Oohapu dhaJehova odhi na omwenyo
Omanenedhiladhilo okuza moontumwafo dha nyolelwa Aakorinto
OMUYAPOSTOLI Paulus okwa li e na ko nasha unene nuupambepo wegongalo lyomuKorinto. Okwa li u uvu kutya omu na okwaauvathana mokati kaamwahe mboka yomuKorinto. Oya li yi idhidhimikile onyata yiipala. Egongalo olya li wo lya nyolele Paulus ontumwafo tali pula shi na ko nasha niinima yontumba. Omolwa oshinima shika, lwomo 55 E.N., sho a li muEfeso pethimbo lyolweendo lwe olutitatu lwuutumwa, Paulus okwa li a nyolele Aakorinto ontumwafo ye yotango.
Konima owala yoomwedhi oonshona okwa li a tsikile ko kontumwafo ye ndjoka yotango moku ya nyolela ontumwafo ontiyali. Molwaashoka oonkalo meni nopondje yegongalo lyaKorinto methelemimvo lyotango odha faathana naandhoka dhopethimbo lyetu, etumwalaka lyaPaulus moontumwafo ndhoka a li a nyolelele Aakorinto oli na oshilonga wo kutse.—Heb. 4:12.
‘TONATENI, KALENI MWA KOLELELA NAANANKONDO’
Paulus ota kumagidha ta ti: “Uvathaneni mwaashihe shoka tamu shi popi.” (1 Kor. 1:10) “Jesus Kristus oye awike e na okukala ekankameno” nkoka uukwatya wopaKriste wu na okutungilwa. (1 Kor. 3:11-13) Paulus okwa popi shi na ko nasha noluhondelo megongalo a ti: “Umbii mo oongoka omwiinayi gwomokati keni.” (1 Kor. 5:13, OB-1954) Okwa ti wo kutya “olutu lwomuntu inalu tulilwa po uuholume, aawe, olwo olwOmuwa.”—1 Kor. 6:13.
Paulus okwa li a pe Aakorinto omayele omawanawa notaga longo kombinga yondjokana nokwiikalela sho ta yamukula ‘kombinga yiinima mbyoka ya nyola.’ (1 Kor. 7:1) Konima sho a li a popi shi na ko nasha nuukwamutse nelandulathano pokugongala kwopaKriste nosho wo uushili kombinga yeyumuko, Paulus okwa li a gandja ekumagidho tali ti: “Tonateni, kaleni mwa kolelela meitaalo, aalumentwelela, aanankondo.”—1 Kor. 16:13, OB-1954.
Omapulo gopamanyolo taga yamukulwa:
1:21—Mbela odhoshili kutya Jehova oha longitha “uugoya” a hupithe mboka yi itaala? Aawe, ihe shi ningi. Ihe molwaashoka ‘uuyuni inawu tseya Kalunga,’ shoka ha longitha opo a hupithe aantu ohashi monika sha fa uugoya kuuyuni.—Joh. 17:25.
5:5—Otashi ti shike ‘okugandja omulumentu [omukolokoshi] kuSatana, a dhenge olutu lwe, opo omwenyo gwe gu hupithwe’? Uuna omuntu a yona sha kwata miiti, ihe ini iyela ombedhi, oha kondwa mo megongalo noha ningi ishewe oshitopolwa shuuyuni waSatana. (1 Joh. 5:19) Onkene ota popiwa e li ngaashi gumwe ngoka a gandjwa kuSatana. Okukondwa mo hoka ohaku gamene onkalonawa yegongalo nenge iikala mbyoka iiwinayi molwaashoka omuntu ngoka okwa li ta hanagula po nenge ta nwetha mo egongalo nombepo ye ombwiinayi.—2 Tim. 4:22.
7:33, 34—Mbela uutumbulilo ‘iinima yuuyuni’ mbyoka omulumentu a hokana nomukiintu a hokanwa ha kala i ipyakidhila nayo otawu ti shike? Mpaka Paulus okwa li ta popi iinima yi na ko nasha nonkalo yesiku kehe, mbyoka Aakriste ya hokana ye na okwiipula nayo. Shika osha kwatela mo iikulya, oonguwo negumbo, ihe inaashi kwatela mo iinima iiwinayi yuuyuni mbuka mbyoka Aakriste ye na okuhenuka.—1 Joh. 2:15-17.
