Etumwalaka lyUukwaniilwa waKalunga olyo lya simanenena mOmbiimbeli. Jehova ota ka longitha Uukwaniilwa mboka a ninge evi alihe Oparadisa. Uukwaniilwa waKalunga oshike? Otu shi shi ngiini kutya otawu pangele ngashingeyi? Owa tompola po nale shike, notawu ka gwanitha po shike monakuyiwa? Oshileshwa shika noshi-32 sigo oshi-33, otayi yamukula omapulo ngoka.

1. Uukwaniilwa waKalunga oshike, nolye Omukwaniilwa gwawo?

Uukwaniilwa owo epangelo lya dhikwa po kuJehova Kalunga. Omukwaniilwa gwawo, oJesus Kristus, ngoka ta pangele nale megulu. (Mateus 4:17; Johannes 18:36) Ombiimbeli otayi popi kombinga yaJesus tayi ti: ‘Ota ningi Omukwaniilwa nUukwaniilwa we kawu na mpoka tawu ka hula po.’ (Lukas 1:32, 33) Jesus e li Omukwaniilwa gwUukwaniilwa waKalunga, ota ka pangela ombanda yevi ayihe.

2. Oolye taya ka pangela pamwe naJesus?

Jesus ita ka pangela oye awike. Aantu ya za ‘momaludhi agehe, momalaka agehe, miigwana ayihe nomomihoko adhihe otaya ka pangela kombanda yevi’ ye li aakwaniilwa pamwe naKristus. (Ehololo 5:9, 10) Aantu yangapi taya ka pangela pamwe naye? Okuza sho Jesus e ya kombanda yevi, aantu omamiliyona oya kala nokuninga aalanduli ye. Ihe aantu owala 144 000 taya yi megulu, ya ka pangele pamwe naJesus. (Lesha Ehololo 14:1-4.) Aakriste yalwe ayehe kombanda yevi, otaya ka ninga aalelwa yUukwaniilwa waKalunga. — Episalomi 37:29.

3. Omolwashike Uukwaniilwa waKalunga wu vule omapangelo gopantu?

Nonando aapangeli yopantu ohaya kambadhala okuninga iinima iiwanawa, kaye na oonkondo dhokuninga kehe shoka ya hala. Aapangeli mboka haye ya pingene po, ohashi vulika ya kale yi ihole yo yene, yo ihaya kala ya hala okukwathela aalelwa yawo. Ihe Omupangeli gwUukwaniilwa waKalunga, Jesus, ita ka pingenwa po nando okomupangeli gumwe i ili. Kalunga okwa “dhika po oshilongo shoka shaa na hulilo” nenge tu tye Uukwaniilwa we. (Daniel 2:44) Jesus ota ka pangela evi alihe, noita ka kala e na okatongo. Jesus omunahole, omunahenda, omuyuuki nota ka longa wo aantu ya ungaunge nayakwawo nohole, nohenda nopauyuuki. — Lesha Jesaja 11:9.

4. Uukwaniilwa waKalunga otawu ka pangela ombanda yevi ayihe

Jesus Kristus oku na oonkondo oonene dhokupangela, e vule aapangeli ayehe mondjokonona. Lesha Mateus 28:18, e tamu kundathana epulo tali landula:

• Omukalo gwaJesus gwokupangela ogwa yooloka ko ngiini kwaangoka gwaapangeli yopantu?

Omapangelo gopantu olundji ohaga lunduluka, nakehe limwe ohali pangele owala oshitopolwa shontumba kombanda yevi. Ongiini kombinga yUukwaniilwa waKalunga? Lesha Daniel 7:14, e tamu kundathana omapulo taga landula:

• Omolwashike shi li nawa sho Uukwaniilwa waKalunga ‘itaawu ka hula po’?

• Omolwashike shi li nawa sho tawu ka pangela ombanda yevi ayihe?

5. Omapangelo gopantu otaga ka pingenwa po

Omolwashike Uukwaniilwa waKalunga wu na okupingena po omapangelo gopantu? Dhana OKAVIDIO, e tamu kundathana epulo tali landula.

