ONTOPOLWA 20

Okulongela Jehova okwa kwatela mo okukwathela mboka ya adhika kiiponga

EHUKU LYONTOPOLWA

Nkene Aakriste haya ulukile ooitaali ooyakwawo ohole yopaKriste pethimbo lyuudhigu

1, 2. (a) Aakriste yomuJudea oya li muupyakadhi wuni? (b) Aakriste yomuJudea oya li yu ulukilwa ngiini ohole?

MOMUMVO 46 E.N. lwaampono, muJudea omwa li ondjala onene. Aalongwa yaKristus mboka ya li muJudea kaya li taya vulu okulanda iikulya, oshoka oya li yi na ondilo nayi noya pumba. Oya li ye niwe kondjala noya li monkugo yi na onkambe. Ashike Jehova okwa li te ke ya kwatha momukalo moka inee shi ningila nando onale yamwe yomaalongwa yaKristus. Ngiini mbela?

² Molwaashoka Aakriste Aajuda naamboka yomiigwana yomuAntiokia shomuSiria oya li yu uvitile Aakriste ooyakwawo Aajuda mboka ya li muJerusalem nomuJudea olukeno, oye ya gongelele oshimaliwa. Nopo ihe oya hogolola aakuluntugongalo yaali, Barnabas naSaulus, opo ye shi faalele aakuluntu yegongalo kuJerusalem. (Lesha Iilonga 11:27-30; 12:25.) Ipula owala nkene aamwatate mboka muJudea ya li yu uvitile ohole ndjoka aamwatate yomuAntiokia ye ya ulukile!

3. (a) Oshigwana shaKalunga kunena ohashi holele ngiini Aakriste yopetameko yomuAntiokia? Gandja oshiholelwa. (Tala wo oshimpungu “Ekwatho lyotangotango nenenenene ndyoka twa gandjele moomvula opo dha piti.”) (b) Montopolwa ndjika otatu ka kundathaneni omapulo geni?

³ Oshiningwanima shika sha ningilwe methelemumvo lyotango, osho shotango sha nyolwa kombinga yAakriste yokoshilando shontumba taya tumine Aakriste yokoshilando shilwe iikwatha. Natse nena osho hatu ningi ngaashi aamwatate yomuAntiokia. Shampa tu uvu kutya ooitaali ooyakwetu moshitopolwa shilwe oya adhika koshiponga nenge kuudhigu wontumba, nena ohatu ke ya kwathela.a Natu kundathaneni omapulo gatatu taga landula kombinga yokukwathela aamwatate, opo tu uve ko nkene shoka sha guma elongelokalunga lyetu. Omolwashike taku vulu okutiwa kutya sho tatu kwathele mboka ya adhika koshiponga otatu longele wo Kalunga? Elalakano lyetu lyokukwathela olyashike? Ohashi tu etele uuwanawa washike uuna tatu kwathele yalwe?

Omolwashike okugandja iikwatha ku li ‘elongelokalunga’ nenge oshilonga oshiyapuki?

4. Paulus okwa lombwele Aakorinto shike kombinga yoshilonga shopaKriste?

⁴ Oohapu dhontumwafo ye ontiyali ndjoka Paulus a nyolele Aakorinto aagwayekwa, kunena odha kwatela mo wo ‘oonzi dhilwe’ dhaKristus. (Joh. 10:16) Montumwafo ndjoka Paulus okwa popi kutya Aakriste oye na oshilonga shopaali. Shotango ‘oshilonga shokuhanganitha aantu,’ ano okuuvithila aantu noku ya longa. (2 Kor. 5:18-20; 1 Tim. 2:3-6) Oshilonga oshitiyali shoka Paulus a popi oshokugandja ‘ekwatho’ kooitaali ooyakwetu. (2 Kor. 8:4) Iitya ayihe mbika iyali “oshilonga” nosho wo ‘okukwatha’ oya tolokwa okuza koshitya shOshigreka diakonia. Omolwashike shoka oshindhindhilikwedhi?

5. Omolwashike oshindhindhilikwedhi sho Paulus a popi kutya okukwatha mboka ya adhika koshiponga oku li elongelokalunga nenge oshilonga oshiyapuki?

