Aaegipiti yonale oya li ya hongo ethano limwe ndyoka tali ulike nkene oshikweyithomanya sha li hashi longo. Iilya ohayi tulwa kemanya lya mbatalala lya fa ongalo, omathimbo gamwe ohali ithanwa ongalo yokukweya iilya. Iilya ohayi tulwa kemanya hoka, taku longithwa okamanya okashona koku yi nyanyagula. Omuntu oha kala ta wege u ukitha komeho nokonima a tsa oongolo, sigo iilya ayihe ya nyanyuka e tayi ningi uusila. Embo limwe otali ti emanya ndyoka oli na ondjundo yookilohalama mbali nenge ne. Ngele owe li dhengitha omuntu, otali vulu oku mu dhipaga thiluthilu. —  Aatokolihapu 9:50-54.

Jael, omo a adhika. Sisera okwa li ta dhiladhila kutya Jael ote ke mu simaneka, molwashoka Sisera oha longele kumwe nomusamane gwe, omukwaniilwa Jabin. Sisera okwa li ta dhiladhila kutya omukiintu ke na sho te mu ningi, okuyelekanitha nomusamane. Sisera ka li a tseya Jael nawa. Jael okwa li e shi uuwinayi mboka Aakaanana haya ningi. Oku shi kutya ohaya thiminike aantu moshilongo. Otashi vulika e shi wete kutya otha oyi iyeta komutemo. Okwa li ta vulu okukwathela Sisera, nenge a game kombinga yaJehova, e ta dhipaga omutondi nguka gwoshigwana ashihe. Jael okwa ningi po shike? Mbela omukiintu ota vulu ngaa okudhipaga ondjayi yiita ndjoka yi na oonkondo?

Jael okwa longitha nawa omutse gwe. Okwa pe Sisera ehala, opo a vululukwe po. Sisera okwa anda ko Jael kaa popye kutya omo e li, uuna pwe ya omulumentu te mu pula. Sho Sisera a lala, Jael okwe mu siikile, naasho e mu pula omeya gokunwa, okwe mu pe omahini. Konima yokathimbo Sisera okwa kotha a pwila mo. Opo ihe Jael okwa kutha omboha nohamala, iinima mbyoka ya li hayi longithwa olundji kaakiintu mboka haya kala mootenda. Okwi inyoweke u uka pomutse gwaSisera, nokwa li a longo oshilonga shoka tashi pula onyati, shoka Jehova a hokwa. Andola okwa kakadhalele nenge a kwatakwata, ando otashi vulika a yi moshiponga. Oshike she mu kwathele a dhipage Sisera? Mbela okwa li ta dhiladhila kombinga yoshigwana shaKalunga, nokunkene omulumentu ngoka a kala noku shi hepeka nonyanya uule womimvo omilongo odhindji? Nenge okwa li ta dhiladhila kuuthembahenda mboka a mona wokugama kombinga yaJehova? Ombiimbeli inayi shi popya. Ihe otu shi shi owala kutya, sho Jael a dhipaga Sisera inapu kalwa. —  Aatokolihapu 4:18-21; 5:24-27.

Konima yethimbo, Barak okwe ya ta kongo Sisera. Jael okwe mu ulukile omudhimba gwe nomboha ndjoka ya mbanduka pombandu yomutse. Nena Barak okwa li e shi kutya ehunganeko lyaDebora olya gwanithwa. Omukiintu a dhipaga shili ondjayi yiita, omulumentu omunankondo, Sisera. Aapataneki naantu mboka ihaayi itaale sha, oya kala nokuluka Jael omadhina omawinayi. Ihe Barak naDebora hasho ya li ye mu tala ko ngawo. Oya tanga Jael meimbilo omolwiilonga ye yuulaadhi taya ti kutya “omukiintu omunelagwelela.” (Aatokolihapu 4:22; 5:24) Debora okwa li e na iikala iiwanawa shili. Ina tsila Jael ondumbo, pehala lyaashono, okwa pandula owala sho oohapu dhaJehova dha gwanithwa.

Sho Sisera a si, onkoshi yoshigwana shaIsraeli, omukwaniilwa Jabin, ya kulwa omayego. Kapu na shikukutu ihashi hulu, nuupika wAakaanana osho wa hulu. Moshilongo omwa kala ombili uule womimvo 40. (Aatokolihapu 4:24; 5:31) Debora, Barak naJael oya lalekwa nuuyamba, omolweitaalo lyawo muJehova Kalunga. Onkee ano, natu holeleni eitaalo lyaDebora, nokukala aadhiginini kuJehova. Natu ladhipike wo yalwe ye shi ninge, naJehova ote ke tu laleka nuuyamba nomasindano ogendji note ke tu pa ombili tayi kalelele.