OKAVIDIO: Uukwaniilwa waKalunga oshike? — Oshitopolwa shokavidio (1:41)

• Omapangelo gopantu oge etitha iinima yini iiwinayi?

Lesha Omuuvithi 8:9, e tamu kundathana omapulo taga landula:

• Sho to tala, Uukwaniilwa waKalunga owa pumbwa ngaa okupingena po omapangelo gopantu? Omolwashike to tile ngawo?

6. Uukwaniilwa waKalunga owu na aapangeli mboka ye shi oonkalo dhetu

Molwaashoka Omukwaniilwa gwetu, Jesus, okwa li omuntu gwopanyama, oha vulu ‘okuuvila uunkundi wetu olukeno.’ (Aahebeli 4:15) Aalumentu naakiintu aadhiginini 144 000 mboka taya ka pangela pamwe naJesus, oya hogololwa kuJehova okuza “momaludhi agehe, momalaka agehe, miigwana ayihe nomomihoko adhihe.” — Ehololo 5:9.

• Mbela itashi ku hekeleke tuu sho Jesus naayehe mboka taya ka pangela pamwe naye, ye shi oonkalo dhaantu? Omolwashike to tile ngawo?

7. Uukwaniilwa waKalunga owo owala wu na oompango dha dhenga mbanda

Aapangeli yopantu ohaya toto po oompango ndhoka ye wete kutya otadhi gamene notadhi etele aakwashigwana yawo uuwanawa. Uukwaniilwa waKalunga nawo owu na oompango ndhoka aakwashigwana yawo ye na okulandula. Lesha 1 Aakorinto 6:9-11, e tamu kundathana omapulo taga landula:

• Sho to tala, uuyuni otawu ka kala wa tya ngiini ngele kehe gumwe oha vulika koompango dhaKalunga?a

• Mbela sho to tala, Jehova oku na ngaa uuthemba wokukala a tegelela aapangelwa yUukwaniilwa we ya vulike koompango ndhika? Omolwashike to tile ngawo?

• Oshike tashi ulike kutya aantu mboka ihaaya vulika koompango ndhika otaya vulu okulunduluka? — Tala ovelise 11.

OWI ILONGO SHIKE?

Uukwaniilwa waKalunga epangelo lyolela li li megulu, ndyoka tali ka pangela ombanda yevi ayihe.

Omapulo geendululo

• Oolye aapangeli mUukwaniilwa waKalunga?

• Uukwaniilwa waKalunga owu vule ngiini epangelo kehe lyopantu?

• Iinima yimwe yini Jehova a tegelela aakwashigwana yUukwaniilwa we ya ninge?

UUYELELE WA GWEDHWA PO

Lesha wu uve kutya Jesus okwa ti Uukwaniilwa owu li peni.

“Mbela Uukwaniilwa waKalunga oshinima shi li momutima gwoye?” (Oshitopolwa shi li kepandja lyetu lyokointaneta)

Omolwashike Oonzapo dhaJehova hadhi vulika kUukwaniilwa waKalunga, pehala lyokuvulika kaapangeli yopantu?

Oya kala aadhiginini kUukwaniilwa waKalunga (1:43)

Tala shoka Ombiimbeli tayi ti kombinga yaantu 144 000, mboka Jehova a hogolola ya ka pangele pamwe naJesus.

“Oolye taya yi megulu?” (Oshitopolwa shi li kepandja lyetu lyokointaneta)

Oshike sha tompo omukiintu gumwe sho e li mondholongo a mone kutya Kalunga oye owala te ke eta uuyuuki muuyuni?

“Nkene nda mono eyamukulo kombinga yokwaanuuyuuki” (Penduka mo! Novomba 2011)

Uukwaniilwa waKalunga owa tameke okupangela megulu mo 1914. Momumvo ngoka omo wo mwa tameke omasiku gahugunina gokupangela kwaantu. Mbela otu shi shi ngiini? Natu ka tale shoka Ombiimbeli ya hunganeka, kwaashoka tashi ningwa muuyuni nokunkene aantu ya kala nokwiihumbata okuza mo 1914.

