Iilonga iiwinayi otayi ka hula po shili

KALUNGA okwe tu pa Oohapu dhe dha nwethwa mo, ndhoka tadhi gandja omatompelo kutya omolwashike aantu haya ningi iinima iiwinayi. Okwe tu pa wo emanguluko lyokuninga omatokolo noonkondo dhokwiipangela tse yene, nokwe shi ningi tashi vulika tu hogolole kaatu ninge iinima iiwinayi. (Deuteronomium 30:15, 16, 19) Molwaashoka iinima mbika otu yi shi, otatu vulu okudhimbulula mo omagamo kehe omawinayi ngoka tu na nokukatuka oonkatu dha pumbiwa kaatu kale we nago. Lwahugunina, okwiidhilika iilonga iiwinayi otaku ke tu nyanyudha nokunyanyudha wo mboka ye li putse.—Episalomi 1:1.

Nonando ongaaka, kashi na nduno mbudhi kutya otu kambadhale shi thike peni okukondjitha kaatu ninge iinima iiwinayi tu li oohandimwe, uuyuni otawu tsikile okuhepekwa kiilonga iiwinayi mbyoka tayi longwa kaantu ooyakwetu. Ombiimbeli otayi tu londodha tayi ti: “Dhimbulukwa aluhe kutya komasiku [gahugunina, KB] otaku ke ya omathimbo omadhigu.” Opo yi ulike kutya oshike sha ningitha omasiku ga kale “omadhigu,” otayi popi tayi ti: “Aantu otaa ka kala nokwiihola, ye hole eliko, aainomi noye hole uuntsa. Otaa ka kala aasheki, ihaa vulika kaakuluntu yawo, ihaa pandula noya pota. Oyo otaa ka kala yaa na olukeno nohenda, haa lundilathana, aapwidhi naadhudhu; otaa ka kala ye tonde uuwanawa. Oyo otaa kala aakotokeli, ihaa yawala, haa tuwalala noye hole olundundu peha lyokuhola Kalunga. Oyo otaa ka kala ya fa haa simaneke Kalunga, ihe otaa idhimbike oonkondo dhe. Yanda aantu ya tya ngaaka.”—2 Timoteus 3:1-5.

Otashi vulika wa ndhindilika uutumbulilo ‘omasiku gahugunina’ metumbulo lyopaupolofeti ndyoka lya tothwa mo pombanda. Otawu ti shike kungoye? Aantu oyendji oyu uvite ko kutya ngele taku popiwa ‘omasiku gahugunina’ otashi ti oshinima shontumba shi li pokuhula po. Oshike shi li pokuhula po? Ndhindhilika shoka Kalunga tu uvaneke mOohapu dhe.

Aakolokoshi otaya ka hanagulwa po thiluthilu.

“Aadhudhu otaa ka kana po mbala; nando u ya konge, ito ya mono. Aaifupipiki otaa ka thigulula evi notaa ka mona uulinawa nombili.”—EPISALOMI 37:10, 11.

“OMUWA ota gamene ayehe mboka ye mu hole, ihe aakaanakalunga ayehe ote ya dhimi po.”—EPISALOMI 145:20.

Itapu ka kala we omathiminiko.

“Ota hupitha ohepele ngo te mu lilile, omuthiminikwa ngo kee na ngo te mu kwatha. Ote ya hupitha methiminiko nomepiyagano.”—EPISALOMI 72:12, 14.

“Eshito alihe tali ka manguluka muupika [weyonuko], li ye memanguluko nomeadhimo lyaana yaKalunga.”—AAROMA 8:21.

Oompumbwe dhaantu dhopalutu otadhi ka gwanithwa po.

“Kehe gumwe ota ka kala nombili mokati komiviinu nomikwiyu dhe, nokape na ngoka te mu halutha we.”—MIKA 4:4.

