Wupulula

8 Vaavaa owo aahunleiye eseelu yaneethanu napiili, wirimu waamaaliwawo cuu, echu ya aminutu makhumi mararu. 2 Kaawoona ankeelo athanu napiili yaawo yeemenle vamiithoni va Muluku, nave yaavahiwa mapenka mathanu nameeli.

3 Aaphiya munkeelo mukina, apharenle etixela ya ooru yoopahamo* sawunkhela nave eemela waacamela va altare. Aavahiwa sawunkhela sawaaca vamoha ni mavekelo a aweela murima oothene wi avahe va altare aari ohoolo wa munyukhu. 4 Mwiixi wa sawunkhela woorweela ontatani na munkeelo waanawela vamoha ni mavekelo a aweela murima oyaaka vamiithoni va Muluku. 5 Nyenya mwawaakuveya munkeelo aakusa etixela yoopahamo sawunkhela, asareihamo ni mooro wa va altare nave arihela veelaponi ya vathi. Nave waakhalavo itari, masu, overunya, ni mwaacikinye. 6 Nave ankeelo athanu napiili yaarino mapenka mathanu nameeli yaahiirehererya wi yoope.

7 Oopacerya aahoopa nipenka nawe. Nave waakhalavo maralala ni mooro waakanyeriwe nnikhami, nave iho saavonyeryiwa veelaponi yavathi; makupa aneeraru a elapo yaaheeyeliwa,* makupa aneeraru a miri saaheeyeliwa, nave munyepu woothene waaheeyeliwa.

8 Munkeelo anaawiili aahoopa nipenka nawe. Nave echu yaalikana ni mwaako mutokweene yeeyo yaavarela mooro, yaariheliwa mphareya. Makupa aneeraru a ephareya yaathatuwa nikhami; 9 makupa aneeraru a soopatuxiwa saarino okumi sa mphareya saahikhwa, nave makupa aneeraru a apophoro yaanyaanyiwa.

10 Munkeelo aneeraru aahoopa nipenka nawe. Nave yaamora wirimu etheneeri etokweene, evyaaka ntoko muthiko; nave eyo yaamorenle makupa aneeraru a maahi a mmihiceni ni amweehimeni. 11 Nsina na etheneeri ti Owaawasa.* Makupa aneeraru a maahi yaathatuwa owaawasa, nave achu ancipale yaahikhwa wa nthowa na maahi, woona wi yaari oowaawa.

12 Munkeelo aneesese aahoopa nipenka nawe. Nave makupa aneeraru a nsuwa naamaniwa vamoha ni makupa aneeraru a mweeri ni makupa aneeraru a itheneeri, wi makupa aya aneeraru ekhale ooripa nave wi makupa aneeraru a nihiku ehikhaleno omwaleela, nave tho wi yeereye emohamoha ni ohiyu.

13 Kaahoona, nave kaahiiwa enaka evavaka veeri va erimu elocaka ni masu oovuwa eriki: “Otakhaliwa, otakhaliwa, otakhaliwa ti wa yaale anakhala veelaponi yavathi, wa nthowa na oruma wa mapenka anahalela, yaawo ankeelo araru ahanlaaya vakhaani woopa!”