Saweeriwa ti Arummwa
1 Oosiveliwa aka Teyofilu, mu liivuru aka oopacerya, kaahoorepela ichu soothene Yesu aapacenryeiye weera ni ohusiha, 2 ophiyerya nihiku nenlo aawelihiweiye wirimu, amanle ovaha sooleeliherya moorweela wa munepa waweela wa arummwa aathanlileiye. 3 Amanle ohooxiwa, aahiisooneiha wa yaawo moorweela wa sawooniherya seeparipari wi owo aari mukumi. Aahooniwa ni yaawo mmahiku makhumi maxexe, alocakano sa Omwene wa Muluku. 4 Aathukumanneiye vamoha ni yaawo, aahaalamulela ariki: “Muhipwahewo o Yerusalemu, nto mutitelele owehererya yeeyo Atiithi aroromelinhaaya, ntoko kooleenlaakaani. 5 Mweeparipari, ti wi Yohani aapatisa ni maahi, nto nyuwo munarwa mpatisiwa ni munepa waweela ehivinrevo mahiku mancipale.”
6 Mwawiihiiha, vaavaa yaathukumannaaya ni yoowo, yaamukoha eriki: “Pwiya, ti elukuluku yeela muneeraanyu mukookiherye omwene wa Isarayeli?” 7 Owo aawaakhula: “Hori wawinyu osuwela mahiku ni ilukuluku Atiithi atikithenryaaya mu owerya waya wa olamulela.* 8 Nto vaavaa munepa waweela oneeraaya orwe wa nyuwo, munamwaakhela ikuru nave munarwa mukhala anamoona aka o Yerusalemu, o Yuteya woothewene ni o Samariya, ophiyerya weiwo elapo ekotenlaayawo.” 9 Amanle oloca masu yaala, aawelihiwa wirimu emoonaka nave neeku naamuhuruwela ophiyerya ehinamoona. 10 Nave ewehaka wirimu hiihale, Yesu apwahaka, mootutuxa yaahooneya alopwana eeli yeemenle ni yaawo ewanre soowara saweela 11 nave yaahi: “Alopwana nyu o Kalileya, ntakhara heeni mweemenlaanyu munaweha wirimu? Yesu yoole okuxiwe mwa nyuwo awelihiwa wirimu, onamukooka mmukhalelo mmohamoha yoowo mmonnaanyu awelaka ayaaka wirimu.”
12 Awo yaakookela o Yerusalemu ekhumaka omwaako wiichaniwa Mwaako wa Asitona, yoowo waacamenle o Yerusalemu, orakamela ni epooma echu ya ekilomeeturu emoha. 13 Vaavaa yaaphin’yaaya, yaawela eyaaka empa yoosulu weiwo yaakhalaayawo. Yaariwo Petru ni Yohani, Tiyaku ni Antreya, Filipi ni Tomasi, Partolomewu ni Mateyu, Yakopo mwaana a Alfewu, Simoni museloti, ni Yutasi mwaana a Yakopo. 14 Ni murima mmoha, oothene yaatitelela ovekela, yaakhalavo tho athiyana akina ophitaanyerya Mariya amama awe Yesu vamoha ni asinnawe.
15 Mmahiku yaale, Petru aaheemela veeri va anna (achu yaathukumanne* vaavale yaari echu ya nsana ni makhumi meeli) nave aloca ariki: 16 “Alopwana, anna, waari woochuneya wi yaakhwanele yeeyo munepa waweela, moorweela wa Tavite, waaloncaaya mwa miririmu mu soorepa vooloca sa Yutasi, yoowo aari muhooleli a yaale yaamphanre Yesu. 17 Yoowo aahaalakhanyiwa ni hiyo nave aathanliwa wi apake makupa mmuteko yoola. 18 (Mulopwana ola, aathuma emaca ni nlivelo na meerelo awe oonanara, nave yoowo aamora ni muru, aphuleya,* nave marupo ewusuwamo. 19 Ela yaasuweliwa ni achu oothene o Yerusalemu, hiihaa, emaca yeela yaahiichana mu elocelo aya Aseltama, ela tiwi, “Emaca ya Nikhami.”) 20 Woona wi yoorempwa mu liivuru a Salmu: ‘Empa awe ethatuwe milepe nave ohikhaliwekemo,’ nave tho: ‘Otokweene awe okuxiwe ni muchu mukina.’ 21 Mwawiihiiha, ti woochuneya omuthanla mmoha mwa alopwana yaale yaanihoola hiyo elukuluku yoothene Apwiya Yesu yaapharaaya miteko saya* variyari vahu, 22 ovinyerya opatisiwa waya ni Yohani ophiyerya nihiku yaawelihiwaaya wirimu, owo onaphwanela weerela onamoona vamoha ni hiyo mu oviihiwa mookhwani wa Yesu.”
23 Mwawiihiiha, yaahaaromola apiili: Yosefe awiichaniwa Parsapa, yoowo tho aasuweliwe ntoko Yustu vamoha ni Matiya. 24 Voocharela, awo yaavekela eriki: “Khwoo Yehova, nyuwo musuwenle mirima sa achu oothene, mmuthoonye mwa alopwana ala eeli yoowo mmuthanlilaanyu 25 wi aakhele muteko yoola wa okhala murummwa yoowo Yutasi ohin’yeiye ayaaka nipuro nawe.” 26 Hiihaa, awo yaaheeherya ihako mwa yaale eeli, emuchoma Matiya, anaalakhanyiwa* vamoha ni arummwa khumi nammoha.