“Uuwanawahenda” nawu kale tawu pangele elaka lyoye

“Okana ke ote ka makulile oohapu dhowino, nokelaka lye oku na [uuwanawahenda, NW].”—OMAYEL. 31:26.

1, 2. (a) Aalongeli yaJehova otaya ladhipikwa ya kokeke uukwatya wuni? (b) Oshike tashi ka kundathanwa moshitopolwa shika?

ETUMWALAKA lya kwata miiti ndyoka omukwaniilwa Lemuel gwopethimbo lyonale a li a lombwelwa kuyina, olya li lya kwatela mo oshinima sha simana shi na ko nasha nomukulukadhi gwomikalo omiwanawa. Okwa li a lombwelwa kutya “okana ke ote ka makulile oohapu dhowino, nokelaka lye oku na [uuwanawahenda, NW].” (Omayel. 31:1, 10, 26) Uuwanawahenda owo uukwatya mboka wu na okukala kelaka lyomukiintu omunandunge nosho wo ayehe yalwe mboka ya hala okunyanyudha Jehova Kalunga. (Lesha Omayeletumbulo 19:22.) Uuwanawahenda owu na okukala wi iwetikile mokupopya kwaalongeli yashili yaKalunga.

² Uuwanawahenda oshike? Oolye ye na okuulukilwa uuwanawahenda? Oshike tashi ke tu kwathela tu kaleke elaka lyetu li na “uuwanawahenda”? Ongiini oku shi ninga taku ka guma ekwatathano lyetu niilyo yuukwanegumbo nosho wo nAakriste ooyakwetu?

Uuna ohenda tayi inyengithwa kohole yi na uudhiginini

3, 4. (a) Uuwanawahenda oshike? (b) Ongiini uuwanawahenda wa yooloka ko kohenda yowala nenge kombili yuukuume?

³ Uuwanawahenda owa kwatela mo okukala nohole nosho wo nohenda. Owa kwatela mo ohenda, sha hala okutya, okukala wu na ko nasha nayalwe noku shi ulika moku ya kwathela nomokupopya oohapu dha dhiladhilwa nawa. Molwaashono ohole nayo oshinima sha simana, okuulika uuwanawahenda ohaku pula omuntu a kale e na ko nasha nonkalonawa yayalwe te shi ningi molwohole. Ihe oshitya shelaka lyopetameko shoka tashi ti uuwanawahenda osha hala okutya oshindji shi vulithe ohenda ndjoka tayi inyengithwa kohole. Omuntu ngoka e na uuwanawahenda ohu ulukile gumwe ohenda te shi ningi nehalo e ta kala omudhiginini kuye sigo elalakano lye li na ko nasha nomuntu ngoka lya gwanithwa.

⁴ Uuwanawahenda owa yooloka ko ishewe kohenda momukalo gulwe gwi ili. Ohenda yowala nenge ombili yuukuume otayi vulu nokuulukilwa omuntu ngoka kuu shi nale. Omuyapostoli Paulus nayakwawo yalwe 275 mboka ya li mosikepa ya teka pamwe naye oya li wo yu ulukilwa ohenda yoludhi ndoka kaantu yomokantuntu kaMalta, aantu mboka ya li inaaya tsakaneka nando onale. (Iil. 27:37–28:2) Mepingathano naashoka, uuwanawahenda ohawu ulukilwathana kaantu mboka ye li nale ookuume noye na ekwatathano lya kola.a Shika osha li shu ulikwa sho Aakeni “ya ningi nawa Aaisraeli, sho ya zi kuEgipiti.”—1 Sam. 15:6, KB.

