Omolwashike oondjokana odhindji hadhi teka?

“Aafarisayi oye ya [kuJesus] oku mu makela ya ti: ‘Oshu uka tuu, omulumentu ngele ta henge po omukiintu gwe omolwoshinima kehe?’”—Mateus 19:3.

AANTU yamwe mboka ya li ko pethimbo lyaJesus oya li ye mu pula ngele ondjokana otayi vulu ngaa okukalelela nosho wo ngele oyi na okukalelela. Okwa li e ya yamukula a ti: “Inamu lesha nani kutya petameko Omushiti okwe ya shiti omulumentu nomukiintu? ‘Onkee ano omulumentu e na okuthiga po he nayina e ti ihanganitha nomukiintu gwe, ayehe yaali e taa ningi omuntu gumwe.’ Kaye li we yaali, aawe, oyo omuntu gumwe. Ano shono Kalunga e shi tula kumwe, inashi kuthwa kumwe komuntu.”a (Mateus 19:4-6) Osha yela kutya Kalunga okwa lalakanena oondjokana dhi kalelele.

Miilongo oyindji kunena, oondjokana dhi thike lwopoopelesenda 40 ohadhi “kuthwa kumwe,” sha hala kutya, aaihokani ohaya hengethana. Mbela omayele gOmbiimbeli kombinga yondjokana kage na oshilonga shasha? Mbela oondjokana ohadhi teka molwaashoka elongekidho lyadho kaali li nawa?

Tala kethaneko ndika: Aaihokani yopaali oya landa iihauto ya faathana. Aihokani yamwe ohaya kaleke oshihauto shawo monkalo ombwanawa nohaye shi hingi nuukeka. Oshihauto shawo ihashi teka. Aaihokani yalwe kaye na ethimbo lyokukaleka oshihauto shawo monkalo ombwanawa nohaye shi hingi nuuhasha. Oshihauto shawo osha teka noya kala kaaye na we nasho. Mbela epuko olyalye, mbela olyoshihauto nenge olyooyene yasho? Osha yela kutya ooyene yasho oyo ye na epuko.

Sha faathana, sho oondjokana odhindji ihaadhi pondola inashi hala okutya edhikopo lyadho oli na okupewa uusama. Oondjokana omamiliyona ndhoka hadhi pondola ohadhi ulike kutya edhikopo lyondjokana kali na uusama washa. Oondjokana ndhoka ohadhi etele oohandimwe, omaukwanegumbo nosho wo omudhingoloko enyanyu nonkalo ombwanawa. Ihe ondjokana, oyi li naanaa ngaashi ohauto ndjoka ya pumbwa okusilwa oshimpwiyu nokukala hayi pangelwa aluhe opo yi kale po.

Kutya nduno ondjokana yoye oyi na owala omasiku gontumba nenge oomvula omilongo, omayele ngoka Ombiimbeli tayi gandja kombinga yankene aaihokani taya vulu oku yi kaleka po noku yi koleka otaga longo. Tala iiholelwa yimwe pomapandja taga landula.

[Enyolo lyopevi]