Ontopolwa 103

Ta talele po ishewe otempeli

JESUS naalongwa ye muBetania oya adhika ya kala mo omausiku gatatu konima yokuthika mo okuza kuJeriko. Ngashingeyi muuyelele wongula onene yOmaandaha, 10 Nisan, otayi ilongekidha okuya kuJerusalem. Jesus okwa sa ondjala. Ano sho ta mono omukwiyu gu na omafo, ota yi kugo a ka tale ngele omu na oonkwiiyu.

Omafo gomuti oge ya nziya kaashi shi pethimbo, oshoka ethimbo lyoonkwiyu omuJuni, nongashingeyi ogo omaandelo gaMarsa. Ihe osha yela kutya Jesus ota dhiladhila kutya molwashoka omafo oge ya kuyele, otashi vulika oonkwiyu nadho dhi na okuya kuyele. Onkee ano okwa yemata. Omafo otaga pe omuti omutalelo tagu pukitha. Opo nduno Jesus ota thingi omuti ta ti: “Inaku kala we ngoka ta li oshiyimati shomungoye sigo aluhe.” Iilanduliko yaashoka Jesus a ningi naashoka a ti, otayi monika sha yela ongula ya landula ko.

Jesus naalongwa ye otaya tsikile nolweendo lwawo notaya thiki nziya muJerusalem. Ota yi kotempeli ndjoka a li a talele po esiku lya tetekele komatango. Ihe nena ota katuka onkatu, ngaashi naanaa e shi ningile oomvula ndatu dha piti sho i ile kOpaasa mo 30 E.N. Jesus ota tidha mo mboka taa landitha notaya landa motempeli notu undulile pohi iitaafula yaalandakanithi yiimaliwa nosho wo iipundi yaalandakanithi yoonguti. Ita pitika nokuli nando ogumwe a humbate oshiyuma ta pitile motempeli.

Ota pangula mboka taya landakanitha iimaliwa notaya landitha motempeli, iinamwenyo ta ti: “Inaku shangwa nani: Ongulu yandje yi na okwiithanwa ongulu yegalikano oyiigwana ayihe? Ihe one mwe yi ningi ombogo [yaayugi, OB-1986].” Yo aayugi molwashoka ohaya pula ondando ya pitilila kwaamboka kaaye na nkene ya ninge ihe oye na owala okulanda kuyo iinamwenyo ya pumbiwa omolwomayambo. Onkee ano Jesus a tala ko omikalondjigilile dhopangeshefa ndhika dhi li omukalo gwokuyaka nenge gwokuyuga aantu.

Sho aasaseri aakuluntu, aanongoraamata naakuluntu yoshilongo tayu uvu shoka Jesus a ningi, otaya kongo ishewe omukalo gwoku mu dhipagitha. Mokuninga ngeyi otayu ulike kutya itaya vulu okupukululwa. Ihe kaye shi nkene ye na okudhipaga Jesus, molwashoka aantu ayehe mboka ye li po oya nyanyukwa okupulakena kuye.

Kakele kAajuda kevalo, mboka kaaye shi Aajuda nayo oye ya kOpaasa. Mbaka oyo aauyimo mUujuda, shoka tashi ti kutya yo oya taamba ko elongelokalunga lyAajuda. Aagreka yontumba, mboka ye li aauyimo mUujuda, otaye ya kuFilippus notaye mu pula ngele otaya vulu okumona Jesus. Filippus ota yi kuAndreas, tashi vulika ta ka pula ngele etsakaneno lya tya ngaaka otali opalele ngaa. Osha yela kutya Jesus oku li natango potempeli, mpoka Aagreka taya vulu oku mu mona.

Jesus oku shi kutya onkalamwenyo ye oyi na ko owala omasiku omashona, onkee ano ta yelitha nawa onkalo ye ta ti: “Otundi oya thikana, Omuna gwOmuntu e na okwaadhimithwa. Oshili, oshili tandi mú lombwele: oshilya ngele itashi gwile mevi noitashi sile mo, otashi ikalele ashike; ihe ngele tashi sile mo, otashi vala iilya oyindji.”

Omuma yoshilya yimwe oyi na ongushu onshona. Ihe oshi li ngiini ngele tayi tulwa mevi notayi “sile mo,” opo yi kale kaayi shi we ombuto? Otayi mene nopo nduno otayi ningi oshihenguti shoka tashi imi oomuma dhiilya odhindji. Sha faathana, Jesus oku li owala omuntu gumwe awike a gwanenena. Ihe ngele ta si a dhiginina muKalunga, ota ningi uupitilo moka tamu pitilwa okugandja omwenyo gwaaluhe kwaamboka aadhiginini mboka ye na ombepo oyo tuu ndjoka e na yeiyambo mwene. Omolwashoka Jesus ta ti: “Oongoka e hole omwenyo gwe, oye te gu kanitha po; naangoka ta tondo omwenyo gwe muuyuni mbuka, oye te gu hupithile momwenyo gwaaluhe.”

