa.’ (1 Aakorinto 15:26) Aantu aavuliki otaya ka vula okukala nomwenyo sigo aluhe ye na uukolele wi ihwapo, ngaashi Kalunga a li a lalakanena petameko.
‘Itaku ka kala we uuwehame.’ (Ehololo 21:4) Uuwehame wuni itaawu ka kala po we? Uuwehame awuhe wopamadhiladhilo, wopamaiyuvo nowopalutu mboka hawu etwa kuulunde nokokwaahagwanenena nowa ningitha aantu omamiliyona ya kale ya nika oluhodhi.
(Ehololo 21:5) Nena ngoka a kuutumba koshi- pangelapundi, okwa popi a ti: “Tala, ngashingeyi iinima ayihe otandi yi ningi iipe!” Okwa lombwele ndje wo a ti: “Nyola oohapu ndhika, oshoka odhoshili nodhi shi okwiinekelwa.”
w03 8/1 ep. 24, okat. 14
Jehova, oKalunga koshili
14 Shoka Jehova he tu pe mOohapu dhe otu na oku shi tala ko sha simanenena. Oha popi oshili shi na ko sha naye mwene, nota ka ninga shoka a ti ota ka ninga. Otu na omatompelo ogendji gokwiinekela Kalunga. Otatu vulu okwiitaala shoka Jehova ta ti kutya ota ka ‘geela mboka inaa tseya Kalunga naamboka inaa vulika kelaka etoye tali popi Omuwa gwetu Jesus.’ (2 Aatessalonika 1:8) Otatu vulu wo okwiinekela Jehova ngele ta ti kutya oku hole mboka haya lalakanene uuyuki, ngele ta ti kutya ota ka gandja omwenyo gwaaluhe kwaamboka ye na eitaalo tali longo, nongele ta ti kutya ota ka kutha po uuwehame, okulila nosho wo eso nokuli. Jehova okwa tsa omuthindo uuyinekelwa weuvaneko ndyoka lyahugunina sho a gandja elombwelo ndika komuyapostoli Johannes tali ti: “Nyola oohapu ndhika, oshoka odhoshili nodhi shi okwiinekelwa.” — Ehololo 21:4, 5; Omayeletumbulo 15:9; Johannes 3:36.
Konga omaliko mOmbiimbeli
(Ehololo 20:5) Ihe oshihupe shaasi mboka ya hupu ko, inaa ninga nando omwenyo, sigo oomvula ndhoka eyovi limwe dha pu ko. Ndika olyo eyumuko lyotango lyaasi.
it-2-E ep. 249, okat. 2
Omwenyo
Moshipango shoka Kalunga a li a lombwele Adam, okwa li a ti kutya ngele okwa vulika ita si. (Gen 2:17) Ngele omutondi gwetu eso a sindwa, uulunde itawu ka longa we momalutu gaantu aavuliki wu ya etele eso. Otaya ka kala nomwenyo sigo aluhe. (1Kor 15:26) Eso otali ka sindwa pehulilo lyokupangela kwaKristus, hoka kwa popiwa membo lyEhololo kutya otaku ka kala uule womimvo 1 000. Omwa popiwa kutya mboka taya ka ninga aakwaniilwa naayambi pamwe naKristus “oya ningi omwenyo noya kala nokupangela pamwe naKristus uule woomvula eyovi limwe.” “Oshihupe shaasi” mboka inaaya ninga nando omwenyo “sigo oomvula ndhoka eyovi limwe dha pu ko,” oye na okukala aantu mboka ya kala nomwenyo pehulilo lyomimvo eyovi, ihe omanga Satana inaa mangululwa mo molumbogo lwomuule noina makela aantu natango nemakelo lyahugunina. Pehulilo lyomimvo ndhoka eyovi, aantu kombanda yevi otaya adhika ya thika megwaneneno, ano monkalo moka Adam naEva ya li omanga inaaya yona. Otaya ka kala lela ya gwanenena. Mboka taya ka pita memakelo lyaSatana sho ta ka mangululwa mo okathimbo molumbogo lwomuule, otaya ka kala nomwenyo sigo aluhe. — Eh 20:4-10.
(Ehololo 20:14, 15) Opo ihe eso noshaasi oyu umbilwa mefuta lyomulilo. Efuta ndika lyomulilo olyo eso etiyali. 15 Kehe ngoka edhina lye inaali nyolelwa membo lyaanamwenyo, oku umbilwa mefuta lyomulilo.
it-2-E ep. 189-190
Efuta lyomulilo
Uutumbulilo mbuka owa holoka owala membo lyEhololo nowopathaneko lelalela. Ombiimbeli oya yelitha noya fatulula uutumbulilo mbuka tayi ti: “Efuta ndika lyomulilo olyo eso etiyali.” — Eh 20:14; 21:8.
Efuta lyomulilo lyopathaneko olya popiwa kutya oli li ngiini membo lyEhololo. Omwa popiwa kutya eso otali ka umbilwa mefuta ndyoka. (Eh 19:20; 20:14) Eso lyo lyene itali vulu okufikwa. Shimwe ishewe, Omuhindadhi, oshishitwa ihaashi monika, oshu umbilwa mefuta ndyoka. Molwaashoka ye ombepo, ita vulu okufikwa lelalela komulilo. — Eh 20:10; yelekanitha Eks 3:2 nosho wo Aatok 13:20.
