Edhina lyomOmbiimbeli lya nyolwa koshiyuma shopethimbo lyonale

Mo 2012 aakonakoni yiinima oya li ya mono iikangwa yoshiyuma shonale shi na omimvo 3 000, noya li ye shi hokwa. Mbela oshike sha li oshihokithi koshiyuma shono? Kaya li ya hokwa iikangwa yasho, ihe ooshoka sha li sha nyolwa ko.

Sho aalafululi yiinima iikulu ya tula kumwe iikangwa mbyono, oya li ya vulu okulesha shoka sha nyolwa ko moondanda dhOshikaanana shonale. Oondanda ndhoka otadhi lesha tadhi ti: “Eshba’al Ben [omwanamati] gwaBeda’.” Shino osho sha li oshikando shotango aalafululi taya mono edhina ndika lya nyolwa koshiyuma shonale.

Opu na Eshbaal gulwe ngoka a nyolwa mOmbiimbeli, ngoka a li gumwe gwomoyanamati yomukwaniilwa Saul. (1 Ondjal. 8:33; 9:39) Omuprofesoli Yosef Garfinkel ngoka naye a li gumwe gwomaalafululi okwa ti: “Otashi kumitha sho edhina Eshbaal lya holoka mOmbiimbeli pethimbo owala omukwaniilwa David ta pangele, ihe ngaashingeyi otali adhika mondjokonona yaalafululi.” Yamwe otaya dhiladhila kutya edhina ndyoka olya li lya simana pethimbo lyontumba. Edhiladhilo ndyoka lyOmbiimbeli otali ambidhidhwa kuuyelele mboka aalafululi ya mono po.

MOmbiimbeli edhina Eshbaal olya nyolwa Ishboshet, oondanda “baal” odha pingenwa po noondanda “boshet.” (2 Sam. 2:10) Omolwashike mbela? Aalafululi oya ti: “MuSamuel omutiyali inamu longithwa edhina Eshbaal, molwaashoka olya li hali dhimbulukitha aantu oshikalunga shoshikungulu Baal, shoka sha li hashi longelwa kAakaanana, ihe edhina ndyoka . . . otali adhika natango membo lyOndjalulo.”