Okutedhatedha nokugalikana okwa pumbiwa shili

5. Oshike tashi ke tu kwathela tu pangele elaka lyetu?

⁵ Okuulika uuwanawahenda mokupopya kwetu kashi shi oshinima oshipu. Omulongwa Jakob okwa nyola kombinga yelaka a ti: “Kaku na nando omuntu gumwe ta vulu okudheula elaka. Olyo uuwinayi waa na evululuko nou udha uuzigo hau lyana.” (Jak. 3:8) Oshike tashi vulu oku tu kwathela tu pangele oshilyo sholutu shika oshidhigu okupangela? Oohapu dhaJesus ndhoka a li a lombwele aawiliki yelongelokalunga yopethimbo lye otadhi tu pe uuyelele moshinima shika. Okwa ti: “Shoka shu udhilila momutima, osho shoka okana take shi popi.” (Mat. 12:34) Opo uuwanawahenda wu pangele elaka lyetu, otwa pumbwa tu kokeke uukwatya mboka moomwenyo dhetu, sha hala okutya, uuntu wetu womeni. Natu ka tale nkene okutedhatedha nosho wo egalikano tali tu kwathele tu ninge ngaaka.

6. Omolwashike tu na okukala hatu tedhatedha nolupandu kiilonga yaJehova yuuwanawahenda?

⁶ Ombiimbeli oya ti kutya Jehova Kalunga ‘omunene muuwanawahenda.’ (Eks. 34:6, KB) Omupisalomi okwi imbi a ti: “OMUWA, evi olyu udha [uuwanawahenda woye, KB].” (Eps. 119:64) MOmanyolo omu na omahokololo ogendji ngoka tagu ulike nkene Jehova a li u ulukile aalongeli ye uuwanawahenda. Okukutha ethimbo lyokutedhatedha nolupandu ‘kiilongankondo’ yaJehova otaku vulu oku tu ningitha tu kale tu na ehalo lyokukokeka uukwatya mbuka wopakalunga.—Lesha Episalomi 77:12.

7, 8. (a) Oshilonga shuuwanawahenda shini Jehova a li a longele Lot nuukwanegumbo we? (b) David okwa li u uvite ngiini shi na ko nasha nuuwanawahenda mboka Kalunga a li e mu ningile?

⁷ Pashiholelwa, dhiladhila kombinga yankene Jehova a li a hupitha omutekulu gwaAbraham Lot pamwe nuukwanegumbo we sho a li a hanagula po oshilando Sodom moka ya li ya kala. Sho ethimbo lya li popepi, aayengeli mboka ya li ye ya kuLot oya li ye mu ladhipike a kuthe uukwanegumbo we yo ya thige po oshilando neendelelo. Ombiimbeli otayi ti: “Sho a li ta kakadhala, [aayengeli] oye mu kwata mokwooko, nomukadhi noyanakadhona yaali, e taye ya pititha mo moshilando.” Mbela omitima dhetu inadhi gumwa ngaa koshilonga shika shehupitho noinatu inyengithwa tu zimine kutya osha li euliko lyuuwanawahenda waKalunga?—Gen. 19:16, 19.

⁸ Dhiladhila wo koshiholelwa shomukwaniilwa David gwaIsraeli shonale, ngoka i imbi eimbilo tali ti: “[Jehova] ota dhimi po oondjo dhandje nota aludha uuvu wandje awuhe.” David ka li tuu a pandula sho a li a dhiminwa po omolweyono lye naBatseba! Okwa li a tanga Jehova ta ti: “Ngaashi uule wokuza pevi okuya kegulu, osho sha tya uunene [wuuwanawahenda we, KB] kumboka haye mu simaneke.” (Eps. 103:3, 11) Okutedhatedha komanyolo ngaka galwe ohashi udhitha omitima dhetu olupandu lwokupandula Jehova omolwuuwanawahenda we nohashi tu inyengitha tu mu tange noku mu pandula. Mokukala ngaa tu na olupandu olundji komutima, osho ngaa tashi ke tu inyengitha tu holele Kalunga kashili.—Ef. 5:1.

