6 Eputudho

EPUTUDHO OSHIKE?

Oshitya eputudho otashi ti kutya okuwilika nenge okulonga okanona. Omathimbo gamwe olya kwatela mo okuukitha okanona. Olundji osha kwatela mo wo oku ka longa omikalo ka kale ke shi shoka shi li mondjila naashoka sha puka, opo ka kale haka ningi omatokolo gomondjila.

OMOLWASHIKE EPUTUDHO LYA SIMANA?

Aavali oyendji kunena ihaya putudha we oyana, netompelo kutya otashi ningitha oyana aniwa ya kale yu uvite kaaye na oshilonga. Ihe aavali mboka ye hole oyana ohaye ya putudha noku ya tulila po oompango dhe ya yeleka ya kale taya vulika kudho.

Meme Pamela okwa ti: “Aanona oya pumbwa okulombwelwa shoka ye na okuninga naashoka kaaye na okuninga, opo shi ke ya kwathele ngele ya ningi aakuluntu. Ngele aanona inaya putudhwa nawa, otaya ka kala ya fa ombautu ndjoka tayi falwafalwa komakuthikuthi notayi vulu okuningina nuupu.”

SHOKA TO VULU OKUNINGA

Kala wa lenga eputudho. Ngele okanona itaka vulika koompango ndhoka wa tula po, osha pumbiwa wu ka geele. Uuna ka vulika, kala ho ka pandula.

Meme Christine okwa ti: “Ohandi pandula aluhe aamwandje, sho haya vulika muuyuni mbuka aanona ihaya vulika. Ngele aanona ohaya pandulwa, ohashi ya kwathele ya taambe ko epukululo ndyoka taya pewa.”

SHOKA OMBIIMBELI TAYI TI: “Shono omuntu te shi kunu, osho wo ta ka teya.” — Aagalati 6:7.

Kala wu na ondjele. Uuna to yele ombedhi omumwoye, shi ninga shi ikolelela komimvo dhe, kokuvula kwe nosho wo kuunene wepuko lye. Ngele owe mu geele shi ikolelela kepuko ndyoka a ninga, nena oto ka pondola. Pashiholelwa, ngele ota longitha ongodhi yopeke papuko, oto vulu oku yi mu kutha uule wethimbo lyontumba. Ino mu geela omolwokanima okashona, molwaashoka owala she ku uvitha nayi.

Tate Wendell okwa ti: “Ohandi tala ngele omumwandje epuko okwe li ningila owina nenge okwa dhiladhila owala pakanona. Omapuko gamwe okanona oka pumbwa owala okulombwelwa kaake shi yelekele we, omanga tashi vulika okanona kamwe ka kale taka endulula omapuko gontumba, omolwuunkundi wontumba.”

SHOKA OMBIIMBELI TAYI TI: “Inamu hinda aana yeni, opo yaa kanithe einekelo.” — Aakolossa 3:21.

Kala wu hole aamwoye. Aanona ohaya taamba ko nuupu nohaya landula epukululo ndyoka to ya pe, ngele oye shi kutya oto shi ningi, molwaashoka wu ya hole.

Tate Daniel okwa ti: “Uuna omumati gwetu a ningi epuko, ohatu mu lombwele kutya otwa pandula omatokolo agehe omawanawa ngoka a ninga monakuziwa. Ohatu mu lombwele wo kutya epuko ndyoka a ninga itali ti kutya ye omuntu omwiinayi, ihe okwa pumbwa oku li pukulula notwi ilongekidha aluhe oku mu kwathela.”

SHOKA OMBIIMBELI TAYI TI: “Ohole ohayi idhidhimikile ayihe noyi na olukeno.” — 1 Aakorinto 13:4.