Ombili ohayi kodheke ongeyo
KUKU Rie ngoka ha kala moHolanda okwa li a geye sho omumwatate George nomumwameme Manon, ya li ye ya oku mu uvithila onkundana ombwanawa yUukwaniilwa. Oya li ye shi mono mo kutya okwa silwa lwaali aasamane nosho wo omwanamati nokwa li wo e na uuwehame wopomatsakaneno gomasipa. Nonando okwa li a geyuluka sho taya kundathana ka li naanaa e na ombili nayo.
Ihe George okwa lombwele Manon kutya sho taya galuka naye etele omukulupe ngoka oongala, molwaashoka okwa sa ezaza nokwa yemata. Sho ye dhi mu etele, okwa li a nyanyukwa ye okwa kumwa. Molwaashoka oya li ye ya inee shi tegelela, oya li ya ningi oshilage ya galuke nale. Sho George naManon ya galuka ethimbo ndyoka ya li yu uvathana, kuku Rie megumbo inaye mu adha mo. Oya li ya yi ko lwiikando pomathimbo ga yoolokathana, ihe inaye mu adha mo. Oya li taya dhiladhila kutya ohe ya holama.
Esiku limwe sho George a shuna ko, kuku Rie omo e mu adha megumbo. Okwa gandja ombili sho ihaa adhika mo nokwa lombwele George kutya okwa li moombete. Kuku Rie okwa ti: “Sho ngaa mwa ningine ko esiku mwa li mpano, onda li nda tameke okulesha Ombiimbeli.” Oya li ya tameke noonkundathana tadhi tungu nodha fala mekonakonombiimbeli.
Manga kuku Rie a li ihaa konakona okwa li ha kala a yemata, ihe konima sho a konakona Ombiimbeli okwa tameke okukala e na ombili. Nonando ka li ha piti mo naanaa megumbo, okwa tameke okupopya naamboka haye mu talele po kombinga yeitaalo lye epe. Kuku Rie okwa li omunkundi, noka li ha vulu okukala pokugongala naanaa. Ihe okwa li ha kala a nyanyukwa uuna aamwameme naamwatate taye mu talele po. Esiku a gwanitha omimvo 82, okwa li a yi koshigongi shoshikandjo hoka a li i igandjele Jehova okupitila meninginitho.
Konima yoomwedhi oonshona sho a hulitha, aantu oya li yi itsu ombapila ndjoka a nyola. Okwa li a nyola mo nkene a kala a nika oluhodhi muukulupe nokwa popi kutya ombili oya simana. Omumwameme Manon okwa ti: “Shoka nda lesha mombapila ndjoka, osha li sha gumu ndje komutima nonda nyanyukwa sho Jehova e tu longitha tu mu ulukile ombili.”
Oshiholelwa shaJehova ohashi tu inyengitha tu ulukile yalwe ohole nosho wo ombili. (Ef. 5:1, 2) Otatu ka pondola muukalele wetu uuna tatu ulike kutya otu li ‘aayakuli yaKalunga notu na uukumwe.’—2 Kor. 6:4, 6.