⁵ Sho Paulus a longitha oshitya shOshigreka shimwe a popye kombinga yiilonga mbyoka iyali, oku ulike kutya okukwathela mboka ya adhika koshiponga nosho wo iilonga mbyoka hayi longwa megongalo lyopaKriste oya pambathana. Paulus okwa adhikile a popi kutya: ‘Oku na oompito dhomayakulo dhi ili nodhi ili, ihe Omuwa ngoka ta yakulwa, gumwe awike. Oku na omaunkulungu gi ili nogi ili gokuyakula, . . . ihe ombepo oye tuu ngoka gumwe, ngoka ta longo ayihe.’ (1 Kor. 12:4-6, 11) Nokuli Paulus okwa ti kutya iilonga mbyoka hayi longwa megongalo lyetu lyopaKriste ‘elongelokalunga’ nenge oshilonga oshiyapuki.b (Rom. 12:1, 6-8) Nomolwashono a li e wete sho opala okulongitha ethimbo lye a “fale omagano ngoka ga pewa aantu yaKalunga.” — Rom. 15:25, 26.

6. (a) Ngaashi Paulus e shi yelitha, omolwashike taku vulu okutiwa kutya otatu longele Kalunga uuna tatu kwathele mboka ya adhika koshiponga? (b) Hokolola nkene hatu kwatha mboka ya adhika kiiponga muuyuni awuhe. (Tala oshimpungu “Uuna pwa holoka oshiponga!” epandja 214.)

⁶ Opo Paulus a kwathele Aakorinto yu uve ko kutya omolwashike okukwatha mboka ya adhika koshiponga nako ku li oshilonga shawo nokwa pambathana nelongelokalunga lyawo, okwa ti: Aakriste ohaya kwathele yalwe molwashoka otaya “vulika kevaangeli lyaKristus.” (2 Kor. 9:13) Onkee ano, Aakriste ohaya kwathele ooitaali ooyakwawo, shaashi ya hala okuvulika komalongo gaKristus. Paulus okwa ti kutya iilonga mbyoka ya longele aamwahe, oyi li lela ‘esilohenda enene lyaKalunga.’ (2 Kor. 9:14; 1 Pet. 4:10) Ano shi na ko nasha nokuyakula aamwatate, mwa kwatelwa okukwatha uuna pwa holoka oshiponga, Oshungolangelo ye 1 Desemba 1975, oya ti: “Katu na nando okulimbililwa kutya Jehova Kalunga nOmwana Jesus Kristus oya hokwa iilonga mbika.” Okukwathela mboka ya adhika koshiponga nako elongelokalunga nenge oshilonga oshiyapuki. — Rom. 12:1, 7; 2 Kor. 8:7; Heb. 13:16.

Elalakano lyokukwathela mboka ya adhika koshiponga

7, 8. Elalakano lyetu lyotango lyokukwathela mboka ya adhika koshiponga olyashike? Shi yelitha.

⁷ Omolwashike hatu kwathele yalwe? Paulus okwa yamukula epulo ndyoka montumwafo ye ontiyali ndjoka a nyolele Aakorinto. (Lesha 2 Aakorinto 9:11-15.) Moovelise ndhoka Paulus okwa holola iinima itatu ya simana mbyoka hayi zi mokugandja “ekwatho” kwaamboka ya adhika koshiponga. Natu yi kundathaneni kooshimwe.

⁸ Shotango, ekwatho lyetu ohali simanekitha Jehova. Ndhindhilika kutya iikando ingapi Paulus a popi kombinga yaJehova Kalunga moovelise ntano ndhoka dha tetekele. Omuyapostoli okwa popi kutya shoka taya ningi otashi ‘hambelelitha Kalunga’ notashi ‘etele Kalunga omapandulo ogendji.’ (Ovelise 11, 12) Okwa popi wo nkene ekwatho ndika hali ningitha Aakriste ya ‘pandule Kalunga’ nenge ye mu simaneke ‘omolwesilohenda lye enene.’ (Ovelise 13, 14) Pehulilo sho Paulus a mana okupopya kombinga yokukwatha mboka ya adhika koshiponga okwa ti: “Kalunga na hambelelwe.” — Ovelise 15; 1 Pet. 4:11.