1. Ombiimbeli oya hunganeka shike?

EmboMbiimbeli lyaDaniel olyu ulika kutya Uukwaniilwa waKalunga otawu ka tameka okupangela pehulilo ‘lyomimvo heyali.’ (Daniel 4:16, 17) Konima yomimvo omathele, Jesus okwa li a popi kombinga yethimbo ndyoka a ti kutya ‘ethimbo lyaapagani,’ nokwa li a popi kutya kalya li lya hula natango. (Lukas 21:24) Ngaashi tatu ke shi mona, omimvo heyali odha li dha hulu mo 1914.

2. Okuza mo 1914, aantu oya kala nokwiihumbata ngiini noshike tashi ningwa muuyuni kunena?

Aalongwa yaJesus oya li ye mu pula ya ti: ‘Endhindhiliko olini tali holola, uuna to ya nehulilo lyuuyuni?’ (Mateus 24:3) Jesus okwa li e ya lombwele iinima oyindji mbyoka tayi ka ningwa konima ngele a tameke okupangela megulu e li Omukwaniilwa gwUukwaniilwa waKalunga. Miinima mbyoka omwa kwatelwa iita, ondjala nomakakamo gevi. (Lesha Mateus 24:7.) Ombiimbeli oya hunganeka wo kutya iikala yaantu ‘momasiku gahugunina’ otayi ka ningitha onkalamwenyo yi kale ‘ondhigu.’ (2 Timoteus 3:1-5) Okuza mo 1914, oonkalo ndhoka niikala mbyono, oya tameke unene okukala yi iwetikile muuyuni.

3. Omolwashike oonkalo dha nayipala noonkondo muuyuni, sho Uukwaniilwa waKalunga wa tameke okupangela?

Konima owala sho Jesus a ningi Omukwaniilwa gwUukwaniilwa waKalunga, megulu omwa tukuluka olugodhi pokati ke naSatana noompwidhuli dhe. Satana ina sindana molugodhi ndoka. Ombiimbeli otayi ti kutya ‘oku umbilwa kombanda yevi pamwe naayengeli ye ayehe.’ (Ehololo 12:9, 10, 12) Satana okwa geya noonkondo, oshoka oku shi shi kutya ota ka hanagulwa po. Onkee ano, oye te etitha uuwehame nokumona iihuna kombanda yevi alihe. Itashi kumitha sho oonkalo muuyuni dha nayipala noonkondo. Uukwaniilwa waKalunga owo owala tawu ka kandula po omaupyakadhi agehe ngoka.

ILONGA OSHINDJI

4. Omayalulo gi ikolelela kwaashoka sha hunganekwa mOmbiimbeli otagu ulike kutya Uukwaniilwa owa tameke okupangela mo 1914

OKAVIDIO: Uukwaniilwa waKalunga owa tameke okupangela mo 1914 (5:02)

Kalunga okwa li a ningitha Omukwaniilwa Nebukadnezzar a yagume kombinga yaashoka sha li tashi ka ningwa monakuyiwa. Ondjodhi ndjoka nefatululo ndyoka Daniel a gandja, otayi popi kombinga yepangelo lyaNebukadnezzar nosho wo kombinga yUukwaniilwa waKalunga. — Lesha Daniel 4:17.a

Lesha Daniel 4:20-26, e to longitha oshimpungu shika wu yamukule omapulo taga landula:

• (1) Nebukadnezzar okwa li a mono shike mondjodhi ye? — Tala ovelise 20 nosho wo 21.

• (2) Oshike sha li tashi ka ningilwa omuti? — Tala ovelise 23.

• (3) Oshike sha li tashi ka ningwa pehulilo ‘lyomimvo heyali’? — Tala ovelise 26.

