Oya li yu uvitha nuulaadhi Oohapu dhaKalunga

Aakriste yonale oya li yu uvitha nuulaadhi nonomukumo nonando oya li taya patanekwa. Oya li yu ulike uukwatya mbuka, ngaashi shu ulikwa membo ‘Yandja oundombwedhi nawanawa’ kombinga yOuhamba waKalunga nosho wo membo Jehovah’s Witnesses—Proclaimers of God’s Kingdom. Ngaashi naanaa ooitaali ooyakwetu yonale, natse ohatu galikana Jehova e tu pe ombepo ye noku tu kwathela tu uvithe oohapu dhe nuulaadhi.—Iil. 4:23-31.

Omumwatate gumwe okwa nyola kombinga yiilonga yetu yokuuvitha pethimbo lyIita yotango yUuyuni a ti: “Aapiya yaKalunga oya li ya longo nuudhiginini mokutaandelitha embo etiheyali lyedhina The Finished Mystery inaashi monika nando onale. Mo 1918 opwa li wo pwa gandjwa okafo Onkundana yUukwaniilwa, Onomola 1 mOshiingilisa. Oka landulwa kokafo Onkundana yUukwaniilwa, Onomola 2, taka yelitha kutya omolwashike embo Finished Mystery lya li lyi tondike kaakwanepangelo. Oka li ka landulwa kOnkundana yUukwaniilwa, Onomola 3. Ongundu yaagwayekwa oya li ya taandelitha uufo mboka apuhe. Osha li tashi pula eitaalo nuulaadhi oku shi ninga.”

Kunena, aauvithi yUukwaniilwa aape ohaya dheulwa muukalele, ihe nale kasha li hashi ningwa aluhe. Omumwatate gumwe Omupoole ngoka a li muAmerika okwa popi kombinga yuukalele we mboka a li a tameke oshikando shotango mo 1922, a ti: “Onda li nda konkola pomweelo gwondohotola yimwe, nonando kanda li ndi shi nkene ndi na okugandja iileshomwa yetu nokanda li ndi shi okupopya nawa Oshiingilisa. Omupangi okwe egulula po. Oshinima shoka ihandi shi dhimbwa nando, molwaashoka onda li nda tuntukwa nonando onda li nda tila. Manga tandi patulula ondjato yandje, omambo gandje agehe oga gwile poompadhi dhomupangi. Kanda li ndi shi kutya nandi tye shike, ihe onda li nde mu pe oshileshomwa. Sho nda zi po puye, onda li ndi na uulaadhi nonda li ndi uvite nda lalekwa nuuyamba kuJehova. Onda li nda gandja iileshomwa oyindji esiku ndyoka miilonga yepandaanda.”

Omumwameme gumwe okwa ti: “Mo 1933 lwaampono aamwatate oyendji oya li haya longitha ohauto yomambako mokugandja etumwalaka lyUukwaniilwa.” Oshikando shimwe okwa li tu uvitha pamwe nomusamane nomukulukadhi gwe moshitopolwa shimwe shi li koondundu muAmerika. Okwa ti: “Omumwatate okwe tu thigi mondoolopa e ta yi nohauto ye ndjoka ya tulwa omambako koondundu. Okwa tameke okudhana etumwalaka ndyoka lya kwatelwa mokangalo, nolya li tali inyenge lya fa tali zi megulu. Aantu mondoolopa oya li ya kambadhala okukonga omumwatate, ihe inaye mu mona nando. Okangalo sho ka pu ko, otwa li twi ithana aantu notwe ya pe uunzapo. Onda li nda longo niihauto yilwe iyali ya tulwa omambako, nonando aantu oyendji kaya li ya hala okupulakena, etumwalaka ndyoka oya li ye li uvite sho ye li momagumbo gawo. Eeno, Jehova ohe tu ulukile omikalo dhu uka ndhoka tu na okulongitha pethimbo lyo opala. Opo tu dhi longithe, otwa pumbwa uulaadhi. Omikalo ndhoka ohadhi pondola aluhe nohadhi simanekitha edhina lyaJehova.”

Momumvo 1930 nasha nosho wo 1940 nasha, oongalamathona niipopiwa yOmbiimbeli ya kwatwa muungalo oya li ya longithwa muukalele. Omumwameme gumwe okwa hokolola a ti: “Omumwameme omugundjuka okwa li ta longo egumbo negumbo ta longitha ongalamathona. Ihe pegumbo limwe, omulumentu mwene gwegumbo okwa li a geye e ta thanga ko ongalamathona kohauto. Ihe puungalo inapu tatuka nando okamwe. Aalumentu yatatu mboka ya li taya li omwiha mololi ya thikama oya mono shoka sha ningwa po, oyi ithana omumwameme ngoka e ya dhanene ko okangalo noya li ya taamba iileshomwa. Shika osha li shu uvitha nawa omumwameme ngoka a li a yemata.” Ano otashi pula uulaadhi okwiidhidhimikila omamakelo ngoka.

Omumwameme okwa ti wo: “Otandi dhimbulukwa esiku iifo ya li ya tamekwa okugandjwa oshikando shotango mepandaanda mo 1940. Nale aamwatate naamwameme oya li haye ende tayu uvitha ya landula ondjila ya humbata omapulakata ga nyolwa: ‘Religion Is a Snare and a Racket’ nosho wo ‘Serve God and Christ the King.’ Aantu oya li wo haya pewa uutraktate oshali. Shoka osha li sha pula uulaadhi, ihe osha li sha simanekitha edhina lyaJehova nokundhindhilikitha mo oshigwana she.”

Omumwameme gulwe okwa ti: “Osha li oshidhigu noonkondo okugandja iifo muundoolopa uushona, molwaashoka Oonzapo odha li hadhi patanekwa noonkondo. . . . Onda li nda pumbwa lela uulaadhi opo ndi vule okugandja iifo mepandaanda nokupopya omautumbulilo ngoka twa li hatu longitha. Ihe nonando ongaaka, otwa li hatu gandja aluhe iifo mOlyomakaya. Omathimbo gamwe aantu oya li haya kala ye na ombili natse. Go gamwe otwa li hatu kondekwa kaantu ya geya, nomathimbo gamwe otwa li hatu holama opo kaaye tu ningile uuwinayi.”

Nonando Oonzapo dhaJehova odha li dha hepekwa pethimbo lyIita Iitiyali yUuyuni, odha li dha tsikile okuuvitha nuulaadhi. Aauvithi 50 000 muAmerika oya li ya taandelitha konyala iileshomwa yi thike pomamiliyona gahetatu pethimbo lyoshikonga shomasiku 43 shoka sha li sha ningwa mu 1 Desemba 1940 sigo omo 12 Januali 1941 hashi ithanwa ethimbo lyokugandja uunzapo nuulaadhi.

Oyendji mboka ya kala ethimbo ele mehangano lyaJehova otaya dhimbulukwa nawa omashongo ngoka ya li ya ningilwa nelalakano lyoku ya teya omukumo. Kakele kaashono, oya kala ya kakatela kehangano lyaJehova. Ihe etumwalaka lyopakalunga otali tsikile nokuuvithwa manga onkalelo ndjika ya kolokosha inaayi hula po. Kekwatho lyaKalunga otatu tsikile okuuvitha oohapu dhe tu na eitaalo nosho wo uulaadhi.

[Oohapu dha simana pepandja 9]

Otwa pumbwa aluhe uulaadhi opo tu vule okukutha ombinga miilonga yokuuvitha Uukwaniilwa