Ondjokonona
Otwi imonene “okawe kamwe ke na ondilo”
OMUMWATATE Winston nanekulu lye, Pamela (Pam) Payne, ohaya longele moshitayimbelewa shaAustralasia. Oya kala ya nyanyukwa monkalamwenyo yawo, ihe oya kala wo taya adhika komashongo ngaashi okwiigilila omikalondjigilile dhi ili nodhi ili nokwiidhidhimikila eso lyokanona kawo, hoka ka sile mela. Nonando ongawo, oya tsikile okukala ye hole Jehova, aapiya ye nosho wo okuuvitha. Momapulapulo ngaka, otatu ka uva nkene ye tu kuthila ko kiimoniwa yawo.
Omumwatate Winston, tu lombwela nkene wa kongo Kalunga.
Onda putukila muukwanegumbo mboka inaawu itaala momalongelokalunga, mofaalama yi li moQueensland, moAustralia. Molwaashoka otwa li tu li kokule naantu, aakwanezimo oyo owala nda li ndi na ekwatathano nayo. Onda tameke okukonga Kalunga, okuza sho ndi na omimvo 12 lwaampo. Onda li nda galikana kuye tandi mu pula a kwathele ndje ndi tseye oshili kombinga ye. Lwanima, onda thigi po ofaalama, e tandi ka mona iilonga moshilandopangelo Adelaide, shaSouth Australia. Sho ndi na omimvo 21, onda tsakanene naPam manga nda li mefudho moshilandopangelo Sydney, nokwa li a lombwele ndje kombinga yongundu yelongelokalunga yedhina British-Israel, ndjoka ya li tayi ti kutya aniwa Aabritania, oya za momazimo gaIsraeli. Ongundu ndjoka oya ti kutya omazimo ngoka ogo omazimo omulongo guukwaniilwa wokuumbangalantu ngoka ga li ga yi muupongekwa, methelemimvo etihetatu K.E.N. Onkee ano, sho nda shuna koAdelaide, onda li nda popi oshinima shoka nomuniilonga pamwe nangame, ngoka a adhika a tameka okukonakona Ombiimbeli nOonzapo dhaJehova. Konima sho nda popi naye oowili dhontumba, unene tuu kombinga yaashoka Oonzapo dhi itaala, onde shi mono kutya egalikano lyandje ndyoka nda galikanene sho nda li okanona, olya yamukulwa. Onda li tandi ilongo oshili kombinga yOmushiti nosho wo uukwaniilwa we! Ondi imonena “okawe . . . ke na ondilo.”— Mat. 13:45, 46.
Omumwameme Pam, nangoye owa li wa tameke okukonga okawe hoka pethimbo wu li omugundjuka. Owe ka mono ngiini?
Onda putukila muukwanegumbo wi itaala melongelokalunga, mondoolopa Coffs Harbour, moNew South Wales. Aavali yandje nosho wo ookuku, oya li yi itaala momalongo gongundu British-Israel. Ngame, omumwamememati gwonkelo, omumwamemekadhona gwosheeli naamwayinagona yandje oyendji, otwa putudhwa twi itaala kutya Kalunga oku hole aantu mboka ye na oohekulululwa Aabritania. Nonando ongawo, omalongo ngoka kanda li tandi tsu kumwe nago nokanda li ndi uvite ndi li popepi naKalunga. Sho ndi na omimvo 14, onda li nda yi koongeleka dhomoshitopolwa dha yoolokathana, mwa kwatelwa Angilikana, Baptist noyoSeventh-day Adventist, ihe kadha li dha kwathele ndje ndi tseye Kalunga.
Lwanima, uukwanegumbo wetu owa tembukile koSydney, hoka nda tsakanene naWinston, ngoka a li e ya ko owala kefudho. Ngaashi e shi popi, oonkundathana dhetu naye kombinga yomalongelokalunga, odhe mu ningitha a tameke okukonakona nOonzapo. Konima yethimbo, oontumwafo ndhoka a ka kala ha tumine ndje, omanyolo ongoye owala to ti opuwo. Paushili wo wene, petameko onda li nda limbililwa nonda li nokuli nda geya. Ihe pehulilo, onde ke shi mona mo kutya shoka a nyola oshi na okukala oshili.
Mo 1962, onda tembukile koAdelaide, opo ndi ka kale popepi naWinston. Okwa li a ningi omalongekidho ndi ka kale naaihokani yamwe Oonzapo, Thomas naJanice Sloman, mboka ya kala aatumwa muPapua New Guinea. Oya ulukile ndje lela olukeno. Onda li owala ndi na omimvo 18, noya li ya kwathele ndje noonkondo ndi tseye oshindji kombinga yaJehova. Onkene, nangame onda tameke okukonakona Oohapu dhaKalunga, nokonima yokathimbo onda ka kala nda tompwa kutya ndjika oyo oshili. Konima sho twa hokana, otwa tameke nziya okulongela Jehova nuudhiginini. Nonando otwa li twa adhika komashongo, etokolo ndyoka olye tu kwathele tu kale twa lenga okawe hoka kondilo noonkondo.
