1 Yohani

1 Yeeyo yaari ovinyerya woopaceryani, yeeyo niiwalaahu, yeeyo nonnaahu ni miitho ahu, yeeyo nivarenryaahu nave niphanraahu ni mata ahu, vooloca sa nsu na okumi, 2 (aa, okumi waahooneihiwa, nave hiyo naahoona nave ninneerela onamoona ni olokoha wa nyuwo sa okumi woohimala yoowo waari ni Atiithi nave wooneihiwa wa hiyo), 3 nenlo nonnaahu nave niiwalaahu ninnalokoha tho wa nyuwo, wi nyuwo tho mukhale mwawiiwanana* ni hiyo. Nave hiyo nri mwawiiwanana ni Atiithi vamoha ni Mwanaya, Yesu Kristu. 4 Hiyo ninnoorepelaani ichu seiha wi ohakalala wahu waakhwanele.

5 Ola muchaka niiwalaahu wa yoowo nave nnalokohaahu wa nyuwo: Muluku ti omwaleela, nave mwa yoowo* hiwaamo epiiphi. 6 Wakhala wi nooloca: “Hiyaano nri mwawiiwanana* ni yoowo,” nto ntitelela weeca mu epiiphi, nri alipa a wootha nave hannachariha eparipari. 7 Nyenya wakhala wi ninneeca mu omwaleela hiiha ntoko owo oreiye mu omwaleela, nri awiiwanana* mukina ni mukhwaawe, nave nikhami na mwanawe, Yesu, ninnanrapiha wa yoocheka yoothene.

8 Wakhala wi nooloca: “Hinaano yoocheka,” nniiwoka hiyo aneene nave eparipari heri mwa hiyo. 9 Wakhala wi noolokoha soocheka sahu, owo toororomeleya ni awookololowa wi anilevelele wa soocheka sahu nave anrapihe wa soohookololowa soothene. 10 Wakhala wi nooloca: “Hiyaano hanchenke,” ninnamweera Muluku mulipa a wootha, nave masu awe hari mwa hiyo.