Aanona oye na okwiilonga shike kombinga yaKalunga?
“Enyolo kehe olya nyolithwa kOmbepo yaKalunga noli na oshilonga shokulonga oshili, okukumagidha, okupukulula nokuulukila omuntu ondjila yu uka.”—2 TIMOTEUS 3:16.
AANONA oya pumbwa okulongwa oshili kombinga yaKalunga. Openi taya vulu okwiilonga oshili ndjoka? Omembo lya simana noonkondo muuyuni auhe lyopalongelokalunga, Ombiimbeli.
Ombiimbeli oya fa ontumwafo ya za kuKalunga. Montumwafo ndjoka, Kalunga okwa holola uukwatya we nokwa gandja ewiliko lyopamikalo koyana ye ayehe aagundjuka naakuluntu. Tala owala gamwe gomomalongo ngoka ge li mOmbiimbeli nosho wo iiyilongomwa mbyoka nokuli naanona aashona taya vulu okwiilonga muyo.
Kalunga okwa hala tu tseye shike kombinga ye?
◼ Shoka Ombiimbeli tayi longo: “Naye ku tseye kutya ongoye awike [Jehova, NW] Omupangeliawike kombanda yevi alihe.”—Episalomi 83:18.
Oshiilongomwa: Kalunga Omuntu gwolela noku na edhina.
◼ Shoka Ombiimbeli tayi longo: “Omadhiladhilo getu agehe noondjuulukwe dhetu adhihe oku dhi shi. Nge to yi kuye, ote ku taamba.”—1 Ondjalulo 28:9.
Oshiilongomwa: Jehova Kalunga oku na ko nasha natse atuhe, mwa kwatelwa aanona aashona. (Episalomi 10:14; 146:9) Okwa hala tu ilonge kombinga ye.
◼ Shoka Ombiimbeli tayi longo: ‘Inamu ehameka othigwa kehe. Ngele tamu shi ningi, ngame, OMUWA, otandi yi uvu, sho tayi kugile ndje ekwatho.’—Eksodus 22:22-24.
Oshiilongomwa: Jehova oha pulakene komagalikano gaanona nokuli naamboka aashona. Otatu vulu okupopya naKalunga pandjigilile nokuulika omadhiladhilo nomaiyuvo getu gomuule.
◼ Shoka Ombiimbeli tayi longo: “Omalupita nomalupita oya yeleke Kalunga; oya geyitha Kalunga kaIsraeli omuyapuki.”—Omapisalomi 78:41.
Oshiilongomwa: Okupopya nosho wo iilonga yetu ohayi gumu omaiyuvo gaJehova, onkee ano otu na okukala hatu dhiladhila omanga inaatu longa nokupopya sha.
Otu na okuungaunga ngiini naamboka ya yooloka ko kutse?
◼ Shoka Ombiimbeli tayi longo: “Kalunga aantu ayehe ohe ya tala ye thike pamwe. Ngoka he mu tila noha longo shoka shu uka, Kalunga ote mu taamba, na kale ogwomoshigwana sha tya ngiini.”—Iilonga 10:34, 35.
Oshiilongomwa: Ngele Kalunga oha taamba ko aantu yomomaputuko agehe, katu na okukala hatu ningi yalwe okatongo molwaashoka owala olwaala lwawo inaalu fa lwetu nenge omaukwatya gawo gokoshipala.
◼ Shoka Ombiimbeli tayi longo: “Kaleni mwi ilongekidha aluhe okuyamukula kehe ngoka te mú pula okufatulula etegameno ndyoka li li mune. Ihe shi ningeni nombili nesimaneko.”—1 Petrus 3:15, 16.
Oshiilongomwa: Ngele tatu kundathana kombinga yelongelokalunga lyetu, otu na okuulika omataloko getu tu na uushili tatu shi ningi momukalo gwolukeno. Otu na wo okuulika esimaneko kwaamboka omalongelokalunga gawo ga yooloka ko kulyetu.
Otu na okuungaunga ngiini niilyo yuukwanegumbo wetu?
◼ Shoka Ombiimbeli tayi longo: “Aanona, vulikeni aluhe kaakuluntu yeni, oshoka osho oshinakugwanithwa sheni shopakriste nosho opalela Kalunga.”—Aakolossa 3:20.
Oshiilongomwa: Aanona ngele ohaya vulika, shika otashi ulike kutya oye hole aavali yawo noya hala okunyanyudha Kalunga.
◼ Shoka Ombiimbeli tayi longo: “Kwathathaneni, dhiminathanii po oondjo ethimbo kehe, uuna pe na ngoka a ningathana namukwawo. Dhiminathanii po oondjo naanaa, ngashika Omuwa e mú dhimine po.”—Aakolossa 3:13.
Oshiilongomwa: Aantu yalwe, mwa kwatelwa iilyo yomaukwanegumbo getu, otashi vulika ye tu uvithe nayi omathimbo gamwe. Ihe ngele otwa hala Kalunga e tu dhimine po, otu na okukala hatu dhimine po yalwe.—Mateus 6:14, 15.
Omolwashike tu na okukala aanashili naanambili?
◼ Shoka Ombiimbeli tayi longo: ‘Etheni iifundja, nakehe gumwe na lombwele mukwawo oshili.’—Aaefeso 4:25.
Oshiilongomwa: Uuna tatu popi oshili, otatu holele Kalunga notatu mu nyanyudha. Ngele tatu kala tu na iikala yokupopya iifundja, otatu kala ngaashi omutondi gwaKalunga, Ondiaboli, ngoka oye ‘he yiifundja.’—Johannes 8:44; Titus 1:2.
◼ Shoka Ombiimbeli tayi longo: “Shoka mwa hala aantu ye mú ningile, osho ya ningileni wo.”—Mateus 7:12.
Oshiilongomwa: Otu na okuyaalela omaiyuvo, omadhiladhilo nosho wo oompumbwe dhiilyo yomaukwanegumbo getu nayalwe momudhingoloko gwetu. Uuna tatu ulike ‘euvitopamwe,’ yalwe otaye ku ungaunga natse momukalo gwombili.—1 Petrus 3:8; Lukas 6:38.
Ngaashi iiholelwa mbyoka tayi shi ulike, iiyilongomwa mbyoka tayi adhika mOmbiimbeli otayi vulu okukwathela aanona ngele ya koko ya kale haya pandula, ye na esimaneko noye na ondjaalela. Ihe olye mbela e na okulonga aanona iiyilongomwa mbika?