Aantu taya kondjitha kaaya kulukile muusi

Eso oli li omutondi omutilithi. Ohatu li kondjitha noonkondo dhetu adhihe. Ohashi vulika tu kambadhale kaatu li taambe ko uuna lye tu kutha gumwe ngoka tu hole noonkondo. Nenge sho tu li pethimbo lyuugundjuka, ohashi vulika tu kale tatu dhiladhila kutya omutondi ngoka ke na esiku e tu kuthe po, edhiladhilo lya puka ndyoka hatu kala twa kakatela.

Aantu aashona oya dhiladhila kombinga yokwaahasa shi vulithe pOofarao yonale. Oyendji oya yamba po oomwenyo dhawo nosho wo oomwenyo dhaaniilonga omayuvi, nelalakano lyokusinda eso. Oopiramide ndhoka ya li ya tungu otadhi gandja uunzapo waashoka ya li ya hala, nosho wo okwaahapondola kwawo.

Aapangeli yaChiina oya li wo ye na elalakano lyokuhulitha po eso, nonando oya li ye ende ondjila yilwe, sha hala okutya okugalulila onkalamwenyo kuuwanawa. Omupangeli Qin Shi Huang okwa li a popi kutya omakonakono ge na ko nasha nuudhindoli oga li ga mono po oshinima shimwe shoka tashi vulu okukaleka eso kokule. Ihe oyindji yomiinima mbyoka ya li ya pilulilwa mumwe oya li yi na omerkuriuma ndjoka yi na uuzigo, nashimwe shomiinima mbyoka ya li ya pilulilwa mumwe otashi vulika osho sha li she mu dhipaga.

Methelemumvo eti-16 E.N., omweendikonakoni Omusipania Juan Ponce de León okwa li a yi nosikepa kUuntuntu waKaribise anuwa ta kongo othithiya yuugundjuka. Okwa li i itsu Florida, U.S.A., momukokomoko gwokukonga othithiya ndjoka ihe okwa ka sa oomvula dhontumba konima yiita pokati kawo nOomvalele dhaAmerika. Nokapu na ootu mpoka pwa adhikile othithiya yuugundjuka.

OoFarao, aapangeli, nosho wo aayendikonakoni oya li ya kongo po omikalo dhokusinda eso. Olye mbela gwomutse a li ta ka dhina elalakano lyawo, nonando otwa li tatu ka kala inaatu shi hokwa? Atuheni muule womitima dhetu, otwa hala okukala nomwenyo sigo aluhe.

MBELA ESO OTALI VULU OKUSINDIKA?

Omolwashike hatu kondjitha eso? Ombiimbeli otayi yelitha kutya omolwashike. Otayi popi kombinga yOmushiti gwetu, Jehova Kalunga,a tayi ti: “Ayihe okwe yi ningi yo opala pethimbo lye. Okwa tula uukwaaluhe moomwenyo dhaantu.” (Omuuvithi 3:11) Otwa hala tu kale tatu nyanyukilwa eopalo lyevi sigo aluhe, ihe kayi shi owala oomvula 80 nenge dhi vule po. (Episalomi 90:10) Shoka osho oomwenyo dhetu dha hala.

Omolwashike Kalunga a tula “uukwaaluhe” moomwenyo dhetu? Mbela oku tu geyithe owala? Shoka itashi wapa. Mepingathano naashoka, Kalunga ote tu uvanekele kutya eso otali ka sindika. Ombiimbeli oya popya lwiikando kombinga yokukutha po eso nosho wo euvaneko lyaKalunga lyomwenyo gwaaluhe. — Tala oshimpungu shoshitopolwa shika, “Eso otali ka sindika.”

Jesus Kristus naye okwa popya a ti: “Mboka ye ku tseya, Kalunga awike kashili, noya tseya wo Jesus Kristus, ngoka we mu tumu, oyo mboka ye na omwenyo gwaaluhe.” (Johannes 17:3) Onkee ano okusinda eso kashi shi oshinima itaashi wapa. Ihe nonando oongawo, Jesus ote shi koleke kutya oKalunga owala ta vulu oku li sinda.