9. Aalongeli yaJehova oye na etompelo lini lya simanenena lyokuulika uuwanawahenda mokukalamwenyo kwawo kwakehe esiku?

⁹ Iiholelwa yopamanyolo otayi ulike kutya Jehova ohu ulike uuwanawahenda we, sha hala okutya, ohole ye yi na uudhiginini kwaamboka ye na nale ekwatathano ewanawa naye. Ongiini mbela shi na ko nasha naamboka kaaye na ekwatathano lya tya ngaaka naKalunga omunamwenyo? Mbela Kalunga oku na onyanya nayo nenge kee na ohenda nayo? Hasho nando. Lukas 6:35 ota ti: “Kalunga oye omwaanawa kumboka ihaa pandula naamboka aakolokoshi.” Natango, Mateus 5:45 ota ti: “Etango lye ohe li pitithile aawinayi naawanawa, nomvula ye ohe yi lokithile aayuuki naalunde.” Manga twa li inaatu ilonga oshili nokukatuka metsokumwe nayo, Kalunga okwa li e tu nine ohenda yowala. Ihe tu li aalongeli ye, ohe tu ulukile ohole ye yashili, sha hala okutya, uuwanawahenda we washili. (Lesha Jesaja 54:10.) Mbela katu na tuu olupandu lwaashoka! Kali shi tuu etompelo ewanawa lyokuulika uuwanawahenda mokupopya kwetu nosho wo mokukalamwenyo kwetu kwakehe esiku!

10. Omolwashike egalikano li li oshinima sha simanenena opo tu vule okuninga uuwanawahenda wu kale uukwatya wetu?

¹⁰ Oshinima sha simanenena shoku tu kwathela tu kokeke uuwanawahenda osho uuthembahenda wegalikano. Otatu vulu okukokeka uuwanawahenda momitima dhetu ngele tatu etha tu inyengithwe kombepo ondjapuki yaJehova. Omukalo gu ukilila opo tu mone ombepo ndjoka ogwo oku yi pula megalikano. (Luk. 11:13) Osho opala tu kale nokupula lwiikando megalikano tu pewe ombepo yaKalunga nokutaamba ko ewiliko lyayo. Eeno, okutedhatedha nokugalikana okwa pumbiwa shili opo tu kale tu na uuwanawahenda mokupopya kwetu.

Aaihokani naya kale haya popi nohenda

11. (a) Otu shi shi ngiini kutya Jehova okwa tegelela aasamane yu ulukile aakulukadhi yawo uuwanawahenda? (b) Omomukalo guni ompango yi na ko nasha nuuwanawahenda tayi vulu okukwathela omusamane a pangele elaka lye?

¹¹ Omuyapostoli Paulus okwa kumagidha aalumentu a ti: “Holeni aakiintu yeni, naanaa ngashika Kristus e hole egongalo lye nokwi igandja meso omolwalyo.” (Ef. 5:25) Paulus okwa li wo e ya dhimbulukitha shoka Jehova a li a lombwele Adam naEva. Okwa nyola a ti: “Omulumentu oku na okuthiga po he nayina e ti ihanganitha nomukiintu gwe, ayehe yaali notaa ningi omuntu gumwe.” (Ef. 5:31) Osha yela kutya Jehova okwa tegelela aasamane ya kale aadhiginini kaakulukadhi yawo, taye ya ulukile aluhe uuwanawahenda. Omusamane ngoka elaka lye hali pangelwa kohole yashili iha yambulula omapuko gomukulukadhi gwe montaneho yaantu nenge e mu popye nondhino. Oha kala a nyanyukwa oku mu tanga. (Omayel. 31:28) Ngele okwaahauvathana okwa holoka po omolwomatompelo gontumba, uuwanawahenda otawu ki inyengitha omusamane a keelele elaka lye kaali shundule omukulukadhi gwe.

12. Ongiini okupopya kwomukulukadhi taku ku ulika kutya uuwanawahenda ohawu pangele elaka lye?

¹² Uuwanawahenda owu na wo okupangela elaka lyomukulukadhi. Okupopya kwe kaku na okukala kwa nwethwa mo kombepo yuuyuni. Mokukala a ‘simaneka omulumentu gwe,’ ohe mu popile muuwanawa montaneho yaantu notashi ka ningitha aantu ya kale ye mu simaneka shi vulithe shito. (Ef. 5:33) Molwaashono ina hala aanona ya kale kaaye na we esimaneko lyokusimaneka he yawo, ota ka henuka okwaahalongela kumwe nomaetopo ge nenge okupataneka shoka ta popi komeho yaanona. Oha kandula po iinima ya tya ngaaka ngele ye li oyo ayeke. Ombiimbeli otayi ti: “Egumbo ohali tungwa po kowino yomukiintu.” (Omayel. 14:1) Egumbo lye otali kala ehala ewanawa kuukwanegumbo auhe.

