Salmu
Salmu a Tavite.
23 Yehova ti Mukukhuli aka.
Hiyaavo eni ekithoweke.
2 Owo onnakaatelela va munyepuni mukithi,
Nave onnakihoolela mmapuroni awiichuuwamo ooriiryela.*
3 Owo onnakiichuuwiha.*
Onnakihoolela mu iphiro sawookololowa nthowa na nsina nawe.
4 Naamwi keecaka mu mpopa orimo epiiphi yooriipa phii,
Nkoovaru echu yoonanara,
Woona wi nyuwo muri ni miyo;
Ekopo anyu ni ekumputu anyu sinnakikhapelela.*
5 Munnarehererya yoolya yawaaca ntakhara miyo vamiithoni va amwiicani aka.
Munnariiryiha* muru aka ni makhurwa;
Koopho aka oosareya phaameene.
6 Chiryene, oreera murima ni osivela woororomeleya sinamukicharaka mahiku oothene a okumi aka,
Nave miyo kinarwa kikhala mu empa ya Yehova mmahiku aka oothene.