Aroma
16 Kinnoosuwelihaani* murokora ahu Fepi, yoowo onarumeela muloko wo Kenkereya, 2 wi mmwaakhele mwa Apwiya mmukhalelo woophwanelela wa aweela murima, nave mmukhaviheryeke mu soothowa sawe soothene, woona wi oowaakiha ancipale, ophitaanyerya yoomi.
3 Mveleele mooni aka wa Priska ni Akila, anamuteko akhwaaka mwa Kristu Yesu, 4 awo yaaleva ekumi* aya ntakhara miyo, nave ohiya yoomiru, nyenya tho miloko soothene variyari va maloko, ninnathamalela. 5 Mveleele tho mooni aka wa muloko yoowo onathukumana vaate vaya. Mooni wa oosiveliwa aka Epenetu, yoowo ori yawiima yoopacerya yo Asiya ntakhara Kristu. 6 Mooni wa Mariya, yoowo onalapa moowetha ntakhara nyuwo. 7 Mooni wa Antroniku ni Yuniya, ahimaaka ni akhwaaka a mukariposo, yaawo ari alopwana oosuweliwa phaama ni arummwa nave ari awiiwanana ni Kristu ovinyerya khalai okipwaha yoomi.
8 Mumvahe mooni aka Ampiliyatu, oosiveliwa aka mwa Apwiya. 9 Mooni wa Urpanu, namuteko mukhwiihu mwa Kristu, vamoha tho ni oosiveliwa aka Estaki. 10 Mooni wa Apelesi, aweemereryiwa ni Kristu. Mooni wa emusi ya Aristopulu. 11 Mooni wa Herotiyanu, mmusi aka. Mooni wa emusi ya Narsisu yaawo ari mwa Apwiya. 12 Mooni wa Trifena ni Trifosa, athiyana yaawo analapa moowetha mwa Apwiya. Mooni wa oosiveliwa aka Persita, tiwi owo onnalapa moowetha mwa Apwiya. 13 Mooni wa Rufu, oothanliwa mwa Apwiya, vamoha ni amama awe yaawo tho ari amamaaka. 14 Mooni wa Asinkritu, Flekonte, Herme, Patropa, Herma, vamoha ni anna ari ni yaawo. 15 Mooni wa Filoloku ni Xuliya, Nerewu ni murokora awe, Olimpa, vamoha ni aweela murima oothene ari ni yaawo. 16 Muvahaneke mooni mukina ni mukhwaawe ni epeexu yaweela. Miloko soothene sa Kristu sinnavonya mooni.
17 Anna, vano kinnoovekaani wi mwaavareryeleke yaale anatannya okawanyeya ni mathowa a okwaculiha evirikanyaka mahusiheryo yaawo muhusenryaanyu; mwaarapele yaawo. 18 Woona wi alopwana siyaawo hari akapuro a Kristu, Apwiya ahu, nto akapuro a soochuna* saya, nave ni masu oolekechalekecha ni awootha, annaahuweliha ale oohikhalano nthowa. 19 Wiiwelela wanyu woosuweliwa ni achu oothene, nave miyo kinnahakalala wanthowa nanyu. Nto kinachuna wi mukhale amiruku vooloca sa yeeyo eri yaphaama, nyenya oohikhalano nthowa vooloca sa yeeyo eri yoonanara. 20 Muluku yoowo onavaha murecele, moohilekela onahaala omuhirimita Satana vathi va inaani sanyu. Mahala matokweene a Apwiya ahu Yesu ekhale ni nyuwo.
21 Timotiyu, namuteko mukhwaaka, onnoovonyeryaani mooni, vamoha tho ni amusi aka Lusiyu, Yasoni, ni Sosipatru.
22 Miyaano Tersiyu, kirempe ekaarata ela, kinnoovonyeryaani mooni mwa Apwiya.
23 Kayu, yoowo okihaihale miyo vamoha ni muloko woothene, onnoovonyeryaani mooni. Erastu namuteko a epooma, onnoovonyeryaani mooni vamoha ni munnawe awiichaniwa Kwartu. 24 *——
25 Muluku onanwerya wootikitheryaani, mwawiiwanana ni michaka saphaama kinalaleyaaka ni olaleerya vooloca sa Yesu Kristu. Muchaka yoola, wohuupululiwa moorweela wa yoovitheya yaweela yeeyo yaavithiwe ovinyerya ilukuluku sakhalai. 26 Nto vano yohuupululiwa ni osuwelihiwa wa maloko oothene moorweela wa Soorempwa sa alipa a miririmu, mwawiiwanana ni nlamulo na Muluku oohimala, wi waaceereryeye wiiwelela wa nroromelo; 27 wa Muluku, yooworu ori amiruku, acicimihiwe moorweela wa Yesu Kristu okhala wookhala. Aamen.