Salmu
Salmu a Tavite.
27 Yehova ti omwaleela waka ni nivuluxo naka.
Taani kineeraaka kinamoova?
Yehova tonaakiha okumi aka.
Taani oni akoopopihe?
2 Vaava aweera soonanara yaakihiphenlaaya wi ekiiphe,
Amwiicani aka yaawo yaakihoosa tiyaakwaculiwe nave yuuwa.
3 Naamwi anakhoco ekirukurenrye wi ekihiphele,
Murima aka hokhala wawoova.
Naamwi elakaniwe ekhoco ntakhara miyo,
Naamwi hiiha, kinarwa kiikhalelaru mu nroromelo.
4 Echu emoha kinnamveka Yehova,
Ti yeeyo kinahaalaaka waavya,
Okhala mu empa ya Yehova mahiku oothene a okumi aka,
5 Tiwi, owo onahaala okikhapelela mu nipuro nawe mu nihiku na epahu;
Owo onahaala okiipithiha mu nipuro noovitheya na muxakala awe;
Nave owo onahaala okikuha vasulu va mwaako wi amwiicani aka ehiwerye okihooxa.
6 Vano, kinnaviiha muru aka vasulu va amwiicani yaawo anakirukurerya;
Mmuxakalani mwawe, kinamvaha mikucho ni okhuwela wa ohakalala;
Kinahaala wiipa macipo oomucicimihano* Yehova.
7 Mukiiwe, khwoo Yehova, vaava kineeraaka kikhuwele;
Mukooniherye mahala nave mukaakhule.
8 Mmurimani mwaka, kinnuupuwela nlamulo nanyu nla:
“Mwaavye ethoi aka.”
Kinarwa kaavya ethoi anyu, khwoo Yehova.
9 Muhivithe ethoi anyu wa miyo.
Muhimukhooce mulapeli anyu mu esara anyu.
Nyuwo mwa mukhaviheryi aka;
Muhikinyanyale naari mano muhikihiye, khwoo Muluku a nivuluxo naka.
10 Naamwi apapa aka ni amama aka ekinyanyanle,
Yehova onamukikhapelela.
11 Mukihusihe ephiro anyu, khwoo Yehova;
Mukihoolele mu ephiro yawookololowa wa nthowa na amwiicani aka.
12 Muhikiveleele wa amwiicani aka,*
Tiwi anamoona oowoka aakivinyerya,
Nave awo annakoopopiha moowali.
13 Ti woowi kaahaalaaka okhalawo kahaarino nroromelo
Wi koone oreera murima wa Yehova mu elapo ya akumi?*
14 Onweherye Yehova;
Okhale akuru ni oolipa murima.
Aa, onweherye Yehova.