Saweeriwa ti Arummwa

6 Mmahiku yaale, yaaceereryeyaka oohuserya, Ayuta yaale yaaloca Ekiriki yaapacerya waakhupanya yaale yaaloca Ehepiri, woona wi anaamukhwele aya yaanahiiwa okhwipi elukuluku ya okaweliwa yoolya ya nihiku. 2 Hiihaa, arummwa Khumi Napiili yaahaathukumanya oohuserya oothene elocano eriki: “Tahi woophwanelela* wi nihiye masu a Muluku wi nikaweke yoolya. 3 Mwawiihiiha, anna, mwaathanle variyari vanyu alopwana athanu napiili a meecelo aphaama,* oosareya munepa waweela ni miruku nave hiyo nnamwaakawela muteko yoola woochuneya. 4 Nto hiyo, nni nikhale a nthiti mmavekeloni ni mmuteko wa ohusiha masu.” 5 Yeeyo yaaloncaaya yaahakalaliha muloko woothene, nave yaamuthanla Estefanu, mulopwana oosareya nroromelo ni munepa waweela, nave tho Filipi, Porokoro, Nikanori, Timoni, Parmena, ni Nikolawu o Antiyokeya yoowo iiseemerenrye okhala Muyuta. 6 Awo yaahaakeriha wa arummwa, nave emanle waavekelela, yaahaakuherya matata aya.

7 Hiihaa, masu a Muluku yaanatitelela omwaramwaxeya, oohuserya yaanaaceereryeyaxa o Yerusalemu; nave alipa a mukucho ancipale yaahikhala awiiwelela nroromelo.

8 Vano Estefanu, asaren’ye mahala a Muluku ni ikuru, aanapaka sootikhiniha ni ineneeryo itokotoko variyari va muloko. 9 Nto alopwana akina a o Nipuro na Malapelo* nawiichaniwa Ootaphuliwa vamoha ni akina o Sirene ni Alexantriya, akina o Silisiya ni o Asiya, yaarwa wi evaanyihane ni Estefanu. 10 Nyenya awo hiyaawerya ovaanya miruku ni munepa yoowo waamweeriha oloca. 11 Voocharela, moovitheya awo yaahaaceenyerya alopwana akina wi eloce eriki: “Noomwiiwa alocaka masu oomunyemula Mose ni Muluku.” 12 Awo yaahaaceenyerya achu, asitokweene, vamoha ni alipa oorepa wi eye wa yoowo emphare wi emukerihe o Sineetriyu.* 13 Awo yaahaaruuha anamoona awootha, yaawo yaalonce eriki: “Mulopwana ola hanamaalaru oloca moonanara nipuro nla naweela vamoha ni Malamulo. 14 Ntoko yootakiherya, noomwiiwa alocaka wi Yesu yoola Munaasareti, onamunyaanya nipuro nenla nave atoroke sookhovelela seiho Mose oninnyerenryeiye.”

15 Hiihaa, oothene yaawo yaakiranthe mu Sineetriyu* yaananwehaxa, nave yaahoona wi ethoi awe yaari ntoko ethoi ya munkeelo.