9. Ongiini ekwatho ndyoka hatu gandja hali ningitha omuntu a lundulule omadhiladhilo ge? Gandja oshiholelwa.

⁹ Ngaashi Paulus, aapiya yaKalunga kunena nayo oyu uvite kutya okukwatha mboka ya adhika koshiponga ohashi simanekitha Jehova nosho wo ‘elongo ndyoka tali mu popi.’ (1 Kor. 10:31; Tit. 2:10) Nokuli ekwatho ndyoka hatu gandja ohali kandula po omipopyo omiwinayi ndhoka aantu yamwe haya popi kombinga yaJehova nosho wo kombinga yOonzapo dhe. Pashiholelwa, omukiintu gumwe ha kala moshitopolwa shimwe shoka sha dhengelwe koshikungulu okwa li e na okapulakata komweelo gwegumbo lye taka ti: “Oonzapo dhaJehova inamu ya mo muka.” Opo ihe esiku limwe okwa mono aaniilonga mboka ya tondoka onkugo taya opalekulula egumbo ndyoka lya li handiyaka yopate. Okwa kala te ya tala uule womasiku sho taya longo nombili, nopo nduno okwa yi ko kuyo a ka tale kutya oyo oolye. Sho a mono kutya oyo aaiyambi yOonzapo dhaJehova, okwa li a kumwa e ta ti: “Onda li nde mu tala ko papuko.” Oshizemo? Okwa kutha po okapulakata hoka ka li komweelo gwegumbo lye.

10, 11. (a) Iiholelwa yini tayi ulike kutya ohatu gwanitha po elalakano lyetu etiyali sho tatu kwathele mboka ya adhika kiiponga? (b) Oshileshwa shini hashi kwathele aaiyambi mboka taya kwathele mboka ya adhika kiiponga? (Tala oshimpungu “Okambo kaamboka haya kwathele uuna pwa holoka oshiponga.”)

¹⁰ Oshitiyali, ohatu ‘kutha ooitaali ooyakwetu oluhepo.’ (2 Kor. 9:12a) Ohatu endelele okukwathela aamwatate mboka ye na ompumbwe noku ya kutha onkayi. Omolwashike? Omolwashoka iilyo yegongalo lyopaKriste oyi li ‘olutu lumwe,’ nongele ‘oshilyo shimwe sholutu tashi ehama, nena iilyo ayihe ohayi ehama pamwe nasho.’ (1 Kor. 12:20, 26) Nomolwashono Omolwashono aamwatate naamwameme mboka ye hole ooitaali ooyakwawo haya etha po kehe shoka taya ningi, e taya kutha iilongitho yawo ya ye koshitopolwa shoka sha adhika koshiponga, opo ye ke ya kwathele. (Jak. 2:15, 16) Pashiholelwa, sho muJapani mwa ningilwe otsunami, oshitayimbelewa shaAmerika osha tumu ombilive kOokomitiye dhOkutunga dhomOshitopolwa moAmerika, tashi pula ngele opu na “aamwatate ya pyokoka” mboka taya vulu okuya kuJapani ya ka kwathele okutungulula Iinyanga yUukwaniilwa. Oshizemo osha li shini? Meni lyiiwike yontumba, konyala aamwatate naamwameme 600 oya ningi eindilo ya ye koJapani tayi ifutile yo yone. Oshitayimbelewa shaAmerika osha ti: “Otwa yakula omaindilo ogendji noonkondo.” Sho omumwatate gumwe moJapani a pula omwiiyambi a za kondje yiilongo kutya omolwashike e ya a kwathele, okwa yamukulwa ngeyi: “Aamwatate moJapani nayo iilyo ‘yolutu lwetu.’ Uuna taya ehama natse otatu ehama pamwe nayo.” Aaiyambi mboka tayi inyengithwa kohole yokwaaihola mwene, omathimbo gamwe ohaya hupula oomwenyo dhawo, opo ya ka kwathele ooitaali ooyakwawo.c — 1 Joh. 3:16.

Switzerland mo 1946

EKWATHO LYOTANGOTANGO NENENENENE NDYOKA TWA GANDJELE MOOMVULA OPO DHA PITI

MUSEPTEMBA 1945, konima owala yoomwedhi oonshona sho Iita Iitiyali yUuyuni ya hulu moEuropa, omumwatate Knorr okwa tseyitha kombinga yoshikonga oshinenenene “shokutuma iikwatha kaamwatate mboka ye li mompumbwe pondingandinga yaEuropa.”

Meni lyiiwike iishona konima sho etseyitho ndyoka lya ningwa, Oonzapo moKanada, moAmerika nomiilongo yilwe odha tameke okugongela nokupakela iizalomwa niikulya. Okuza muJanuali 1946, iinima mbika oya tuminwa ooitaali ooyakwetu moAustria, moBelgium, moBulgaria, moChina, moCzechoslovakia, moDenmark, moIngilanda, moSuomi, moFulaanisa, moNdowishi, moGreka, moHungary, moItalia, moHolanda, moNorway, moFilipine, moPoland nomoRomania.