Nkene ondjodhi yi na ko nasha nomuti ya pambathana nUukwaniilwa waKalunga

EHUNGANEKO (Daniel 4:20-36)

Epangelo

(1) Omuti omuleeleka

Elelo lya yiwa moshipala

(2) ‘Kii po omuti,’ e tamu etha pu pite “omimvo heyali”

Elelo lya totululwa

(3) “Ngoye oto ka kala omukwaniilwa ishewe”

Egwanitho lyotango lyehunganeko ndika . . .

• (4) Omuti ogwa li tagu thaneke lye? — Tala ovelise 22.

• (5) Elelo lye olya li lya yiwa ngiini moshipala?  — Lesha Daniel 4:29-33.

• (6) Oshike sha li sha ningilwa Nebukadnezzar pehulilo ‘lyomimvo heyali’?  — Lesha Daniel 4:34-36.

EGWANITHO LYOTANGO

Epangelo

(4) Nebukadnezzar Omu-kwaniilwa gwaBabilonia

Elelo lya yiwa moshipala

(5) (5) Konima yomumvo 606 K.E.N., Nebukadnezzar okwa kanitha oondunge dhe noka li a vulu okupangela omimvo heyali dho dhenedhene

Elelo lya totululwa

(6) Nebukadnezzar a galulilwa oondunge dhe, e ta tameke okupangela

Egwanitho etiyali lyehunganeko ndyoka . . .

• (7) Omuti ogwa li tagu thaneke lye?  — Lesha 1 Ondjalulo 29:23.

• (8) Elelo lyawo olya li lya yiwa ngiini moshipala? Otu shi shi ngiini kutya olya li lya yiwa moshipala omanga Jesus e li kombanda yevi?  — Lesha Lukas 21:24.

• (9) Openi nuunake elelo ndika lya li lya totululwa?

EGWANITHO ETIYALI

Epangelo

(7) Aakwaniilwa yaIsraeli oya li ye lile po epangelo lyaKalunga

Elelo lya yiwa moshipala

(8) Jerusalem sha hanagulwa po, shoka sha yi moshipala okupangela kwaakwaniilwa yAaisraeli uule womimvo 2 520

Elelo lya totululwa

(9) Jesus okwa li a tameke okupangela megulu e li Omu-kwaniilwa gwUukwaniilwa waKalunga

5. Uuyuni owa lunduluka okuza mo 1914

Dhana OKAVIDIO.

OKAVIDIO: Uuyuni owa lunduluka okuza mo 1914 (1:10)

Jesus okwa li a hunganeke nkene oonkalo muuyuni tadhi ka kala konima ngele okwa langekwa po e li Omukwaniilwa. Lesha Lukas 21:9-11, e tamu kundathana epulo tali landula:

• Oonkalo dhini twa lesha mpaka wa mona nenge wu uva?

Omuyapostoli Paulus okwa li a popi nkene aantu taya ka kala momasiku gahugunina gomapangelo gopantu. Lesha 2 Timoteus 3:1-5, e tamu kundathana epulo tali landula:

• Iikala yini yomwaambika wa ndhindhilika maantu kunena?

6. Ulika kutya owi itaala kutya Uukwaniilwa waKalunga otawu pangele ngashingeyi

Lesha Mateus 24:3, 14, e tamu kundathana omapulo taga landula:

• Iilonga yini ya simana tayi ulike kutya Uukwaniilwa waKalunga otawu pangele ngashingeyi?

• Ongiini to vulu okukutha ombinga miilonga mbika?

Uukwaniilwa waKalunga otawu pangele ngashingeyi megulu, nesiku owo owala tawu ka tameka okupangela kombanda yevi alihe, oli li popepi. Lesha Aahebeli 10:24, 25, e tamu kundathana epulo tali landula:

• Kehe gumwe gwomutse oku na okuninga shike, sho tu wete “esiku lyOmuwa tali hedha popepi”?

OWI ILONGO SHIKE?

Omahunganeko gOmbiimbeli, eyalulo lyethimbo noonkalo dhuuyuni, otadhi ulike kutya Uukwaniilwa waKalunga otawu pangele ngashingeyi. Ohatu ulike kutya otwi itaala muwo mokuuvitha kombinga yawo nomokuya kokugongala.