Omumwatate Winston, tu lombwela kombinga yomimvo dhoye dhopetameko miilonga yaJehova.
A. Okaalita kolweendo lwetu miilonga yuutonatelishikandjo
B. Oositamba dhopoosa dhokoontuntu dhimwe. Oontuntu Kiribati naTuvalu odha li nale hadhi ithanwa Gilbert naEllice
C. Ontuntu ombwanawa yedhina Funafuti yi li moTuvalu. Yimwe yomoontuntu ndhoka twa li twa talele po, manga inaaku tuminwa aatumwa
Konima owala yokathimbo sho ngame naPam twa hokana, Jehova okwa tameke oku tu pa ‘iilonga iinene noya simana.’ (1 Kor. 16:9) Oshilonga shotango, otwa li twe shi ladhipikilwa komumwatate Jack Porter, ngoka a li omutonatelishikandjo ha talele po egongalo lyetu ndyoka lya li eshona. (Ngashingeyi atuhe naye, otu li iilyo yOkomitiye yOshitayimbelewa shaAustralasia.) Omumwatate Jack nanekulu lye, Roslyn, oya li ye tu ladhipike tu ye muukokolindjila wondjigilile, uuthembahenda mboka twa li twa nyanyukilwa uule womimvo ntano. Sho ndi na omimvo 29, ngame naPam otwa li twa pulwa tu ye miilonga yuutonatelishikandjo, koontuntu dhokoSouth Pacific, ndhoka dha ka kala hadhi tonatelwa koshitayimbelelwa shaFiji. Oontuntu ndhoka ongaashi: American Samoa, Samoa, Kiribati, Nauru, Niue, Tokelau, Tonga, Tuvalu naVanuatu.
Pethimbo ndyono, koontuntu dhimwe aantu oya li haya kala ya limbililwa Oonzapo dhaJehova, onkee otwa li tu na okukala twa kotoka notu shi okuyoolola. (Mat. 10:16) Omagongalo oga li omashona, naamwatate yamwe kaya li haya vulu oku tu pa omulalo. Onkee otwa li hatu pula aantu yomoshitopolwa, ngele otaya vulu oku tu kwathela tu kale hatu zi momagumbo gawo, noya li aluhe ye na olukeno natse.
Omumwatate Winston, owu na lela ohokwe miilonga yokutoloka. Oshike she ku ningitha wu kale wu uvite ngaaka?
Ta kwatele komeho osikola yaakuluntugongalo, moSamoa
Pethimbo ndyono, aamwatate yokontuntu Tonga, kaya li ye na uufo nosho wo uumbo uushona owundji mOshitonga, elaka lyOshipolynesia. Uuna taya ningi omakonakonombiimbeli, oya li haya longitha embo Oshili ndjoka tayi fala kOmwenyo Gwaaluhe, lyomOshiingilisa. Onkee ano, pethimbo lyiiwike ine yosikola yaakuluntugongalo, aakuluntugongalo yatatu yomoshitopolwa, mboka kaaya li naanaa ye shi Oshiingilisa, oya zimine ya toloke embo ndyoka mOshitonga. Pam oye a li a topotopa iitopolwa yembo ndyoka, e tatu yi tumine koshitayimbelewa shaAmerika, opo embo ndyoka li ka nyanyangidhwe. Osha pula iiwike ihetatu, okulongekidha embo ndyoka. Nonando kalya li naanaa lya tolokekeka, olya li lya kwathele aapopi yOshitonga oyendji, yi ilonge oshili. Ngame naPam katu shi aatoloki, ihe oshimoniwa shoka oshe tu kwathela tu kale tu na ohokwe miilonga mbyoka.
Omumwameme Pam, onkalamwenyo oya li yi li ngiini koontuntu hoka, oku yi yelekanitha nomoAustralia?
Obesa yimwe moka twa li hatu zi, sho tu li miilonga yuutonatelishikandjo
Oya li ya yooloka ko thiluthilu! Pomahala gamwe, opwa li pu na oomwe, uupyu wamatutu noshimuke, oombuku, omikithi nomathimbo gamwe nakayidhi kaalwenya okwa li he tu dhenge. Nonando ongawo, kongulohi kehe otwa li hatu kala tu uvite twa pepelelwa, sho tatu vululukwa twa tala kefuta tu li metala lyetu lyomwiidhi. Omausiku gamwe, omwedhi ogwa li hagu kala gwa toka lela notwa li hatu vulu okumona omiti dhookokonata, nogwa li wo hagu kala gwa minikila efuta. Oompito ndhoka odhe tu kwathele tu tedhatedhe nokugalikana, shoka she tu kwathele tu dhiladhile kiinima mbyoka iiwanawa.