Ekwatho ndika inali gandjwa owala lumwe. Iikwatha oya tsikile okutumwa sigo okonima yoomvula mbali netata. Moomvula ndhoka, konyala aamwatate 85 000 oya tumu ookilograma dhiikulya 300 000 lwaampono, ookilograma konyala 450 000 dhiizalomwa nomapando goongaku ge vulithe po 124 000 kooitaali ooyakwawo miilongo moka mwa li mu na iita. Iikwatha mbika oya hulu okutumwa muAuguste 1948. Mo 1949 Oshungolangelo oya tile: “Oshinima shika oshu ulike kutya otu holathane. Otu shi shi kutya aamwatate oya kwathele, opo ya simanekithe Omuwa, molwaashoka oye shi shi kutya iikwatha mbyoka otayi ka kwathela yamwe ya tsikile okulongela Kalunga kashili; nonkee ano, oye shi tala ko shi li uuthembahenda uunene okukwathela aamwahe momukalo nguka.” Ekwatho ndika olya simanekitha Jehova, olya pupaleke onkalo yooitaali ooyakwetu nolya koleke ekwatathano lyaamwatate muuyuni awuhe.

¹¹ Mboka kaaye shi Oonzapo nayo ohaya pandula oshilonga shetu shokukwathela uuna pwa holoka oshiponga. Pashiholelwa, sho moArkansas moAmerika mwa holokele oshiponga mo 2013, oshifokundaneki shimwe osha kundaneke nkene aaiyambi ye endelele okugandja eyakulo sha ti: “Oonzapo dhaJehova ohadhi unganeke nawa aaiyambi yadho ya vule okukwathela nawa noneendelelo uuna pwa holoka oshiponga.” Eeno, ngaashi naanaa omuyapostoli Paulus e shi popi, ekwatho lyetu ohali ‘mana po’ nenge hali kutha po oluhepo lwaamwatate mboka ye li mompumbwe.

12-14. (a) Omolwashike sha simanenena okugwanitha po elalakano lyetu etitatu lyokukwathela mboka ya adhika koshiponga? (b) Shoka sha popiwa kooitaali ooyakwetu otashi ulike ngiini kutya okutsikila niinima yopambepo okwa simana?

¹² Oshititatu, ohatu kwathele mboka ya adhika koshiponga ya tsikile okulongela Jehova. Omolwashike shika sha simana? Paulus okwa ti kutya mboka taya kwathwa ohayi inyengithwa ya ‘pandule Kalunga.’ (2 Kor. 9:12b) Aakriste mboka ya adhika koshiponga otaya vulu owala okupandula Kalunga, unene tuu ngele oya kwathelwa nziya ya tameke ishewe oku mu longela. (Fil. 1:10) Mo 1945 Oshungolangelo oya tile: “Paulus okwa pitikile . . . ooitaali ya gongele omagano molwaashoka oga li taga ka kwathela . . . Aakriste mboka ye li moluhepo ya vule okuza mo yo ya vule okumona ompito ya longele Jehova noonkondo dhawo adhihe.” Natse nena otu na elalakano lya faathana. Aamwatate ngele oya tameke okuuvitha, eitaalo lyawo ohali kolo nohaya hekeleke wo yalwe. — Lesha 2 Aakorinto 1:3, 4.

¹³ Natu pulakeneni kuyamwe mboka ya monene ekwatho ndyoka e taya tameke okuya ishewe momapya nankene ya nkondopalekwa. Omumwatate gumwe ota ti: “Ngame negumbo lyandje otwa li twa nyanyukwa shili sho twa mono ompito yokuya momapya. Sho tatu hekeleke yalwe, oshe tu kwathele tu dhimbwe iimpwiyu yetu.” Omumwameme gumwe okwa ti: “Okukala ndi itula miinima yopambepo osha kwathele ndje ndi dhimbwe uupyakadhi mboka ndi li muwo. Osha kwathele ndje ndi kale ndu uvite nda gamenwa.” Omumwameme gulwe okwa ti: “Nonando iinima yimwe kaya li miikaha yetu, okuuvitha okwa kwathele ndje pamwe naanegumbo yandje tu kale tu na elalakano. Okupopya nayalwe kombinga yetegameno lyuuyuni uupe okwe tu kwathele tu koleke einekelo lyetu kutya ayihe otayi ka ninga iipe.”