“Otaa ka tunga omagumbo, opo ya kale mo yo yene. Otaa ka tsika omiviinu, opo ya lye iiyimati yadho yo yene. Itaa ka tunga omagumbo, nayalwe taa kala mo, nenge ya tsike sha, nayalwe taa ka lya iiyimati. Omasiku gaantu yandje otaga ka kala omale ga fa omasiku gomuti. Aahogololwa yandje otaa ka kala ko olule nokunyanyukilwa iilonga yiikaha yawo yene.”—JESAJA 65:21, 22.

Otapu ka kala uuyuuki.

“Ano, Kalunga itu uthile ando aahogololwa mboka haye mu ithana omutenya nuusiku . . . ? Otandi mú lombwele, ote ya uthile mbalambala.”—LUKAS 18:7, 8.

“OMUWA oku hole shoka shu uka noihe etha aantu ye aainekelwa. Ote ya gamene sigo aluhe.”—EPISALOMI 37:28.

Okwiihola mwene otaku ka pingenwa po kuuyuuki.

“Aakwuuyuni otayi ilongo uuyuuki.”—JESAJA 26:9, KB.

“Tse otwa tegelela shoka Kalunga e shi uvaneka: egulu epe nevi epe, moka tamu ka kala uuyuuki.”—2 PETRUS 3:13.

Aantu otaya lunduluka nokuli nongashingeyi

Nopwaahe na omalimbililo, atuhe otatu ka nyanyukilwa omauvaneko ga tya ngaaka. Ihe eshilipaleko lini li li po ndyoka tali ulike kutya otaga ka gwanithwa? Muushili wo wene, otu na ngashingeyi uunzapo kutya omauvaneko gaKalunga otaga ka gwanithwa. Uunzapo mbuka owuni? Owo uushili kutya aantu omamiliyona muuyuni auhe kunena oye shi pondola nale okweekelahi omaukwatya gokwiihola mwene, gokukala nomikalo dha nyata, nenge gokukala nelongitho lyoonkondo noyi ilonga okukala aanashili, aanambili nosho wo aanahenda. Kunena, Oonzapo dhaJehova dhi vulithe pomamiliyona gaheyali, odhi li aamwayinathana yopaigwana mboka ya sinda uukwamuhoko, uukwashigwana, uukwapolotika nosho wo omayooloko gopamaliko, ngoka ga kala nokweeta uutondwe owundji, elongitho lyoonkondo nosho wo etilohi lyombinzi momukokomo gwondjokonona ayihe.a Omalunduluko ga tya ngaaka taga ningwa kunena otage eta ekankameno lya kola lyokwiitaala kutya omauvaneko gaKalunga otaga ka gwanithwa apuhe inaashi monika nando onale.

Ihe oshike hashi etitha omalunduluko ga tya ngawo? Eyamukulo otali adhika meuvaneko lilwe lyOmbiimbeli ndyoka lya nyolwa komupolofeti Jesaja. Okwa nyola a ti:

“Embungu otali ka kala pamwe nokanzi, nongwe tayi kala ya lala pokakombwena. Okatana nokankoshona otau napele pamwe, nokamati okashona take u litha. . . . Nonime otayi li omwiidhi ya fa ongombe. Okahanona haka yamu taka dhana pomututu gwontoka, nokaputuputu opo ka toyo otaka tsu oshikaha shako kokwena kwepili. Kondundu yandje ondjapuki itaku ka longwa uuwinayi nenge iikolokosha, oshoka evi otali ka udha okutseya OMUWA kwa fa omeya ga siikila efuta.”—Jesaja 11:6-9.

Mbela ehunganeko ndika otali hunganeke owala ethimbo uuna iinamwenyo tayi ka kala ya hangana naantu? Aawe, otali kwatele mo oshindji shi vulithe mpoka. Ndhindhilika kutya oshitopolwa shahugunina shoovelise ndhika otashi ulike kutya oshike tashi eta elunduluko ndyoka tali ti: “Evi otali ka udha okutseya OMUWA.” Mbela ontseyo yaKalunga ohayi lundulula omikalo dhiinamwenyo? Hasho nando. Ihe ohayi lundulula aantu! Ehunganeko ndika otali hunganeke kutya mboka ye na omagamo ga fa giinamwenyo, otaye ke ga thiga po notaya ka kala ye na uukwatya wopaKriste molwaashoka oyi ilonga shoka Ombiimbeli tayi longo noye shi tula miilonga.

