Nkene to vulu okwiidhidhimika ngele wa kengelelwa kukuume kopandjokana

MARGARITA nomusamane gwe, Raúl, oya li ya longele Jehova pamwe ye li aakalele yethimbo lyu udha uule woomvula.a Ihe konima yokuvalwa kwokanona kawo kosheeli, Raúl okwa tameke ta yi kokule naJehova kashona nakashona. Konima, Raúl okwa kala nonkalamwenyo inaayi yogoka nokwa kondwa mo megongalo lyopaKriste. Margarita okwa ti: “Sho ayihe mbika ya ningwa, onda li ndi wete ndi li pokusa. Omutima gwandje ogwa li gwa tekauka, nokanda li ndi shi shoka ndi na okuninga.”

Mbala konima sho Jane a hokanwa, omusamane gwe okwe mu kengelele momikalo dhi ili nodhi ili. Okwa tameke oku mu monitha iihuna palutu. Jane okwa ti: “Sho a dhenge ndje oshikando shotango onda li nda haluka, nda sa ohoni nonda li ndi wete nda shunduluwa. Okwa li ha pula ndje aluhe ndi mu dhimine po ngele a dhenge ndje. Onda li nda dhiladhila kutya ndi li Omukriste ondi na owala oku mu dhimina po nokudhimbwa. Onda li wo nda dhiladhila kutya ngele onda lombwele kehe gumwe uupyakadhi wetu, nokuli naakuluntugongalo otandi ka kala kaandi shi omwiinekelwa. Oshinima shika shokumonithwa iihuna noku mu dhimina po osha ningwa uule woomvula. Ethimbo alihe onda kala he dhiladhila kutya ondi na okuninga po sha opo omusamane gwandje a kale e hole ndje. Konima sho e tu thigi po nokamwanakadhona ketu, onda li ndi uvite kutya ondi na okuninga po sha nenge okupopya opo ndi kaleke po ondjokana yetu.”

Ngaashi Margarita naJane, otashi vulika wu kale to mono iihuna pamadhiladhilo, pamahupilo nopambepo ngele omusamane gwoye okwe ku thigi po. Nenge ngele omukulukadhi gwoye ke shi omwiinekelwa otashi vulu oku ku etela uudhigu nuuwehame wopamadhiladhilo. Kapu na omalimbililo kutya otu li ‘momathimbo omadhigu,’ ngaashi Ombiimbeli ya hunganeka. Ehunganeko ndika otali ulike kutya ‘momasiku gahugunina’ momaukwanegumbo otamu ka kala omaupyakadhi nokaamu na ohole. Yamwe otaya ka kala ya fa haya longele Kalunga, ihe otaye mu idhimbike. (2 Tim. 3:1-5) Aakriste yashili nayo ohaya mono iihuna omolwomaupyakadhi, ihe oshike tashi vulu oku ku kwathela wu idhidhimike ngele owa kengelelwa kukuume kopandjokana?

Itala ko mwene ngaashi Jehova he ku tala ko

Petameko otashi vulika wu mone oshidhigu okwiitaala kutya gumwe ngoka wu hole oye e ku uvitha nayi noonkondo. Otashi vulika nokuli wu tameke okwiipa uusama omolwuulunde we mboka a longo.

Dhimbulukwa kutya nokuli nomulumentu a gwanenena, Jesus, okwa li a kengelelwa kugumwe ngoka a li i inekela noku mu hole. Jesus okwa li a hogolola okuume lela yopothingo, aayapostoli, konima yokugalikana a mana mo. Ayehe 12 oya li aalongeli yaJehova aainekelwa. Onkee ano, kapu na omalimbililo Jesus okwa li a nika oluhodhi noonkondo sho Judas a “ningi omugwaaleki.” (Luk. 6:12-16) Jehova kali a pa Jesus ombedhi omolwoonkatu dhaJudas.

Odhoshili kutya kapu na kuume kopandjokana a gwanenena. Aaihokani ayehe ohaya ningi omapuko. Omupisalomi okwa nwethwa mo a nyole ta ti: “OMUWA, ngele to kala nokudhimbulukwa oondjo, olye ta vulu okukala po?” (Eps. 130:3) Mokuholela Jehova, aaihokani ayehe oye na okukala haya dhiminathana po.—1 Pet. 4:8.

Ihe “kehe gumwe gwomutse ote ki ihokolola koshipala shaKalunga polwe mwene.” (Rom. 14:12) Ngele kuume kopandjokana oha popi aluhe noha katuka nonyanya, oku na okwiihokolola kuJehova. Jehova ota pangula elongitho lyoonkondo nokupopya nonyanya, onkee ano, kapu na etompelo lyasha ndyoka tali ningitha gumwe u ungaunge nakuume kopandjokana momukalo kaagu shi gwopahole nenge nokwaahenesimaneko. (Eps. 11:5; Ef. 5:33; Kol. 3:6-8) Osha yela kutya ngele Omukriste okwa tsikile okukala a geya nopwaahe na okwiiyela ombedhi, oku na okukondwa mo megongalo. (Gal. 5:19-21; 2 Joh. 9, 10) Kuume kopandjokana ina pumbwa okukala u uvite e na ondjo ngele oshinima shoka okwe shi tseyithile aakuntugongalo. Jehova oku na shili olukeno naamboka taya ningwa nayi.