¹⁴ Ooitaali ooyakwetu mboka ya adhika koshiponga oya pumbwa wo okutameka nziya okuya kokugongala. Tala kwaashoka sha ningilwa omumwameme gwedhina Kiyoko ngoka a li e na omimvo 50 nasha pethimbo mpoka. Ka li e shi kutya ota ka hupa ngiini shaashi iinima ye ayihe oya hanagulwa po kotsunami, kakele koohema noosandala ndhoka a li a zala. Omukuluntugongalo gumwe okwe mu lombwele kutya otaya kala haya ningile okugongala kwawo kwokoshiwike mohauto ye. Kiyoko ota ti: “Mohauto otwa li hatu kala mo nomukuluntugongalo nomukadhi nosho wo omumwameme gulwe. Okugongala ka kwa li ngaashi kwoshito, ihe okwa li haku kwathele ndje ndi dhimbwe kutya okwa ningilwe otsunami. Onda li handi kala nda mbilipalelwa. Okugongala hoka oku ulukile ndje kutya okukala pamwe nAakriste ooyakwetu okwa simana.” Omumwameme gulwe ngoka a li ha kala pokugongala konima sho pwa holokele oshiponga, ota ti: “Okugongala okwa li haku kwathele ndje ndi idhidhimike.” — Rom. 1:11, 12; 12:12.

Okukwathela mboka ya adhika koshiponga ohaku eta uuwanawa tawu kalelele

15, 16. (a) Aakriste yomuKorinto nosho wo yalwe oya mwene uuwanawa washike sho taya kwathele mboka ya adhika kuudhigu? (b) Ohatu mono mo wo uuwanawa washike nena, sho tatu kwathele mboka ya adhika kuudhigu?

¹⁵ Paulus sho a lombwele Aakorinto kombinga yokukwathela mboka ya adhika kuudhigu, okwe ya lombwele wo kombinga yuuwanawa mboka yo nosho wo yalwe taya vulu okumona mo. Okwa ti: ‘[Aakriste Aajuda muJerusalem mboka ya kwathwa] otaa ke mú galikanena nohole oyindji omolwesilohenda ndyoka enene Kalunga e li mú hololele.’ (2 Kor. 9:14) Eeno, okugandja kwAakorinto okwa li taku ka inyengitha Aakriste Aajuda ya galikanene aamwahe muKorinto, mwa kwatelwa mboka kaaye shi Aajuda, naashika osha li tashi ka koleka ohole yawo yokuholathana.

¹⁶ Oshungolangelo ye 1 Desemba 1945 oya faathanitha ekwatho ndyoka lya popiwa kuPaulus nekwatho ndyoka hatu gandja nena, ya ti: “Uuna yamwe yomoshigwana shaKalunga oshiyapuki taya kwathele yalwe mboka ye na ompumbwe, shika ohashi ya hanganitha.” Shika osho aaiyambi mboka haya kwathele mboka ya adhika kuudhigu haya kala yu uvite. Omukuluntugongalo gumwe ngoka a kwathelele mboka ya yelulwa kefundja, ota ti: “Okukwathela ooitaali ooyakwetu okwa koleke ekwatathano lyandje nayo.” Omwiitaali gumwe ngoka a li a pandula ekwatho ndyoka a pewa, ota ti: “Uumwayinathana wetu otawu tu ulukile nkene tatu ka kala uuna tu li moparadisa.” — Lesha Omayeletumbulo 17:17.

17. (a) Oohapu ndhoka tadhi adhika muJesaja 41:13 ohadhi gwanithwa po ngiini ngele tashi ya pwaamboka ya adhika kuudhigu? (b) Tumbula iiholelwa mbyoka tayi ulike kutya okukwathela mboka ya adhika kuudhigu ohaku simanekitha Jehova nohaku koleke ekwatathano lyetu. (Tala wo oshimpungu “Aaiyambi muuyuni awuhe taya kwatha yalwe.”)

¹⁷ Shampa aaiyambi ya thiki pehala mpoka pwa holoka oshiponga, aamwatate mboka ya gumwa koshiponga ohaya mono nkene Kalunga ta gwanitha po euvaneko lye ndyoka tali ti: “Ongame OMUWA Kalunga koye; otandi ku tsu omukumo te ti: ‘Ino tila, otandi ku kwatha.’” (Jes. 41:13) Omumwameme ngoka a hupu moshiponga okwa ti: “Onda li nda kanitha einekelo sho nda mono iinima ayihe ya hanagulwa po, ihe Jehova okwa tsu ndje omukumo. Ekwatho ndyoka aamwatate ya pe ndje kali shi okutumbulwa.” Aakuluntugongalo yaali oya nyola peha lyomagongalo konima sho oshiponga shopaunshitwe sha vunyagula oshitopolwa shawo ya ti: “Ekakamo lyevi olye tu etela oluhodhi olunene, ihe Jehova okwe tu kwathele okupitila mooitaali ooyakwetu. Otwa li hatu lesha kombinga yankene yalwe mboka ya adhika kuudhigu haya kwathelwa, ihe ngashingeyi otwe shi imonena ko tse yene.”

