Liivuru Anaawiili a Matharihelo
35 Yosiya aahimpaka Paska ntakhara Yehova o Yerusalemu nave axinama yaahiiphiwa ntakhara mikucho sa Paska mu nihiku naneekhumi naxexe na mweeri woopacerya. 2 Owo aahaakookiherya alipa a mikucho mmiteko saya nave aahaaceenyerya wi ephareke miteko saya mu empa ya Yehova. 3 Mwawiihiiha aahaaleela Alevi, ahusiha a Isarayeli oothene, yaawo yaari aweela ntakhara Yehova: “Mmukuhe Arka awela mu empa yeeyo etekiwe ni Solomoni, mwaana a Tavite, mwene a Isarayeli; nyuwaano himunaphwanela tho omuteexa mmachurini. Vano, mmurumeele Yehova, Muluku anyu, ni wa achu awe, Isarayeli. 4 Nave mwiirehererye ntakhara muteko, mwawiiwanana ni imusi sa makholo anyu vamoha ni makhuuru anyu, mucharihaka yeeyo erempwe ni Mwene Tavite, a Isarayeli ni Solomoni, mwanawe. 5 Mweemele mu nipuro naweela mmakhuuru mwawiiwanana ni imusi sa makholo sa nloko* sa asinninyu; emoha ti emoha enaphwanela okhalano nikhuuru na emusi ya makholo a Alevi. 6 Nwiiphe asinama a mikucho sa Paska, mwiiseelihe ni mpake marehereryo ntakhara asinninyu, wi mwaakhwaniherye masu a Yehova yaavahiwe moorweela wa Mose.”
7 Yosiya aahaaveleela wa muloko axinama, ntakhara mikucho sa Paska: Ipucepuche ni ipuri sawaakhwana macikhwi makhumi mararu* vamoha ni imope sawaakhwana macikhwi mararu* soothene saakuxiwe mmuhakhuni wa mwene. 8 Asitokweene awe tho yaapaka yooveleela ntoko yoovaha ntakhara muloko, alipa mukucho ni Alevi. Hilikiya, Sakariya ni Xeyeli, ahooleli a empa ya Muluku eeparipari, yaahaavaha alipa a mukucho axinama a mikucho sa Paska macikhwi meeli ni masana mathanu nammoha* ni imope masana mararu.* 9 Konaniya ni asinnawe Semaya ni Netaneli, hiihaa ntoko Hasapiya, Xeyeli ni Yosapati, ahooleli a Alevi, yaahaaveleela wa Alevi ni axinama a mikucho sa Paska macikhwi mathanu* ni imope masana mathanu.*
10 Muteko waarehereryiwa, nave alipa a mukucho yaahikhala mmapuro aya, vamoha tho ni Alevi, mwawiiwanana ni makhuuru aya hiihaa ntoko mwene aalamulenleiye. 11 Yaahiwiipha axinama a mikucho, nave alipa a mukucho yaahimiserya nikhami yaakhenlaaya wa Alevi, eniiha Alevi eviihakavo manyapara a axinama. 12 Voocharela, yaareherya soovaha soopahiwa wi yaakawele achu, yaawo yaari mmakhuuru mwawiiwanana ni imusi sa makholo, wi soovaha iveleeliwe wa Yehova mwawiiwanana ni yeeyo erempwe mu liivuru a Mose; nave yaaheerano emohamoha ni imope. 13 Yaahaapeya yoovaha ya Paska vaikho, mwawiiwanana ni yookhovelela; nave awo yaahaapeya* soovaha saweela mu ipiya, mmino ni mpanelani; voocharela yaahaakerihela mwawaakuveya achu oothene. 14 Voocharela, Alevi yaarehererya yoolya ya Paska ntakhara yaawo aneene ni alipa a mukucho, woona wi alipa a mukucho, muyareriwo wa Aroni, yaahanle evahaka mikucho soopahiwa ni ipaanya ophiyerya osekuwa. Mwawiihiiha, Alevi yaahirehererya yoolya ya Paska ntakhara yaawo aneene ni wa alipa a mukucho, muyareriwo wa Aroni.