Ngele kuume kopandjokana okwa yi moluhondelo, ina yona owala kukuume ke ihe nokuJehova wo. (Mat. 19:4-9; Heb. 13:4) Ngele kuume ngoka kee na ondjo okwa kala metsokumwe nomakotampango gOmbiimbeli, ina pumbwa okukala u uvite e na ondjo omolwokuyona kwaangoka e mu kengelela.

Dhimbulukwa kutya Jehova oku shi nkene wu uvite. Okwi ipopi e li omusamane gwoshigwana shaIsraeli, nomOohapu dhe omu na omahokololo ogendji taga popi nkene a li u uvite oluhodhi omolwokwaahe na uudhigini kwoshigwana shoka. (Jes. 54:5, 6; Jer. 3:1, 6-10) Kala wu na uushili kutya Jehova oku wete omahodhi goye uuna to lili sho wa kengelelwa kukuume koye kopandjokana. (Mal. 2:13, 14) Oku shi kutya owa pumbwa ehekeleko neladhipiko.

Nkene Jehova ha gandja ehekeleko

Jehova oha gandja ehekeleko okupitila megongalo lyopaKriste. Jane okwa li a mono eyambidhidho lya tya ngaaka. Jane okwa ti: “Omutonatelishikandjo okwa li e ya pethimbo mpoka nda li nda gwililwa po noonkondo pamadhiladhilo. Okwa li e shi kutya ondi na okukala nda polimana molwaashoka omusamane gwandje okwa henga ndje. Okwa li a kutha ethimbo mokukundathana nangame Enyolo ndyoka li li mAakorinto yotango 7:15. Ovelise ndjoka nomatyokosha ge gopahole oga li ga kwathele ndje ndi ethe po omadhiladhilo okukala ndi uvite kutya ondi na ondjo nosha li she etele ndje ombili yopamadhiladhilo.”b

Margarita ngoka a popiwa metetekelo, okwa li wo a mono kutya Jehova oha gandja ekwatho okupitila megongalo lyopaKriste. Okwa ti: “Sho nda mono kutya omusamane gwandje ini iyela lela ombedhi, onda yi naamwandje koshilando shilwe. Sho nda thiki ko onda mono egumbo li na oondunda mbali dhokuhiila. Esiku lya landula ko, manga nda li tandi longolola oondjato dhetu nda yemata, pomweelo opwa konkolwa. Onda li ndi shi omukulukadhi mwene gwegumbo ngoka ha zi mondunda ya landula ko. Ihe nani okwa li omumwameme ngoka a konakona nameme Ombiimbeli noye wo a kwathela uukwanegumbo wetu wi ilonge oshili. Ka li e ya kungame, ihe okwa li e ya molwaashoka oha konakona nomukulukadhi mwene gwegumbo ndyoka. Onda li ndi uvite nda pepelelwa nokanda li te vulu okupangela omaiyuvo gandje. Onde mu lombwele onkalo ndjoka ndi li muyo notwa lili pamwe. Okwa ningi elongekidho nziya tu ye naye kokugongala esiku olyo tuu ndyoka. Egongalo olye tu taamba ko, naakuluntugongalo oya ningi omalongekidho ya kwathele ndje okusila oshimpwiyu uukwanegumbo wandje pambepo.”

Nkene yalwe taya vulu oku ku kwathela

Dhoshili, iilyo yegongalo lyopaKriste otayi vulu okugandja ekwatho momikalo odhindji. Pashiholelwa, Margarita pethimbo mpoka okwa li e na okukonga iilonga. Uukwanegumbo wumwe megongalo owa li we mu kwathele okusila oshimpwiyu oyana ngele ya zi kosikola uuna sha pumbiwa.

Margarita okwa ti: “Ohandi pandula unene ngele aamwatate naamwameme taya yi pamwe nangame naanona yandje muukalele.” Mokuninga ngaaka, iilyo yegongalo otayi kwathele “mokuhumbata omitenge” dhayakwawo nokungawo otaya gwanitha po “ompango yaKristus.”—Gal. 6:2.

Mboka taya mono iihuna omolwokuyona kwayalwe ohaya kala ya pandula ngele taya kwathelwa. Monique ngoka omusamane gwe e mu thigi po nokwe mu thigile okakalata ke na oondjo dhoodola dhaNamibia 110 000 naanona ye li yane, okwa ti: “Aamwatate naamwameme yopambepo oya li ye hole ndje. Ando kandi shi kutya ondi li monkalo ya tya ngiini, ando oya li inaaya kwathela ndje. Onda mono nkene Jehova a pe ndje aamwatate ye li nawa kaaku na we mboka ya li ya ambidhidha aamwandje. Onda li nda nyanyukwa okumona nkene aamwandje taya koko pambepo kekwatho lyaamwatate mboka. Uuna nda pumbwa omayele aakuluntugongalo oya li haya kwathele ndje. Uuna nda pumbwa ngoka tandi popi naye oya li haya pulakene.”—Mark. 10:29, 30.