Otwa kala tu hole aanona, oshoka oya li haya ningi iiyolitha noya li haya kala ye tu tala nawa, uuna ye tu mono aatiligane twa za kiilongo yilwe. Oshikando shimwe sho twa ka talela po ontuntu Niue, okamati kamwe oka li ka thengathenga Winston komaako ge ngoka ge na olundele, e taka ti: “Ondi hole omalwenya goye.” Osho sha li oshikando shotango, okanona hoka taka mono omaako ge na olundele. Onkee kaka li ke shi kutya nake lu popye ngiini!
Osha li hashi tu uvitha nayi okumona nkene aantu oyendji ya hepa nosho wo moonkalo oondhigu moka ya li. Oya li ye li momidhingoloko omiwanawa, ihe kamwa li iipangelo ya gwana nomeya gokunwa. Ihe aamwatate kaya li taya monika tayi ipula unene. Onkalo ndjoka oya li ye yi igilila. Oya li ya nyanyukwa, sho ye li nuukwanegumbo wawo, ye na ehala lyokugongalela naasho ya li ye na uuthembahenda wokutanga Jehova. Oshiholelwa shawo oshe tu kwathele tu tsikile okupititha komeho shoka sha simana nokukala nonkalamwenyo inaayi kitakana.
Omumwameme Pam, omathimbo gamwe owa li wu na oku ka teka omeya nokuteleka iikulya yeni momudhingoloko omupe. Owa li ho shi ende ngiini?
Pam ta yogo oonguwo dhetu, moTonga
Otandi pandula tate. Okwa longa ndje iinima oyindji yi na oshilonga, ngaashi okutema omulilo, okuteleka nosho wo nkene ndi na okukwata nawa okashona hoka ndi na. Oshikando shimwe sho twa ka talela po kontuntu Kiribati, otwa kala hatu zi mokagumbo okashona komwiidhi mwa kolongwa, ka dhikwa niihenguti. Onda li nda fulu elambo mondunda, opo tu vule okutelekela mo, nonda li handi tema niipeta yookokonata. Kombinga yomeya, onda li handi ka teka komuthima naakulukadhi ooyakwetu yomoshitopolwa, hoka kwa li haku kala ku na omukweyo. Opo ya teke mo omeya, oya li haya longitha oshiti shoometa mbali sha mangelwa ongodhi ya mangelwa kondooha, ngaashi okandjolo. Oya li haya ningi omalufo gokudhuga. Uuna ya tula ondooha momuthima, ohaye yi endeke sigo ya udha. Onda li ndi shi oshipu, ihe olufo lwandje sho lwa thiki, onda nyengwa. Sho nda tula mo ondooha lwiikando, ohayi kala owala ya kaama kombanda yomeya! Konima sho aantu ya mana okuyola, omukulukadhi gumwe okwi iyamba a kwathele ndje. Aantu yomoshitopolwa oya li haye tu kwathele aluhe noye na olukeno natse.
Amuhe omwa ka kala mu hole lela oshinakugwanithwa sheni moontuntu moka. Otamu vulu oku tu kuthila ko kiimoniwa yeni?
Omumwatate Winston: Oshe tu pula ethimbo twi igilile omikalondjigilile dhimwe. Pashiholelwa, uuna aamwatate ya teleke, olundji oya li haye tu pe iikulya ayihe mbyoka ya longekidha. Petameko, katwa li tu shi kutya otwa li tu na oku ya thigila po. Onkene otwa li owala hatu yi mana po thilu! Sho twa tseya kutya otu na okukala hatu ya thigile po, osho twa tameke okuninga. Nonando otwa kala tatu ningi omapuko ngono, aamwatate oya li ye shi uvite ko kutya kasha li owina. Aluhe konima yoomwedhi hamano, sho tu li muutonatelishikandjo, oya li haya kala ya nyanyukwa lela oku tu mona, uuna twe ya oku ya talela po. Kakele kaamwatate yomoshitopolwa, otse owala Oonzapo ya li haya mono twa za koshitopolwa shilwe.
Te ku uvitha naamwatate naamwameme, montuntu Niue
Otwa li twa gandja uunzapo uuwanawa, komahala ngoka twa li twa talele po. Aakwashigwana oyendji oya li tayi ipula kutya aamwatate yomoshitopolwa shawo oyo owala ya tota po elongelokalunga lyawo yene. Sho ye tu mono twa za kondje yoshilongo twe ya okutalela po aamwatate, aakwashigwana oya li ya kumwa noya fuuka.