Omapulo geendululo

• Oshike sha ningwa pehulilo lyomimvo heyali ndhoka dha popiwa membo lyaDaniel?

• Oshike she ku tompa kutya Uukwaniilwa waKalunga owa tameke okupangela mo 1914?

• Ongiini to vulu okuulika kutya owi itaala kutya Uukwaniilwa mboka otawu pangele?

UUYELELE WA GWEDHWA PO

Tala kwaashoka aanyoli yondjokonona nosho wo aantu yalwe taya ti kombinga yomalunduluko ngoka ga ningwa muuyuni okuza mo 1914.

“Sho eihumbato lyaantu lya lunduluka” (Penduka mo! Apilili 2007)

Tala nkene ehunganeko ndyoka li li muMateus 24:14 lya gumu omulumentu gumwe.

“Onda li ndi hole unene uudhano wokatanga haka dhengwa noshiti (Baseball)!” (Oshungolangelo No. 3 2017)

Otu shi shi ngiini kutya ehunganeko li li muDaniel ontopolwa 4 otali popi Uukwaniilwa waKalunga?

“Uukwaniilwa waKalunga owa li wa tameke okupangela uunake? (Oshitopolwa 1)” (Oshungolangelo, 1 Novomba 2014)

Oshike tashi ulike kutya ‘omimvo heyali’ dha popiwa muDaniel ontopolwa 4 odha hulu mo 1914?

“Uukwaniilwa waKalunga owa li wa tameke okupangela uunake? (Oshitopolwa 2)” (Oshungolangelo, 1 Januali 2015)

Uukwaniilwa waKalunga otawu pangele nale megulu. Masiku otawu ka eta omalunduluko omanene kombanda yevi. Natu ka tale komauwanawa gamwe ngoka tatu vulu oku ka mona mUukwaniilwa waKalunga.

1. Uukwaniilwa waKalunga otawu ka eta ngiini ombili nuuyuuki kombanda yevi?

Jesus, Omukwaniilwa gwUukwaniilwa waKalunga, ota ka hanagula po aakolokoshi nomapangelo agehe piita yaArmagedon. (Ehololo 16:14, 16) Pethimbo ndyoka, ehunganeko ndika lyOmbiimbeli otali ka gwanithwa: “Aadhudhu otaa ka kana po mbala.” (Episalomi 37:10) Jesus ota ka longitha Uukwaniilwa waKalunga a shilipaleke kutya kombanda yevi oku na ombili notaku longwa uuyuuki. — Lesha Jesaja 11:4.

2. Onkalamwenyo otayi ka kala ya tya ngiini, sho ehalo lyaKalunga tali ka gwanithwa kombanda yevi?

Kohi yUukwaniilwa waKalunga “aayuuki otaa ka thigulula evi e taa kala mo sigo aluhe.” (Episalomi 37:29) Dhiladhila owala wu li muuyuni mu na aantu ayehe aayuuki, ye hole Jehova noye holathane! Kapu na ngoka te ke ehama, nakehe gumwe ota ka kala nomwenyo sigo aluhe.

3. Uukwaniilwa waKalunga otawu ka gwanitha po shike, ngele aakolokoshi ya hanagulwa po?

Konima ngele aakolokoshi ya hanagulwa po, Jesus ota ka pangela e li Omukwaniilwa, uule womimvo 1 000. Pethimbo ndyono, Jesus naantu 144 000, otaya ka kwathela aantu kombanda yevi, ya kale ya gwanenena. Pehulilo lyomimvo ndhono, evi alihe otali ka ninga oparadisa notali ka kala lyu udha aantu ya nyanyukwa, molwaashoka ohaya vulika koompango dhaJehova. Konima yaashono, Jesus ota ka shunitha Uukwaniilwa kuHe, Jehova. Edhina lyaJehova otali ‘ka yapulwa’ inaashi monika nando onale. (Mateus 6:9, 10) Edhina ndyoka otali ku ulika kutya Jehova Omupangeli omwaanawa ngoka e na ko nasha naalelwa ye. Opo nduno, Jehova ota ka hanagula po Satana noompwidhuli dhe nakehe ngoka e li ompinge nepangelo Lye. (Ehololo 20:7-10) Oonkalo oombwanawa ndhoka tadhi ke etwa kUukwaniilwa waKalunga, otadhi ka kala sigo aluhe.

