Salmu
96 Mmwiipele Yehova ncipo mvyaani.
Mmwiipele Yehova, elapo yoothene!
2 Mmwiipele Yehova; mucicimihe nsina nawe.
Mulaleyeke michaka saphaama sa ovuluxa wawe nihiku ti nihiku.
3 Mulaleye ovuwa wawe variyari va maloko,
Miteko sawe sootikhiniha variyari va achu oothene.
4 Yehova ti mutokweene ni oophwanela ocicimihiwa.
Owo tawoopihaxa waapwaha amiluku oothene akina.
5 Amiluku oothene a achu ari amiluku atheru,
Nyenya Yehova ti yoowo opanke erimu.
6 Ncicimiho* ni ovuwa sohoorukureryaani;
Va nipuro nanyu naweela sookhalavo ikuru ni oreera.
7 Mumvahe Yehova yeeyo enamphwanela, nyuwo imusi sa achu,
Mumvahe Yehova yeeyo enamphwanela wa nthowa na ovuwa wawe ni ikuru.
8 Mumvahe Yehova ovuwa onaphwanela nsina nawe;
Muruuhe yoovaha nave mvolowe mmayateni mwawe.
10 Mulokohe variyari va maloko: “Yehova ti Mwene!
Elapo yootikitheryiwa moolipa; nave eyo henawerya ocikinyeya.
Owo onamwaathoriha* achu mwawookololowa.”
11 Irimu ihakalale, nave elapo yavathi ehakalale;
Ephareya erume ni soothene siri mwemmo;
12 Imaca ihakalale ni soothene siri mwemmo.
Mu elukuluku emohamoha, miri soothene sa mutakhwani ihakalale
13 Vamiithoni va Yehova, woona wi owo onnarwa;*
Owo onnarwa wi athorihe elapo.
Owo onamuthoriha elapo yavathi mwawookololowa,
Vamoha ni achu ni ororomeleya wawe.