Omumwameme Pam: Oshinima shimwe shoka itaandi dhimbwa, ooshoka twa ningilwa moKiribati, moka mwa li owala egongalo limwe li na aamwatate naamwameme taya yalulwa. Omumwatate Itinikai Matera, ngoka oye owala a li omukuluntugongalo, okwa li ha longo nuudhiginini e tu sile oshimpwiyu. Esiku limwe, okwe ya kaandjetu nokatungwa mu na eyi limwe. Okwa ti: “Olyeni.” Pethimbo ndyoka, osha li lela sha pumba okupewa eyi lyondjuhwa. Nonando omagano ngoka oga li omashona, omumwatate okwe ge tu pe nehalo ewanawa, nosha li sha gumu omitima dhetu.
Mokweendela ko kwethimbo, omumwameme Pam, etegelelo lyoye olya gu mo. Oshike she ku kwathele wu idhidhimike?
Onda ningi etegelelo mo 1973, sho ngame naWinston twa li moSouth Pacific. Otwa tokola tu shune koAustralia, nokonima yoomwedhi ne, etegelelo lyandje olya gu mo. Oshinima shoka osha li wo sha gumu Wiston noonkondo, oshoka okanona oka li ketu atuhe. Mokweendela ko kwethimbo, onda kala ndi li hwepo, ihe onda ka pepelelwa owala thiluthilu, sho twa pewa Oshungolangelo yomasiku 15 Apilili 2009. Oshitopolwa “Omapulo ga za kaaleshi” shoka shi li mo, oshi na epulo tali ti: “Mbela ngele okanona oka sile mela lyayina, otaka ka yumuka ngaa?” Oshitopolwa shoka oshe tu shilipaleka kutya oshinima shoka oshi li miikaha yaJehova, ngoka ha longo aluhe shoka shu uka. Ota ka aludha iilalo oyindji mbyoka twa etelwa muuyuni mbuka wa kolokosha, sho ta ka wilika Omwana a ‘hanagule po iilonga yaSatana.’ (1 Joh. 3:8) Oshitopolwa shoka, oshe tu kwathele wo tu kale twa lenga lela “okawe” kondilo hoka tu na, tu li aapiya yaJehova! Ando katwa li tu na etegameno lyUukwaniilwa, andola otu li peni?
Konima yeso lyokanona ketu, otwa tsikile ishewe niilonga yethimbo lyu udha. Otwa longo uule woomwedhi dhontumba moBetel yaAustralia, e tatu shuna ishewe miilonga yuutonatelishikandjo. Mo 1981, konima sho twa longele koshitopolwa shokuushayi moNew South Wales nomoSydney, otwa li twa hiywa tu ka longele koshitayimbelewa shaAustralia, ngaashi sha li hashi ithanwa, moka tu li sigo onena.
Omumwatate Winston, sho mwa li mwa longo koontuntu dhokoSouth Pacific, oshe ku kwathela ngaa miilonga yoye yokukala wu li oshilyo shOkomitiye yOshitayimbelewa shaAustralasia?
Eeno, osha kwathela ndje lela momikalo odhindji. Petameko, oshitayimbelewa shaAustralia osha li sha pulwa shi tonatele oontuntu ngaashi American Samoa naSamoa. Okuza mpono, oshitayimbelewa shaNew Zealand noshaAustralia, oyi imbwanga mumwe. Ngashingeyi, oshitayimbelewa shaAustralasia ohashi tonatele iitopolwa ngaashi American Samoa, Samoa, oontuntu dhokoshitopolwa Cook, New Zealand, Niue, Timor-Leste, Tokelau naTonga, ndhoka odhindji dhomudho nda mona uuthembahenda woku dhi talela po, ndi li omukalelipo gwoshitayimbelewa. Oshimoniwa shandje shokulonga pamwe naamwatate naamwameme aadhiginini koontuntu ndhoka, osha kala lela ekwatho enene kungame, sho ngashingeyi handi ya yakula okuza koshitayimbelewa.
Winston naPam ye li koshitayimbelewa shaAustralasia
Pehulilo, onda hala owala okutya, ngame naPam otwe shi mona mo kutya haakuluntu owala haya kongo Kalunga. Aagundjuka nayo oya hala “okawe . . . ke na ondilo,” nonando aakwanezimo yawo itaya ulike ohokwe. (2 Aak. 5:2, 3; 2 Ondjal. 34:1-3) Odhoshili kutya Jehova, oKalunga omunahole, ngoka a hala aagundjuka naakuluntu ya ka mone omwenyo gwaaluhe!
Sho ngame naPam twa tameke okukonga Kalunga, ngashingeyi pwa pita omimvo dhi vulithe po 50, katwa li tu shi kutya otashi ke tu fala sigo openi. Kapu na omalimbililo kutya oshili yUukwaniilwa, oyi li okawe kondilo kaaku na we! Otwa tokola toko tu dhiginine okawe hoka ke na ondilo, noonkondo dhetu adhihe!