“Oshiholekwa” shoka twi ilongo muukalele wetu

Nakuhokolola tate Olivier Randriamora

Omuyapostoli Paulus okwa nyola a ti: “Nashi kale oshishona nenge nashi kale oshindji. Onda pyokoka miinima ayihe: [Ondi ilongo oshiholekwa, NW] okukala nda kuta nenge okukala nda sa ondjala, . . . Ngame otandi vulu shaa shoka, oshoka Kristus ota koleke ndje.”​— Fil. 4:12, 13.

OOHAPU ndhoka odha kala nokuladhipika ndje pamwe nomukulukadhi gwandje Oly. Ngaashi Paulus, otwa li twi ilongo “oshiholekwa” shokukala twi inekela thiluthilu muJehova sho tu li miilonga ye muMadagascar.

Meme gwaOly okwa tameke okukonakona Ombiimbeli nOonzapo dhaJehova mo 1982. Pethimbo mpoka onda adhika nda yaleka nale Oly. Onda tameke wo okukonakona Ombiimbeli, nokonima yethimbo Oly naye okwa tameke okukonakona. Otwa hokana mo 1983 notwa ninginithwa mo 1985. Nziya konima yaashoka otwa tameke okukutha uukwathelikokolindjila. MuJuli 1986, otwa ningi aakokolindjila yondjigilile.

MuSeptemba 1987, otwa langekwa po tu li aakokolindjila yi ikalekelwa. Otwa li twa tuminwa kokandoolopa kaaku na egongalo ke li kuumbangalantuninginino waMadagascar. Moshilongo moka omu na omihoko 18 ominene ndhoka dha thikama po maapopi yomalaka ogendji, dho odhi na omithigululwakalo noohedhi dha yoolokathana noonkondo. Elaka lyopambelewa muMadagascar, Oshimalagasi, ihe pomahala galwe aantu ohaya popi omalaka galwe gi ili. Otwa tameke okwiilonga elaka ndyoka hali popiwa mondoolopa ndjoka tatu kokolondjila, shoka osha ningitha aantu moshitopolwa ya kale haye tu taamba ko.

Petameko, onda li handi gandja oshipopiwa shomontaneho Osoondaha kehe, na meme Oly oha hakele omake aluhe ngele nda mana. Otse atuke twa li hatu kala po. Otwa li wo hatu ningi Osikola yOkudheula Aauvithi ayihe. Ngele meme Oly ta gandja oshipopiwa, okwa li he shi ningi ongotapopi nomunegumbo. Sho omutonatelishikandjo e tu talele po, okwa li a ningi eetopo tu lundulule okugongala. Otwa li twe li nyanyukilwa noonkondo.

Inatu kala hatu mono iimaliwa yetu pethimbo, molwaashoka opoosa kaya li hayi tumu oombapila dhetu aluhe. Otwi ilongo okuhupa noshimaliwa oshishona. Oshikando shimwe katwa li tu na iimaliwa ya gwana okufuta ombesa tu ye koshigongi shoshikandjo, shoka sha li tashi ka ningilwa kehala li li ookilometa 130. Omumwatate gumwe okwa li e tu pe omayele omawanawa a ti: “Tseyithileni Jehova uudhigu weni. Inamu dhimbwa kutya oye tamu longele.” Otwa li twa galikana kombinga yoshinima shoka notwa li twa tokola tu ye kolupadhi. Omanga tatu ilongekidhile olweendo, omumwatate gumwe okwe ya e tu talele po nokwe tu pe iimaliwa ya gwana naanaa okufuta ombesa.

MIILONGA YUUTONATELISHIKANDJO

MuFebuluali 1991, onda langekwa po ndi li omutonatelishikandjo. Sho nda dheulwa otwa tameke iilonga yuutonatelishikandjo, moshilandopangelo Antananarivo. Pethimbo ndyoka ongundu yetu onshona oya li yi indjipala naauvithi omugoyi, yatatu yomuyo oya li ya ninginithwa. Pokugongala otwa li hatu kala po tu li 50 lwaampono. Mo 1993, otwa li twa tumwa koshitopolwa shi li kuuzilo woshilongo. Onkalamwenyo hoka oya li ya yooloka ko kwaandjoka twi igilila yomoshilando.

Opo tu thike komagongalo nokoongundu ndhoka dhi ilile, ethimbo limwe otu na okweenda ookilometa 145 tatu pandakana mokuti kwa thita ku na oondundu. Otwa li hatu faalele owala omitsalo dhe eleka. Ngele egongalo otali ku ulukilwa omathano, ngaashi sha li hashi ningwa omalupita pethimbo ndyoka, nena omitsalo odhi na okukala omidhigu, molwaashoka otu na okufaalela iikwaniipangitho ayihe. Ngame onda li handi humbata opatilii yohauto, ye meme Oly ta humbata (o-projector), eshina lyokuulika omathano.

