Wupulula
9 Munkeelo aneethanu aahoopa nipenka nawe. Nave kaahoona etheneeri yaakhumme wirimu emorela veelaponi, nave yaavahiwa exaavi ya nlici nawiixa.* 2 Eyo yaahula nlici nawiixa* nave okhumamo mwiixi munlicini ntoko mwiisi wa cukucha mutokotoko; nsuwa vamoha ni erimu saahiripa wa nthowa na mwiisi waakhuma munlicini. 3 Nave mmwiisini mwemmwe waakhumamo nasope* amwalamwalela veelaponi yavathi, nave aavahiwa owerya, owerya omohamoha yoowo awalisi* a veelaponi yavathi aryaayano. 4 Aaleeliwa ohinanariha munyepu wa veelaponi yavathi, naari echu ekina ekithi naari mwiri mukina, nyenya pahiru achu yaawo ahirino eseelu ya Muluku vayuuci vaya.
5 Nasope heemereryiwe owiipha, nyenya wi aahoose mu miyeeri mithanu, nave ohooxa waya waalikana ni ohooxa wa walisi vaava onamulumeiye muchu. 6 Mmahiku yaawo achu anahaala waavyaka okhwa nyenya herwa ephwanya yoowo, nave awo anahaala ochunaka okhwa, nyenya okhwa onahaala waachawaka yaawo.
7 Nasope owo, aalikana ni akavalo oorehereryiwa ntakhara ekhoco; mmuruni mwawe waakhalamo echu yaalikana ni korowa a ooru, nave ethoi awe yaalikana ni ethoi ya muchu, 8 nyenya miihi awe yaalikana ni miihi a muthiyana. Miino awe yaalikana ni yaale a mwaco, 9 nave owo aakhalano yawiisaakihano ya vachirima ya muthipo. Oruma wa makuphelo awe waalikana ni oruma wa ikaaro inacuchiwa ni akavalo echimakelaka okhoconi. 10 Owo tho ookhalano mwiila ni mpuula ntoko awalisi, nave owerya wawe wa waahoosa achu mu miyeeri mithanu ori omwiilani. 11 Ookhalano mwene, munkeelo a onlicini nawiixa.* Mu Ehepiri nsina nawe ti Apiton,* nyenya mu Ekriki owo ookhalano nsina nawi Apolion.*
12 Otakhaliwa woopacerya woovira. Onani! Onnarwawo tho otakhaliwa wiili samala ichu seiya.
13 Munkeelo aneethanu nammoha aahoopa nipenka nawe. Nave kaahiiwa nsu naarweela veeri va manyaka a altare a ooru ori vamiithoni va Muluku 14 nlocaka wa munkeelo aneethanu nammoha yoowo aarino nipenka: “Waataphule ankeelo asese yaawo amakiwe o muhice mutokotoko Eufrate.” 15 Nave ankeelo asese yaawo yaarehereryiwe ntakhara elukuluku, nihiku, mweeri ni eyaakha yaalakeleliwe yaahitaphuliwa wi ewiiphe makupa aneeraru aachu.
16 Waaca wa anakhoco yaaweeciha akavalo yaari amiile amiileru masana meeli;* kaahiiwa waaca waya. 17 Mu yawoona aka, akavalo vamoha ni yaawo yaawenle yaari mmukhalelo ola: Yaakhalano yawiisaakihano ya vachirima yoophilivila ntoko mooro, yaasuuli ntoko erimu ni yancalo* ntoko enxofre; miru sa akavalo saari ntoko miru sa amwaco, nave mwaano mwaya waanakhumamo mooro, mwiisi ni enxofre. 18 Makupa aneeraru a achu yaahiiphiwa ni ipahu seiha raru: Mooro, mwiixi ni enxofre saakhuma mwaano mwaya. 19 Woona wi owerya wa akavalo ori mwaano mwaya ni omwiilani waya, tiwi miila saya iri ntoko inowa nave sookhalano miru, nave ni miila seiyo awo annaaphoreihano achu.
20 Nyenya achu akina yaawo yahiiphiwe ni ipahu seiya hiyaacharunwe wa miteko sa matata aya; awo hiyaahin’ye olapa masololo ni soophwaniherya sa ooru, sa eparata, sa muchove, sa maluku ni sa mapawa, seiho ihinawerya woona, naari wiiwa, naari weeca. 21 Awo hiyaacharunwe owiipha waya achu naari wiisaaciherya* waya naari ocapaheya* waya naari wiiya waya.