OKUKWATHELA YALWE OKWA LUNDULULA ONKALAMWENYO YE

OKUKWATHELA yalwe ohaku gumu ngiini onkalamwenyo yaagundjuka? Natu taleni nkene onkalamwenyo yaPeter Johnson ya lunduluka sho e shi ningile manga e na omimvo 18. Nena ota ti: “Sho nda mwene aamwatate ya pandula ekwatho ndyoka twe ya pe, nenyanyu ndyoka nda li ndi na sho te kwathele yakwetu mpoka li thike, osha gumu ndje noonkondo. Shika osha nyatipaleke ndje ndi kale nda hala okulongela Jehova nda mana mo.” Okuza mpoka Peter okwa tameke okukokola ondjila. Okwa ka longa wo koBetel, nokonima okwa ka ninga oshilyo shOkomitiye yOkutunga yomOshitopolwa. Peter ota ti: “Onkalamwenyo yandje oya lunduluka noonkondo okuza sho nda kwathele lwotango mboka ya adhika kuudhigu mo 1974.” Mbela ngoye omugundjuka? Mbela ito vulu okuholela Peter? Olye e shi wo kutya ngele owa kwathele mboka ya adhika kuudhigu itashi ka lundulula onkalamwenyo yoye sho to longele Jehova?

Mbela ito vulu okukutha ombinga?

18. Oshike to vulu okuninga ngele owa hala okuya wu ka kwathele mboka ya adhika kiiponga? (Tala wo oshimpungu “Okukwathela yalwe okwa lundulula onkalamwenyo ye.”)

¹⁸ Mbela owa hala okumona enyanyu ndyoka hali zi mokukwathela mboka ya adhika koshiponga? Ngele osho, dhimbulukwa kutya mboka haya kwathele mboka ya adhika koshiponga olundji ohaya zi mwaamboka haya tungu Iinyanga yUukwaniilwa. Ano tseyithila aakuluntugongalo kutya owa hala okuninga eindilo wu kale nangoye ho tungu. Omukuluntugongalo gumwe ngoka e na ontseyo oyindji miilonga yokukwathela mboka ya adhika koshiponga ote tu ladhipike ta ti: “Inda owala koshitopolwa shoka sha adhika koshiponga, uuna wa pulwa kOkomitiye yOkukwathela mIiponga Iinene.” Komukalo ngoka, iilonga yetu yokukwathela otayi ka longwa melandulathano.

19. Mboka haya kwathele mboka ya adhika koshiponga ohaya ulike ngiini kutya tse aalongwa yaKristus yashili?

¹⁹ Okukwathela mboka ya adhika koshiponga oku li omukalo gwa dhenga mbanda moka hatu vulika kelombwelo lyaKristus ndyoka tali ti kutya otu na “okuholathana.” Uuna tatu ulike ohole ya tya ngaaka, nena otatu ulike kutya tse aalongwa yaKristus yashili. (Joh. 13:34, 35) Kali shi tuu eyambeko enene sho tu na aaiyambi yehalo ewanawa mboka haya simanekitha Jehova, sho taya kwathele yalwe mboka taya ambidhidha Uukwaniilwa waKalunga nuudhiginini!

a Ontopolwa ndjika otayi kundathana kombinga yekwatho ndyoka lya pewa ooitaali ooyakwetu. Ihe olundji ohatu kwathele wo naamboka kaaye shi Oonzapo. — Gal. 6:10.

b Paulus okwa longitha oshitya diakonos (omuyakuli) molupe lwuuwindji sho a popi kombinga ‘yomuyakuli gwegongalo.’ — 1 Tim. 3:12.

c Tala oshileshwa “Aiding Our Family of Believers in Bosnia,” mOshungolangelo yOshiingilisa ye 1 Novomba 1994, epandja 23-27.

AAIYAMBI MUUYUNI AWUHE TAYA KWATHA YALWE

IILONGO YOPOKATI NOYOKUUNINGININO WAAFRIKA

Mo 1994 moRwanda omwa li omadhipago gopamihoko moka mwa sile aantu 800 000 lwaampono nenge ye vule po. Konima yomadhipago ngoka, omakuyunguto oga taandele miilongo yilwe mbyoka yi li pondingandinga yaAfrika, nookamba dhoontauki odhu udha ndo. Opo ya kwathele ooitaali ooyakwawo mboka ye li moshipyu, Oonzapo dhaJehova moBelgium, moFulaanisa nomoSwitzerland odha tumu ootona 300 dhiizalomwa, ootenda, omiti, iikulya niikwatha yilwe wo. Meni lyiiwike, iikwatha mbika oya thiki kaamwameme mbaka.

