Kala nokweenda pambepo opo wu kale nomwenyo nombili
‘Ihatu ende panyama ihe opambepo.’—ROM. 8:4, KB.
1, 2. (a) Oshiponga shashike hashi vulu okuholoka po uuna omuntu ta hingi, ihe ota piyaganekwa kusha? (b) Uupyakadhi wuni tawu vulu okuholoka po uuna ekwatathano lyomuntu naKalunga tali tengauka?
OMUKWANEPANGELO mombelewa yiiyenditho mIilongo ya Hangana okwa ti: “Opu na iinima oyindji mbyoka hayi piyaganeke aahingi noshinima shoka otashi ende tashi nayipala noonkondo.” Oongodhi dhopeke odho oshinima shimwe shoka hashi vulu okupiyaganeka omuhingi. Aantu oyendji oye shi popya kutya oya li miiponga nenge konyala ya ye mo omolwaahingi mboka taya longitha oongodhi dhopeke sho taya hingi. Osha nika oshiponga noonkondo okukala to hingi ngoye owi ipyakidhila niinima yilwe.
2 Oshinima sha faathana otashi vulu okuningilwa ekwatathano lyetu naKalunga. Omuntu ngoka ekwatathano lye naKalunga tali tengauka, okwa fa owala omuhingi ngoka ihaa vulu okumona iiponga mbyoka tayi vulu okuholoka po uuna ta piyaganekwa kusha. Eitaalo lyetu otali ka nkundipala ngele otwe etha li piyaganekwe. (1 Tim. 1:18, 19) Omuyapostoli Paulus okwa li a londodha Aakriste ooyakwawo muRoma ya angale oshiponga shika a ti: ‘Okukala pamadhiladhilo guuntu otashi eta eso, ihe okukala mewiliko lyombepo otashi eta omwenyo nombili.’ (Rom. 8:6) Mbela Paulus okwa li a hala okutya shike? Ongiini tatu vulu okuyanda “okukala pamadhiladhilo guuntu” nenge gopanyama nokulalakanena ‘ewiliko lyombepo’?
Kaye na ‘okupangulwa’
3, 4. (a) Paulus okwa li a popi kombinga yashike shoka a li ta kondjo nasho? (b) Omolwashike twa pumbwa okukonakona onkalo yaPaulus?
3 Paulus montumwafo ye ndjoka a nyolele Aaroma, okwa popi kombinga yekondjithathano ndyoka li li pokati konyama ye nomadhiladhilo ge. (Lesha Aaroma 7:21-23.) Paulus ka li i iyekelela nenge i iyetela ohenda omolwuulunde mboka. Kakele kaashono, okwa li Omukriste omugwayekwa a pyokoka nokwa li a hogololwa a ninge “omuyapostoli gwiigwana.” (Rom. 1:1; 11:13, NW) Omolwashike Paulus a popi kombinga yuupyakadhi mboka a li ta kondjo nawo?
4 Paulus okwa li a zimine kutya ita vulu okulonga ehalo lyaKalunga momukalo moka a li a hala oku li longa. Omolwashike mbela? Okwa ti: “Aantu ayehe oya yona, kaye na oonkondo dhaKalunga dhoku ya hupitha.” (Rom. 3:23) Molwaashoka Paulus naye oluvalo lwaAdam, okwa li a gumwa kiilanduliko yuulunde yokwaahagwanenena. Molwaashoka atuheni inatu gwanenena, otu li monkalo ya fa ye notwa taalela ekondjo ngaashi ye esiku kehe. Kakele kaashono, opu na iinima oyindji mbyoka tayi vulu okupiyaganeka omadhiladhilo getu noku tu kutha ‘mondjila ndjoka ya thinana tayi fala komwenyo.’ (Mat. 7:14) Paulus okwa li e na etegameno, natse otu na wo okukala tu li na.
5. Openi Paulus a li a mono ekwatho nosho wo epepelelo?
5 Paulus okwa nyola a ti: “Olye ta mangulula ndje . . . ? Kalunga na hambelelwe omolwaJesus Kristus, Omuwa gwetu!” (Rom. 7:24, 25) Paulus okwa popi kombinga yaagwayekwa “mboka ye li muukumwe naJesus Kristus.” (Lesha Aaroma 8:1, 2.) Okupitila mombepo ondjapuki, Jehova okwe ya ningi oyana opo ya kale “aathigululi pamwe naKristus.” (Rom. 8:14-17, KB) Ombepo yaKalunga neitaalo lyawo mekuliloyambo lyaKristus olye ya kwathele ya sindane mekondjo ndyoka Paulus a popi, nomolwaashoka kaye na ‘okupangulwa.’ Oya mangululwa “mepangelo lyuulunde nolyeso.”