Molwaashoka efuta lyomulilo otali thaneke “eso etiyali” nosho wo kutya Ehololo 20:14 otali ti kutya “eso noshaasi” otayi ka umbilwa mo, osha yela kutya efuta ndyoka itali vulu okukala eso ndyoka aantu ya thigulula kuAdam (Rom 5:12), noitali vulu okukala oshaasi. Onkee ano, oli na okukala tali thaneke eso lilwe, moka kaamu na eyumuko, oshoka mOmbiimbeli kapu na mpoka mwa popiwa “efuta lyomulilo” lya gandja aasi mboka ye li mo, ngaashi mboka ya si omolwokuyona kwaAdam nosho wo mboka ye li moshaasi. (Eh 20:13) Onkee, mboka inaaya nyolelwa mo “membo lyaanamwenyo,” aantu mboka inaayi itedhulula ye li ompinge nuunamapangelo waKalunga, oyu umbilwa mefuta lyomulilo, sha hala okutya oya hanagulwa po thiluthilu, nenge tu tye eso etiyali. — Eh 20:15.
Elesho lyOmbiimbeli
(Ehololo 20:1-15) Nena onda mono omuyengeli ta kuluka e na oshipatululo sholumbogo lwomuule nelyenge enene. 2 Oye okwa kwata oshikoko, eyoka ndyoka ekulu hali ithanwa omuhindadhi nenge Satana, nokwe mu manga, a kale a mangwa ngaaka uule woomvula eyovi limwe. 3 Omuyengeli oku umbile Satana molumbogo lwomuule nokwe lu pata noshipatitho, opo kaa vule we okupukitha aantu, sigo oomvula ndhoka eyovi limwe tadhi piti po. Konima yaashika ota ka mangululwa uule wokathimbo okafupi kowala. 4 Opo ihe onda mono iipangelapundi, naamboka ya kuutumba ko, oya pewa oonkondo dhokupangula. Ongame nonda mono oomwenyo dhaamboka ya dhipagwa molwaasho taa uvitha oshili yaJesus noohapu dhaKalunga. Oyo inaa galikana nando oshilikama nenge oshiyelekela shasho nongaashi inaa ndhindhilikwa noshihako shoshilikama miipala nomiikaha yawo. Oyo oya ningi omwenyo noya kala nokupangela pamwe naKristus uule woomvula eyovi limwe. 5 Ihe oshihupe shaasi mboka ya hupu ko, inaa ninga nando omwenyo, sigo oomvula ndhoka eyovi limwe dha pu ko. Ndika olyo eyumuko lyotango lyaasi. 6 Aanelago naalalekwa nuuyamba oomboka taa mono ompito yokuyumudhwa meyumuko ndika lyotango. Eso etiyali itali vulu nando oku ya pangela, ihe otaa ka ninga aayambi yaKalunga noyaKristus notaa ka pangela pamwe naKristus uule woomvula eyovi limwe. 7 Oomvula eyovi limwe ngele dha piti po, Satana ota ka piithwa mo mondholongo, 8 nota ka tsikila okupukitha aantu ayehe mboka ya kala kombanda yevi alihe, kokutya Gog naMagog. Eeno, Satana ote ke ya gongela ayehe, ya hinge iita, notaku ka kala aantu oyendji yaa shi okuyalulwa ya fa omawe gehekevi lyomooha dhefuta. 9 Oyo otaa ka halakanena evi alihe notaa ka kundukidha ontanda yaantu yaKalunga noshilando shoka Kalunga e shi hole. Ihe omulilo otagu ka za megulu e tagu ya lungunitha po. 10 Nena omuhindadhi ngoka a li he ya pukitha, otu umbilwa mefuta lyomulilo nosulufuli moka mwa adhika mu umbilwa nale oshilikama nomuhunganeki omufundja. Oyo otaa ka kala taa hepekwa omutenya nuusiku aluhe sigo aluhe. 11 Nena onda mono oshipangelapundi oshinene oshitokele nagumwe a kuutumba ko. Evi negulu oya yi ontuku yoshipala shaangoka a kuutumba koshipangelapundi noinayi monika we. 12 Opo ihe onda mono oonakusa, aanenentu naadhinwa ya thikama komeho goshipangelapundi. Omambo oga li ga pandjwa, nembo ekwawo, embo lyaanamwenyo, olya pandjwa. Oonakusa oya pangulwa noya tokolelwa shaa ngoka ngaashi e shi ilongela, ngashika sha nyolwa membo. 13 Nena efuta olya gandja aasi mboka ya sile mulyo. Eso noshaasi oya gandja wo aasi mboka ya li mo, naayehe oya pangulwa noya tokolelwa, ngaashi ye shi ilongela. 14 Opo ihe eso noshaasi oyu umbilwa mefuta lyomulilo. Efuta ndika lyomulilo olyo eso etiyali. 15 Kehe ngoka edhina lye inaali nyolelwa membo lyaanamwenyo, oku umbilwa mefuta lyomulilo.