Omolwashike aantu haya ningi iinima iiwinayi?

OPU na oshinima shimwe shoka ihaashi patanekwa kaantu oyendji: Aantu atuhe inatu gwanenena, onkee ohatu ningi omapuko nohatu ningi iinima mbyoka tashi vulika tu ki ipe uusama konima yethimbo. Nonando ongaaka, mbela shika otashi fatulula kutya omolwashike hapu ningwa iilonga oyindji iiwinayi iinene niishona mbyoka hatu mono nohatu uvu kombinga yayo konyala esiku kehe, kutya nduno opaumwene nenge omiikundaneki?

Nonando aantu inaya gwanenena, oyendji oya zimina kutya opu na omithikampango dhontumba dhopamikalo ndhoka kaadhi na okutaagulukwa nosho wo kutya aantu otaya vulu okukala inaaya longa iilonga iiwinayi. Otashi vulika oyendji taya ka zimina wo kutya opu na eyooloko pokati kokupopya iifundja mokwaaha shi sha nokupopya iifundja shu ukilila, nopokati kokumonitha omuntu oshiponga inaashi tegelelwa nokudhipaga omuntu sha longekidhwa. Natango, iilonga tayi halukitha ohayi longwa olundji kaantu mboka taya monika ya fa yowala noyomomudhingoloko. Omolwashike aantu haya ningi iinima iiwinayi?

Ombiimbeli otayi tu pe uuyelele moshinima shika. Otayi ulike paushili omatompelo ga simana kutya omolwashike aantu hayi ihumbata momikalo ndhoka ye shi kutya omiwinayi. Natu tale kwaashoka tayi ti.

▪ “Ehepeko hali goyapaleke omunandunge.”—OMUUVITHI 7:7, OMBIIMBELI YOSHINDONGA YO-1954.

Ombiimbeli otayi ulike kutya omathimbo gamwe aantu ohaya kala yu uvite ya ningithwa koonkalo dhawo ya ninge shoka ando kaaya li taya ka ninga. Yalwe ohaya longo iilonga yomiyonena mokukambadhala okweeta po shoka yu uvite kutya osho ekandulopo lyomaupyakadhi nokwaahenuuyuuki. Embo lyedhina Urban Terrorism otali ti: “Poompito odhindji, einyengotompelo lyotango lyoshikulo olyo molwaashoka sha yematekwa koonkalo dhopapolotika, dhopankalathano nosho wo dhopamahupilo ihaadhi vulu okupangelwa.”

▪ “Mohole yeliko omo tamu zi uukolokoshi auhe.”—1 TIMOTEUS 6:10.

Aantu yamwe ohaya ti kutya nokuli nando omuntu na kale omwaanawa ota vulu okuyona po omikalo omiwanawa ngele okwa pewa iimaliwa oyindji. Yamwe mboka taya monika ye li aanambili moonkalo dhesiku kehe ohaya monika ya fa taya lunduluka thiluthilu uuna tashi ya pokulikola nenge pokukanitha oshimaliwa nohaya ningi aawiinayi naageyentu. Dhiladhila komiyonena odhindji ndhoka hadhi etithwa kolwiho, ngaashi okwaanda ko, ekengelelo, ekwatombambyona nosho wo nokuli edhipago.

▪ “Uuna epangulo lyaalongi yuudhudhu itaali endelele okupangulwa, omwenyo gwaana yaantu ogwa fula okulonga uudhudhu.”—OMUUVITHI 8:11.

Enyolo ndyoka otali ulike kegamo lyaantu lyokudhiladhila kutya otaya vulu okuninga kehe shimwe ya hala ngele kaye wetike kwaamboka ye na oonkondopangelo. Shika oshoshili kaantu mboka haya hingi ondapo ya pitilila koteya, okufukila momakonakono, okuyaka iimaliwa yaakwashigwana niinima yilwe iiwinayi yi vule mbyoka. Ngele ompango ihayi tulwa miilonga nenge kaapu na uumbanda wokukwatwa, aantu mboka haya vulika kompango shito otashi vulika ye wete taya vulu okuninga shoka kaaya li ye na oku shi ninga. Oshifo shedhina Arguments and Facts osha ndhindhilika kutya “molwaashoka mboka haya longo omiyonena olundji ihaya geelwa, osha fa hashi nwetha mo aakwashigwana yowala ya longe omiyonena ndhoka dhinyanyalitha unene.”

▪ “Omuntu oha makelwa kuuhalu we mwene, mboka tau mu hekaheka e tau mu yulu. Uuhalu ngele wa ningi uusimba, otau vala uulunde.”—JAKOB 1:14, 15.

Aantu ayehe otashi vulika ya kale ye na omadhiladhilo omawinayi. Kehe esiku ohatu homonwa nomaetopo nomamakelo ogendji gokuninga shoka sha puka. Pomathimbo gonale gOmbiimbeli, Aakriste oya li ya lombwelwa taku ti: “Emakelo ndyoka lye mú adha, olyo tuu ndyoka hali adha aantu ayehe.” (1 Aakorinto 10:13) Nonando ongaaka, oshizemo oshi ikwatelela kehogololo ndyoka omuntu ta ningi, sha hala okutya, okweetha mbala okudhiladhila kombinga yedhiladhilo ewinayi nenge oku li etha li koke. Enyolo ndyoka li li pombanda montumwafo yaJakob ya nwethwa mo otali tu londodha kutya ngele omuntu okwe etha omahalo ga puka ga ‘simbapale,’ osha yela kutya iilonga iiwinayi oyo tayi ka landula ko.

▪ “Enda pamwe naanawino, u likole owino, ihe ngoka ta kala paagoya, ota likola uuwinayi.”—OMAYELETUMBULO 13:20.

Mboka hatu endathana nayo ohaye tu nwetha mo, kutya nduno omomukalo omwaanawa nenge omwiinayi. Onkee ano, olwindji aantu ohaya ningi shoka kaaya li ye na elalakano lyoku shi ninga omolwethiminiko lyookuume, nohashi eta iilanduliko ya nika oshiponga. Melaka lyOmbiimbeli, oshitya ‘omagoya’ itashi ulike kwaamboka kaaye na oondunge, ihe okwaamboka hayi ipwililikile omayele gopandunge gOohapu dhaKalunga. Kutya nduno otu li aagundjuka nenge aakuluntu, ngele inatu hogolola ookuume ketu nosho wo mboka hatu endathana nayo pandunge, sha hala okutya, pamithikampango omiwanawa dhOmbiimbeli, otatu vulu okutegelela ‘okulikola uuwinayi.’

Ovelise ndjika noonkwawo dhilwe odhindji mOmbiimbeli otadhi yelitha sha yela kutya omolwashike aantu, tashi vulika mboka ye li aakwashigwana yowala, ya ninge uuwinayi nenge nokuli iinima tayi halukitha. Nonando otashi tu kwathele okuuva ko shoka hashi inyengitha aantu ya ninge iinima iiwinayi, mbela opu na ngaa etegameno kutya onkalo otayi ka lundulukila kuuwanawa? Eeno, omolwaashoka Ombiimbeli itayi yelitha owala kutya omolwashike aantu haya longo iilonga iiwinayi, ihe otayi uvaneke wo kutya iilonga ya tya ngawo itayi ka kala po we. Mbela omauvaneko ngaka ogeni? Mbela iinima ayihe iiwinayi muuyuni onayi ka hule po shili? Oshitopolwa tashi landula otashi gandja omayamukulo.