Liivuru Anaawiili a Matharihelo

24 Yowasi aarino iyaakha thanu napiili vaavaa aakhanleiye mwene, nave aalamulela iyaakha makhumi maxexe* o Yerusalemu. Amamaawe yiichaniwa Sipiya, o Persepa. 2 Yowasi aaheera yeeyo yaari yaphaama vamiithoni va Yehova variyari va mahiku oothene a mulipa a mukucho, Yehoyata. 3 Yehoyata aahaathanla athiyana eeli, ntakhara Yowasi, nave owo aahikhala tiithi a anamwane aasilopwana ni aasithiyana.

4 Voocharela, Yowasi aalakelela mmurimani mwawe orehererya wanaawiili empa ya Yehova. 5 Mwawiihiiha, aahaathukumanya anamukucho ni Alevi nave aaleela ariki: “Haweni mu ipooma so Yuta nave mwathukumanye ikhorowa sa Isarayeli oothene wi mureheryekeno empa ya Muluku anyu, eyaakha ti eyaakha; munaphwanela weerano mwawaakuveya vooloca sa mwaha yoola.” Nto Alevi, hiyaawenreno mwawaakuveya. 6 Mwa yeeyo, mwene aamwiichana Yehoyata, muhooleli a alipa mukucho, nave amukoha: “Ntakhara heeni oheenrawevo echu wi Alevi eruuhe muxokho waweela wo Yuta ni wo Yerusalemu olakeleliwe ni Mose, mulapeli a Yehova, muxokho waweela wa muloko wa Isarayeli ntakhara muxakala wa Onamoona? 7 Tiwi, anamwane a Ataliya, muthiyana yoole oonanara murima, yaakhucula empa ya Muluku eeparipari nave epharihela ichu soothene saweela sa empa ya Yehova mmalapelo a Pala.” 8 Voocharela, moorweela wa nlamulo na mwene, yaapaka ekoofri nave ekuha vaate va mulako wa empa ya Yehova. 9 Ohoolo waya, yaahilaleya o Yuta woothewene ni o Yerusalemu, wi aruuheliwe Yehova muxokho waweela yoowo Mose mulapeli a Muluku eeparipari, aamulamulenleiye Isarayeli otakhwani. 10 Asitokweene oothene ni achu oothene yaahakalala; awo yaanaruuha sooveleela nave yaanarihela mukoofrini, ophiyerya esaren’ye.*

11 Vaavaa Alevi yaaruuhaaya ekoofri wi eveleele wa mwene, nave yoona wi mwemmo soosareyamo ikhorowa, namarepa a mwene ni mukhaviheryi a muhooleli a alipa mukucho yaanarwa ekuxamo ikhorowa mukoofrini nave ekookiherya ekoofri mu nipuro naya. Ti yeela yeeraayano nihiku ti nihiku, nave yaanathukumanya ikhorowa sawaaca. 12 Voocharela, mwene ni Yehoyata yaanaavahererya ikhorowa yaale yaavareryela muteko waapakiwa mu empa ya Yehova, nave awo yaanawiichana alipa ookwasa maluku ni alipa oohana wi erehererye empa ya Yehova. Yaanawiichana tho yaale yaalapa ni muthipo ni muchove wi erehererye empa ya Yehova. 13 Yaawo yaavareryela muteko yaahipacerya, nave muteko woorehererya waanaya vahoolo ovareryeliwaka ni yaawo; awo yaarehererya empa ya Muluku eeparipari ekhala ntoko yaakhalenlaaya nave elipiha. 14 Nave vaavaa yaakwaanxaaya, yaakuxa ikhorowa saahanle wa mwene ni wa Yehoyata, epharihela wi ipakiweno ikaruma sa mu empa ya Yehova, wi ipakiweno ikaruma sa muteko ni sooveleela vamoha ni akoopho ni ikaruma sa ooru ni sa eparata. Nave mikucho soopahiwa saanavahiwa moohihiyererya mu empa ya Yehova variyari va mahiku oothene a Yehoyata.

15 Vaavaa Yehoyata uuluvanleiye nave alyilevo* miyakha sincipale, owo aakhwa; owo aakhwile arino iyaakha nsana ni makhumi mararu.* 16 Mwawiihiiha, awo yaamvitha mu Epooma ya Tavite vamoha ni mamwene, woona wi owo aahipaka yaphaama o Isarayeli, vooloca sa Muluku eeparipari ni empa Awe.

17 Amanle okhwa Yehoyata, asitokweene o Yuta yaahirwa emukokhorela mwene, nave mwene aahaawiriyana. 18 Awo yaanyanyala empa ya Yehova, Muluku a makholo aya, nave epacerya olapela miri saweeliheya* ni soophwaniherya. Mwa yeeyo, esara ya Muluku yaamunyahuwela* Yuta ni Yerusalemu wa nthowa na yoocheka aya. 19 Yehova aanaarumihela alipa a miririmu wi emukookele yoowo, nave awo yaanaalopola* yaawo, nto awo yaanakhooca waawiriyana.

20 Munepa wa Muluku waamukhuruwela* Sakariya mwaana a Yehoyata mulipa a mukucho, nave owo aaheemela vanipuro noocukhuwa waapwaha achu, aloca ni yaawo ariki: “Ti yeela Muluku eeparipari olonceiye: ‘Ntakhara heeni muhiniiwelelaanyu malamulo a Yehova? Nyuwaano hamukhumelela phaama! Woona wi moomunyanyala, owo tho onamoonyanyalaani.’” 21 Yaampakanela yoowo, nave moorweela wa nlamulo na mwene, yaamvonya maluku van’yateni na empa ya Yehova. 22 Mwawiihiiha, mwene Yowasi huupuwenle osivela woororomeleya yoowo apapaawe,* Yehoyata, yaamoonihenryaaya, nave owo aahimwiipha mwanaya, yoowo va okhwa wawe aalonce ariki: “Yehova oone yeela nave oothoriheeni.”

23 Omapacereryo wa eyaakha,* anakhoco a Asiriya yaaya owana ni Yowasi, nave awo yaamuhiphela Yuta ni Yerusalemu. Voocharela yaahiwiipha asitokweene oothene nave yaamurumihela mwene o Tamasku ichu saya soothene. 24 Naamwi nikhuuru na akhoco na Asiriya naarino alopwana avakhaani, Yehova aahaaveleela anakhoco ancipale mmatani mwaya, woona wi awo yaamuhiya Yehova Muluku a makholo aya. Asiriya yaamuthoriha Yowasi. 25 Nave vaavaa Asiriya yaapwanhaaya, emuhin’ye aphoren’yesa,* alapeli awe yaamvaanelela, wa nthowa na nikhami na anamwane* a Yehoyata mulipa a mukucho. Awo yaamwiiphenle vakaamani vawe. Mwawiihiiha, owo aahikhwa nave avithiwa mu epooma ya Tavite, nto hiyaamvinthe mmahiye a mamwene.

26 Yaawo yaamvaanelenle Yowasi yaari Sapati, mwaana a Simiyati, o Amoni, ni Yehosapati, mwaana a Sinreti o Mowape. 27 Miyaha soothene vooloca sa anamwane awe, michaka sincipale sa omulopolano ni orehereryiwa* wa empa ya Muluku eeparipari, soorempwa mu soorepela* sa Liivuru a mamwene. Nave Amasiya mwanawe, aakhala mwene mu nipuro nawe.