6. Omolwashike aapiya ayehe yaKalunga ya pumbwa okuuva ko oohapu dhaPaulus?
6 Nonando Paulus okwa li ta popi Aakriste aagwayekwa, shoka a popi kombinga yombepo yaKalunga nosho wo yekuliloyambo lyaKristus otashi vulu okweetela aapiya yaJehova ayehe uuwanawa kutya nduno oye na etegameno lini. Paulus okwa li a wilikwa kuKalunga a gandje omayele ngoka kAakriste aagwayekwa. Osha simanenena opo aapiya yaKalunga ayehe yu uve ko shoka a popi nokukambadhala ya mone mo uuwanawa.
Nkene Kalunga a “pangula uulunde momuntu”
7, 8. (a) Omeityo lini Ompango ya li ‘onkundi omolwuulunde womuntu’ nenge wonyama? (b) Kalunga okwa pondola shike okupitila mombepo ye ondjapuki nosho wo mekuliloyambo?
7 Montopolwa onti-7 yAaroma, Paulus okwa yelitha kutya aantu inaaya gwanenena otaya pangelwa kuulunde. Montopolwa onti-8 okwa popi kombinga yoonkondo dhombepo ondjapuki. Okwa yelitha nkene ombepo ondjapuki tayi vulu okukwathela Aakriste mekondjo lyawo lyokukondjitha oonkondo dhuulunde opo ya vule okukala metsokumwe nehalo lyaJehova noya kale ya hokiwa kuye. Paulus okwa ti kutya Kalunga okwa pondola okupitila mombepo ye ondjapuki nomekuliloyambo lyOmwana, okuninga shoka Ompango ndjoka ya li ya pewa Moses inaayi vula okuninga.
8 Ompango oya li ya pangula aalunde, molwaashoka inaaya vulika kuyo. Kakele kaashono, aasaaseri aakuluntu mboka ya li ko pethimbo lyOmpango oya li inaaya gwanenena nomayambo ngoka haya ningi kaga li taga vulu okuhulitha po uulunde thiluthilu. Meityo ndyoka Ompango oya li ‘onkundi omolwuulunde womuntu’ nenge wonyama. Ihe sho Kalunga a “tumu Omwana, ngoka e ya molupe lwomuntu omulunde” noku mu gandja e li eyambo, Kalunga okwa “pangula uulunde momuntu,” nokungeyi okwa gwanitha po shoka sha li “sha nyenge ompango.” Kungawo, Kalunga okwa tala ko Aakriste aagwayekwa ye li aayuuki molwaashoka oye na eitaalo tali longo mekuliloyambo lyaJesus. Otaya ladhipikwa kaaye ‘ende panyama, ihe opambepo.’ (Lesha Aaroma 8:3, 4, KB.) Oye na okukala aadhiginini sigo ya mana oondjenda dhawo dhokombanda yevi, opo ya ka mone “oshishani shomwenyo.”—Eh. 2:10.
9. Oshitya “epangelo” nenge ompango shoka sha longithwa mAaroma 8:2 otashi ti shike?
9 Paulus okwa popi wo ‘okupangelwa kombepo’ nosho wo ‘epangelo lyuulunde nolyeso.’ (Rom. 8:2) Shoka osha hala okutya ngiini? Oshitya “epangelo” nenge ompango shoka sha popiwa mpaka itashi ulike koompango dhontumba ngaashi ndhoka dhi li mOmpango ndjoka ya li ya pewa Moses. Embo limwe olya ti: “Oshitya shOshigreka ompango shoka sha popiwa mpaka otashi ti kutya iinima iiwanawa nenge iiwinayi mbyoka aantu haya ningi noye yi tala ko yi li ompango. Otashi gandja wo eityo li na ko nasha nomikalo ndhoka aantu haya hogolola ya landule monkalamwenyo.”