11:26—Mbela eso lyaJesus oli na okudhimbulukiwa “kehe esiku” noshi na okuningwa “sigo” uunake? Paulus ka li a hala okutya eso lyaJesus oli na okudhimbulukiwa esiku kehe. Uutumbulilo wOshigreka mboka wa tolokwa “kehe esiku” otawu ti “ngele” nenge “ethimbo ndyoka tashi ningwa.” Onkee ano, Paulus okwa li a ti kutya ethimbo kehe Aakriste aagwayekwa taya kutha ombinga momandhindhiliko gEdhimbuluko shoka hashi ningwa lumwe momumvo mo 14 gaNisan otaya “hokolola eso lyOmuwa.” Shika ohaye shi ningi “sigo ote ya” sha hala okutya sigo otaya yi megulu okupitila meyumuko.—1 Tes. 4:14-17.
13:13—Omomukalo guni ohole onene yi vule eitaalo netegameno? Uuna ‘iinima mbyoka twa tegamena’ notu na ‘einekelo lya kola’ muyo tayi gwanithwa, eitaalo netegameno ohali hulile mpoka. (Heb. 11:1) Ohole onene yi vule eitaalo netegameno molwaashoka yo ohayi kala sigo aluhe.
15:29 (Yelekanitha NW.)—‘Okuninginithwa medhina lyaasi’ otashi ti shike? Paulus ka li a ti kutya aantu mboka ye na omwenyo oye na okuninginithwa pehala lyaamboka ya sa inaaya ninginithwa. Ihe okwa li ta popi okuninginithwa kwAakriste mboka ya gwayekwa nombepo ya ye monkalamwenyo moka haya kala aadhiginini sigo okusa kwawo nohayi landulwa kokuyumudhilwa omwenyo gwopambepo.
Iiyilongomwa kutse:
1:26-31; 3:3-9; 4:7. Ngele tatu itanga neifupipiko omolwa Jehova, ihe hamolwetu yene, otashi humitha komeho uukumwe megongalo.
2:3-5. Sho Paulus a li tu uvitha muKorinto, okwa li ti ipula ngele ota vulu okutompa aapulakeni ye mboka ya li ya longekeka muufilosofi wOshigreka. Ihe ka li nando e etha uunkundi wontumba nenge uumbanda wu mu imbe a longe oshilonga shuukalele we shoka a pewa kuKalunga. Sha faathana natse katu na nando okweetha oonkalo ndhoka oondhigu dhi tu imbe tu uvithe onkundana ombwanawa yUukwaniilwa waKalunga. Otu na okukala neinekelo kutya Jehova ote ke tu kwathela ngaashi Paulus.
2:16. Okukala tu na “omadhiladhilo gaKristus” otashi ti otu na okutseya nkene ha dhiladhila nomolwashike ha dhiladhila ngawo opo tu tseye nawa uukwatya we nokulandula oshiholelwa she. (1 Pet. 2:21; 4:1) Inashi simana tuu okukala hatu konakona onkalamwenyo yaJesus nuukalele we!
3:10-15; 4:17. Otu na okukonakona nokuhwepopaleka uunkulungu wetu wokulonga nokuninga aantu aalongwa. (Mat. 28:19, 20) Ngele itatu longo aantu nawa, aakonakoni yetu itaya ka pondola uuna eitaalo lyawo tali yelekwa, notashi vulika shi tu yemateke noonkondo notatu ka hupithwa twa fa twa “nakulwa momulilo.”
6:18. ‘Okuyanda oluhondelo’ itashi ti owala okuhenuka onyata yiipala hayi ithwanwa por·neiʹa, ihe osha kwatela mo wo okuhenuka iinima ngaashi okutala omafano giipala, okwaahe na uuyogoki wopamikalo, okudhiladhila kombinga yoluhondelo, okukala wu na iihole yokambweenga, sha hala okutya, kehe shimwe shoka tashi vulu okufala moluhondelo.—Mat. 5:28; Jak. 3:17.
7:29. Aaihokani oye na okukala ya kotoka opo kaaya tule komeho unene ondjokana yawo e taya tula iinima yUukwaniilwa pondondo ontiyali.
10:8-11. Jehova okwa li a yemata noonkondo sho Aaisraeli ya li ya ngungutula kombinga yaMoses naAaron. Oshi li pandunge opo twaaha kokeke iikala yokungungutula.
16:2. Otatu vulu okukala hatu yambidhidha pashimaliwa iilonga yokuuvitha muuyuni auhe ngele otwe shi longekidha nale nohatu shi ningi aluhe.
“TAAMBENI EKUMAGIDHO”
Paulus okwa lombwele Aakorinto kutya oye na ‘okudhimina po nokuhekeleka’ omuyoni ngoka a li a geelwa, ihe okwi iyela ombedhi. Nonando ontumwafo ye yotango oya li ye ya nikitha oluhodhi, Paulus okwa li a nyanyukwa molwaashoka oya li ‘yi itedhulula.’—2 Kor. 2:6, 7; 7:8, 9.