Osha yela kutya Jesus ita dhiladhila owala kuye mwene, oshoka ota yelitha natango ta ti: “Ngele ku na ngoka ta longele ndje, oye na landule ndje; naankoka ndi li, nomuntu gwandje oko ta ka kala. Nongele ku na ngoka ta longele ndje, Tate ote mu simaneke.” Ondjambi kayi shi tuu onkumithi kwaamboka taya landula Jesus notaye mu longele! Oyo ondjambi yokukala wa simanekwa kuHe okukala pamwe naKristus mUukwaniilwa.

Mokudhiladhila okumona iihuna kunyanyalitha nosho wo eso liehamitha noonkondo mbyoka ye mu tegelela, Jesus ota tsikile ta ti: “Ngashingeyi omwenyo gwandje gwa tukuluka, nondi tye ngiini? Tate, hupitha ndje mokathimbo nkaka.” Andola shoka she mu tegelela okwa li ta vulu oku shi yanda ee! Ihe hasho, ngaashi te shi popi ta ti: “Shika she eta ndje mokathimbo nkano.” Jesus ota tsu kumwe nelongekidho alihe lyaKalunga, mwa kwatelwa eso lye lyopayambo. Mateus 21:12, 13, 18, 19; Markus 11:12-18; Lukas 19:45-48; Johannes 12:20-27.

▪ Omolwashike Jesus e na etegameno okumona oonkwiyu nokuli nando kalya li ethimbo lyadho?

▪ Omolwashike Jesus ti ithana mboka taya landitha motempeli “aayugi”?

▪ Okomukalo guni Jesus a fa omuma yoshilya ndjoka ya sa?

▪ Jesus ota dhiladhila ngiini shi na ko nasha nokumona iihuna nosho wo eso mbyoka ye mu tegelela?

Ontopolwa 104

Ewi lyaKalunga tali uvika oshikando oshititatu

MANGA Jesus e li motempeli, ota adhika kuuwehame uunene wokomwenyo omolweso ndyoka e na okusa nziya. Oti ipula unene nankene edhina lyaHe tali ka kala lya gumwa, onkee ano ta galikana ta ti: “Tate, adhimitha edhina lyoye!”

Opo tuu mpono ewi enene okuza megulu otali ti: “Onde li adhimitha notandi li adhimitha ishewe.”

Engathithi lyaantu ndyoka lya thikama mpoka olya ngwangwana. “Omuyengeli a popi naye,” yamwe yomuyo osho taya ti. Yalwe otaya ti kutya endundumo. Ihe muushili wo wene, Jehova Kalunga oye a popi! Ihe shika kashi shi oshikando shotango ewi lyaKalunga tali uvika shi na ko nasha naJesus.

Peninginitho lyaJesus, oomvula ndatu netata dha piti, Johannes Omuninginithi oku uvile Kalunga ta popi Jesus ta ti: “Nguka Omumwandje omuholike nde mu hokwa.” Opo nduno ethimbo lyontumba konima yOpaasa ya piti, Jakob, Johannes naPetrus, sho Jesus a shituluka montaneho yawo, oyu uvile Kalunga ta popi ta ti: “Omumwandje ngu omuholike, onde mu hokwa; mu uveni.” Nongashingeyi osho oshikando oshititatu, mo 10 Nisan, omasiku gane manga Jesus inaa sa, aantu tayu uvu ishewe ewi lyaKalunga. Ihe oshikando shino Jehova ota popi opo omangathithi gaantu ga vule oku li uva.

Jesus ota yelitha ta ti: “Ewi ndika inaali ya molwandje, aawe, omolweni tuu.” Otali gandja uunzapo kutya Jesus oye Omuna gwaKalunga shili, Messias omuuvanekwa. Jesus ota tsikile ta ti: “Epangulo lyuuyuni oli li ko ongashingeyi; ngashingeyi omupangeli guuyuni mbuka otu umbilwa pondje.” Onkalamwenyo yaJesus yuudhiginini muushili wo wene, otayi koleke kutya Satana Ondiaboli, omupangeli guuyuni mbuka, okwa gwana ‘okuumbilwa pondje,’ sha hala okutya, okugeyelwa neso.

