Yupu
9 Yupu aahaakhula ariki:
2 “Eparipari, koosuwela wi ti hiihaa.
Ti mwawiihai muchu oneereiye aloce wi owo tawookololowa murima vamiithoni va Muluku?
3 Wakhala wi muchu onnachuna ovaanyihana ni Yoowo*
Muchu yoowo hawerya waakhula naari mano nikoho nimoha wa makoho ncikhwi nimoha Owo oneereiye ampakele.
4 Owo ookhalano murima wa miruku ni ikuru itokweene.
Taani onawerya okhoma ni yoowo, akhala mmureceleni?
5 Owo onnathaamiha* miyaako ahikhanle onasuwela;
Owo ananariwa, onnapwexa seiho.
6 Owo onnacikinya elapo nave aviihavo vanipuroni vaya,
Hiihaa, apoco aya annathukumela.
7 Owo onnalamulela nsuwa wi nihaarye,
Nave onnawalela omwaleela wa itheneeri;
8 Owo onnaatalela erimu meekheiye,
Nave onneeca vasulu va macumuxa matokweene a mphareya.
9 Owo oopaka makhuuru* a itheneeri aniichaniwa Aaxi,* Kesili* ni Kima,*
Vamoha ni makhuuru a itheneeri a weiwo onakhumawo echeku ya murupi.
10 Owo onnapaka ichu itokotoko ni sawiixeela,
Ichu sootikhiniha ni soohaalakhanyeya.
11 Owo onnavira vamiithoni vaka nave nkiinawerya omoona;
Onnavira vakhiviru vaka, nto kihisuwela.
12 Vaavaa owo onakuxeiye echu, taani onawerya omuhiiha?
Taani onawerya oloca wa yoowo: ‘Tiheeni oneeraawe?’
13 Muluku ananariwa hanakookela muculi;
Ophiyerya tho akhaviheryi a Rapi* annakokhora vamiithoni vawe.
14 Vano hankanto miyaano kaachunaka omwaakhula yoowo;
Kinnaphwanela othanlela phaama masu aka wi kiloce ni yoowo!
15 Naamwi kaarino rasau, nkaahaala omwaakhula,
Pahiru kaahaala oveka wi kimoreliwe ikharari ni muthoriha aka.*
16 Wakhala wi koomwiichana, apwanne onahaala okaakhula?
Nkinaroromela wi onahaala okiiwa,
17 Tiwi, owo onnakinyaanya ni echeku yoowali
Nave onnaaceererya makhwaca aka ohirivo nthowa.
18 Owo hanakihiyaru wi kimumule;
Nave onnakisareiha ni ichu soowaawa.
19 Wakhala mwaha vooloca sa owerya, owo takuru.
Wakhala mwaha vooloca sa ekhaikhai, owo oni: ‘Taani onawerya okiichana wi akikohakohe?’
20 Waakhanle wi kookhalano rasawu, eyano aka yaahaala okithoriha;
Naamwi kititelenle okhala awookololowa murima,* owo onahaala okiphwanyerya nthowa.*
21 Naamwi kititelenle okhala awookololowa murima, nkinasuwela yeeyo eni yeereye;
Kinnathanya okumi aka.
22 Hiwaavo ohiyana. Ti nthowa nene kinalocaaka kiriki:
‘Owo onnaatoloxa oohikhalano nthowa hiihaa ntoko amutakhali.’
23 Woomwi osareya wa maahi woowiipha achu mootutuxa,
Owo aahaala waatheya achu ahirino nthowa, vawoona wi hiyaanono ewehereryo.
24 Elapo yooveleeliwa mmatani mwa amutakhali;
Owo onnawala miitho a* athoriha.
Waakhanle wi tahi yoowo, vano taani?
25 Vano, mahiku aka annavira mwawaakuveya ompwaha mulipa oochimaka;
Annachawa ehoonne yeeyo eri yaphaama.
26 Annavira ntoko amwaaceya ooveya anapakiwa ni echeere,
Ntoko inaka iniihiya wi ephare echu.
27 Wakhala wi kooloca: ‘Kinamucuwala wiikhupanyerya waka,
Kinamuhiya othanana waka nave kikhale oohakalala,’
28 Nlelo kaamukhala awoova wa nthowa na sawiicela saka soothene,
Nave koosuwela wi himwaahaala okeera muchu oohikhalano nthowa.
29 Kaahaala ophwanyeryiwa nthowa.*
Vano ntakhara heeni wiilipixerya siiyo ene?
30 Wakhala wi kohiirapiha ni maahi a mucharapo,
Nave keeliha mata aka ni sapau,
31 Nyuwo mwaahaala okipwiniha vancokwini,
Nave hiiha, ikuwo saka saahaala okhala soothanyeya wa miyaano.
32 Tiwi, Muluku tahi muchu ntoko miyo wi kimwaakhule,
Wi niye o nipuro na othoriha vamoha.
34 Waakhanle wi oohiya okimana,*
Ni oheeriha wi okoopopiha wawe okeerihe omoova,
35 Kaamuloca ni yoowo kihoovaka,
Tiwi, nkikhovelenle oloca koovaka.