Paulus okwa li a ladhipike Aakorinto ya kale yaa “na uuluya” molwaashoka oya li “aayamba miinima ayihe.” Sho a li a yamukula aatsindumbo naye, okwa gandja omayele ge lwahugunina kwaayehe a ti: “Kalii po nawa! Lalakaneni, mu kale mwa gwana. Taambeni ekumagidho lyandje, mu kale mwa tsa ompango yimwe. Uvathaneni, ne mu kale mu na ombili.”—2 Kor. 8:7; 13:11.
Omapulo gopamanyolo taga yamukulwa:
2:15, 16—Ongiini tu li ‘ezimba lyeyambo lya nika nawa lyaKristus’? Otu li ngaaka molwaashoka ohatu vulika kwaashoka Ombiimbeli tayi ti nokuuvitha etumwalaka ndyoka li li mo. Nonando “ezimba” ndyoka otashi vulika li kale ewinayi kwaamboka kaaye na uuyuuki, oli li etoye kuJehova nokwaamboka ye na omitima dhu uka.
5:16—Osha hala kutya ngiini sho Aakriste aagwayekwa ‘kaaye na ngoka ye shi pakukala kwomuntu’? Ihaya tala omuntu pamukalo gopanyama, ngaashi okukala ye hole omuntu omolwuuyamba, olwaala, omuhoko nenge uukwashigwana we. Shoka sha simana kuyo ekwatathano lyopambepo nAakriste ooyakwawo.
11:1, 16; 12:11—Mbela Paulus okwa li omugoya nenge kee na ondjele nAakorinto? Aawe, hasho nando. Ihe, yamwe otashi vulika ya li ye mu tala ko e li omwiinenepeki molwaashoka okwa li ta popi ta gamene ondondo ye yuuyapostoli.
12:1-4—‘Omulumentu ngoka a falwa mOparadisa’ okwa li lye? Ombiimbeli inaayi popya nando omuntu gumwe ngoka a mona emoniko ndyoka, osha yela kutya Paulus okwa li ta hokolola oshimoniwa she, molwaashoka ehokololo olya landula oshipopiwa she shoka a li ta gamene ondondo ye e li omuyapostoli. Shoka Paulus a li a mono otashi vulika sha li oparadisa yopambepo ndjoka tayi nyanyukilwa kegongalo lyopaKriste ‘pehulilo lyuuyuni.’—Dan. 12:4.
Iiyilongomwa kutse:
3:5. Ovelise ndjika otayi tu lombwele kutya Jehova oha tala ngele Omukriste okwa gwana okuya muukalele okupitila mOohapu dhe, mombepo ye ondjapuki nosho wo okupitila moshitopolwa shehangano lye shokombanda yevi. (Joh. 16:7; 2 Tim. 3:16, 17) Otatu ningi nawa ngele tatu konakona Ombiimbeli niileshomwa mbyoka ya kankamena kuyo nuudhiginini, okugalikana twa mana mo nokukala pokugongala akuhe kwopaKriste nokukutha ombinga muko.—Eps. 1:1-3; Luk. 11:10-13; Heb. 10:24, 25.
4:16. Molwaashoka Jehova oha ningi ‘omuntu gwetu gwomeni omupe esiku kehe’ otu na okukala hatu kambadhala tu ulike olupandu lwiinima mbyoka Jehova he tu pe, katu na okweetha esiku li pite po inaatu gandja eitulomo kiinima yopambepo.
4:17, 18. Okudhimbulukwa kutya ‘uudhigu mbuka tu wu na ngashingeyi owo pakathimbo,’ otashi tu kwathele tu kale aadhiginini muJehova pethimbo lyuudhigu.
5:1-5. Omadhiladhilo gaPaulus nkene Aakriste aagwayekwa yu uvite shi na ko nasha netegameno lyawo lyomegulu kage shi tuu omawanawa!
10:13. Otu na okulonga owala moshitopolwa shoka sha nuninwa egongalo lyetu, kakele ngele pwa ningwa elongekidho opo tu kwathele mpoka pu na ompumbwe onene.
13:5. ‘Opo tu ikonakone ngele otu li meitaalo,’ otu na okushilipaleka kutya eihumbato lyetu otali tsu kumwe naashoka tatu ilongo mOmbiimbeli. ‘Opo tu iyeleke’ ngele otu li meitaalo otu na okutala ongushu yuupambepo wetu, mwa kwatelwa wo oondunge dhetu ‘dhokuyoolola,’ nongushu yiilonga yeitaalo lyetu. (Heb. 5:14; Jak. 1:22-25) Ngele tatu tula miilonga omapukululo ngoka taga longo gaPaulus, otatu ka tsikila nokweenda mondjila yoshili.
[Ethano pepandja 30, 31]
Mbela uutumbulilo “kehe esiku tamu li oshikwiila shika notamu nu moshitenga shika” otawu ti shike?—1 Kor. 11:26.