Omolwashike aantu yamwe haya ti inaya pumbwa Kalunga?

“Ngaashi aantu yalwe omamiliyona, nangoye ino pumbwa okwiitaala muKalunga.” Oohapu ndhoka odha li dha nyolwa kepulakata ndyoka lya li lya futilwa kiilyo yongundu ndjoka inaayi itaala muKalunga. Osha yela kutya oyu uvite inaaya pumbwa nando Kalunga.

Omanga yalwe mboka haya ti oyi itaala muKalunga haya ningi omatokolo ga fa gaantu inaayi itaala muye. Omumbisofi gwaKatoolika, Salvatore Fisichella, okwa ti ngeyi kombinga yiilyo yongeleka ye: “Mboka haye tu tala otashi vulika ihaaya dhimbulula kutya tse Aakriste, oshoka oonkalamwenyo dhetu odha faathana nodhaamboka kaaye shi ooitaali.”

Yamwe kaye na nokuli nethimbo lyokudhiladhila kombinga yaKalunga. Ohayi ipula kutya oku li kokule unene nayo noita vulu okunwetha mo onkalamwenyo yawo. Ohaye mu dhimbulukwa owala uuna ye li muupyakadhi nenge ya pumbwa sha. Konyala oye mu tala ko a fa omupika ngoka taya vulu okulongitha kehe ethimbo ya hala.

Yalwe ihaya tula miilonga shoka haya longwa komalongelokalunga gawo, tashi vulika taya dhiladhila kutya itashi ya kwatha sha. Pashiholelwa, oopelesenda 76 dhAakatoolika mOndowishi odhi itaala kutya inashi puka omulumentu nomukiintu ya kale pamwe inaaya hokana, nonando ongeleka yawo nosho wo Ombiimbeli otayi ti osha puka. (1 Aakorinto 6:18; Aahebeli 13:4) Aakatoolika hayo owala itaaya tsu kumwe nomalongo gelongelokalunga lyawo. Aasita yomalongelokalunga ogendji ohaya nyenyeta kutya aakwanegongalo yawo ohayi ihumbata ya fa inaayi itaala muKalunga.

Iiholelwa mbika otayi tu ningitha tu pule epulo: Mbela otwa pumbwa ngaa Kalunga? Epulo ndika kali shi epe. Tango olya holokele momapandja gopetameko lyOmbiimbeli. Opo tu li monene eyamukulo, natu tale kiinima yimwe mbyoka ya li ya holoka po ya popiwa membo lyaGenesis.