Salmu
116 Miyaano kinnamusivela Yehova,
Woona wi owo* onniiwa nsu naka, mavekelo aka ookhumela vathi va murima ntakhara nikhaviheryo.
3 Mikoyi sa okhwa saakirukurerya;
Mahiye yaakiwalela.*
Kaaweryiwa ni wuukhuwa vamoha ni othanana.
4 Nto kaahiichana nsina na Yehova:
“Khwoo Yehova, mukaakihe!”*
5 Yehova ta niphwanya* ni awookololowa;
Muluku ahu ta ikharari.
6 Yehova onnaakhapelela oohisuwela.
Nkaarino ikuru, nave owo aakivuluxa.
7 Okumi* aka wiichuuwe wanaawiili,
Woona wi Yehova oheeravo echu mooreera murima ntakhara miyo.
8 Nyuwo mookaakiha* wa okhwa,
Moovuta miithori aka nave mookhapelela nnaani naka wi kihikwaculiwe.
9 Kinahaala weeca vamiithoni va Yehova mu elapo ya akumi.
10 Kaakhalano nroromelo, mwawiihiiha kaaloca;
Miyo kaatepa wuukhuwa.
11 Kaakhala oohaleeliheya nave kaaloca:
“Achu oothene alipa awootha.”
12 Tiheeni kineeraaka kimukookiherye Yehova
Wa saphaama soothene onakipakeleiye?
13 Kinahaala omviiha koopho a ovuluxiwa,*
Nave kinamwiichana nsina na Yehova.
14 Kinamwaakhwaniherya malakano aka wa Yehova
Vamiithoni va achu awe oothene.
15 Echu yawiicelaxa* vamiithoni va Yehova
Ori okhwa wa yaawo ari oororomeleya wa yoowo.
16 Kinnavekela okhumela vathi va murima wa nyuwo, khwoo Yehova,
Woona wi ka mulapeli anyu.
Miyo ka mulapeli anyu, mwaana a kapuro anyu a mwaamuthiyana.
Nyuwo mookoopola wa ikurenti saka.
17 Kinamoovahaani mukucho wa mathamalelo;
Kinamwiichana nsina na Yehova.
18 Kinamwaakhwaniherya malakano aka wa Yehova
Vamiithoni va achu awe oothene,
19 Mmayate mwa empa ya Yehova,
Veeri vaa, weyo Yerusalemu.
Mmucicimihe Yehova!*