Olundji otwa li tu na okweenda ookilometa 40 mesiku tu ka thike kegongalo lilwe. Opo tu ka thike, otu na okulonda oondundu nokusiluka, okutaaguluka omilonga nokweenda momanono. Omathimbo gamwe otwa li hatu lala pooha dhondjila, ihe olundji otwa li hatu kongo omulalo pomikunda ndhoka dhi li popepi. Omathimbo gamwe otwa li hatu pula omulalo kaantu mboka kaatu shi nando onale. Uuna twa pewa omulalo meme Oly okwa li ha pula tu kwathelwe ombiga tu telekele mo. Okwa li ha ka teka omeya pomulonga nenge petale ndyoka li li popepi. Ngame ohandi pula ekuya ndi ka pande iikuni. Iinima mbyoka ohayi pula ethimbo. Iikando yimwe otwa li hatu landa ondjuhwa yomwenyo e tatu yi dhipaga noku yi thula.

Ngele twa mana okulya, ohatu ka teka omeya gokwiiyoga. Omathimbo gamwe otwa li hatu lala mokombitha. Uuna taku lokwa, ohatu lala twa hedha kekuma, twi igamene koontongo.

Otwa li hatu uvithile aluhe mboka ye tu pa omulalo. Uuna twa thiki kegongalo hoka tu uka, otwa li hatu hambelelwa nokuyakulwa nawa kaamwatate naamwameme. Olupandu ndoka haya kala ye na sho tatu ya talele po ohalu tu dhimbitha uupyakadhi mboka twa pita muwo momukokomoko gwondjila.

Uuna tu li momagumbo gooitaali ooyakwetu, otu hole oku ya kwathela miilonga yawo yomegumbo. Shika ohashi ya kwathele wo ya longe pamwe natse muukalele. Katwa li hatu tegelele aanegumbo ye tu pe iinima yondilo nenge iikulya yi ikalekelwa.

OKUTALELA PO OONGUNDU NDHOKA DHI ILILE

Otwa li tu hole unene okutalela po oongundu ndhoka dhi ilile, hoka aamwatate ya li haya kala ye tu tegelela tu ka longe pamwe nayo. Ihatu kala naanaa tu na ethimbo ‘lyokuvululukwa po kashona.’ (Mark. 6:31) Aaihokani yamwe Oonzapo, oya li ya hiya aakonakonimbiimbeli yawo 40 kegumbo lyawo, opo natse tu kale po pekonakono lyawo. Meme Oly nomumwameme oya li ya ningi omakonakonombiimbeli 20, omanga ngame nomumwatate tatu ningi galwe 20. Sho ngaa omukonakonimbiimbeli gumwe ta zi mo, ye omukwawo ota kolokele mo. Lwopokati komutenya otwa ka ninga okugongalo, konima otwa tsikile ishewe nomakonakonombiimbeli. Otu uhala twi ipyakidhila esiku alihe sigo ohetatu yokongulohi.

Sho ethimbo lya thikana lyokutalela po ongundu yilwe, atuhe otwa yi. Ohetatu yongula atuhe otwa li mondjila tu uka komukunda hoka ku na ongundu ndjoka. Atuhe otwa li twa zala oonguwo oonkulu. Otwi idhenge omugulu omule notwa li twa thiki ko lwomoshanga shomutenya. Otwa zala oonguwo dha yela e tatu tameke okuuvitha egumbo negumbo nopwaa na okukwatakwata. Omagumbo oga li omashona naauvithi oya li oyendji. Oshitopolwa ashihe otwa li twe shi mana ko muule wominute 30 lwaampono. Otwa yi komukunda gwa landula ko. Sho twa mana otwi idhenge ondjila onde tu shune komagumbo. Petameko otwa li hatu kala twa teka omukumo, molwaashoka ohatu longitha ethimbo olindji nohatu ningi oonkambadhala dha mana mo okuthika ko, ihe sho omuntu to yi ko, ohamu longo po owala owili yimwe lwaampono. Ihe aamwamatate naamwameme yomoshitopolwa kaya li haya kala taya ngungutula. Oya li aapenda.

Ongundu yimwe muTaviranambo, oya li lwokondungu yondundu. Sho twa yi ko, otwa adha ko omumwatate naangandjawo haya kala megumbo lyondunda yimwe. Pooha negumbo opwa li okandunda okashona moka hamu gongalelwa. Opo tu li po, omumwatate ngoka twa li puye okwi igidha mokule ta ti: “Aamwatate-ee!” Otu uvu ewi limwe lyomulumentu tali mu itaale kondungu yondundu yimwe tali ti: “Ee!” Omumwatate okwi igidha ishewe ta ti: “Omutonatelishikandjo okwa thika!” Oya yamukula ya ti: “Eewa!” Etumwalaka ndyoka olya li lya yi okawi nokawi sigo lya thiki kuyalwe mboka ye li kokule. Aantu oya tameke okuya okanamundonda, naasho okugongala kwa tameke aakalipo oya li ya konda 100.