Natu tale koshiholelwa shaPedro.b Okwa li i itaala kutya okwa li ta kondjele uuyuuki sho a li i imbwanga mumwe nongundu yiikulo. Konima yokudheulwa, okwa li a lombwelwa a mbome po omihandjo dhopolisi. Manga a li ti ilongekidha oku ke shi ninga, okwa li a kwatwa po. Pedro okwa li a kala oomwedhi 18 mondholongo moka a li a tsikile niilonga ye yuunashibotha. Pethimbo mpoka, omukulukadhi gwaPedro okwa li a tameke okukonakona Ombiimbeli nOonzapo dhaJehova. Pedro sho a zi mo mondholongo naye wo okwa tameke okukonakona Ombiimbeli, naashoka a li i ilongo kombinga yaJehova Kalunga osha li she mu inyengitha a ninge omalunduluko omanene miikala ye nosho wo nkene a tala ko onkalamwenyo. Pedro ota ti: “Otandi pandula Jehova oshoka inandi dhipaga nando omuntu gumwe pethimbo lyoomvula nda li oshikulo. Ngashingeyi ohandi longitha egongamwele lyombepo yaKalunga, Ombiimbeli okugandja etumwalaka lyombili yashili nuuyuuki kaantu, ndyoka li li onkundana ombwanawa yUukwaniilwa waKalunga.” Nokuli Pedro okwa li a talele po omihandjo ndhoka a li a longekidha oku dhi hanagula po, opo a vule oku ya uvithila etumwalaka lyombili nosho wo lyuuyuni kaawu na elongithonkondo.

Enwethomo li na oonkondo ndyoka Oohapu dhaKalunga tadhi vulu okukala dhi na kaantu otali tu pe natango omatompelo opo tu kale tu na eitaalo momauvaneko gaKalunga kutya ehulilo lyiilonga ayihe iiwinayi otali ya shili. Eeno, aantu itaya ka ninga we iinima iiwinayi sigo aluhe, ihe otaya ka lundulukila kuuwanawa. Masiku Jehova ota ka kutha po omutameki gwiilonga iiwinayi, Satana Ondiaboli ngoka ha ningitha uuyuni iinima ayihe mbika mokwaahamonika. Ombiimbeli otayi ti: “Uuyuni auhe ou li mepangelo lyomuhindadhi.” (1 Johannes 5:19) Ihe masiku ita ka kala po we. Mboka taya ka kala inaaya hala okweetha omikalo dhawo omiwinayi, nayo itaya ka kala po we. Itashi ka kala tuu shinyanyudha okukala po pethimbo ndyoka!

Oshike omuntu e na okuninga opo a kale e na uushili kutya ota ka mona onakuyiwa ya tya ngaaka? Dhimbulukwa kutya oyo ontseyo ‘yokutseya OMUWA’ ndjoka tayi eta omalunduluko maantu kunena notayi ke eta omalunduluko muuyuni auhe monakuyiwa yi li popepi. Mokumona ontseyo yashili yOmbiimbeli noku yi tula miilonga ngaashi Pedro e shi ningi, nangoye wo oto vulu okukala netegameno lyokukala muuyuni “moka tamu ka kala uuyuuki.” (2 Petrus 3:13) Onkee ano otatu ku ladhipike wu longithe ompito ndjoka yi li po natango wu mone ontseyo yokutseya Kalunga naJesus Kristus, molwaashoka otashi vulu okutya omwenyo gwaaluhe kungoye.—Johannes 17:3.

[Omanyolo lyopevi]

[Oohapu dha simana pepandja 9]

Nangoye wo oto vulu okukala netegameno lyoku ka kala muuyuni “moka tamu ka kala uuyuuki.”—2 PETRUS 3:13