13. Omoshinima shini kondandalunde uuwanawahenda wu na okupangela okupopya kwetu, nongiini tawu vulu oku shi ninga?

¹³ Nokuli nando ongele ye li oyo ayeke megumbo lyawo, aaihokani oye na okutsikila okulongitha elaka lyawo momukalo ngoka tagu ulike kutya oya simanekathana. Paulus okwa nyola a ti: “Omu na okweetha iinima mbika ayihe: ondjahi, uugeyi nuuwinayi auhe. Momakana geni inamu pita we omasheko nenge oohapu oombwinayi.” Okwa gwedha ko a ti: “Kaleni mu na olukeno, ohenda, eifupipiko, ombili neidhidhimiko. . . . Kumbika ayihe gwedhii ko ohole, oshoka oyo epaya tali vulu okumangela iinima ayihe kumwe.” (Kol. 3:8, 12-14) Uuna aanona yi igilila okuuva oohapu dhopahole nodhohenda megumbo, itaya ka kala owala ya nyanyukwa ihe otaya ka holela wo aavali yawo mokupopya kwawo.

14. Omomukalo guni omitse dhuukwanegumbo tadhi vulu okulongitha elaka lyadho okuhekeleka mboka ye li metonatelo lyadho?

¹⁴ Omupisalomi okwa li a nyola kombinga yaJehova a ti: “Uuwanawahenda woye nawu hekeleke ndje.” (Eps. 119:76, NW) Omukalo gwa tongomana moka Jehova ha hekeleke oshigwana she omoku shi kumagidha nomoku shi wilika. (Eps. 119:105) Ongiini omitse dhuukwanegumbo tadhi vulu okumona uuwanawa moshiholelwa shaTate yetu gwomegulu nokulongitha elaka lyawo ya hekeleke mboka ye li metonatelo lyawo? Otaya vulu oku shi ninga moku ya pa ewiliko ndyoka lya pumbiwa nosho wo moku ya ladhipika. Ekonakono lyUukwanegumbo lyokongulohi inali gandja tuu ompito yi li nawa opo omaukwanegumbo ga mone eliko lyopambepo!—Omayel. 24:4.

Ulukila ooitaali ooyakweni ohole yi na uudhiginini

15. Ongiini aakuluntugongalo nayalwe mboka ya pyokoka pambepo taya vulu okulongitha elaka lyawo okugamena yalwe megongalo?

¹⁵ Omukwaniilwa David okwa li a galikana a ti: “Ote gamenwa [kuuwanawahenda, NW] nokuudhiginini woye.” (Eps. 40:11) Ongiini aakuluntugongalo Aakriste nosho wo yalwe megongalo mboka ya pyokoka pambepo taya vulu okuholela Jehova moshinima shika? Okulongitha elaka lyetu tu ukithe eitulomo kuuyelele wopamanyolo oshi li lela oshilonga shuuwanawahenda.—Omayel. 17:17.

16, 17. Omomikalo dhimwe dhini tatu vulu okuulika kutya okupopya kwetu otaku pangelwa kuuwanawahenda?

