Saweeriwa ti Arummwa
19 Vaavaa Apolu aareiye o Korinto, Paulo aavira makupa oomoko nave akhuruwela o Efesu. Owo aahaaphwanya oohuserya akina weiwo 2 nave aahaakoha yaawo ariki: “Apwanne mwaahaakhela munepa waweela vaavaa mwaaroromenlaanyu?” Awo yaamwaakhula eriki: “Hinintonko wiiwa elociwaka wi wookhalavo munepa waweela.” 3 Mwawiihiiha owo aahaakoha: “Mpatisiwe ni opatiso wawani?” Awo yaahaakhula: “Ni opatiso wa Yohani.” 4 Paulo aahi wa yaawo: “Opatiso wa Yohani, waari opatiso wooniherya orukunuxa murima; owo aanaaleela achu wi emuroromele yoowo aahaala orwa ohoolo wawe, ela tiwi, mwa Yesu.” 5 Yiiwalaaya yeela, awo yaapatisiwa mu nsina na Apwiya Yesu. 6 Vaavaa Paulo aakuhenryeiye matata awe, munepa waweela waahaakhuruwela yaawo, epacerya oloca mu ilocelo ikina ni oloca mwa miririmu. 7 Oothene waaca waya, yaari alopwana khumi napiili.
8 Mu miyeeri miraru, owo aanavolowa mu nipuro na malapelo* alocaka moolipa murima, aperekhaka miyaha ni avaanelaka* ni yaawo mmukhalelo woolekecha vooloca sa Omwene wa Muluku. 9 Nyenya woona wi akina yaaciyela maaru aya, ehinaroromela,* nave enaloca moonanara sa Ephiro variyari va muloko, owo aahaahiya nave aavalaanya oohuserya variyari va yaawo; nihiku nnihiku aanaperekha miyaha mu esikola ya Tiranu. 10 Yeela yaaheereya mu iyaakha piili, ophiyerya wi oothene yaakhala o eprovinsiya yo Asiya, Ayuta ni Akriki, yaahiiwa masu a Apwiya.
11 Muluku aatitelela weerano miteko sootikhiniha sakuru moorweela wa Paulo, 12 ophiyerya wi yaanakuxiwa maleeso awe a mmatani ni malaya aawareleiye muteko,* ikuheryiwa awiiceliwa, enapenuwa nave minepa soonanara saanakhuma. 13 Nyenya Ayuta akina yaawo yeeceeca elapo ni elapo yiikaraka masololo, yaaheererya tho opharihela nsina na Apwiya Yesu wa yaawo yaaphariwe ni minepa soonanara, eriki: “Kinnoolamulelaani chiri mu nsina na Yesu, yoowo Paulo onamulaleyeiye, mukhumemo.” 14 Anamwane athanu napiili a mmoha a ahooleli a alipa a mukucho awiichaniwa Seva, yaaneerano yeela. 15 Nyenya munepa waawaakhula oriki: “Miyaano koomusuwela Yesu nave tho nkinamutikhina Paulo; nto nyuwo mwaani?” 16 Muchu yoole aaphariwe ti munepa woonanara aahaacuphela, aawerya oothene yaawo, aaphoreiha, ophiyerya echawa mu empa yeele epwitikiri ene. 17 Mwaha yoola waasuweliwa ni oothene, ophitaanyerya Ayuta ni Akriki yaawo yaari o Efesu; oothene yaasareya woova, nave nsina na Apwiya Yesu naatitelela ocicimihiwa. 18 Ancipale a yaawo yaaroromenle, yaanarwa enaperekha ni olokoha saweera saya. 19 Mweeparipari, achu ancipale a yaawo yeerano masica, yaahaathukumanya aliivuru aya nave eweeyela vamiithoni va oothene. Yaalakhanyeryiwaaya esisapo aya, yaahooniwa wi yaanaakhwana macikhwi makhumi mathanu* a ikhorowa sa eparata. 20 Mwawiihiiha, mmukhalelo wakuru, masu a Yehova yaanaaceereryeya nave yaahinlaana.
21 Simanle weereya ichu soothene seiha, Paulo aalakelela* wi amanle ovira o Maketoniya ni o Akaya, aahaala oya o Yerusalemu. Owo aahi: “Kaya weiwo kinnaphwanela tho oya o Roma.” 22 Mwawiihiiha, owo aahaarumiha o Maketoniya akhaviheryi awe apiili, Timotiyu ni Erastu, nto owo aatitelela okhala eprovinsiya yo Asiya mu elukuluku vakhaani.