10. Omolwashike tu li kohi yuulunde neso?
10 Paulus okwa nyola a ti: “Uulunde owe etwa muuyuni komuntu gumwe, nuulunde we owe etelele eso. Onkee ano eso olya taandele maantu ayehe, oshoka ayehe oya yono.” (Rom. 5:12) Molwaashoka atuheni otu li oluvalo lwaAdam, otu li kohi yompango yuulunde neso. Uuhalu wetu wopanyama ohawu tu ningitha tu longe shoka tashi yemateke Kalunga notashi fala meso. Paulus montumwafo ye ndjoka a nyolele Aagalati, iikala neihumbato ndyoka okwe li ithana “iilonga yuuhalu wopantu.” Okwa gwedha ko a ti: “Aantu mboka taa longo iilonga ya tya ngeyi, itaa ka thigulula [uukwaniilwa waKalunga, KB].” (Gal. 5:19-21) Aantu mboka oya fa owala mboka haya landula omahalo gawo gopanyama. (Rom. 8:4) Ohaya ningi owala shoka onyama yawo inaayi gwanenena ya hala. Ihe mbela aantu mboka haya hondele, haya longele iikalunga, oompulile nenge haya yono sha kwata miiti oyo owala haya landula omahalo gawo gopanyama? Hasho, molwaashoka iilonga yuuhalu wopantu oya kwatela mo wo efupa, ongeyo, okutopoka moongundu nomiimpaga nuukodhi, iinima mbyoka yamwe ya tala ko yi li omapuko ganathangwa. Mbela opu na ngaa gumwe gwomutse ta vulu okutya ihe ende nandonando panyama?
11, 12. Kalunga okwa ninga po shike e tu kwathele tu sinde ompango yuulunde neso, noshike tu na okuninga opo a kale e tu hokwa?
11 Inatu nyanyukwa tuu sho Jehova e shi ninga tashi vulika opo tu vule okusinda ompango yuulunde neso! Jesus okwa ti: “Osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.” Otatu vulu okukala inaatu geelwa omolwuulunde mboka twa thigulula ngele onkalamwenyo yetu otayi ulike kutya otu hole Kalunga notu na eitaalo tali longo mekuliloyambo lyaJesus Kristus. (Joh. 3:16-18) Otatu vulu okupopya ngaashi Paulus ngoka a ti: “Kalunga na hambelelwe omolwaJesus Kristus, Omuwa gwetu!”
12 Onkalo yetu otayi yelekanithwa nomuntu ta pangwa omukithi omudhigu. Ngele otwa hala okwaaluka thiluthilu, otu na okuninga ngaashi ndohotola te tu lombwele. Nonando okukala tu na eitaalo tali longo mekuliloyambo otaku vulu oku tu mangulula kompango yuulunde neso, otu li natango aalunde noinatu gwanenena. Opo tu kale tu na ekwatathano ewanawa naKalunga notwa hokiwa kuye, otu na okuninga po sha. Paulus okwa popi wo kutya otu na okukala nuupambepo uuwanawa, opo tu aluke komukithi gwokwaahagwanenena.
Ongiini tatu vulu okweenda pambepo?
13. Okweenda mombepo osha hala okutya shike?
13 Ohatu kala nelalakano lyoku ka thika kehala lyontumba ngele tatu ende. Opo tu ende pambepo, otwa pumbwa okuninga ehumokomeho moshili. (1 Tim. 4:15) Otu na okuninga oonkambadhala esiku nesiku tu ende mewiliko lyombepo yaKalunga monkalamwenyo yetu. Kalunga ota ka kala e tu hokwa ngele tatu ‘ende pambepo.’—Gal. 5:16.
14. Aantu mboka haya lalakanene “shoka shopanyama” oye na egamo lyokuninga shike?
14 Paulus okwa popi kombinga yaantu yaali mboka ye na omadhiladhilo taga kondjithathana montumwafo ye ndjoka a nyolele Aaroma. (Lesha Aaroma 8:5, KB.) Oshitya onyama shoka tashi popiwa mpaka itashi ulike kolutu lwomuntu. Oshitya ‘onyama’ mOmbiimbeli ohashi longithwa omathimbo gamwe okuulika kuulunde nosho wo kokwaahagwanenena kwetu. Oshinima shika osho hashi eta ekondjithathano ndyoka hali kala pokati konyama nomadhiladhilo, iinima mbyoka Paulus a popi metetekelo. Ihe mboka haya ‘dhiladhila panyama’ ihaya ningi oonkambadhala ya kondjithe iinima mbyoka ngaashi Paulus. Pehala lyokuninga shoka Kalunga a hala ya longe nosho wo oku shi landula, ohaya kala taya lalakanene owala “shoka shopanyama.” Olundji ohaya kala taya gandja eitulomo keholokopo lyawo nokomahalo gawo gopanyama. Ihe mboka “ye li pambepo” ohaya kala taya dhiladhila kombinga yiinima ‘yopambepo’ nohaye etha Jehova e ya wilike.
