Marku

9 Yesu aahaaleela tho ariki: “Chiri kinnooleelaani wi akina a nyuwo muri vaava, helawiha okhwa ehipacenrye woona Omwene wa Muluku orwaaka ni owerya.” 2 Evinre mahiku mathanu nammoha, Yesu aamukuxa Petru, Tiyaku vamoha ni munnawe awiichaniwa Yohani, yaaworu, aayano omwaako woorakama. Weiwo, Yesu aatatuxiwa vamiithoni vaya; 3 soowara sawe saanaarya nave saakhala saweelaxa. Haavo mulipa oovasa veelaponi yavathi onawerya weeliha hiiha ikuwo. 4 Nave tho, Eliya ni Mose yaahooneya wa yaawo, epacerya oloca ni Yesu. 5 Voocharela, Petru aaloca wa Yesu ariki: “Rapi, ti yaphaama wi nikhale wenno. Nnahaala oteka mixakala miraru, mmoha wawinyu, mukina wa Mose ni mukina wa Eliya.” 6 Chiryene, owo haasuwenle echu aahaaleiye weera, woona wi yaasareya woova. 7 Voocharela, naahooneya neeku, naahuruwela, nave naahiiweya nsu muneekuni nriki: “Ola ti Mwanaka, kinamusivelaaka. Munwiriyaneke.” 8 Mootutuxa, yaawenhaaya voorukurerya, haavo yaamonnaaya, pahiru Yesu taari ni yaawo.

9 Ekhuruwaka omwaako, Yesu aahaalopola wi ehimuleele muchu mukina vooloca sa yeeyo yoonnaaya, ophiyerya Mwaana a muchu aviihiwe mookhwani. 10 Awo yaahiiwelela masu awe,* nyenya yaanavaanyihana vooloca sa yootaphulela ya oviihiwa mookhwani. 11 Awo yaapacerya omukoha eriki: “Vano, ntakhara heeni alipa oorepa analocaaya wi Eliya toni apacerye orwa ahaakumve ophiya Kristu?” 12 Owo aawaakhula: “Eliya toni apacerye orwa wi arehererye ichu soothene; vano ela eniiwanana hai ni yeeyo erempwe vooloca sa Mwaana a muchu wi onaphwanela ohooxeya ichu sincipale ni onyemuliwa? 13 Nyenya kinnooleelaani wi Eliya oorwa, nto awo yaamweerela ichu soothene yaachunaaya, hiihaa ntoko yaarempwaaya vooloca sa yoowo.”

14 Yaaphiyalaaya weiwo yaariwo oohuserya akina, yaahoona muloko* mutokweene wa achu waarince, nave vaavale yaakhalavo alipa oorepa evaanyihanaka ni yaawo. 15 Nyenya vaavaa achu a muloko yoole yaamonnaaya Yesu, yaatepa otikhina nave yaachimaka eyaaka omulocela. 16 Mwawiihiiha, owo aahaakoha ariki: “Tiheeni munavaanyihanaanyu ni oohuserya?” 17 Mmoha a muloko yoole wa achu aamwaakhula Yesu ariki: “Muhusiha, kihooruuhelaani mwanaka nthowa nawi ookhalano munepa onamweeriha ohiloca.* 18 Munepa owo wamphara, onnamuuwiherya vachayani, anakhuma niphweru mwaano ni okhuuriha miino, ophiyerya wuumavo. Kaahaaveka oohuserya anyu wi yiikare, nave awo hawenrye.” 19 Aakhulaka, Yesu aahi wa yaawo: “Muyareriwo woohiroromela, ophiyerya liini kineeraaka kititelele okhala ni nyuwo? Kini koovileleeni ophiyerya liini? Mmuruuhe va.” 20 Awo yaamukeriha mmiravo wa Yesu, nto munepa waamonnaaya Yesu, waamuthukumeliha mwaana yoole, uuwela vachayani, anuupureya, akhumaka niphweru mwaano. 21 Voocharela Yesu aahaakoha apapa a mwaana: “Echu yeela epacenrye omweera ovinyerya liini.” Awo yaahaakhula: “Ovinyerya woonamwaneni, 22 nave ikwaha sincipale onnamvonyerya vaikho ni mmaahini wi omwiiphe. Nto mwaaweryaka weeravo echu, munikhaviherye.” 23 Yesu aamwaakhula ariki: “Masu awi ‘Mwaaweryaka!’ Ichu soothene ti sooweryeya wa yoole orino nroromelo.” 24 Moohilekela, tiithi a mwaana aakhuwela alocaka: “Kookhalano nroromelo! Mukikhaviherye waaceererya nroromelo naka!”