Mokuulika kiilanduliko yeso lye ndyoka tali hedha popepi, Jesus ota ti: “Ongame nge tandi yeluthwa mo mevi, [omaludhi gaantu, NW] ayehe otandi ya [hilile] kungame.” Eso lye kali shi ando sho a sindika, oshoka mokupitila mulyo ota ka hilila yalwe kuye opo ya vule okunyanyukilwa omwenyo gwaaluhe.

Ihe engathithi lyaantu otali shi pataneke tali ti: “Otse tu uvu mompango, Kristus ota kala aluhe; ongoye to ti ngiini ano, Omuna gwOmuntu e na okuyeluthwa? Omuna nguka gwOmuntu olye?”

Nonando opu na omauliko agehe ngaka, mwa kwatelwa ewi lyaKalunga mwene ndyoka yu uvu, aantu oyendji inayi itaala kutya Jesus oye Omuna gwashili gwomuntu, Messias omuuvanekwa. Ngaashi e shi ningile oomwedhi hamano dha piti pOshituthi shOmatsali, Jesus oti ipopi mwene ishewe e li “uuyelele” nota ladhipike aapulakeni ye ta ti: “Manga mu na uuyelele, itaaleni uuyelele [opo mu ninge aana yuuyelele, KB].” Konima yokupopya iinima mbika, Jesus ota zi po nota holama, sha yela kutya omolwashoka omwenyo gwe ogu li moshiponga.

Okwaaitaala Jesus kwAajuda otaku gwanitha oohapu dhaJesaja kutya ‘omeho goshigwana oga tsikithwa noomwenyo dhawo odha kukutikwa, opo yaa itedhulule, noyaa aludhwe.’ Jesaja okwa mono memoniko ompangu yaJehova yomegulu, mwa kwatelwa Jesus meadhimo lye e li puJehova manga inaa ninga omuntu. Ihe Aajuda, mokugwanitha shoka Jesaja a nyola, oye ekelehi netangalalo omauliko kutya Nguka oye Omuhupithi gwawo omuuvanekwa.

Mepingathano naashika, oyendji yomaapangeli (sha yela kutya iilyo yompangu yopombanda yAajuda, Osanhedrin) oyi itaale shili Jesus. Nikodemus naJosef Omuarimatia oyo yaali yomaapangeli mbaka. Ihe konyala ethimbo ndino aapangeli itaya popi eitaalo lyawo, oshoka oya tila ya tidhwe poondondo dhawo mosinagoga. Aantu ya tya ngaaka itaya kanitha tuu oshindji!

Jesus ota tsikile ta ti: “Oongoka i itaala ndje, hangame i itaala, aawe, oonguka a tumu ndje. Naangoka a mono ndje, oye a mono ko ngoka a tumu ndje. . . . Nongele pe na ngoka tu uvu oohapu dhandje, ye ite dhi dhiginine, hangame tandi mu pangula; oshoka ngame inaandi ya okupangula uuyuni, aawe okuhupitha uuyuni. . . . Oohapu ndhoka nde dhi popya, odho tadhi mu pangula esiku lyahugunina.”

Ohole yaJehova yokuhola aantu ayehe yomuuyuni oye mu inyengitha okutuma Jesus opo mboka ye mu itaala, ya vule okuhupitwa. Ehupitho lyaantu otali ka kala lyi ikwatelela kevuliko lyawo kiinima mbyoka Kalunga a lombwele Jesus a popye. Epangulo otali ka ningwa “esiku lyahugunina” pethimbo lyElelo lyOomvula Eyuvi lyaKristus.

Jesus ota hulitha ta ti: “Inaandi popya mungame mwene, ihe Tate nguka a tuma ndje, oye a pe ndje oshipango shoka, ndi na oku shi tya noku shi popya. Ongame nondi shi shi, oshipango she osho omwenyo gwaaluhe. Onkee ano shono tandi shi popi ngaashi Tate a lombwele ndje.” Johannes 12:28-50; 19:38, 39; Mateus 3:17; 17:5; Jesaja 6:1, 8-10.

▪ Iikando itatu yini ewi lyaKalunga lyu uvika mekwatathano naJesus?

▪ Omuprofeti Jesaja okwa mono ngiini eadhimo lyaJesus?

▪ Aapangeli mboka yi itaala Jesus oyo oolye, ihe omolwashike itaaye mu hempulula montaneho?

▪ “Esiku lyahugunina” oshike, nokekankameno lini aantu taya ka pangulwa?