OMPUMBWE YIIENDITHO

Mo 1996, otwa li twa tuminwa koshikandjo shomalusilu nomiilondo shi li popepi naAntananarivo, hoka okwa li ompumbwe yiienditho yokututa aantu. Otwa li tu na oku ka talela po ongundu yimwe muBeankàna, oshitopolwa shi li ookilometa 240 lwaampono okuza muAntananarivo. Otwa li twi ikundu nomulumentu gumwe ngoka ha hingi ololi onshona e tu faalele. Ololi oya li ya londeka aantu 30, yamwe oye li meni yo yamwe okombanda, yamwe oya li ya lala kombanda yololi nokuli, omanga yamwe ye yi kakanya konima.

Iienditho oyindji moshilongo moka iikwakwa. Ololi moka tu li oya li ya teka e tatu tsikile nondjila yetu kolupadhi. Konima sho twe ende ko oowili dhontumba, ko otaku zi natango ololi yilwe onene. Oya li yu udha aantu niinima shimwe to nyengwa, ihe nonando ongawo, omuhingi okwe tu thikamene owala. Molwaashoka katu na nkene, otwa londo, notwe ende twa thikama ondjila ayihe. Otwa li twa thiki pomulonga gumwe mpoka pwa li pu na ontopa tayi longululwa. Otwa heluka mo ishewe nokuya kolupadhi sigo twa thiki pomukunda gumwe mpoka pu na aakokolindjila yaali yi ikalekelwa. Nonando hayo twa li twe ya kuyo, otwa kala tatu uvitha pamwe nayo omanga twa tegelela ontopa yi longwe nosheenditho shilwe natango shi tu faalele.

Konima yoshiwike okwa zi oshihauto shimwe, noshe tu londeke. Ondjila oya li yu udha omalambo omale. Olundji otwa li hatu zi mo moshihauto tu ke shi undule momeya omale twa pwila mo oongolo. Otwa li hatu ihata po omathimbo gamwe shampa sha hwama. Ongula onene yoontundumene otwa li twa thiki mokamukunda moka tu na okuhelukila. Okuza mpoka twa helukile otwa li tu na ishewe okweenda momapya golwishi moka mu na enono, opo tu ka thike nawa hoka twa hala.

Osha li oshikando shotango tatu talele po oshitopolwa shoka. Otu uvithile aantu yamwe mboka taya longo momapya golwishi noku ya pula ye tu pukulule mpoka pu na Oonzapo dhaJehova. Otwa li twa nyanyukwa noonkondo sho twa mono kutya aantu mboka aamwatate.

OTWA LI TWA LADHIPIKE YALWE YA YE MIILONGA YETHIMBO LYU UDHA

Oshinima shimwe shoka she tu etele enyanyu omimvo dha ka pita osho okuladhipikila yalwe ya ye miilonga yethimbo lyu udha. Sho twa li twa talelepo egongalo limwe moka mu na aakokolindjila yondjigilile omugoyi, otwa li twe ya ladhipike, opo kehe gumwe gwomuyo a kwathele omuuvithi gumwe a ye muukokolindjila. Konima yoomwedhi hamano sho twa galuka, otwa adha mo aakokolindjila yondjigilile ye li 22. Aamwatate yaali aakuluntugongalo oya li ya ningi aakokolindjila yondjigilile sho ya ladhipikwa koyanakadhona. Aamwatate mboka oya ladhipike omukuluntugongalo omukwawo e ya waimine. Omasiku hamale, omukuluntugongalo ngoka okwa li a langekwa po e li omukokolindjila i ikalekelwa. Lwanima, ye nomukadhi oya yi miilonga yuutonatelishikandjo. Yo aakuluntugongalo mboka ya ladhipikwa koyanakadhona, gumwe okwa yi miilonga yuutonatelishikandjo, nomukwawo omiilonga yokutunga Iinyanga yUukwaniilwa.

Ohatu pandula Jehova esiku kehe, molwaashoka itatu vulu okuninga sha nokaapu na ekwatho lye. Uuna tatu dhiladhila kwaashoka twa tompola po muukalele, ohashi tu nyanyudha, nonando omathimbo gamwe ohatu kala twa vulwa nohatu ehama. Jehova oha humitha komeho iilonga ye. Otwa pandula sho natse tu na ombinga nando onshona miilonga ye. Ngashingeyi otatu mu longele tu li aakokolindjila yi ikalekelwa. Eeno shili, otwi ilonga “oshiholekwa” shokukala twi inekela muJehova ngoka ‘he tu koleke.’

[Oohapu dha simana pepandja 6]

Otwi ilonga “oshiholekwa” shokukala twi inekela muJehova

[okaalita/Omathano pepandja 4]

Madagascar oyo ontuntu ontine yomoontuntu onene muuyuni yi na evi etiligane. Muyo otamu adhika iinamwenyo yi ili noyi ili nosho wo omiti dhomaludhi

[Ethano pepandja 5]

Otu hole okukutha ombinga momakonakonombiimbeli

[Omathano pepandja 5]

Ompumbwe yiienditho yokututa aantu oya li omukundu kutse