“Ondjodhi yandje osho ya tsu”
Omumwameme Emilia okwa li nale omukokolindjila gwondjigilile omimvo 15 dha pita. Ihe iilonga mbyoka okwa li e yi etha po omimvo dhontumba dha ka pita. Lwanima, okwa kala ha tedhatedha kethimbo ndyoka sho a li ha kala a nyanyukwa sho ta kokolondjila. Okwa kala a hala okutamununa mo ishewe uukalele we.
Ihe ethimbo olindji lyaEmilia olya li hali pwile miilonga ye yokwiikongela omboloto, naashoka inashi mu etela enyanyu lyasha. Esiku limwe manga e li naaniilonga ooyakwawo okwa ti: “Ando onda li handi longo oowili oonshonee!” Omuhona gwawo okwe shi uvu e te mu pula ngele okwa mana mo ngaa shili. Emilia okwe mu lombwele kutya okwe shi halelela. Ihe opo shi pite, oshi na okuya komuhona omukuluntu, molwaashoka pamulandu gwehangano lyawo aaniilonga ayehe oya tegelelwa ya longe oowili dha gwana po. Omumwameme Emilia okwa li i ilongekidha oku ka popya nomuhona, ihe okwa galikana kuJehova e mu pe ombili nuulaadhi.
Pethimbo lyomutumba, Emilia okwa pula nesimaneko a kale ha longo oowili oonshona. Okwa yelitha kutya ethimbo ndyoka ote ke li longitha okukwathela yalwe. Okwa ti: “Ondi li gumwe gwomOonzapo dhaJehova, nohandi kwathele aantu pambepo. Omikalo dhaantu oyendji kunena odha hutuka. Oya pumbwa okulombwelwa omakotampango nomithikampango dhopamikalo ndhoka tadhi adhika mOmbiimbeli. Uunongo mboka wu li mo, otawu ya kwathele. Sho nda hala okulonga oowili oonshona itashi ti kutya onda hala okulya onyalo miilonga, ihe onda hala ethimbo lya gwedhwa po ndi kwathele aantu. Omolwaashono tandi pula ndi kale handi longo oowili oonshona.”
Omuhona omukuluntu okwa li a pakaleka omakutsi nokwa popi kutya opu na oshikando shimwe naye a li ta dhiladhila okulonga iilonga yokwiiyamba. Opo nduno okwa ti: “Omolwomatompelo ngoka wa gandja, otandi tsu kumwe nangoye. Ihe owu shi ngaa mbela kutya ofuto yoye otayi ka shunithwa pevi?” Emilia okwa ti kutya oku shi shi, nokwa hala okukala nonkalamwenyo yi li paunathangwa. Okwa gwedha ko a ti: “Elalakano lyandje olyo okuningila aantu shoka tashi ya kwathele shili.” Omuhona omukuluntu okwe mu lombwele a ti: “Ondi hole aantu mboka hayi iyamba ya kwathele yalwe.”
Miilonga yetu inamu kala nando onale gumwe e na elalakano ewanawa lya fa lyoye. Ngashingeyi omumwameme Emilia oha longo owala omasiku gane moshiwike. Shimwe ishewe, ofuto ye oya gwedhelwa noha pewa shi vulithe pwaashoka a li ha mono nale. Emilia okwa ti: “Ondjodhi yandje osho ya tsu, molwaashoka ondi li ishewe omukokolindjila gwondjigilile.”
Mbela oho kala ngaa to tala mpoka wu na okuninga omalunduluko, opo wu ye muukokolindjila nenge wu shune mo ishewe?
[Oohapu dha simana pepandja 32]
Omuhona omukuluntu okwe mu lombwele a ti: “Ondi hole aantu mboka hayi iyamba ya kwathele yalwe”