Liivuru Anaawiili a Matharihelo
26 Achu oothene o Yuta yaamukuxa Usiya, yoowo aarino iyaakha khumi nathanu nammoha, nave yaamweera okhala mwene mu nipuro na apapa awe, Amasiya. 2 Owo aamuteka wanaawiili Eloti nave aamurehererya Yuta amanle mwene* wiichuuwa vamoha ni makholo awe. 3 Usiya aarino iyaakha khumi nathanu nammoha vaavaa aakhanleiye mwene, nave aalamulela iyaakha makhumi mathanu napiili o Yerusalemu. Amama awe yiichaniwa Xekoliya, o Yerusalemu. 4 Owo aaneerano yeeyo yaari yawookololowa vamiithoni va Yehova, hiiha ntoko Amasiya, apapa awe, yenraayano. 5 Owo aanamwaavya Muluku mmahiku a Sakariya, yoowo aamuhusinhe omoova Muluku eeparipari. Vaavaa owo aamwaavyeiye Yehova, Muluku eeparipari aanamweeriha okhala ooreela.
6 Owo aakhuma ayaaka owana ni Afilisti nave aamwarya mukuso wa exiri yo Kati, exiri yo Xapine ni exiri yo Asitoti. Mwawiihiiha, owo aateka ipooma mmuceche wo Asitoti ni mmuceche wa Afilisti. 7 Muluku eeparipari aanatitelela omukhaviherya vaavaa aawaneiye ni Afilisti, a Arape yaawo yaakhala o Kurpali ni Ameunimi. 8 A Amoni yaapacerya omuliva muxokho Usiya. Nave ovuwa wawe waaphiya o Yikuputu, woona wi owo aakhala ooweryaxa. 9 Ohiya yeeyoru, Usiya aateka miconco o Yerusalemu, waacamela va mulako wookwantuni, o mulako wa mpopa ni apoco oolipa, nave alipiha. 10 Owo tho aateka miconco otakhwani nave aathipa* ihime sincipale (woona wi aakhalano mihuwo sawaaca); aaheerano tho emohamoha o Sefela ni va mureyareya.* Mmiyaakoni ni o Karmelo owo aakhalano alipa oolima ni achu yaawo yaalapa mu imaca sa uuva, woona wi aanasiveliwano olima.
11 Usiya tho aakhalano anakhoco ooreheryeya oya okhoconi. Awo yaanakhuma mu ilukuluku sa ekhoco, ereheryen’ye mmakhuuru. Yaakontaariwa ni orehereryiwa ni Xeiyeli, mulipa oorepa, ni mutokweene Maseiya, yoowo aahooleliwa ni Hananiya mmoha a atokweene a mwene. 12 Waaca wa ahooleli a imusi sa makholo aya yaawo yaahoolela anakhoco yaala oowerya, yaari macikhwi meeli masana mathanu nammoha.* 13 Anakhoco yaahooleliwa ni yaawo yaari macikhwi masana mararu ni thanu napiili ni masana mathanu* ooreheryeya oya okhoconi, nikhuuru noowerya na anakhoco yaawo yaamukhaviherya mwene wa amwiicani. 14 Usiya aahaarehererya anakhoco oothene ni iyaakiho, mavaka, akapaseti, soowara sa okhoconi, minra ni ixapala sa ovonyano maluku. 15 Ohiya yeeyoru, aapakawo tho o Yerusalemu maakina akhoco yaapakiwe ni manxinyeru; awo yaakuhiwa mmiconconi ni mmakwantuni mwa ixiri. Nave yaanavonyano mavaka ni maluku matokweene. Mwawiihiiha, ovuwa wawe waasareya mweelapo yoothene, woona wi aahaakhela nikhaviheryo nootikhiniha nave aakhala oowerya.
16 Mwawiihiiha, vaavaa aakhanleiye oowerya, murima awe waapacerya wiirumiha wi iipahule, nave aaheerano ichu moohiroromeleya ntakhara Yehova Muluku awe, moorweela wa ovolowa mu empa ya Yehova wi apahe sawunkhela va altare a sawunkhela. 17 Mwawaakuveya, Asariya mulipa a mukucho, ni alipa a mukucho akina a Yehova makhumi mathanu namararu, alopwana oolipa murima, yaahimuchara. 18 Awo yaamuhiiha Usiya nave eloca eriki: “Henoophwanelaani Usiya, opaha sawunkhela wa Yehova! Pahiru alipa a mukucho tanaphwanela opaha sawunkhela, woona wi awo muyareriwo wa Aroni, yaawo eelihiwe. Mukhume mu nipuro naweela, woona wi nyuwaano moheerano ichu moohiroromeleya, nave himwaakhela ncicimiho na makupa a Yehova Muluku wanthowa na weerano yeeyo.”
19 Nto Usiya aananariwa apharenle etixela ya opahamo sawunkhela wi apahe sawunkhela; nave vaavaa owo aatempeiye onanariwa ni alipa a mukucho, yaamurweela mareca vayuucini vamiithoni va alipa a mukucho, mu empa ya Yehova, waacamela va altare a sawunkhela. 20 Vaavaa Asariya, muhooleli a alipa a mukucho, ni anamukucho oothene yaanwenhaaya, yaahoona wi mareca yaamurweela vayuuci! Wa nthowa na yeeyo, yaamukumiherya vaate mwamvai nave owo tho aakhumela vaate mwawaakuveya nthowa nawi Yehova aamulaka.
21 Mwene Usiya aatitelela okhala a mareca ophiyerya nihiku na okhwa wawe. Woona wi aari a mareca, owo aatitelela okhala mu empa yoovalaanyiwa, ntakhara wi aahiviihiwa mu empa ya Yehova. Yotamu, mwanawe, aakhala muhooleli a empa* ya mwene, aathorihaka achu mweelaponi.
22 Nave saweereya ikina sa Usiya, ovinyerya woopaceryani ophiyerya wookuchulani, soorempwa ni mulipa a miririmu Yesaya, mwaana a Amosi. 23 Mwawiihiiha, Usiya aahiichuuwa ni makholo awe, nave yaamvitha ni makholo awe, nto mu emaca ya mahiye yeeyo yaari ya mamwene, woona wi yaaloca: “Owo mulipa a mareca.” Nave Yotamu, mwanawe, aakhala mwene mu nipuro nawe.