Saweeriwa ti Arummwa
14 Paulo ni Parnape yaaphiyalaaya o Ikoniyu, yaavolowa mu nipuro na malapelo* a Ayuta nave eloca ophiyerya wi muloko muncipale wa achu, Ayuta vamoha ni Akriki, epacerya weemererya. 2 Nto Ayuta yaawo yaaheemerenrye, yaahiweeriha achu a maloko, wi ewooneke moonanara anna. 3 Hiihaa, Paulo ni Parnape yaamaliha elukuluku yincipale elocaka moolipa murima moorweela wa ikuru sa Yehova, yoowo aanavaha onamoona wa masu a mahala awe matokweene, mu weemererya wi ineneeryo vamoha ni sootikhiniha, seereyeke moorweela wa yaawo. 4 Nyenya, muloko wa achu a epooma waakawanyeya; akina yaari o makupa a Ayuta, nave akina yaari makupa a arummwa. 5 Voocharela, achu a maloko vamoha ni Ayuta ni ahooleli aya yaalakelela waahooxa ni waavonya maluku. 6 Yaaleeliwaaya yeela, yaachawela o Lustra ni o Terpe, ipooma sa o Likawoniya, ni miceche soorukurerya. 7 Weiwo, awo yaatitelela olaleerya michaka saphaama.
8 O Lustra, aakhalawo mulopwana oorakala meco. Owo aari oorakala oyariwa wooyariwa, nave haantonkoru weeca. Owo aakiraathi, 9 anawiriyana yeeyo Paulo aaloceiye. Paulo aamuwehaxa yoowo, nave vaavaa aamoonneiye wi aakhalano nroromelo wi apenuxiwe, 10 aaloca ni masu oovuwa ariki: “Ovinye weemele.” Mwawiihiiha, mulopwana aacupha apacerya weeca. 11 Muloko woonnaaya yeeyo Paulo eenreiye, waakhuwela mu elocelo yo Likawoniya oriki: “Amuluku aakhuruwa, enooneya ntoko achu, ephiya wa hiyo!” 12 Awo yaapacerya omwiichana Parnape ni nsina na Sewu nave Paulo ni nsina na Herme, ntakhara ti yoowo aari mulipa ooloca. 13 Empa ya muluku Sewu yaari ohoolo wa epooma. Hiihaa, mulipa a mukucho aaruuha omulakoni wa epooma imope ni korowa a ithutu; vawi owo ni muloko yaanakhwela ovaha mukucho.
14 Nyenya vaavaa arummwa, Parnape ni Paulo yaasuwenlaaya yeela, yaahaahula soowara saya echimakela veeri va muloko nave ekhuwela eriki: 15 “Alopwana nyu, ntakhara heeni muneeraanyu ichu seiha? Hiyo tho na achu nrino sooceecheya soolikana ni sawinyu. Nnalaleerya michaka saphaama wa nyuwo wi mucharuwe ichu satheru, murukunuwele wa Muluku mukumi, yoowo opatunxe erimu, elapo ya vathi, ephareya ni soothene inakhala mummo. 16 Mmahiku a khalai, owo aaheemererya wi maloko oothene yeeceke mu iphiro saya. 17 Naari hiihaa, owo haahin’ye wiiseerela onamoona; aanooniha oreera wawe murima, oorupihelakaani nyuwo epula ya wirimu, oovahakaani ilukuluku sa sawiima, oovonihakaani ni soolya ni ohakalaliha murima anyu.” 18 Naamwi elocaka ichu seiha, hiwaakhwen’yevo waahiiha achu waahelela yaawo mikucho.
19 Nyenya Ayuta yaaphiya erwaaka o Antiyokeya ni o Ikoniyu nave etuunyerya muloko, voocharela yaamvonya maluku Paulo nave empurulela okhwipi wa epooma, yuupuwelaka wi aari ookhweene. 20 Nyenya vaavaa oohuserya yaamurincaaya, aavinya achikela opooma. Mu nihiku noocharela, owo aapwaha ni Parnape eyaaka o Terpe. 21 Emanle olaleerya michaka saphaama mu epooma yeele ni waapaka oohuserya ancipale, yaakookela o Lustra, Ikoniyu ni o Antiyokeya. 22 Weiwo, yaahaalipiha oohuserya,* yaaceenyeryaka wi etitelele okhala munroromeloni, eriki: “Nnaphwanela ovolowa mu Omwene wa Muluku moorweela wa soohooxa sincipale.” 23 Ohiya yeeyoru, yaahaathanlela atokweene muloko ti muloko, epakaka mavekelo ni wiinanela olya, nave yaahaaveleela yaawo wa Yehova, yoowo awo yaamuroromelaaya.
24 Voocharela awo yaavira o Pisitiya nave ephiya o Panfiliya, 25 emanle olaleerya masu o Perxe, awo yaakhuruwela o Ataliya. 26 Yaacimula vaavale elapuwela o Antiyokeya, weiwo yaakhenlaayawo mahala matokweene a Muluku wi ephare muteko yoowo vano yaakhwanihenryaaya.
27 Yaaphiyalaaya, yaathukumanya muloko woothene, nave yaahaaleela ichu sincipale seiho Muluku eenreiye moorweela wa yaawo, ni mukhalelo aahunleiye mulako wi maloko eroromele. 28 Mwawiihiiha, awo yaamaliha elukuluku yincipale ni oohuserya.