15 Alipa awiipa, anamwane a Asafi, yaari mmapuro aya mwawiiwanana ni nlamulo na Tavite, na Asafi, na Hemani ni Yetutumi mulipa a woona a mwene; nave alipeleli a milako yaari mmilako soohiyanahiyana. Hiwaari woochuneya ohiya muteko aya, ntakhara asinnaya, Alevi, yaahaareheryela yoolya ya Paska. 16 Hiihaa, mu nihiku nenle, yaakwaaxa orehererya soothene Yehova aalamulenleiye, wi emulye Paska ni opaka soovaha soopahiwa va altare a Yehova, mwawiiwanana ni Nlamulo na mwene Yosiya.
17 Aisarayeli yaawo yaari vaavale, yaamulya Paska mu elukuluku yeele ni ipaau soohiheliwa yooruruvaliha mmahiku mathanu nameeli. 18 Ovinyerya mmahiku a mulipa miririmu Samuwele, hantonko weereya Paska oolikana ni yoola o Isarayeli, nave haavo mwene mukina o Isarayeli aampanke Paska oolikana ni Paska eeriwe ni Yosiya, ni alipa amukucho, Alevi, ni oothene o Yuta ni o Isarayeli yaari vaavale, vamoha ni achu o Yerusalemu. 19 Paska yoola aalyiwe mu eyaakha yaneekhumi nathanu nararu ya olamulelo wa Yosiya.
20 Imanle weereya soothene seiya, vaavaa Yosiya aareherenryeiye empa ya Yehova, Neko mwene o Yikuputu, aacimula ayaaka owana o Karkimisi makupa a Eufrate. Voocharela, Yosiya aayawo wi awane ni yoowo. 21 Mwa yeeyo, owo aamurumihela anamichaka Yosiya, ariki: “Apwanne wookhalanovo echu ni yeeyo, weyo mwene o Yuta? Tahi wi kinarwa owana ni weyo olelo, nto kinaya owana ni omwene okina,* nave Muluku ookileela wi kinaphwanela weereno mwawaakuveya. Wi okhale phaama, omaale omwiica Muluku yoowo ori ni miyo, waaheerano yeeyo owo onamooruuhela epahu.” 22 Nto Yosiya, haamwiiwelenle yoowo, nave aahiwara ntoko mukhoco pure wi awane ni yoowo; haachunne owiriyana masu a Neko, yaawo yaarweela mwaano mwa Muluku. Mwawiihiiha, owo aaya owana o mureyareya wo Mexitu.
23 Mwa yeeyo, alipa oovonya munra yaahimuhoma mwene Yosiya nave mwene aaloca wa anamuteko awe ariki: “Mukiviihevo vaava, tiwi kootepa ophoreihiwa.” 24 Hiihaa, anamuteko awe yaamviihamo mu ekaaro ya ekhoco, emukuha mu ekaaro awe yanaawiili nave emukeriha o Yerusalemu. Mwawiihiiha, owo aahikhwa avithiwa mu nihiye na makholo awe, nave Yuta oothene ni Yerusalemu yaamwinlela Yosiya. 25 Nave Yeremiya, aahiipa ncipo na makhwelo ntakhara Yosiya, nave alipa awiipa oothene aasithiyana ni aasilopwana anniipa ntakhara Yosiya mu wiikhupanyerya waya ophiyerya olelo; wiipa macipo yaawo eri yookhovelela yo Isarayeli, nave awo aarempwa mu liivuru a wiikhupanyerya.
26 Saweereya ikina sa Yosiya, miteko sawe sa osivela woororomeleya, mu wiiwelela yeeyo erempwe mu Nlamulo na Yehova, 27 ni yeeyo eenreiye, ovinyerya woopaceryani ophiyerya wookuchulani, irempwale mu liivuru a mamwene o Isarayeli ni o Yuta.