Marku

16 Mwawiihiiha, nivinre nihiku na Sapata, Mariya Matalena, Mariya amama awe Tiyaku vamoha ni Salome, yaahithuma makhurwa wi yacikichele mwiili wa Yesu. 2 Wooxiixelo ene wa nihiku noopacerya na esumana,* nsuwa nrikimukhumaru, awo yaaya o mahiye.* 3 Nave yaanakohana eriki: “Taani oni anikhaviherye oviihavo nluku vamulako wa nihiye?” 4 Nto yaawenhaayavo, yaahoona wi nluku nle naapirikixiwavo, naamwi naari ntokotokoxa. 5 Yaavolonwaaya mu nihiye, yaamoona mmiravo akiraanthe makupa oolopwana, awanre yoowara yoorekama yaweela nave awo yaatuthuwa. 6 Owo aalocano ariki: “Muhituthuwe. Koosuwela wi munamwaavya Yesu Munaasareti yoowo aathomeiwe va mwiri. Owo ooviihiwa. Haamo muumu. Moone nipuro aakuhiweiyevo. 7 Vano haweni mwaaleele oohuserya awe vamoha ni Petru, wi ‘Owo oohoola, onaya o Kalileya. Munammoona weiwo, ntoko aalonceiye ni nyuwo.’” 8 Mwawiihiiha, yaavinya o nihiyeni, echawa, vawi yaatikhina, enathukumela. Nave haavo yaamuleenlaaya, nthowa na woova.*