23 Elukuluku yeele, aakhalavo namvutuka mutokweene nthowa na ephiro. 24 Mulopwana mmoha awiichaniwa Timetriyu, mulipa oopaka ipa ikhaani sa eparata sa mu empa ya muluku Artemi, aanaaphuriha vancipale alipa oohana. 25 Owo aahaathukumanya yaawo vamoha ni akina yaaphara muteko mmohamoha nave alocano: “Alopwana, nyuwaano moosuwela phaameene wi nakoso ola onnaniphuriha vancipale. 26 Vano nyuwaano munnoona ni wiiwa wi ohiya pahiru o Efesu, nyenya eprovinsiya yoothene yo Asiya, mulopwana yoola Paulo onnalekecha muloko wa achu aweerihaka otoroka muupuwelo aya, alocaka wi amuluku oopakiwa ni matata aachu, tahi amuluku eeparipari. 27 Opwaha yeeyo, ohiya pahiru omuyeleela nakoso ahu, nyenya tho empa ya muluku mutokweene a mwaamuthiyana Artemi, hekhala echweenevo, nave enarwa emwarya tho otokweene awe, yoowo oothene a mu eprovinsiya yo Asiya ni oothene a elapo yavathi anamulapaaya.” 28 Yiiwalaaya yeeyo, esara ya alopwana yaala yaanyahuwa nave epacerya okhuwela eriki: “Mutokweene ti Artemi o Efesu!”
29 Mwawiihiiha, namvutuka aamwaramwaxeya epooma yoothene, nave oothene yaavolowa echimakaka va nipuro na eteyatru, yaapurulaka alopwana o Maketoniya, yaawo yaari asinthamwene a mukwaha a Paulo. 30 Paulo aanachuna ovolowa wi iiperekhe variyari va muloko, nyenya oohuserya hiyaamweemerenrye wi eereno yeeyo. 31 Ophiyerya tho akina a alipa oorehererya ifesta ni mapokha, yaawo yaari asinthamwene awe, yaamurumihela michaka emvekaka wi ahiileve oya nipuro nenle na eteyatru. 32 Eri hiihaa, aakhalavo namvutuka variyari va muloko waathukumanne: Akina yaanakhuwela elocaka echu emoha, akina tho yaanakhuwela elocaka echu ekina, nave ancipale a yaawo hiyaasuwenle echu ene yaathukumanenlaaya. 33 Mwawiihiiha, yaamviihavo Alexantre veeri va Muloko; Ayuta yaamukakhela ohoolo. Nave Alexantre aavaha eneneeryo ni matata awe, woona wi aanachuna wiisaakiha variyari va muloko. 34 Nyenya vaavaa yaasuwenlaaya wi yoowo aari Muyuta, yaakhuwela vamoha elukuluku ya iwora piili, eriki: “Mutokweene ti Artemi o Efesu!”
35 Wookuchulani, muhooleli a epooma amanle omaaliha muloko wa achu, owo aahi: “Alopwana nyu o Efesu, taani variyari va achu ohisuwenle chiryene wi epooma yo Efesu ennakhapelela empa ya muluku, ya muluku mutokweene Artemi vamoha ni iruku imonre wirimu? 36 Woona wi ela eri echu yoohivaanyeya, mmaale, muheereno echu mu waaluwa murima. 37 Alopwana ala mwaaruuhalaanyu va, hiiyale echu mu empa ya muluku ahu naari hamunyemunle muluku ahu amwaamuthiyana. 38 Waakhanle wi Timetriyu vamoha ni alipa oohana ari ni yoowo aakhalano echu ya omusomela muchu, aakhalavo mahiku nipuro na othoriha nnalapaaya vamoha ni atokweene;* eye weiwo wi esomelane mukina ni mukhwaawe. 39 Nyenya wakhala wi munaavya echu ekina opwaha yeela, eyo enaphwanela olakeleliwa va muthukumanoni wa nlamulo. 40 Vawi nri va yawoopiha ya okhalano nthowa na waarukunuwela alamuleli wa namvutuka yoola eeren’ye olelo, woona wi hinaavo nthowa nnahaalaahu oloca wi niisaakihe wa namvutuka yoola.” 41 Amanle oloca ichu seiha, owo aahaarowiha achu yaathukumanne.