15, 16. (a) Okudhiladhila ohaku nwetha mo ngiini iikala yomuntu? (b) Aantu oyendji kunena oye hole iinima yini?
15 Lesha Aaroma 8:6. Manga omuntu inaa ninga sha kutya nduno oshiwanawa nenge oshiwinayi ohe shi dhiladhila tango. Omuntu ngoka ha dhiladhila panyama oha kokeke iikala yopamadhiladhilo nenge omahalo ngoka taga hwahwameke iilonga yopanyama. Omadhiladhilo ge, omahalo ge nosho wo iikala ye ohayi kala ya kwatwa omboko kiinima yopanyama.
16 Aantu oyendji kunena oya kwatwa omboko kushike? Omuyapostoli Johannes okwa nyola a ti: “Iinima ayihe mbyoka yi li muuyuni, inayi za muTate, ihe oyomuuyuni. Iinima mbika oyo uuhalu wopantu okuhola mbyoka aantu taye yi tala notaye yi itangele.” (1 Joh. 2:16) Uuhalu mboka owa kwatela mo onyata yiipala, esimano nosho wo omaliko. Omambo, iifo, iifokundaneki, oomuvi, oopolohalama dhoko-TV nosho wo ointaneta ohayi ulike unene iinima mbyoka, molwaashoka aantu oyendji ohaya dhiladhila kuyo noye yi hole. Ihe okukala “pamadhiladhilo guuntu otashi eta eso” lyopambepo ngashingeyi, nomonakuyiwa eso lyolela. Omolwashike mbela? Omolwaashoka “omuntu ngoka e na omadhiladhilo taga wilikwa [konyama, KB], oku tonde Kalunga. Oshoka iha vulika kOmpango yaKalunga ye ita vulu okuvulika kuyo. Mboka haa vulika [konyama, KB], itaa vulu okwoopalela Kalunga.”—Rom. 8:7, 8.
17, 18. Ongiini tatu vulu okukala mewiliko lyombepo, notashi ke tu etela uuwanawa wuni?
17 Kakele kaashono, ‘okukala mewiliko lyombepo otaku eta omwenyo nombili,’ omwenyo gwaaluhe monakuyiwa nosho wo ombili yokomutima nombili naKalunga. Ongiini tatu vulu ‘okukala mewiliko lyombepo?’ Omokukala aluhe tatu landula ewiliko lyaKalunga nolyombepo ye ondjapuki nokudhiladhila metsokumwe naye. Ngele tatu shi ningi, nena otatu “vulika kOmpango yaKalunga” notwe mu ‘opalela.’ Uuna tatu makelwa, itatu ki ipula kutya natu ninge ngiini. Otatu ka ninga ehogololo lyomondjila ndyoka li li metsokumwe nombepo ye ondjapuki.
18 Onkee ano, osha simanenena tu kale tatu dhiladhila iinima yopakalunga. Shika otatu shi ningi ‘mokukala twi ilongekidhila shoka tu na oku shi ninga,’ mokugalikana aluhe monkalamwenyo yetu, mokulesha Ombiimbeli noku yi konakona, mokugongala nosho wo mokuya muukalele. (1 Pet. 1:13) Pehala lyokweetha iinima yopanyama yi tu piyaganeke, natu kale hatu dhiladhila iinima yopakalunga. Ngele tatu shi ningi, otatu ka kala nokweenda pambepo, notashi ke tu etela omayambeko ogendji, omwenyo gwaaluhe nombili.—Gal. 6:7, 8.
Oto vulu okuyelitha?
• Oshike shoka sha li “sha nyenge ompango,” nongiini Kalunga a li a sindi oshinima shoka?
• ‘Epangelo lyuulunde nolyeso’ oshike, nongiini tatu vulu okumanguluka mulyo?
• Oshike tu na okuninga opo tu kale tatu ‘wilikwa kombepo’?
[Omathano pepandja 12, 13]
Oho ende panyama nenge opambepo?