Mateyu
18 Mu elukuluku ene yeele, oohuserya yaamwaacamela Yesu emukoha eriki: “Taani oni akhale mutokweenexa mu Omwene wa wirimu?” 2 Voocharela Yesu aamwiichana mwaana amweemexa veeri vaya 3 aloca ariki: “Chiri kinnooleelaani wi, mwaahirukunuwa murima* mukhala ntoko anamwane akhaani, himurwa mvolowa mu Omwene wa wirimu. 4 Mwawiihiiha, yoole oniiyeviha ntoko mwaana ola mukhaani, ti yoowo oni akhale mutokweenexa mu Omwene wa wirimu; 5 yoole onamwaakhela mwaana mukhaani si yoola mu nsina naka, onakaakhela tho miyo. 6 Nyenya yoole oni amukwaculihe mmoha a asikhaani yaala arino nroromelo mwa miyo, yaamukhala yaphaama wa yoowo omakeleliwa muxikoni namahaani yoole onapirikixiwa ni puuru, nave ariheliwe mu ephareya yawiixa.
7 “Otakhaliwa ti wa elapo yavathi, wa nthowa na maluku aya ookwaculiha! Chiryene, anamukhalakavo maluku ookwaculiha, nto ootakhaliwa muchu yoowo nnarweelawo nluku nookwaculiha! 8 Wakhala wi ntata naa naari nnaani naa ninnookwaculiha, okwate nave orihele okhwipi. Vawi ti waphaama wa weyo ovolowa mookumini orakanle, ohiya oriheliwa omooroni woohimala ni mata naari manaani meeli. 9 Nave tho, wakhala wi niitho naa ninnookwaculiha, owosole nave orihele okhwipi. Vawi ti waphaama ovolowa mookumini orino niitho nimoha, ohiya oriheliwa o Kehena* orino miitho oomeeli. 10 Mukhaleno ephoole wi muhimunyemuleru mmoha a akhaani yaala; kinnooleelaani wi elukuluku yoothene ankeelo aya wirimu annoona ethoi ya Atiithi aka, ari wirimu. 11 *——
12 “Munoona hai? Wakhala wi muchu orino ipucepuche nsana,* nave erimeela emoha, apwanne hanahiya o mwaako ihe makhumi mathanu naxexe ni thanu naxexe* wi aavye yeele emoha erimenle? 13 Chiri kinnooleelaani wi, aphwanya, owo onnatepa ohakalala ni yeeyo, ohiyana ni ihe makhumi mathanu naxexe ni thanu naxexe* ihirimenle. 14 Hiihaa tho, Atiithi aka* ari wirimu, hanakhwela wi arimeele naari mmoharu mano a akhaani yaala.
15 “Ohiya yeeyo, wakhala wi munnaa oopaka yoocheka, hawe wamuleele yoocheka awe* muriwo apiili pahiru. Oowiriyana, woomukhaviherya munnaa opaka yaphaama. 16 Nto aahoowiriyana, onwope muchu mmoha naari apiili, wi ni onamoona wa* achu apiili naari araru, mwaha woothene omalihiwe. 17 Wakhala wi haawiriyanne anamoona awo, waleele muloko. Nto wakhala wi hawiriyanne tho muloko, omweere yoowo ntoko mmalapo naari mulipa ooliviha muxokho.
18 “Chiri kinnooleelaani wi, ichu soothene muneeraanyu mmake veelaponi, inarwa imakiwa wirimu, nave soothene muneeraanyu mutaphule veelaponi, inarwa itaphuliwa wirimu. 19 Kinnooleelaani tho eparipari ela: Wakhala wi achu eeli a mwa nyuwo, veelaponi yavathi, munneemererya ovekela ntakhara mwaha vyakala wookhweleya, Atiithi aka ari wirimu enarwa yoovahaani. 20 Woona wi, athukumannevo achu eeli naari araru mu nsina naka, miyo kiri veeri vaya.”
21 Petru aamwaacamela Yesu, amukoha ariki: “Pwiya, munnaka akichekela, kimulevelele ikwaha kavi? Apwanne kimulevelele ikwaha thanu napiili?” 22 Yesu aahimwaakhula ariki: “Nkinooleela wi omulevelele ikwaha thanu napiili, nto ikwaha makhumi mathanu napiili ni thanu napiili.*
23 “Ti nthowa nene Omwene wa wirimu onalikanyihiwaaya ni mwene yoowo aachuna wi akapuro awe emulive ivaale. 24 Aapacenryeiye waaliviha, aaruuheliwa mulopwana yoowo aapolen’ye italentu macikhwi khumi.* 25 Nyenya, woona wi haarino yoolivano, mwene aahilamulela wi atumihiwe kapuro owo, amwaariye, anaawe ni ichu sawe soothene wi eliviwe evaale. 26 Mwawiihiiha, kapuro owo amukokhorela, amucicimiha, aloca ariki: ‘Kinnoovekaani wi mukiweherye, kinahaala woolivaani soothene.’ 27 Mwene ole aamoriwa ikharari, alevelela ivaale soothene kapuro aareiyeno nave amurowiha. 28 Nyenya kapuro ole aapwaha, aamphwanya kapuro mukhweiye yoowo aampolen’ye itenaariyu nsana.* Aamphwannyeiye, aamphara esiko, anamuhirikinya ariki: ‘Okilive soothene okipolen’yaawe.’ 29 Mwawiihiiha kapuro mukhweiye aahikokhora amveka ariki: ‘Kinnooveka wi okiweherye, kinahaala wooliva soothene.’ 30 Nto owo aakhooca, nave aalamulela wi ariheliwe mukariposo, ophiyerya alimve soothene aapolen’yeiye. 31 Akapuro akhweiye yonnaaya yeeyo yeeren’ye, yaahithananaxa nave eya yamuleela mwene, soothene seeren’ye. 32 Voocharela, mwene ole aamwiichaniha, alocano ariki: ‘Kapuro we oonanara murima, kohoolevelela ivaale soothene vaavaa waakivenkaawe. 33 Hiwaaphwanela tho ommorela ikharari kapuro mukhwaa, hiiha ntoko miyaano koomorenlaaka ikharari?’ 34 Mwawiihiiha, mwene ole anyeenyen’ye, amveleela wa mapilisa, ophiyerya alimve soothene aapolen’yeiye. 35 Hiihaa tho, Atiithi aka a wirimu ananweereelaani emohamoha wakhala wi mmoha ti mmoha a nyuwo hanamulevelela munnawe ni murima woothene.”