MuAfrika omo tuu moka, oondohotola naapangi omulongo ya za kuFulaanisa, mboka ye li wo Oonzapo, oya kala taya kwatha aamwatate naamwameme, opo ya pupaleke onkalo moka aamwatate yi iyadha omolwiita yopashigwana, ondjala yekomba nosho wo omikithi. Osipana ndjika oya li ya panga aantu ye vulithe 10 000 moomvula owala mbali dha piti. Oshilonga shawo ohashi simanekitha Jehova nosho wo ehangano lye. Gumwe gwomaapangi ota ti: “Shampa twe ya okukwathela aamwatate mehala lyontumba, aantu ohaya popi ya fuuka taya ti: ‘Mbaka Oonzapo dhaJehova mba! Oye ya okukwathela aamwahe.’” Onzapo yimwe sho ya pangwa, oya pandula ya ti: “Tangi mumwameme. Tangi Jehova!”

Omathimbo gamwe uuna pwa holoka iiponga iinyanyalithi, ohatu gandja wo ekwatho. Mo 2012 moNigeria omwa ningilwe oshiponga shohauto moka mwa sile aamwatate 13, ayehe yomegongalo limwe, nayalwe 54 oya li ye ehamekwa nayi. Okomitiye yomakwatho oya shilipaleke kutya kehe omuvu okwa pewa omuntu a kale te mu tonatele. Sho omuvu gumwe a mono nkene aamwatate mboka ya li moshiponga taya kwathelwa nawa kuyakwawo, okwa dhengele omusita gwawo ta ti: “Kape na nando omuntu gwomongeleka yetu i ile a talele ndje po. Ila koshipangelo wu tale nkene Oonzapo dhaJehova tadhi ulukilathana ohole yashili!”

Nonando aamwatate mbaka aaholike yomegongalo ndyoka eshona oya li ya dhengwa ya lila, ohole ndjoka yu ulukilwa kooitaali ooyakwawo oye ya hekeleke. Shimwe ishewe, aauvithi megongalo sho ya mono nkene aaiyambi ya sile aamwatate mboka ya li moshiponga oshimpwiyu, oyendji oya tameke okulonga muukalele ya mana mo. Egongalo ndika olya li lyi na aauvithi 35 manga oshiponga shoka inaashi holoka. Ihe muule ashike womvula yimwe, megongalo moka omwa li aauvithi 60.

AUSTRALIA

Mo 2013 iitopolwa yimwe mbyoka yi li komunkulofuta gwaQueensland oya li ya dhengwa kefundja ndyoka lya hanagula po omagumbo gOonzapo 70. Mark naRhonda pamwe nomwanakadhona oya tauka mo megumbo lyawo ndyoka lya yelulwa kefundja e taya yi kehala hoka taku gandjwa ekwatho. Ehala ndyoka olya li lyu udha nayi. Rhonda ota ti: “Omwa li mu na aantu oyendji, nomutumba ogwo ngaa kaagwa li po.” Shoka sha li wo tashi piyaganeke, eyogelelo olindji ndyoka lya li tali ningwa komadhagadhaga ngoka ga li taga ningi ge ya ga shuna. Molwaashoka Rhonda okwa li a tila, okwa pula omusamane gwe ta ti: “Otatu ka ninga po shike?” Mark okwi indile Jehova e ya kwathe. Rhonda ota ti: “Konima yominute 30 lwaampono, opwe ya oshihauto e ta mu zi aamwatate yatatu. Sho ye tu popitha, oya ti: ‘Ne otamu ya natse. Otamu ka kala kegumbo lyomumwatate.’” Rhonda okwa gwedha ko ta ti: “Itandi vulu okupopya nkene twa li tu uvite pethimbo mpoka omolwekwatho ndyoka ehangano lyaJehova lye tu pe.”

Aaiyambi ye vulithe 250 oya tondokele kehala ndyoka lya dhengwa kefundja, opo ya ka kwathele aamwatate naamwameme. Omumwatate gumwe omukokele ota ti: “Kandi shi kutya ongundu yOonzapo oya zi peni, ihe oya tameke taya opaleke egumbo lyandje. Ngame nanekulu lyandje ka tu na siku tu ke shi dhimbwe.”