25 Vano, Yesu onneiye wi muloko wa achu waanamwaacamela, owo aasamela munepa woonanara, alocaka: “Weyo munepa woohiloca ni woohiiwa, miyo kinnoolamulela, khumamo mwa mmiravo ola, nave ohirwe tho omukookele!” 26 Omanle okhuwela ni omuthukumeliha vatokovene, munepa woonanara waakhuma, nave mwaana ole aari ntoko muchu ookhweene; mwawiihiiha achu ancipale yaanaloca eriki: “Ookhwa!” 27 Nyenya Yesu amphara ntata amviiha nave owo aaheemela. 28 Hiihaa, aavolonweiye mpa, oohuserya awe yaamukoha vameekheiye eriki: “Ntakhara heeni nihiwenryaahu wiikara nsololo?” 29 Owo aawaakhula: “Munepa wa mukhalelo yoola, oniikariwa pahiru ni mavekelo.”

30 Awo yaacimula nipuro nenle, eya yavira o Kalileya, nto Yesu haachunne wi achu esuwele sa yeela. 31 Tiwi, Yesu aanaahusiha oohuserya awe, aaleelaka ariki: “Mwaana a muchu onamveleeliwa mmatani mwa amwiicani awe, awo anammwiipha, nyenya evinre mahiku mararu amanle wiiphiwa, owo onamviihiwa mookhwani.” 32 Nto awo hiyiiwexexa sooloca sawe, nave yaanoova omukoha.

33 Awo yaaphiya o Kafarnawu. Yaavolonwaaya mpa, Yesu aahaakoha: “Tiheeni mwaavaanyihanaanyu mphironi?” 34 Awo hiyaamwaakhunle echu, woona wi mphironi, yaavaanyihana vooloca sa taani ari mutokweenexa. 35 Mwawiihiiha, Yesu aakiraathi, awiichana oohuserya Khumi Napiili nave alocano ariki: “Yoole onachuna okhala oopacerya, onaphwanela okhala ookuchula ni kapuro a oothene.” 36 Voocharela aamukuxa mwaana, amweemexa variyari vaya; ampharela mmakhatani* nave aloca wa oohuserya awe: 37 “Yoole onamwaakhela mmoha a anamwane yaala akhaani mu nsina naka, onakaakhela tho miyo; nave yoole onakaakhela miyo, hanakaakhela pahiru miyo, nyenya tho onamwaakhela Yoole okirumme.”

38 Yohani aaloca wa Yesu: “Muhusiha, noomoona muchu iikaraka masololo mu nsina nanyu, nave neererya omuhiiha, woona wi hananchara.” 39 Nyenya Yesu aahi: “Muheererye omuhiiha, woona wi haavo onapaka sootikhiniha* mu nsina naka nave voocharela anakiloca moonanara. 40 Ntakhara yoole ohinavaanyihana ni hiyo, ori ni hiyo. 41 Chiri kinnooleelaani wi, yoole oni oovaheeni koopho a maahi oowurya nthowa na okhala wanyu oomuchara a Kristu, harwa ayeleela nchuwelo nawe. 42 Nyenya yoole oni amukwaculihe mmoha a asikhaani yaala arino nroromelo, yaamukhala yaphaama wa yoowo omakeleliwa muxikoni namahaani yoole onapirikixiwa ni puuru, nave ariheliwe mphareya.

43 “Wakhala wi ntata naa ninnookwaculiha, okwate. Vawi ti waphaama wa weyo ovolowa mookumini orakanle, ohiya orino matata oomeeli oriheliwe o Kehena,* weiwo mooro ohinaweryaaya oxipihiwa. 44 *—— 45 Wakhala wi nnaani naa ninnookwaculiha, okwate. Vawi ti waphaama wa weyo ovolowa mookumini ori oorakala, ohiya oriheliwa o Kehena* ni manaani oomeeli. 46 *—— 47 Nave, wakhala wi niitho naa ninnookwaculiha, orihele okhwipi. Vawi ti waphaama ovolowa mu Omwene wa Muluku nniitho nimoha, ohiya oriheliwa o Kehena* ni miitho oomeeli, 48 weiwo nyuuku ihinakhwaaya nave mooro ohinaxiphaaya.

49 “Vawi oothene anaphwanela weeleeliwa ni mooro. 50 Maakha* taphaama, nto wakhala wi maakha aayeleela osiva waya, muni mukookiherye hai osiva waya? Mukhaleno maakha mwa nyuwo meekhiinyu, nave mukhale a murecele mukina ni mukhwaawe.”