ILONGA OSHINDJI

4. Uukwaniilwa waKalunga otawu ka hulitha po omapangelo gopantu

Ombiimbeli otayi ti: “Omuntu gumwe ta dhiladhilile mukwawo oshiponga,” nenge tu tye, ta pangele mukwawo nonyanya. (Omuuvithi 8:9) Jehova ota ka longitha Uukwaniilwa we a hulithe po uupyakadhi mboka.

Lesha Daniel 2:44 nosho wo 2 Aatessalonika 1:6-8, e tamu kundathana omapulo taga landula:

• Jehova nOmwana, Jesus, otaya ka ningila shike aapangeli yopantu nosho wo aayambidhidhi yawo?

• Shoka wi ilongo kombinga yaJehova naJesus, oshe ku tompa ngiini kutya otaya ka katuka pauyuuki?

5. Jesus Omukwaniilwa e li nawa kaaku na we

E li Omukwaniilwa gwUukwaniilwa waKalunga, Jesus ota ka kwathela aantu kombanda yevi momikalo odhindji. Dhana OKAVIDIO wu mone kutya Jesus okwa kala nale e na ehalo lyokukwathela aantu noku na oonkondo dhoku shi ninga, e dhi pewa kuKalunga.

OKAVIDIO: Jesus oku ulike shoka Uukwaniilwa tawu ka gwanitha po (1:13)

Sho Jesus a li kombanda yevi, okwa li a ningi iinima mbyono tayi ka gwanithwa po monakuyiwa kUukwaniilwa. Omayambeko geni ga tumbulwa mpaka wa halelela oku ka mona? Lesha omanyolo taga landula ngoka tage tu kwathele tu tseye omayambeko ngoka.

6. Uukwaniilwa waKalunga otawu ka eta onakuyiwa ombwanawa

OKAVIDIO: Shoka tashi ulike kutya onakuyiwa otayi ka kala ombwanawa (4:38)

Lesha Episalomi 145:16, e tamu kundathana epulo tali landula:

• Oho kala wu uvite ngiini, sho wu shi shi kutya Jehova ota ka “kutitha iinamwenyo ayihe”?

OWI ILONGO SHIKE?

Uukwaniilwa waKalunga otawu ka gwanitha po ehalo lyaKalunga. Otawu ka ninga evi alihe oparadisa, notali ka udha aantu aayuuki, taya ka longela Jehova sigo aluhe.

Omapulo geendululo

• Uukwaniilwa waKalunga otawu ka yapulitha ngiini edhina lyaJehova?

• Omolwashike tatu vulu okukala neinekelo kutya Uukwaniilwa otawu ka gwanitha po omauvaneko agehe gomOmbiimbeli?

• Miinima mbyoka tayi ka etwa kUukwaniilwa, oshinipo wa halelela oku ka mona?

UUYELELE WA GWEDHWA PO

Lesha wu uve kutya Armagedon oshike.

“Iita yaArmagedon oshike?” (Oshitopolwa shi li kepandja lyetu lyokointaneta)

Lesha kombinga yaashoka tashi ka ningwa pethimbo ndyoka hali ithanwa “uudhigu uunene.” — Mateus 24:21.

“Uudhigu uunene oshike?” (Oshitopolwa shi li kepandja lyetu lyokointaneta)

Tala nkene aanegumbo taya vulu okutedhatedha kiinima mbyoka taya ka mona moparadisa.

Kala wa fa wu iwete wu li mOparadisa (1:50)

Lesha wu uve nkene omulumentu gumwe ngoka a li ompinge nopolotika a mono omayamukulo gaashoka a li ta kongo.

“Ombiimbeli ohayi lundulula onkalamwenyo yaantu” (Oshungolangelo, 1 Januali 2012)