1 Atesalonika

1 Miyo Paulo, vamoha ni Silvanu* ni Timotiyu, wa muloko wo Tesalonika, yoowo ori mwawiiwanana ni Muluku, Atiithi ni Apwiya Yesu Kristu:

Mahala matokweene ni murecele ekhale ni nyuwo.

2 Mahiku oothene ninnamuthamalela Muluku vaavaa nnooromolaahuuni oothene nyuwo mmavekeloni mwahu, 3 woona wi vamiithoni va Muluku ahu ni Atiithi, ninnuupuwela moohihiyererya muteko anyu woororomeleya, wiilipiserya wanyu onaceenyeryiwa ni osivela, ni ovilela wanyu wanthowa na ewehereryo anyu mwa Apwiya ahu Yesu Kristu. 4 Tiwi hiyaano noosuwela, anna oosiveliwa ni Muluku, wi owo ohoothanlaani, 5 woona wi michaka saphaama nlalenryaahu, hiphin’ye wa nyuwo pahi ni masu, nyenya tho, ni ikuru, ni munepa waweela vamoha ni weemererya otokotoko; hiiha ntoko musuwenlaanyu achu a mukhalelo taani nikhanlaahu variyari vanyu ntakhara mphurelo anyu. 6 Nave nyuwo mwaakhala oonitakiherya hiyo ni a Apwiya, woona wi moheemererya masu muhoolelaka soohooxa sincipale ni ohakalala onarwa wa munepa waweela, 7 mwawiihiiha nyuwo muri yootakiherya wa oothene anaroromela o Maketoniya ni o Akaya.

8 Eparipari tiyawi, wa nthowa na nyuwo, Masu a Yehova aavuwa ohiya pahiru o Maketoniya ni o Akaya, nyenya nroromelo nanyu wa Muluku nohunlaana mmapuro oothene, mwawiihiiha tahi woochuneya wi nloce echu ekina. 9 Tiwi, yaawo aneene annatitelela oloca mukhalelo naaloncaahu ni nyuwo mu ekwaha yoopacerya ni mukhalelo mwaarukunuwenlaanyu wa Muluku, muhiyaka olapela soophwaniherya sanyu, wi mukhale akapuro a Muluku mukumi ni eeparipari, 10 nave wi mmuweherye Mwanawe orweela wirimu, yoowo omviihaleiye mwa alipa ookhwa, ela tiwi, Yesu, yoowo onooponle mwa esara yeeyo enoorwa.