Kuume omunahole oha mono shili kutya uunake kee na okupopya kombinga yoshimoniwa oshiwinayi. (Omuuv. 3:7) Margarita okwa ti: “Kakele owala kokupopya omaupyakadhi gandje, olundji onda li handi nyanyukilwa okupopya naamwameme megongalo epe kombinga yiilonga yokuuvitha, yaakonakonimbiimbeli noyaanona yetu. Onda pandula sho ya kwathele ndje ndi dhimbwe iinima yonale nokutameka nonkalamwenyo ompe.”

Yanda ombepo yokushunithila uuwinayi

Omathimbo gamwe, otashi vulika wu kale wu uvite nayi omolwuupyakadhi mboka to mono we etithwa keyono lyakuume koye. Ngele owe etha omadhiladhilo ngoka ga kale mungoye, otaga vulu okuyona po etokolokoto lyoye okukala omudhiginini kuJehova. Pashiholelwa, otashi vulika wu kale wa hala okushunithila uuwinayi kuume koye ngoka kee shi omudhiginini.

Ngele owa mono kutya owa hala oku mu shunithila uuwinayi, oshi li nawa okutala koshiholelwa shaJosua naKaleb. Aalumentu mboka aadhiginini oya li ya tula oomwenyo dhawo moshiponga opo ya ka ndaadhe Evi lyEuvaneko. Ondaadhi dhimwe kadha li dhi na eitaalo lya kola nodha li dha ningitha aantu kaaya vulike kuJehova. Yamwe yomAaisraeli oya li nokuli ya hala ya dhenge Josua naKaleb nomamanya sho ya li taya kambadhala okuladhipika oshigwana shi kale shi inekela muJehova. (Num. 13:25–14:10) Josua naKaleb oya li ya kala nokweendagula mombuga uule woomvula 40, hamolwokuyona kwawo, ihe omolwoshigwana shaIsraeli.

Nonando Josua naKaleb oya li ya yematela aamwahe inaye ya kwatela onkone omolwuulunde wawo. Oya li ya lenga iilonga yawo yokulongela Jehova. Pehulilo lyokula mombuga omimvo 40, Josua, Kaleb nAalevi oya li ya thiki mEvi lyEuvaneko molwaashoka oyo owala ya li ya hupu po maantu yepipi lyawo.—Num. 14:28-30; Jos. 14:6-12.

Otashi vulika wu mone iihuna okathimbo kontumba omolwokwaahe na uudhiginini kwakuume koye kopandjokana. Ondjokana otashi vulika yi teke notashi vulika wo wu mone iihuna pamaiyuvo nopamahupilo. Ihe pehala lyokweetha wu teke omukumo, dhimbulukwa kutya Jehova oku shi nkene e na okuungaunga naamboka taya yonene owina omakotampango ge, ngaashi owala oshigwana oshitangalali shaIsraeli sha li sha ningilwa mombuga.—Heb. 10:30, 31; 13:4.

Oto vulu okwiidhidhimika

Pehala lyokweetha wu kale wa gwililwa po komadhiladhilo omawinayi, kala to dhiladhila ngaashi Jehova. Jane okwa ti: “Okupulakena kOoshungolangelo noo-Awake! ndhoka dha kwatelwa muungalo ohashi kwathele ndje ndi idhidhimike. Okugongala nako ohaku ladhipike ndje wo noonkondo. Okukala handi kutha ombinga pokugongala kehe osha kwathela ndje ndi dhimbwe omaupyakadhi gandje. Iilonga yokuuvitha nayo oya kwathela ndje wo. Ohandi koleke eitaalo lyandje mokukwathela yalwe ya kale yi itaala muJehova. Okukala ndi na aakonakonimbiimbeli osha kwathela ndje ndi kale handi dhiladhila iinima mbyoka ya simana.”

Monique ngoka a tumbulwa metetekelo okwa ti: “Okukala pokugongala aluhe nokukutha ombinga pandjigilile miilonga yomomapya olundji ngaashi tandi vulu osha kwathela ndje ndi idhidhimike. Uukwanegumbo wetu owa kala wu na ekwatathano ewanawa nosho wo niilyo yegongalo. Okumona iihuna okwa kwathela ndje ndi kale ndi shi uunkundi wandje. Onda li nda makelwa, ihe onda vula okwiidhidhimika omolwekwatho lyaJehova.”

Ngoye oto vulu wo okwiidhidhimikila omamakelo ga faathana. Nonando ohashi kala oshidhigu, kambadhala wu landule omayele gaPaulus ngoka taga ti: “Inatu vulweni okulonga uuwanawa, oshoka ngele itatu seni uunye, nena ethimbo otali ke ya, uuna tatu ka teya iiyimati.”—Gal. 6:9.

[Omanyolo gopevi]

[Ethano pepandja 31]

Mboka ya thigwa po kookuume kawo kopandjokana ohaya pandula mboka haye ya kwathele miilonga yomomapya