¹⁶ Oshike tu na okuninga ngele otwa mono Omukriste u uka mondjila ndjoka yi li ompinge nomakotampango gOmbiimbeli? Mbela uuwanawahenda itawu ke tu inyengitha tu longithe elaka lyetu tu kambadhale oku mu pukulula? (Eps. 141:5) Ngele otwa tseya kutya omwiitaali omukwetu okwa yona eyono lya kwata miiti, ohole yi na uudhiginini otayi ke tu inyengitha tu ladhipike omuyoni i “ithane aakuluntu yegongalo, ye mu galikanene noye mu gwayeke omagadhi medhina lyOmuwa.” (Jak. 5:14) Ngele omuyoni ina ya kaakuluntugongalo, itashi ka kala pahole nopahenda ngele inatu shi lopota. Yamwe mokati ketu otashi vulika ya kale ya teka omukumo, ye na ezaza, ya gwililwa po komaipulo kutya yo kaye na oshilonga shasha nenge ya uvithwa nayi koshinima shontumba. Omukalo omwaanawa kutse ngoka tatu vulu okuulika kutya uuwanawahenda otawu pangele okupopya kwetu ogwo ‘okupopya nehekeleko noomwenyo dha polimana.’—1 Tes. 5:14, NW.

¹⁷ Otu na okwiinyenga ngiini ngele otu uvu omahokololo kombinga yooitaali ooyakwetu ngoka taga popiwa kaatondi yaKalunga? Pehala lyokukala twa limbililwa uudhiginini waamwatate, otatu ka kala inaatu taamba ko omapopyo ga tya ngaaka nenge tu pule ngoka ta lundile aamwatate ngele oku na uushili kutya opu na ngaa ekankameno lyaashoka a popi, ngele oku li omuntu ta vulu okupopiwa naye. Ngele aatondi yoshigwana shaKalunga ya hala okutseya kutya aamwatate Aakriste ohaya kala peni opo ye ya etele uupyakadhi wontumba, ohole yi na uudhiginini yokuhola aamwatate otayi ke tu inyengitha kaatu gandje uuyelele mboka.—Omayel. 18:24.

Omuntu ngoka e na “uuwanawahenda ota kala e na omwenyo”

18, 19. Omolwashike uuwanawahenda kaawu na okuza ko kelaka lyetu mokuungaunga naalongelikalunga ooyakwetu?

¹⁸ Ohole yi na uudhiginini oyi na aluhe okukala yi iwetikile mokuungaunga kwetu naalongeli yaJehova ooyakwetu. Nokuli nuuna tu li moonkalo oondhigu, uuwanawahenda kawu na okuza ko kelaka lyetu. Sho uuwanawahenda woyana yaIsraeli wa li wa ningi wa “fa omume ndjoka tayi kaha ongulangula,” Jehova okwa li a yemata. (Hos. 6:4, 6) Mepingathano naashoka, Jehova oha kala a nyanyukwa ngele tatu kala nuuwanawahenda kehe ethimbo. Natu tale kunkene ha laleke nuuyamba mboka taye wu lalakanene.

¹⁹ Omayeletumbulo 21:21 otaga ti: “Omulalakaneni [gwuuyuuki nuuwanahenda, NW] ota kala e na omwenyo, uuyuuki nesimano.” Gamwe gomomalalekonuuyamba ngoka omuntu ngoka ta ka mona ogo kutya ota ka mona omwenyo, sha hala okutya, kaku shi okukala po okuhupi ihe omwenyo kaagu na ehulilo. Jehova ohe mu kwathele ‘i imonene okukalamwenyo kwashili.’ (1 Tim. 6:12, 19) Natu kambadhaleni okukala hatu “ulukilathana uuwanawahenda.”—Sak. 7:9, NW.

[Enyolo lyopevi]

Oto vulu okuyelitha?

• Uuwanawahenda oto wu fatulula ngiini?

• Oshike tashi ke tu kwathela tu kaleke uuwanawahenda kelaka lyetu?

• Ongiini aaihokani taya vulu okuulukilathana ohole yashili mokupopya kwawo?

• Oshike hashi ulike kutya uuwanawahenda owu li kelaka lyetu mokuungaunga nooitaali ooyakwetu?

[Ethano pepandja 25]

David okwa li a tanga uuwanawahenda waJehova

[Ethano pepandja 26]

Mbela ohamu ningi ngaa Ekonakono lyUukwanegumbo lyokongulohi pandjigilile?