BRASILIA

Mo 2008, efundja ndyoka lye etelele enono olya dhenge oshitopolwa shaSanta Catarina nolya hanagula po omagumbo gaantu 80 000 lwaampo. Omukalimo gumwe okwa ti: “Opwa li pu na enono olindji tali kungulula po omiti.” Aamwatate yamwe oya ka kala mOshinyanga shIigongi. Omumwatate Márcio ngoka ha tonatele oshinyanga ota ti: “Aamwatate oya hupu po owala noohema ndhoka ya li ya zala, noohema odha li dhu udha enono.” Omumwameme gumwe ota ti: “Egumbo lyetu olya mbonyoka po moosekonde dhowala. Oshu uvitha ndje nayi sho nda mono tali mbonyoka po, ihe kandi na siku ndi dhimbwe ehekeleko ndyoka twa hekelekwa nalyo kaamwatate. Oye tu ulukile shili ohole! Shika osha longo ndje ndi kale nda lenga iinima yopambepo.”

Oshinyanga shIigongi moSanta Catarina moBrasilia shu udha iikwatha shoka sha li sha ningwa endiki lyokugandja ekwatho mo 2009

Enono ndika olya hanagula po omagumbo agehe ngoka ga li ga tungilwa koondundu ndhoka dhi li popepi noRio de Janeiro. Opo aamwatate ya kale yi ilongekidhila oshiponga shika hashi holoka olundji, oya toto po Okomitiye tayi kalelele yOkukwathela mIiponga Iinene. Uuna taku fekelwa kutya otaku zi efundja tali etelele enono, aamwatate mboka haya kala moshitopolwa shoka tashi ka adhika koshiponga shika, ohaya tseyithile okomitiye. Aaiyambi ohaye ya nziya ya londa momaloli ga nyolwa “Oonzapo dhaJehova — Tadhi gandja ekwatho kaantu.” Aaiyambi mbaka ohaya kala ye shi nale shoka ye na okuninga. Ohaya kala ya zala uundjatha wa nyolwa Oonzapo dhaJehova. Ohaya longo pamwe nOkomitiye yOkukwatathana nIipangelo ya kwathele aamwatate naamwameme mboka ya gumwa koshiponga. Ohaye etelele iikulya, omeya, omiti, iizalomwa, oothewa niinima yilwe yokwoopaleka. Okututa mo enono momagumbo kashi shi oshipu. Konima yoshiponga shimwe opo sha ningilwe, aaiyambi 60 oya li yu udha omaloli gane nenono ndyoka ya tutu megumbo limwe alike!

UUNA PWA HOLOKA OSHIPONGA!

Aakuluntugongalo ohaya kwatathana naauvithi ayehe
Aakuluntugongalo ohaya tseyithile omuunganeki gwolutu lwaakuluntugongalo
Aaunganeki ohaya tseyithile aatonateli aayendi nosho wo aamwatate yalwe mboka haya kwatathana noshitayimbelewa
Iikulya, omeya, ehala, epango lyopaunamiti ohayi gandjwa nziya nosho wo ekwatho lyopamaiyuvo nolyopambepo
Oshitayimbelewa ohashi tseyithile Olutuwiliki okupitila mOkomitiye yAaunganeki kombinga yonkalo nompumbwe ndjoka yi li po
Okomitiye yOkukwathela mIiponga Iinene ohayi unganeke iikwatha nokukwathela aamwatate naamwameme ya yambuke po
Okomitiye yAaunganeki ohayi tala kompumbwe ndjoka yi li po, nongele osha pumbiwa, ohayi pula aaiyambi yokiilongo yilwe ya ka kwathele

OKAMBO KAAMBOKA HAYA KWATHELE UUNA PWA HOLOKA OSHIPONGA

MUJUNI 2013, opwa nyanyangidhilwe okambo kedhina Jehovah’s Witnesses and Disaster Relief. Oka li ka nuninwa unene aanambelewa yepangelo lyaAmerika mboka haya tonatele omakwatho gopaulumompumbwe. Okambo ota ka kundathana kombinga yomakwatho ngoka twa kala hatu gandja okuza mo 1940 nasha. Oke na wo okaalita hoka taku ulike iilongo moka twa kwathela. Omukuluntugongalo gumwe ngoka ha kwathele nokuunganeka omakwatho ota ti: “Aamwatate mboka ye li mOokomitiye dhOkuunganeka Omakwatho ohaya longitha okambo haka, manga inaapu holoka oshiponga ya kwatathane naanambelewa mboka haya kala miitopolwa mbyoka hayi adhika unene kiiponga. Ohashi kala oshipu kutse okupewa epitikilo lyokuya mehala moka mwa holoka oshiponga, ngele aanambelewa mbaka oye na ontseyo kombinga yekwatho ndyoka hatu gandja.”